Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Mamakafaka ireo lohahevitra sy fanontaniana momba ny filazantsara amin’ny fomba fijery mibanjina ny mandrakizay: Miezaka mahita ny zavatra araka ny fahitan’ny Tompo azy ireny

“Mamakafaka ireo lohahevitra sy fanontaniana momba ny filazantsara amin’ny fomba fijery mibanjina ny mandrakizay: Miezaka mahita ny zavatra araka ny fahitan’ny Tompo azy ireny”, Testamenta Taloha: Boky torolalana ho an’ny mpampianatra seminera (2026)

Fifehezana fotopampianarana: Mitady valiny ho an’ireo fanontaniako: Lesona 164

Mamakafaka ireo lohahevitra sy fanontaniana momba ny filazantsara amin’ny fomba fijery mibanjina ny mandrakizay

Miezaka mahita ny zavatra araka ny fahitan’ny Tompo azy ireny

Mety tsy ho hitantsika eo no ho eo foana ny valin’ireo fanontaniantsika na vahaolana amin’ireo olantsika, ary tsy maninona izany. Ireny fotoana ireny dia tranga fanararaotra entina hatokisana ny Ray any An-danitra sy i Jesoa Kristy. Hitan’Izy Ireo ny zavatra tsy hitantsika. Fantatr’Izy Ireo ny zavatra tsy fantatsika. Rehefa miezaka mahita ny zavatra araka ny fahitan’izy ireo azy ireny isika dia manomboka mahita ny fanontaniantsika sy ny olantsika amin’ny fomba hafa. Ity lesona ity dia afaka manampy ny mpianatra hamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay.

Fanomanana ny mpianatra: Asao ireo mpianatra hamorona lesona ampiasana zavatra azo tsapain-tanana na fifanahafana izay afaka maneho ny lanjan’ny fahitana zavatra amin’ny fomba fijery hafa. Azo omena fahafahana hizara ny heviny any am-piandohan’ny fotoam-pianarana izy ireo.

Sahanasa fianarana azo atao

Fomba fijery

Hevero ny hanasa ny mpianatra hieritreritra lesona ampiasana zavatra azo tsapain-tanana na fifanahafana iray izay afaka maneho ny lanjan’ny fahitana zavatra amin’ny fomba fijery hafa. Asao izy ireo hizara ny hevitr’izy ireo amin’ny iray kilasy. Na azonao atao ny mampiseho ireo sary izay ahitana ny lohateny hoe “Tokantrano–Fomba fijery voafetra” ary asao ny mpianatra hifanakalo hevitra momba ireto fanontaniana manaraka ireto miaraka amin’ny namana iray:

Raha afaka misafidy ny iray amin’ireo trano ireo ianao mba hipetrahana, dia iza amin’ireo no hosafidianao? Nahoana?

Ampisehoy ny ampahany faharoa amin’ireo sary izay ahitana ny lohateny hoe “Tokantrano–Fomba fijery amin’ny antsipiriany” ary asao ny mpianatra hifanakalo hevitra momba ny fanontaniana manaraka.

Inona no fiantraikan’izany fomba fijery fanampiny izany eo amin’ny safidinao?
Inona avy ireo toe-javatra mety hatrehantsika izay ahafahan’ny fijerena zavatra amin’ny fomba fijery samihafa manampy antsika?

Alaovy sary an-tsaina hoe ireo trano ireo dia maneho ireo fanontaniantsika momba ny filazantsara na ny toe-javatra iainantsika.

Nahoana no mety hampidi-doza ny misintona tsoakevitra mahakasika ny fanontaniantsika na ny toe-javatra iainantsika kanefa tsy miezaka ny hijery izany amin’ny fomba fijery mivelatra kokoa?

Mety nahita fanontaniana na zavatra mampiahiahy manokana momba ny filazantsara ireo mpianatra nandritra ny fianarana seminera. Raha izay no izy dia asao izy ireo hieritreritra ny iray amin’ireo fanontanian’izy ireo. Raha tsia dia azonao atao ny manasa azy ireo haka fotoana izao mba handinika fanontaniana na ahiahy izay mety ananan’izy ireo na ananan’ny hafa. Asao ny mpianatra hisaintsaina ombam-bavaka mandritra ny lesona mikasika ny fomba ahafahan’ny fomba fijery mibanjina ny mandrakizay manampy azy ireo hahita valiny, na vahaolana, na fiadanana bebe kokoa farafahakeliny.

Vakio ny andiam-pehezanteny 8–10 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023) mba hitadiavana ny fomba ahafahantsika “mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay”.

Rehefa avy nandalina ny mpianatra, dia angataho izy ireo hizara ny zavatra nianarany. Rehefa mizara izany izy ireo dia azonao atao ny mametraka fanontaniana fanombanana fahatakarana iray na roa toy ny hoe:

Inona no zavatra fantatrao momba ny Ray any An-danitra sy i Jesoa Kristy izay mandrisika anao hiezaka hahita ny zavatra araka ny fahitan’Izy Ireo?
Inona no torohevitra homenao mba hanampiana ny olona hijery ny fanontaniany na ny toe-javatra iainany amin’ny fomba fijery mibanjina ny mandrakizay?
Inona no fifehezana fotopampianarana na andinin-tsoratra masina hafa manampy anao hijery ireo zavatra amin’ny fomba fijery mibanjina ny mandrakizay?

Azonao atao ny manasa ny mpianatra hikaroka ny lisitr’ireo andinin-tsoratra masina fifehezana fotopampianarana ao amin’ny Tahirin-kevitra fototra ho an’ny fifehezana fotopampianarana mba hanampiana azy ireo hamaly ilay fanontaniana teo aloha.

Aorian’io fifanakalozan-kevitra io dia omeo taratasy ny mpianatra tsirairay. Asao ny mpianatra hanoratra fehezanteny iray famintinana ny zavatra nianarany momba ny famakafakana ireo hevi-dehibe sy ireo fanontaniana amin’ny fomba fijery mibanjina ny mandrakizay. Rehefa samy avy nanoratra zavatra iray izy ireo dia asao ireo mpianatra mba hifanakalo taratasy amin’ny mpianatra maro samihafa araka izay tratrany mandritra ny 10 segondra mandra-pitenenanao hoe “mijanòna”.

Miantsoa mpianatra vitsivitsy hamaky ilay fehezanteny voasoratra eo amin’ilay taratasy noraisin’izy ireo. Mety niara-nilaza zavatra toy izao ny mpianatra: Ny famakafakana ireo fanontaniantsika amin’ny fomba fijery mibanjina ny mandrakizay dia hanampy antsika hahita azy ireo bebe kokoa tahaka ny ahitan’ny Tompo azy ireny.

Amporisiho ny mpianatra hitazona ilay taratasy noraisin’izy ireo. Hampiasaina ao aoriana kely ao amin’ny lesona ireo.

Ohatra amin’ny fomba fijery mibanjina ny mandrakizay

Misafidiana iray amin’ireto ohatra manaraka ireto avy ao amin’ny soratra masina. Tadiavo ny fiantraikan’ny fomba fijery mibanjina ny mandrakizay teo amin’ny fijerin’ireo olona ireo.

Alohan’ny hanombohan’ny mpianatra ny fandalinany dia azonao atao ny manome sahan-kevitra fanampiny ho an’ny ohatra tsirairay avy. Ho an’ireo izay mamaky ny tantaran’i Adama sy i Eva dia azonao atao ny manazava fa ny olona sasany dia mandray ny Fahalavoana ho ratsy satria nampiditra ny fahotana sy ny fahafatesana ary ny fitsapana teto amin’izao tontolo izao izany. Mahakasika an’i Joba dia azonao zaraina fa maro tamin’ireo olona tao amin’ny fianakaviany no maty, very ny fananany, ary niaina olana ara-pahasalamana lehibe izy.

Nanazava ny Fahalavoana i Adama sy i Eva. Mosesy 5:10–11
Nizara ny fijoroany ho vavolombelona i Joba nandritra ireo fitsapana. Joba 19:25–26

Inona no porofo hitanao fa nahita ny toe-javatra niainany tao anatin’ny sahan-kevitry ny drafitry ny famonjen’ny Ray any An-danitra io olona io?
Inona no fiantraikan’ny fijoroana ho vavolombelon’io olona io momba an’i Kristy teo amin’ny fomba nahitany ilay toe-javatra?

Rehefa avy nizara ny zavatra hitany ny mpianatra, dia manontania hoe:

Inona avy ireo ohatra sasantsasany avy amin’ny fiainan’i Jesoa Kristy izay niatrehany toe-javatra iray tamin’ny fomba fijery mibanjina ny mandrakizay?

Raha mila fanampiana izy ireo amin’ny fitadiavana ohatra iray dia azonao atao ny manasa ny mpianatra hamaky ny Isaia 53:3–5, 10 ary hifanakalo hevitra momba ny antony, tamin’ny fomba fijery mibanjina ny mandrakizay, naha-“sitrak’i Jehovah ny hanorotoro sy hampangirifiry Azy” (Isaia 53:10). (Na dia nampalahelo ny Ray any An-danitra aza ny nahita an’i Jesoa Kristy nijaly, ny fomba fijery mibanjina ny mandrakizay nanany dia nanome Azy fahafahana hahita fa ny Sorompanavotan’ny Zanany dia ampahany manan-danja ao amin’ny drafitry ny famonjena ho an’ny zanany rehetra.)

Saintsaino raha toa misy toe-javatra iainanao amin’izao fotoana izao ka ny fanarahana ny ohatra nasehon’ny Ray any An-danitra sy i Jesoa Kristy no hanampy anao hahita ny zavatra amin’ny fomba fijery mibanjina ny mandrakizay ao anatin’izany.

Fanazaran-tena

Ho an’ny sahanasa manaraka dia azon’ny mpianatra atao ny mampiasa ireo taratasy izay noraisin’izy ireo teo aloha taorian’ny nampitampitana ilay fehezan-teny iray famintinana ny fomba fijery mibanjina ny mandrakizay.

Manorata fanontaniana na toe-javatra mety hiainan’ny zatovo iray izay mety hanampy hijerena azy amin’ny fomba fijery mibanjina ny mandrakizay.

Rehefa avy nanoratra zavatra ny mpianatra tsirairay dia asao indray izy ireo mba hanohy hifanakalo taratasy mandritra ny 10 segondra mandra-pitenenanao hoe “mijanòna.” Avy eo dia azo asaina miara-miasa tsiroaroa ny mpianatra mandritra ny ambin’ilay sahanasa.

Ifanakalozy hevitra miaraka amin’ny namana iray ny iray na izy roa amin’ireto fanontaniana manaraka ireto rehefa mifandray amin’ny zavatra voasoratra eo amin’ireo taratasy noraisinao izy ireo. Mariho fa ny fanontaniana voalohany ao amin’ny vondrona tsiroaroa dia avy amin’ny andiam-pehezanteny 8 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana.

Inona no zavatra efa fantatro mikasika ny Ray any An-danitra sy ny drafiny, ary ny fomba hifandraisany amin’ireo zanany?

Ahoana no ahafahan’izany manova ny fomba ahitana ilay fanontaniana na toe-javatra?
Inona avy ireo fampianaran’ny filazantsara mifandray amin’io foto-kevitra na olana io na manazava azy io?

Inona no soratra masina na teny nambara avy amin’ny mpitarika ao amin’ny Fiangonana izay manohana io fampianarana io?

Rehefa avy mifanakalo hevitra momba ny valinteninareo ianareo dia manorata valiny fohy eo amin’ny taratasinareo.

Rehefa vitan’ny mpianatra izany dia mangataha mpianatra manolo-tena vitsivitsy hamaky ilay fanontaniana na toe-javatra eo amin’ny taratasiny amin’ny iray kilasy ary hizara ny valinteny nosoratany avy eo. Azonao atao ny mangataka ny mpianatra ambiny mba hitady hevi-baovao fanampiny izay afaka manampy ny zatovo iray hijery ilay fanontaniana na toe-javatra amin’ny fomba fijery mibanjina ny mandrakizay.

Zarao ny fijoroana ho vavolombelona anananao fa afaka manampy antsika hahita zavatra avy amin’ny fomba fijeriny ny Ray any An-danitra rehefa mitodika any Aminy isika. Azonao atao ihany koa ny mizara fa amin’ny fotoana izay ahatsapantsika fa tsy mbola afaka mahita ny zavatra hitany isika, dia mbola afaka matoky Azy isika (jereo ny Ohabolana 3:5–6). Amporisiho ny mpianatra mba hiezaka hatrany hamakafaka ny fanontaniany sy ny toe-javatra iainany amin’ny fomba fijery mibanjina ny mandrakizay.

Loharanom-pitaovana fanampiny

Ahoana no ahafahan’ny finoako ny Ray any An-danitra sy i Jesoa Kristy hiantraika amin’ny fomba fijeriko?

Nampianatra ny Loholona David A. Bednar ao amin’ny Kôlejin’ny Apôstôly Roambinifolo hoe:

15:19

Tsy hadalana na firehetam-po amin-javatra iray ny fahatokiana. Fa ny fahatokiana kosa dia ny fametrahana fitokisana amin’i Jesoa Kristy amin’ny maha-Mpamonjy antsika Azy, sy amin’ny anarany, ary amin’ny fampanantenany. Rehefa “mibosesika handroso amin’ny fiorenana ao amin’i Kristy [isika], amin’ny [fananana] fanantenana mamirapiratra sy lavorary omban’ny fitiavana an’ Andriamanitra sy ny olon-drehetra,” [2 Nefia 31:20] dia omena fomba fijery mibanjina ny mandrakizay sy fahatakarana mihoatra lavitra ny fahaizana voafetra ananantsika amin’ny maha-olombelona antsika. (“Dia hosedraintsika amin’izany izy ireo,” Liahona, nôv. 2020, 11)

Ny Filoha Dieter F. Uchtdorf, fony izy mpanolotsaina tao amin’ny Fiadidiana Voalohany dia nilaza hoe:

21:33

Ny finoana dia fatokiana—fatokiana fa Andriamanitra dia mahita ny zavatra tsy hitantsika, fa Izy dia mahafantatra ny zavatra izay tsy fantatsika [jereo ny Isaia 55:8–9]. Indraindray dia tsy ampy ny fatokiana ny fomba fijerintsika sy ny fitsarantsika.

Nianarako izany tamin’ny naha-mpanamory fiaramanidina ny tenako, nandritra ireo andro izay tsy maintsy nisidinako tao amina zavona na rahona matevina ka tsy nahafahako nahita afa-tsy metatra vitsivitsy teo anoloako ihany. Tsy maintsy niantehitra tamin’ireo fitaovana izay nilaza tamiko ny toerana [nisy] ahy sy ny [itodiako] aho. Tsy maintsy nihaino ny feon’ireo mpanara-maso ny fifamoivoizana amin’ny habakabaka aho. Tsy maintsy nanaraka ny fitondran’ny olona iray izay nanana fampahalalana marina kokoa noho izay nananako aho. Olona izay tsy afaka ny ho hitako, nefa nianatra ny natoky azy aho. Olona izay afaka nahita ny zavatra tsy hitako. Nila natoky sy nanao zavatra araka ny fitarihany aho mba ho tody soa aman-tsara any amin’ny toerana tokony halehako. (“Rihana fahatelo, varavarana farany”, Liahona, nôv. 2016, 17)

Ahoana no ahafahan’ny fomba fijery mibanjina ny mandrakizay manampy ahy hanao safidy?

Ny Filoha Russell M. Nelson dia nanazava hoe:

19:15

Rehefa misafidy ianareo dia manasa anareo aho hijery mihoatra lavitra ny toe-javatra iainana ankehitriny dia amin’ny fomba fijery mandrakizay. Ataovy lohalaharana i Jesoa Kristy, satria miankina amin’ny finonareo Azy sy ny Sorompanavotany ny ho fiainanareo mandrakizay. Miankina amin’ny fankatoavanareo ny lalàny ihany koa izany. Ny fankatoavana no manamboatra ny lalana hananana fiainana feno fifaliana ho anao androany sy valisoa lehibe sy mandrakizay amin’ny ho avy.

Rehefa sendra fahasarotana ianareo, dia saino amin’ny fomba selestialy! Rehefa sedrain’ny fakam-panahy dia saino amin’ny fomba selestialy! Rehefa mandiso fanantenana anao ny fiainana na ireo olona akaikin’ny fonao dia saino amin’ny fomba selestialy! Rehefa misy olona maty aloha loatra dia saino amin’ny fomba selestialy. Rehefa misy olona mitondra takaitra noho ny aretimitaiza dia saino amin’ny fomba selestialy. Rehefa mibahana ao an-tsainao ireo tsindry eo amin’ny fiainana dia saino amin’ny fomba selestialy! (“Saino amin’ny fomba selestialy!” Liahona, nôv. 2023, 118)

Sahanasa fianarana fanampiny

Sahan-kevitra ara-tantara

Ao amin’ny andiam-pehezanteny 9 ao amin’ny Tahirin-kevitra fototra ho an’ny fifehezana fotopampianarana, ny mpianatra dia hamaky mikasika ny maha-zava-dehibe ny “fieritreretana ny kolontsaina sy ny fenitra nisy tamin’ny fotoan’andro nitrangany toy izay manery hampanjaka ny fomba fijery sy ny fitondrantena ankehitriny.” Azonao atao ny manampy ny mpianatra hahatakatra kokoa izany amin’ny alalan’ny fametrahana fanontaniana toy izao:

Inona avy ireo fenitra ara-kolontsaina tamin’ny andron’ny Testamenta Taloha izay mety ho hafahafa raha toa ka natao ankehitriny?

Ireto avy ny mety ho valinteny:

Sorona

Lovan’ny lahimatoa

Fanambadiana mamelo-maso (fanambadian’ny lehilahy iray ny vady navelan’ny rahalahiny maty tsy nitera-dahy)

Inona avy ireo fenitra ara-kolontsaina amin’izao fotoana izao izay mety ho hafahafa raha toa ka natao tamin’ny andron’ny Testamenta Taloha?
Ahoana no mety hanampian’io fomba fijery io rehefa mamakafaka ireo zava-nitranga ara-tantara?

Ny drafitry ny famonjena

Azonao atao ny manampy ny mpianatra hizatra hijery ireo hevi-dehibe ao anatin’ny sahan-kevitry ny drafitry ny famonjena amin’ny alalan’ny fandikana ity tabilao manaraka ity eny amin’ny solaitrabe. Efa vita ny tsanganana 1. Asao ny mpianatra ho eny amin’ny solaitrabe ary hanoratra lohahevitra na olana ao amin’ny tsanganana 2 izay mety hanampy mba hahafahana mijery amin’ny fomba fijery mibanjina ny mandrakizay. Ohatra, azon’izy ireo atao ny manoratra ny fahadiovam-pitondrantena, ny tenin’ny fahendrena, ny fahafatesana, ny hasarobidin’ny fanahy, ny fanambadiana, sns.

1. Ny drafitry ny Famonjena

2. Lohahevitra na olana

1. Ny drafitry ny Famonjena

Fiainana talohan’ny nahaterahana

Fiainana an-tany

Fiainana aorian’ny fahafatesana

Ny Sorompanavotan’ i Jesoa Kristy

Rehefa avy nanoratra ny valinteniny teo amin’ny tsanganana faharoa ny mpianatra dia apetraho ao anatin’ny vondrona kely maromaro izy ireo ary asao ifanakalo hevitra momba ity fanontaniana manaraka ity amin’ny alalan’ny fisafidianana teny na andian-teny avy amin’ny tsanganana tsirairay mba hamenoana ny banga mifanaraka amin’izany. Afaka mamaly imbetsaka ilay fanontaniana izy ireo, ka misafidy fomba samihafa hamenoana ny banga isaky ny mandeha.

Inona no takatrao momba ny (misafidiana lohahevitra iray avy ao amin’ny tsanganana 1) ny zavatra afaka manampy olona iray hijery (misafidiana zavatra avy ao amin’ny tsanganana 2) amin’ny fomba fijery mibanjina ny mandrakizay?

Ohatra iray amin’ny fomba ahafahana mameno ilay fanontaniana ny hoe:

Inona no takatrao momba ny fiainana aorian’ny fahafatesana ka afaka manampy olona iray hijery ny fanambadiana amin’ny fomba fijery mibanjina ny mandrakizay?

Mamerina mandrafitra fanontaniana (Fametrahana ireo fanontaniana amin’ny fomba hafa)

Rehefa avy nijery ilay horonan-tsary hoe “Examining Questions with an Eternal Perspective [Mamakafaka ireo fanontaniana amin’ny fomba fijery mibanjina ny mandrakizay]” ianao dia azonao omena ny mpianatra tsirairay ilay taratasy zaraina hoe “Mamerina mandrafitra fanontaniana”. Asao ny mpianatra hisaintsaina izao manaraka izao:

Misafidiana fanontaniana na olana ara-piarahamonina iray. Soraty eo afovoan’ny efajoro tsirairay izany.
Eritrereto ny fiheverana samy hafa mety hanananao na ananan’ny olona iray manana fomba fijerin’izao tontolo izao momba an’io resaka io. Soraty manodidina ilay efajoro hoe “fomba fijery voafetra” izany.
Jereo amin’ny fomba fijery mibanjina ny mandrakizay koa io fanontaniana io na io olana ara-piarahamonina io. Saintsaino ny fanontaniana toy ny hoe “Inona no zavatra efa fantatro momba ny Ray any An-danitra sy ny drafiny ary ny fomba hifandraisany amin’ireo zanany?” sy ny hoe “Inona avy ireo fampianaran’ny filazantsara izay mifandray amin’io foto-kevitra na olana io na manazava azy io?” Soraty manodidina ilay efajoro hoe “fomba fijery mibanjina ny mandrakizay” ny eritreritrao.

Miatrika ireo fitsapana amin’ny fomba fijery mibanjina ny mandrakizay

Ho solon’ny fijerena ny “Examining Questions with an Eternal Perspective [Mamakafaka ireo fanontaniana amin’ny fomba fijery mibanjina ny mandrakizay],” dia azonareo atao ny mijery horonan-tsary iray misy olona iray izay miaina fitsapana. Asao ny mpianatra hitady ny fomba niatrehan’ilay olona ao anatin’ilay horonan-tsary ny fitsapana azy tamin’ny fomba fijery mibanjina ny mandrakizay. Safidy iray azo atao ny:

“Hallmarks of Happiness” manomboka eo amin’ny mari-potoana 8:11 ka hatramin’ny 9:12. Ny Loholona Gary B. Sabin ao amin’ny Fitopololahy dia nizara ny fomba nandraisan’ny zanany vavy kely ny fandidiana famindrana avokavoka tamin’ny fomba fijery mibanjina ny mandrakizay.

12:15