“Ang Atong Balaanong Pagkatawo ug Katuyoan: Ako Anak sa Dios,” Manwal sa Magtutudlo sa Seminary sa Daang Tugon (2026)
“Ang Atong Balaanong Pagkatawo ug Katuyoan: Ako Anak sa Dios,” Manwal sa Magtutudlo sa Seminary sa Daang Tugon
Alang sa Kalig-on sa mga Kabatan-onan: Paghimo og mga Pagpili: Leksiyon 173
Ang Atong Balaanong Pagkatawo ug Katuyoan
Ako Anak sa Dios
Ang young women sa Simbahan sa tibuok kalibotan mipahayag, “Ako usa ka hinigugmang anak nga babaye sa langitnong mga ginikanan, nga adunay diosnong kinaiya ug mahangtorong padulngan.” (“Tema sa Young Women”). Ang young men mipahayag, “Ako hinigugmang anak nga lalaki sa Dios, ug Siya adunay ipabuhat kanako.” (“Tema sa Korum sa Aaronic nga Pagkapari”). Kini nga leksiyon mohatag sa mga estudyante sa kahigayonan nga pamalandongan ang ilang balaanong pagkatawo ug katuyoan.
Pagpangandam sa estudyante: Dapita ang mga estudyante sa pagpamalandong sa unang linya sa “Tema sa Young Women” o “Tema sa Korum sa Aaronic nga Pagkapari.” Pwede nila kining sulayan sa pagmemorya o pag-recite og kadaghan sa tibuok adlaw. Pwede nga ipakigbahin sa mga estudyante kon sa unsang paagi ang paghimo niini makaimpluwensiya sa ilang mga kinaiya og binuhatan.
Posibleng mga Kalihokan sa Pagkat-on
Ako usa ka anak sa Dios!
Ang sinugdanan niini nga kurso sa seminary naglakip sa daghang leksiyon gikan sa Daang Tugon nga naghisgot sa atong balaang pagkatawo ug katuyoan. Pananglitan, Leksiyon 3: “Abraham 3,” Leksiyon 4: “Moises 1:1–11,” Leksiyon 5: “Moises 1:12–26,” ug Leksiyon 8: “Genesis 1:26–27.” Rebyohon niini nga leksiyon ang mga kamatuoran bahin sa balaanong pagkatawo gikan ubang mga leksiyon sa Daang Tugon. Mahimo tingali kini nga usa ka rebyo kon natun-an na sa mga estudyante kini nga mga leksiyon o mahimong preview kon ila kining tun-an sa umaabot diha sa seminary.
Ikonsiderar ang pagsugod sa klase pinaagi sa pagpakita sa mga estudyante og usa ka samin. Dapita sila sa paghisgot sa mosunod nga mga pangutana uban sa ilang kapares:
-
Kapila ka motan-aw sa samin sa tibuok adlaw?
-
Unsay sagad nimong hunahunaon samtang magtan-aw sa imong kaugalingon sa samin?
Ikonsiderar ang paghatag sa mga estudyante og kopya sa mosunod nga pamahayag:
Gisulti ni Elder Gary E. Stevenson sa Korum sa Napulog Duha ka Apostoles ang mosunod ingon nga pagdapit sa kabatan-onan:
Kadaghanan ninyo magsugod sa inyong adlaw pinaagi sa pagbarog sa samin. Ugma, niining semanaha, niining tuiga, sa kanunay, hunong kon motan-aw kamo sa inyong kaugalingon sa samin. Hunahunaa sa inyong kaugalingon, o isulti og kusog kon gusto ninyo, “Wow, tan-awa ko! Talagsaon ako! Ako usa ka anak sa Dios! Siya nakaila kanako! Siya nahigugma kanako!” (“Mga Pag-aghat sa Espiritu,” Liahona, Nob. 2023, 45)
Aron mahatagan og gibug-aton ang pagdapit ni Elder Stevenson, pwede nimong dapiton ang mga estudyante nga motindog ug dungan nga isulti ang iyang pamahayag sugod sa “Wow, tan-awa ko!”
Hatagi og panahon ang mga estudyante sa pagpamalandong sa mosunod:
-
Gibati ba ninyo nga tinuod ang pamahayag ni Elder Stevenson bahin ninyo? Ngano o nganong dili?
Samtang imong tun-an ang mga tudling sa kasulatan niini nga leksiyon, pamalandonga kon sa unsang paagi kini may kalabotan kaninyo. Samtang inyo nang buhaton, makatabang ang Espiritu Santo aron mapamatud-an o mas modako ang inyong kompiyansa bahin sa inyong balaang pagkatawo ug katuyoan.
Usa ka ehemplo gikan sa mga kasulatan
Ikonsiderar ang pagdrowing sa mosunod nga tsart diha sa pisara ug dapita ang mga estudyante sa pagkopya niini ngadto sa ilang journal sa pagtuon. Pwede nimong kuhaan ang gidaghanon sa mga tudling sa kasulatan nga tun-an sa mga estudyante sigon sa mga panginahanglan sa imong mga estudyante o sa nahibiling oras sa klase.
Daghan kita og makat-onan bahin sa atong balaang pagkatawo ug katuyoan gikan sa mga kasinatian ug pagtulun-an sa mga tawo diha sa Daang Tugon. Bisan og daghan niini nga mga tudling mao ang mahitungod sa mga tawo sa Daang Tugon, magamit gihapon kanato ang mga kamatuoran.
Sa dili pa sugdan sa mga estudyante ang pagtuon niini nga mga tudling, makatabang tingali ang dungang nga pagtuon sa usa ka tudling. Ang mosunod maoy usa ka paagi nga mahimo nimo kini.
Basaha ang Moises 1:3, 6, 12–13 ug pangitaa ang kalainan nga nahimo ngadto ni Moises dihang nasayod nga siya anak sa Dios.
-
Unsay imong nakaplagan?
Ipakigbahin tingali sa mga estudyante ang mga kamatuoran nga sama sa Ako anak sa Dios ug Siya adunay ipabuhat kanako o ang pagkasayod nga ako anak sa Dios makatabang nako nga mabuntog ang mga tentasyon. Diha sa pisara, pagdrowing og mga arrow gikan sa Moises 1:3, 6, 12–13 paingon sa bag-ong mga lingin. Isulat niini nga bag-ong mga lingin ang mga kamatuoran o uban pa nga nailhan sa mga estudyante. Pwedeng dapiton ang mga estudyante nga mao usab kini ang himoon diha sa ilang mga journal sa pagtuon.
Kon makabenepisyo ang mga estudyante sa dugang panaghisgot bahin niini nga mga kamatuoran, ikonsiderar ang paggamit sa materyal gikan sa Leksiyon 4: “Moises 1–11” ug Leksiyon 5: “Moises 1:12–26.”
-
Sa unsang paagi ang pagkahibalo niini nga mga kamatuoran nakapausab sa imong kinabuhi (o sa unsang paagi kini makapausab)?
-
Unsa kahay pipila sa mga buluhaton nga ipabuhat sa Dios kanimo?
Pagtuon ug panaghisgot sa estudyante
Ikonsiderar ang pagparespares sa mga estudyante o pagbahin nila sa gagmayng grupo ug ang paghatag sa mga instruksiyon sa ubos. Pwede nimong ipahaom ang mga instruksiyon sumala sa nahibiling oras sa klase.
Timan-i: Pwede nimong dapiton ang mga estudyante nga mobasa sa Genesis 1:26–27 sa pagtan-aw usab sa ikaduhang parapo sa “Ang Pamilya: Usa ka Pamahayag ngadto sa Kalibotan” alang sa dugang panglantaw. Kon dili pamilyar ang mga estudyante sa istorya ni Rayna Ester, ikonsiderar ang pagpasabot nga usa siya ka Judeo sa Persia nga girisgo ang iyang kinabuhi aron luwason ang katawhan sa Ginoo gikan sa pagkamatay.
-
Basaha ang tulo o kapin pa sa nahibiling mga tudling sa kasulatan diha sa tsart.
-
Diha sa tsart sa imong journal sa pagtuon, pagdrowing og mga arrow gikan sa kada kasulatan nga imong basahon. Pagdrowing og bag-ong mga lingin sa tumoy niini nga mga arrow.
-
Sulod sa maong bag-ong mga lingin, isulat kon unsay gitudlo sa kasulatan bahin sa imong balaang pagkatawo o katuyoan.
-
Hisgoti uban sa imong grupo kon sa unsang paagi kini nga mga pagtulun-an nakaapektar sa imong kinabuhi o sa unsang paagi kini posibleng makahimo og kalainan.
Dihang mahuman na ang mga estudyante, pwede nimo silang dapiton nga magdugang og pipila ka kamatuoran nga ilang nakat-onan diha sa tsart sa pisara.
Gilista sa ubos ang mga kamatuoran nga nailhan tingali sa mga estudyante, uban sa mga leksiyon niini.
Abraham 3:22–23. Nagpuyo ako kauban sa Langitnong Amahan ingon nga usa sa Iyang espiritu nga mga anak sa wala pa ko matawo. Tan-awa ang Leksiyon 3: “Abraham 3.”
Abraham 3:24–26. Gipadala ako sa yuta aron makita kon motuman ba ko sa mga sugo sa Dios.
Genesis 1:26–27. Ako anak sa langitnong mga ginikanan, nga gilalang sa ilang imahe. Tan-awa ang Leksiyon 8: “Genesis 1:26–27.” Tan-awa usab sa ikaduhang parapo sa “Ang Pamilya: Usa ka Pamahayag ngadto sa Kalibotan.”
Ester 4:14. Ang Langitnong Amahan mibutang kanako sa mga sitwasyon diin makatabang ko sa pagtuman sa Iyang buluhaton. Tan-awa ang Leksiyon 94: “Ester Bahin 1.”
Salmo 82:6. Ako anak sa Dios ug ako adunay potensiyal nga mahimong sama Niya.
Jeremias 1:5. Sa wala pa ko matawo, nakaila na ang Ginoo kanako ug gihatagan ako og pihong mga responsibilidad nga buhaton sa mortalidad. Tan-awa ang Leksiyon 130: “Jeremias 1.”
Malaquias 2:10. Kitang tanan anak sa Dios ug kinahanglang mabinationg motratar sa usag usa.
Pwede kang mopili og pipila sa mga pamahayag nga gisulat sa mga estudyante diha sa pisara ug hisgotan kini gamit ang materyal gikan sa katugbang nga leksiyon. Tan-awa ang kataposan niini nga leksiyon para sa kompletong bersiyon sa graphic. O pwede kang mangutana og usa o sobra pang mga pangutana nga sama sa mosunod:
-
Sa imong hunahuna, nganong importanteng mahibaloan kini nga kamatuoran?
-
Unsang mga kasinatian ang nakatabang kanimo sa pagtuo nga tinuod kini?
-
Sa unsang paagi ang pagkahibalo sa balaanong pagkatawo ug katuyoan sa uban makaimpluwensiya sa pamaagi sa imong pagtratar nila?
Pwede nimong ipakita kini nga pamahayag ingon nga bahin sa panaghisgot sa nag-unang pangutana:
Gihangyo kita ni Presidente Russell M. Nelson nga tahoron ang tanang anak sa Dios dihang siya miingon:
Ang matag usa kanato adunay balaanong potensiyal tungod kay ang matag usa anak sa Dios. Ang matag usa managsama diha sa Iyang panan-aw. Ang mga implikasyon niini nga kamatuoran lawom kaayo. Mga kaigsoonan, palihog paminaw og maayo sa unsay akong isulti. Ang Dios wala magmahal sa usa ka kaliwat nga labaw kay sa lain. Ang Iyang doktrina mahitungod niini klaro. Siya nagdapit sa tanan nga moduol ngadto Kaniya, “itom ug puti, ulipon ug gawasnon, lalaki ug babaye.” [2 Nephi 26:33].
Akong iseguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagpabor o wala pagpabor sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit.
Naguol ko nga ang atong Itom nga mga kaigsoonan sa tibuok kalibutan nag-antus sa mga kasakit sa diskriminasyon ug pagkamapihigon. Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon. Mohangyo ako kaninyo sa pag-awhag og respeto sa tanang anak sa Dios.
Ang pangutana alang sa matag usa kanato, bisan unsa pa ang kaliwatan, managsama. Andam ba kamo nga ipatigbabaw ang Dios labaw sa tanan diha sa inyong kinabuhi? (“Ipatigbabaw ang Dios Labaw sa Tanan,” Liahona, Nob. 2020, 94)
Panapos
Handurawa nga samtang mobiya ka na sa seminary, miingon ang usa ka estudyante: “Dili kaayo ko segurado sa atong nakat-onan karon. Mituo ba gyod ka adtong bahin sa atong balaanong pagkatawo ug katuyoan?”
Pamalandongi ang mga butang nga imong nakat-onan ug gibati. Sa imong journal sa pagtuon, pagsulat og mubong tubag nga pwede nimong ipakigbahin sa imong higala.
Dapita ang pipila ka estudyante sa pagpakigbahin kon unsay ilang gisulat. Dasiga ang mga estudyante nga ibutang sa samin nga kanunay nilang gigamit ang pamahayag ni Elder Stevenson, aron masunod nila ang iyang pagdapit. Ang mosunod nga imahe mohatag og pipila ka ideya kon unsay hitsura sa kompletong tsart human ang mga estudyante matapos sa kalihokan sa pagtuon.