“Pagdumala sa Teknolohiya: ‘Mag-amping Kita ug Dili Magpasagad sa Paggamit sa Teknolohiya,’” Manwal sa Magtutudlo sa Seminary sa Daang Tugon (2026)
“Pagdumala sa Teknolohiya: ‘Mag-amping Kita ug Dili Magpasagad sa Paggamit sa Teknolohiya,’” Manwal sa Magtutudlo sa Seminary sa Daang Tugon
Alang sa Kalig-on sa mga Kabatan-onan: Paghimo og mga Pagpili: Leksiyon 174
Pagdumala sa Teknolohiya
“Mag-amping Kita ug Dili Magpasagad sa Paggamit sa Teknolohiya”
Usahay mas sayon ang mahimong kaswal kay sa magmanhunahunaon ug adunay piho nga katuyoan kon maggamit sa teknolohiya. Kon mag-amping kita ug adunay tumong sa paggamit niini, pwedeng himoon sa Ginoo nga panalangin ang teknolohiya para nato ug sa uban. Kini nga leksiyon makatabang sa mga estudyante sa paggamit sa mga pagtulun-an ni Jesukristo aron susihon ang ilang paggamit sa teknolohiya.
Pagpangandam sa estudyante: Dapita ang mga estudyante sa paghunahuna bahin sa paggamit sa teknolohiya ug sa posibleng mga epekto niini ngadto sa ilang kaugalingon ug sa uban. Aron matabangan bahin niini, pwedeng tan-awon sa mga estudyante ang ilang mga device para sa setting o application nga nagpakita kon unsa kadugay gigamit ang device o ang mga application.
Posibleng mga Kalihokan sa Pagkat-on
Mga desisyon bahin sa paggamit sa teknolohiya
Ikonsiderar ang pagdrowing og hulagway sa usa ka tawo nga nagtindog sa tunga sa nagsanga nga mga dalan.
-
Unsa ang lainlaing paagi sa paggamit sa mga kabatan-onan sa teknolohiya karon?
Ipakigbahin tingali sa mga estudyante ang mga paggamit nga sama sa pagpakig-istorya sa uban, pagtuon sa mga kasulatan, kalingawan, pagtan-aw sa social media, ug paghimo og homework. Samtang tubagon sa mga estudyante ang pangutana, pwede kang maghimog listahan o butangan og label ang mga dalan diha sa pisara gamit ang mga tubag sa mga estudyante. Kini nga listahan makatabang unya sa mga estudyante sa ulahing bahin sa leksiyon.
-
Sa unsang paagi kita masayod kon unsa ang angay o dili angay nga paggamit sa teknolohiya?
Sama niini nga tawo nga daghang dalan nga kapilian, maglisod tingali kita sa paghimo og maayong desisyon bahin kon unsaon nato sa paggamit sa teknolohiya.
Basaha ang mosunod nga mga bersikulo, nga pangitaon kon sa unsang paagi kita giyahan sa Ginoo sa atong paghimo og desisyon.
-
Exodo 13:21–22
-
Salmo 119:105
-
Isaias 2:3, 5
Pwede nimong dapiton ang mga estudyante nga ipakigbahin kon unsay ilang idugang sa drowing ug kon ngano. Pwede silang magdugang og lampara, gilis sa panganod o kalayo, o mga kasulatan diha sa drowing sa sinugdanan sa mga dalan.
-
Unsaon nimo pag-summarize niini nga mga pagtulun-an sa usa lang ka kapahayag?
Tabangi ang mga estudyante nga mailhan ang kamatuoran nga sama sa nagtagana og tabang ang Ginoo aron giyahan kita sa atong mga kinabuhi.
-
Sa unsang mga paagi kita magiyahan sa Ginoo ug sa Iyang mga pagtulun-an sa paghimo og mga desisyon bahin sa kon unsaon nato paggamit ang teknolohiya?
Paggahin og panahon ug ikonsiderar kon giunsa nimo paggamit ang teknolohiya ug kon unsay naggiya nimo karon sa paggamit niini. Samtang magtuon ka karon, hatagi og pagtagad ang mga pag-aghat sa Espiritu.
Pagdumala sa teknolohiya
Ang Simabahan naghimo og kapanguhaan para sa kabatan-onan nga gitawag og Pagdumala sa Teknolohiya. Makatabang nato ang tulo ka importateng baroganan niini aron makahimo og mas maayong desisyon bahin sa atong paggamit sa teknolohiya.
-
Katuyoan. Makagamit ko sa teknolohiya nga adunay katuyoan. Wala kini magkontrolar kanako.
-
Plano. Kon magplano ko daan, mas maayo ang akong bation ug makahimo og mas maayong mga pagpili.
-
Hunong kadali. Okey ra nako nga mohunong kadali ug mopahulay una.
Kon makatabang, pwede nimong i-refer sa mga estudyante ang drowing diha sa pisara ug ipangutana kon sa unsang paagi kining tulo ka baroganan makatabang sa indibidwal diha sa drowing sa paghimog mas maayong mga desisyon bahin sa ilang paggamit sa teknolohiya.
Bisan kon importante ang tanang tulo ka baroganan, magpunting ang nahibiling bahin sa leksiyon sa pagbaton og katuyoan. Aron tabangan ang mga estudyante bahin sa pagbaton og katuyoan sa paggamit og teknolohiya, ikonsiderar ang pagpangutana og sama sa mosunod.
-
Sa imong hunahuna, sa unsang paagi nga gusto sa Ginoo nga gamiton nimo ang teknolohiya?
Paggamit sa teknolohiya nga may katuyoan
Aron tabangan kitang mogamit og teknolohiya nga naay katuyoan, pwede kitang modangop sa Ginoo ug sa Iyang tambag nga anaa sa kasulatan ug sa mga pulong sa Iyang mga propeta. Base sa mga pagtulun-an sa Ginoo, makahimo kita og mga pangutana aron masusi ang atong paggamit sa teknolohiya ug matabangan kita nga makabaton og katuyoan.
Ipakita ang mosunod nga mga instruksiyon ug dapita ang mga estudyante nga kompletohon ang duha sa lakang nga nag-inusara o uban sa gagmayng grupo. Kon makabenepisyo ang mga estudyante gikan sa usa ka ehemplo kon unsaon kini paghimo, ikonsiderar ang pagbasa sa usa sa mga kasulatan gikan sa unang lakang uban sa klase. Pwede usab nimong ipakita ang mga pangutana nga pang-aghat, sama sa mosunod, aron tabangan ang mga estudyante nga makita kon unsa kini nga mga pangutanaha.
-
Ang paggamit ba sa teknolohiya sa ingon niini nga paagi …?
-
Nakabalda ba ang akong paggamit sa teknolohiya sa …?
Makita usab ang mga pangutana nga posible nilang mahimo nga makita human sa mga instruksiyon para sa kalihokan.
Pagpraktis sa paghimog mga pangutana nga makapamalandong nga gibase sa mga pagtulun-an sa Ginoo.
-
Basaha ang usa sa mosunod nga mga kasulatan. Gamita ang imong nakat-onan sa paghimog pangutana nga makatabang nato sa pagbaton og katuyoan ug sa pagpamalandong sa atong paggamit sa teknolohiya.
Isaias 55:2; 2 Nephi 9:51
Mateo 22:36–39
-
Basaha ang usa sa upat ka parapo ilawom sa ulohan nga “Mga pagdapit” sa seksiyon nga “Magkinabuhi sa kahayag sa Dios” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Gamita ang imong nakat-onan sa paghimog pangutana nga makatabang nato sa pagbaton og katuyoan ug sa pagpamalandong sa atong paggamit sa teknolohiya.
Ikonsiderar ang pagdapit sa mga estudyante nga isulat sa pisara ang mga pangutana nga ilang gihimo o diha sa usa ka papel ug i-post kini diha sa mga bungbong palibot sa lawak. Ania ang pipila ka ehemplo sa mga pangutana nga himoon tingali sa mga estudyante:
-
Ang paggamit ba sa teknolohiya niining paagiha makapatagbaw nako o mobati na hinuon ko og kahaw-ang? (Isaias 55:2; 2 Nephi 9:51)
-
Nakabalda ba ang akong paggamit sa teknolohiya sa pagpakitag gugma ngadto sa Dios o sa uban? (Mateo 22:36–39)
-
Ang paggamit ba sa teknolohiya niining paagiha moresulta sa akong pagkasina sa uban ug pagkompara sa akong kaugalingon sa uban? (Moroni 7:45)
-
Unsaon nako paggamit sa teknolohiya sa paagi nga makahatag og dugang kahayag sa akong kinabuhi? (Doktrina ug mga Pakigsaad 50:23–25)
-
Kini ba nga paggamit sa teknolohiya makaugmad sa kahigal nga mga tinguha? (Doktrina ug mga Pakigsaad 63:16)
-
Ang ako bang paggamit sa teknolohiya makatabang o makadaot sa akong relasyon sa uban? (“Magkinabuhi sa kahayag sa Dios,” Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 19)
Dapita ang pipila ka estudyante o grupo nga ipakigbahin ang ilang nabasa nga mitultol sa ilang mga pangutana.
-
Sa unsang paagi ang paggamit sa mga pagtulun-an sa Ginoo niining paagiha motabang nato sa pagbaton og katuyoan sa atong paggamit sa teknolohiya?
Pagpraktis
Ang mosunod nga kalihokan motabang sa mga estudyante nga gamiton ang mga pangutana nga ilang gihimo aron susihon ang ilang kaugalingong paggamit sa teknolohiya.
Kon gipapilit sa mga estudyante ang ilang mga pangutana sa palibot sa lawak, dapita ang mga estudyante nga motindog ug liboton ang mga pangutana aron kompletohon ang kalihokan.
Sa imong journal sa pagtuon, ilista ang pipila ka paagi sa imong paggamit sa teknolohiya. Gamit ang mga pangutana nga gihimo nimo ug sa imong mga classmate, timbang-timbanga ang kaugalingon nimong paggamit sa teknolohiya. Hunahunaa ang mga butang diin maayo ka o kon diin ka kinahanglang palamboon. Isulat ang bisan unsang impresyon nga tingali imong madawat gikan sa Espiritu Santo.
Pwedeng ipakigbahin sa andam nga mga estudyante ang ilang nakat-onan. Kon makatabang, pwede nimong ipakigbahin ang mosunod nga pamahayag.
Si Elder Peter M. Johnson sa Seventy mitudlo sa mosunod bahin sa kon sa unsang paagi ang atong paggamit sa teknolohiya makakonektar nato sa Ginoo ug sa Iyang gahom.
Kining mga pag-abante sa teknolohiya makatingala, apan kon dili ta mag-amping, kini makapabalda kanato sa pagkab-ot sa atong balaang potensyal. Ang paggamit niini sa tukmang paagi magdala og gahum sa langit. …
Magmainampingon kita ug dili magpasagad sa atong paggamit sa teknolohiya. Ipadayon ang pagpangita og mga paagi nga ang teknolohiya makapaduol nato sa Manluluwas aron makatuman sa Iyang buhat samtang mag-andam kita sa Iyang Ikaduhang Pag-anhi. (“Gahum sa Pagbuntog sa Kaaway,” Liahona, Nob. 2019, 111)
Pahinumdomi ang mga estudyante nga panalanginan ug palig-onon sila sa Manluluwas samtang sila molihok uyon sa bisan unsang impresyon nga ilang nadawat karon (tan-awa ang Salmo 29:11).