“Alang sa Kalig-on sa mga Kabatan-onan: Pagkonektar sa Atong mga Pagpili ngadto ni Kristo,” Manwal sa Magtutudlo sa Seminary sa Daang Tugon (2026)
“Alang sa Kalig-on sa mga Kabatan-onan: Pagkonektar sa Atong mga Pagpili ngadto ni Kristo,” Manwal sa Magtutudlo sa Seminary sa Daang Tugon
Alang sa Kalig-on sa mga Kabatan-onan: Paghimo og mga Pagpili: Leksiyon 171
Giya sa Alang sa Kalig-on sa mga Kabatan-onan
Pagkonektar sa Atong mga Pagpili ngadto ni Kristo
Sa tibuok natong kinabuhi, kanunay kitang mohimo og mga pagpili. Kon kita mobati nga nabug-atan mahitungod sa paghimo og husto nga mga desisyon, si Jesukristo ug ang Iyang doktrina mohatag nato og kalig-on ug giya. Usa sa atong kadangpan ang Alang sa Kalig-on sa mga Kabatan-onan: Usa ka Giya sa Paghimo og mga Pagpili aron makaplagan ang mga kamatuoran bahin ni Jesukristo ug sa Iyang doktrina. Kini nga leksiyon makatabang sa mga estudyante sa pagpraktis gamit ang Alang sa Kalig-on sa mga Kabatan-onan, basahon nga giya sa paghimo onig dinasig nga mga pagpili base Jesukristo ug sa Iyang doktrina.
Pagpangandam sa estudyante: Dapita ang mga estudyante nga rebyohon ang napili nilang seksiyon diha sa Alang sa Kalig-on sa mga Kabatan-onan. Pwedeng ikonsiderar sa mga estudyante kon sa unsang paagi ang mga pagtulun-an ni Jesukristo sa maong seksiyon makatabang nila sa paghimo og dinasig nga mga desisyon.
Posibleng mga Kalihokan sa Pagkat-on
Si Jesukristo ang akong bato
Sa dili pa sugdan ang leksiyon, hatagig kopya ang mga estudyante sa Alang sa Kalig-on sa mga Kabatan-onan: Usa ka Giya sa Paghimo og mga Pagpili o tabangi sila sa pagpangita sa elektronikong kopya diha sa Librarya sa Ebanghelyo.
Ikonsiderar ang pagsugod sa klase pinaagi sa pagpakita og hulagway sa usa ka parola panahon sa bagyo.
-
Unsa ang pipila ka mga baroganan sa ebanghelyo ang pwede nimong itudlo sa usa ka tawo pinaagi niini nga hulagway?
Kon nagkinahanglan og tabang ang mga estudyante, pwede nimo silang pangutan-on kon unsay girepresentaran sa bagyo o bato kon ang parola nagrepresentar sa atong kinabuhi. Pwedeng ipakigbahin sa mga estudyante ang lainlaing mga baroganan. Pasalamati sila sa pagtampo sa panaghisgot.
Basaha ang Salmo 62:5–7, nga pangitaon kon sa unsang paagi nalangkit ngadto sa parola ang mga pulong niini nga salmo.
-
Nganong maayong gamiton ang bato sa paghulagway ni Jesukristo?
Basaha ang mosunod nga pamahayag gikan ni Elder Dieter F. Uchtdorf sa Korum sa Napulog Duha ka Apostoles, nga mangita kon sa unsang paagi nato mahimong bato si Jesukristo.
Matag higayon nga mohimo kamo og usa ka matarong nga pagpili base sa mahangtoron nga mga kamatuoran sa Manluluwas, kamo nagpakita nga gusto ninyo nga maanaa Siya sa inyong kinabuhi. Kadto nga mga pagpili moabli sa mga ganghaan sa langit, ug ang Iyang kalig-on moabot nga ibubo diha sa inyong kinabuhi. …
… Sa samang paagi, samtang kita magtukod sa atong mga kinabuhi, importante ang paghimo og maayo nga mga pagpili. Ug importante ang pagsabot sa mahangtoron nga kamatuoran sa Manluluwas. Apan ang kalig-on nga atong kinahanglanon sa pagsugakod sa mga unos sa kinabuhi moabot kon kita mokonektar sa atong mga pagpili ngadto kang Jesukristo ug sa Iyang doktrina. Mao kana ang matabang sa Alang sa Kalig-on sa mga Kabatan-onan nga atong buhaton. (“Alang sa Kalig-on sa mga Kabatan-onan: Ang Mensahe sa Manluluwas alang Kaninyo,” Alang sa Kalig-on sa mga Kabatan-onan, Marso 2024, 38)
-
Unsay atong makat-onan gikan kang Elder Uchtdorf?
Samtang makigbahin ang mga estudyante, tabangi silang mailhan ang usa ka kamatuoran nga sama niini: makadawat kita og kalig-on gikan ni Jesukristo kon atong ikonekta ang atong mga pagpili ngadto Kaniya ug sa Iyang doktrina. Pwede nimong isulat kini nga kamatuoran diha sa pisara.
-
Sa inyong hunahuna, unsay ipasabot sa pagkolekta sa atong mga pagpili ngadto ni Jesukristo ug sa Iyang doktrina?
Pwedeng ipakigbahin sa mga estudyante ang mga butang nga sama sa pagsunod sa ehemplo ni Jesukristo, paghimo og mga pagpili base sa Iyang mga pagtulun-an, o pag-ampo alang sa giya gikan sa Langitnong Amahan samtang naghimog mga desisyon.
Seguroa nga nasabtan sa mga estudyate nga ang Alang sa Kalig-on sa mga Kabatan-onan: Usa ka Giya sa Paghimo og mga Pagpili mao ang usa ka himan nga makatabang nato nga makonekta ang atong mga pagpili ngadto ni Jesukristo.
Pwede usab nimong ipakigbahin ang mosunod nga pananglitan gikan ni Elder Uchtdorf.
Gipasabot ni Elder Uchtdorf kon unsa kaha ang pagkonekta sa atong mga pagpili ngadto ni Jesukristo ug sa Iyang doktrina.
Ang inyong mga higala tingali nasayod nga dili kamo mangopya o mamakak ug nga giseryoso ninyo ang edukasyon. Apan nasayod ba sila nga kini tungod kay si Jesukristo mitudlo nga “ang kamatuoran maghatag kaninyog kagawasan”? [Juan 8:32; “Ang kamatuoran maghatag kaninyog kagawasan,” Alang sa Kalig-on sa mga Kabatan-onan, Marso 2024, 30]. (“Alang sa Kalig-on sa mga Kabatan-onan: Ang Mensahe sa Manluluwas alang Kaninyo,” Alang sa Kalig-on sa mga Kabatan-onan, Marso 2024, 38)
-
Sa unsang paagi ang pagkonektar sa atong mga pagpili ngadto ni Jesukristomopalig-on nato nga makabarog sa mga bagyo sa kinabuhi?
Paghunahuna og usa ka sitwasyon nga imong giatubang sa pagkakaron, o gidahom nga atubangon sa umaabot, nga tingali kinahanglan kamong mohimog lisod nga mga pagpili. Ikonsiderar kon sa unsang paagi makatabang kaninyo si Jesukristo ug ang Iyang doktrina.
Paminawa ang mga pag-aghat sa Espiritu samtang nagpraktis kamo sa pagkonektar sa inyong mga pagpili ngadto ni Jesukristo uban sa tabang sa Alang sa Kalig-on sa mga Kabatan-onan nga giya nga basahon.
Ang istruktura sa giya nga basahon
Katuyoan niini nga leksiyon mao ang pagtabang sa mga estudyante nga mapamilyar sa ilang kaugalingon kon giunsa pag-organisar ang Alang sa Kalig-on sa mga Kabatan-onan nga giya nga basahon. Kon pamilyar na ang imong mga estudyante sa giya nga basahon, pwede nimong laktawan kini nga seksiyon ug moadto sa Modelo.
Ipatan-aw sa mga estudyante ang graphic sa ubos nga bahin sa “Paghimo og dinasig nga mga pagpili” diha sa giya nga basahon, o ipakita ang mosunod nga impormasyon gikan sa graphic.
“Diha sa Alang sa Kalig-on sa mga Kabatan-onan, inyong makit-an ang mga pagtulun-an ni Jesukristo ug sa Iyang mga propeta. Gamit niining mga kamatuoran isip inyong giya, kamo makahimo og dinasig nga mga pagpili nga mopanalangin kaninyo karon ug sa tibuok kahangtoran” (“Paghimo og dinasig nga mga pagpili,” Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 4). Ang giya nga basahon gibahin ngadto sa lainlaing mga hilisgotan, ug ang kada hilisgotan naay tulo ka bahin:
-
Mahangtoron nga mga kamatuoran, o doktrina sa gipahiuli nga ebanghelyo ni Jesukristo
-
Mga pagdapit sa paglihok nianang mga kamatuoran
-
Gisaad nga mga panalangin nga gitanyag sa Ginoo niadtong kinsa mosunod sa Iyang mga pagtulun-an
Pagmodelo sa proseso
Gigamit niini nga seksiyon ang ehemplo ni Jose sa Ehipto dihang mipalayo siya gikan sa asawa ni Potifar ug ang “Ang inyong lawas sagrado” nga bahin sa Alang sa Kalig-on sa Kabatan-onan ingon nga modelo kon unsaon paggamit ang giya nga basahon sa paghimo og dinasig nga mga pagpili.
Pwede kang magpakita og hulagway ni Jose nga mipalayo gikan sa asawa ni Potifar ug pangutan-a ang mga estudyante kon unsay ilang nahinumdoman bahin sa istorya. Kon kinahanglan, ipasabot nga samtang nagserbisyo sa balay ni Potifar, kusganong gisuklan ni Jose ang sekswal nga relasyon nga pagpangdani sa asawa ni Potifar (tan-awa ang Genesis 39:1–8). O pwedeng tan-awon sa mga estudyante ang “Joseph in Egypt” (2:51) gikan sa time code 0:00 hangtod 0:41.
Basaha ang Genesis 39:9–12, nga mangita kon giunsapagkonektar ni Jose sa iyang mga pagpili ngadto ni Jesukristo ug sa Iyang doktrina.
-
Unsay imong nakaplagan?
Ikonsiderar ang paghimo og tulo ka grupo sa mga estudyante. Dapita ang matag sakop sa grupo sa pagpili og managlahing numero gikan sa usa ngadto sa tulo nga motakdo sa usa sa mosunod nga mga pangutana.
Tun-i ang seksiyon nga “Ang inyong lawas sagrado” diha sa Alang sa Kalig-on sa mga Kabatan-onan gamit ang usa sa mosunod nga mga pagpunting:
-
Sa imong hunahuna, unsang “Mahangtoron nga mga kamatuoran” ang nakatabang ni Jose sa paghimo sa iyang pagpili?
-
Unsang “Mga pagdapit” ang gisunod ni Jose?
-
Sa imong hunahuna, hain sa “Gisaad nga mga panalangin” ang nasinati ni Jose?
Dapita ang mga estudyante nga ipakigbahin ngadto sa ilang grupo ang ilang nakaplagan. Pwede nimong ipasabot nga bisan og gipriso si Jose tungod sa iyang desisyon nga mipalayo gikan sa asawa ni Potifar, padayon siyang giubanan sa Ginoo (tan-awa ang Genesis 39:20–21; 41:38–43).
Pagpraktis
Hatagig higayon ang mga estudyante nga magpraktis gamit ang sumbanan nga anaa sa Alang sa Kalig-on sa mga Kabatan-onan: Usa ka Giya sa Paghimo og mga Pagpili diha sa kaugalingon nilang mga sitwasyon. Ikonsiderar ang paggamit sa handout nga “Pagkonektar sa atong mga pagpili ngadto ni Jesukristo ug sa Iyang Doktrina” aron mahimo kini.
Human makompleto sa mga estudyante ang handout, pwede nimo silang dapiton nga ipakigbahin kon sa unsang paagi sila napalig-on ni Jesukristo samtang ilang gikonektar ang ilang mga pagpili ngadto Kaniya ug sa Iyang doktrina.
Pwede nimong balikan ang Salmo 62:5–7. Dayon, ikonsiderar ang pagpangutana sa mga estudyante sa mosunod.
-
Unsay inyong nakat-onan karon bahin sa padayong konektado kang Jesukristo ug sa Iyang doktrina dihang mohimo kag mga desisyon?
Ikonsiderar ang pagpakigbahin sa inyong pamatuod kang Jesukristo. Pwede ninyong taposon ang klase pinaagi sa usa ka pamahayag gikan sa seksiyon nga “Si Jesukristo motabang kaninyo,” diha sa Alang sa Kalig-on sa mga Kabatan-onan. Dasiga ang mga estudyante sa pagkonektar sa ilang mga pagpili ngadto Kaniya ug sa Iyang doktrina.