Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Ezekiela 47: Ireo fitahiana avy amin’ny Tempoly

“Ezekiela 47: Ireo fitahiana avy amin’ny Tempoly,” Testamenta Taloha: Boky torolalana ho an’ny mpampianatra seminera (2026)

“Ezekiela 47: Ireo fitahiana avy amin’ny Tempoly,” Testamenta Taloha: Boky torolalana ho an’ny mpampianatra seminera

Ezekiela 1–3; 33–34; 36–37; 47: Lesona 141

Ezekiela 47

Ireo fitahiana avy amin’ny tempoly

Manome fitahiana betsaka antsika ny Tompo amin’ny alalan’ny fitsaohana Azy ao amin’ny tempoly. Hitan’i Ezekiela tamin’ny alalan’ny fahitana ny tempolin’ny andro farany izay haorina ao Jerosalema. Hitany ny rano mikoriana avy amin’ilay tempoly, manasitrana ny tany manodidina ary mitondra aina ho an’ny Ranomasina Maty. Ity fahitana ity dia tandindon’ny fitahiana omen’ny Tompo antsika rehefa mitsaoka Azy ao amin’ny tempoliny isika. Ity lesona ity dia afaka hanampy ny mpianatra hahatsapa faniriana bebe kokoa hitsaoka an’ Andriamanitra ao amin’ny tempoly.

Fanomanana ny mpianatra: Azonao atao ny manome ny mpianatra ireto fanontaniana manaraka ireto ary manasa azy ireo ho tonga vonona hizara ny valinteniny:

Sahanasa fianarana azo atao

Faniriana hitsaoka ao amin’ny tempoly

Atomboy amin’ny fomba hanampiana ny mpianatra hihevitra mikasika ny faniriany handeha sy hitsaoka ao amin’ny tempoly ny lesona. Azonao atao ny mampiseho sarin’ny tempoly mba hanaovana izany. Avy eo dia soraty eo amin’ny ilan’ny tempoly ny valintenin’ny mpianatra amin’ny iray amin’ireto fanontaniana manaraka ireto ary eo amin’ny ilany iray hafa ny valinteniny amin’ny fanontaniana iray hafa.

Inona no mety ho antony mahatonga ny zatovo iray haniry hanatrika sy hanompo ao amin’ny tempoly?
Inona no mety ho antony mahatonga azy ireo tsy hazoto ho avy any an-tempoly? Inona no mety hahasarotra izany?

Ny fanontaniana hanaovana fanombanan-tena dia manampy ny mpianatra hahita fahafahana ho amin’ny fivoaran’ny tena manokana sy fahafahana mianatra. Entano ny mpianatra hanokana fotoana fohy hisaintsainana ireto fanontaniana manaraka mikasika ny tenany ireto.
Hatraiza ny halehibeazan’ny fanirianao hitsaoka any amin’ny tempoly? Nahoana?
Inona no mety hanakana anao tsy handeha hiangona any amin’ny tempoly?

Raha mandalina ny Ezekiela ianao androany dia mangataha fanampiana avy amin’ny Tompo hampitombo ny fanirianao handeha hiangona sy hitsaoka any amin’ny tempoly.

Ny fahitana tempoly voarain’i Ezekiela

Fanamarihana: Mba hanampiana ny mpianatra hahatsapa ny fitiavan’ny Tompo dia zava-dehibe ato amin’ity lesona ity ny filazana fa ny fitahiana dia azo avy amin’ny Tompo amin’ny alalan’ny tempoly fa tsy avy amin’ny tempoly mivantana akory.

Ao amin’ny Ezekiela 47 i Ezekiela dia naharay fahitana izay mampiseho tandindona ireo fitahiana omen’ny Tompo ny olona rehetra manao ny asan’ny tempoly sy ny tantaram-pianakaviana. Ny iraka avy any an-danitra nitondra an’i Ezekiela teo amin’ny varavaran’ny tempoly tany Jerosalema no nanombohan’izany.

Vakio ny Ezekiela 47:1, ary tadiavo ny zavatra hitan’i Ezekiela nivoaka avy tao amin’ilay tempoly.

Ahoana no mahatonga ny rano ho tandindona tena mety ho an’ny fitahiana avy amin’ny Tompo?

Anisan’ny valinteny mety ho hita ny hoe, mitondra aina ny rano, ilain’ny olon-drehetra, manadio, ary misy amin’ny toerana rehetra. Nampitaha ny tenany sy ny fitahiana omeny tamin’ny rano velona ny Mpamonjy nandritra ny fotoana nanaovany asa fanompoana tety an-tany (jereo Jaona 4:10; 7:37–39).

Mety hanampy amin’ity sahanasa manaraka ity ny manazava fa ny hakiho dia ventin-drefy, manomboka eo amin’ny kiho hatreo amin’ny tendron-dratsantanana, tokony ho 45 ka hatramin’ny 53 santimetatra eo ho eo.

Vakio ny Ezekiela 47:2–5 ary tadiavo ny lasa halalin’ny rano rehefa nikoriana avy amin’ny tempoly.

Koa satria tena azo alaina sary an-tsaina tsara ny fampianaran’ny Tompo ato amin’ity tantara ity dia afaka manampy amin’ny fanoritsoritana ny zavatra ianarantsika izany. Manaova sarina tempoly tsotsotra misy rano mikoriana avy ao aminy eo amin’ny tapany ambony amin’ny pejin’ny diary fandalinanao. (Hotohizanao ny sarina rano mankany amin’ny tapany ambany avy eo.)

Inona no tian’ny Tompo ampianarina mikasika ny fitahiana omeny amin’ny alalan’ny tempoly ao amin’ity fahitana ity araka ny hevitrao?

Anontanio ireo mpianatra hoe:

Raha ampianao sarin-javatra hanehoana tandindona toerana tsy misy zava-miaina na tsy miroborobo eo amin’io sary nataonao io dia inona no hataonao eo ary nahoana?

Raha nametrahana izany fanontaniana izany ny olona tany Jerosalema tamin’ny andron’i Ezekiela dia azo antoka fa ny efitr’i Jodia na ny Ranomasina Maty no ho valinteniny. Nomena izany anarany izany ny Ranomasina Maty satria tsy afaka mamelon’aina biby na zava-maniry izy io. Mahery sira ihany koa izy ary tsy azo sotroina. Raha ilaina dia asehoy na ampahafantaro ny mpianatra ny toerana misy ny sary “Judean Wilderness [tany foanan’i Jodia]” (Kisary ao amin’ny Baiboly, lah. 3) ao amin’ny fanampiana amin’ny fandalinana ao amin’ny loharanom-pitaovana na ao amin’ny Torolalana ho an’ny soratra masina raha hijery ny efitra eo akaikin’ny Ranomasina Maty. Azon’izy ireo atao ihany koa ny mijery ny “Physical Map of the Holy Land [Sarintanin’ny Tany Masina]” (Sarintany ao amin’ny Baiboly, lah. 1) ary mitady ny tany foanan’i Jodia sy ny Ranomasina Maty.

Vakio ny Ezekiela 47:8–9, 12 ary tadiavo izay mitranga amin’ny zavatra rehetra nokasihan’ilay rano avy amin’ny tempoly, anisan’izany ny Ranomasina Maty.

Ahoana no hamintinanao izay nianaranao tamin’ny fahitana voarain’i Ezekiela?

Ampitomboy ny fahatakaranao

Vakio ny taratasy zaraina “Ireo fitahiana avy amin’ny Tempoly” ary tsipiho na farito ny fitahiana izay misongadina aminao.

Azon’ny mpianatra soratana eo amin’ny sary nataony izany fitahiana izany, eo amin’ilay rano mikoriana avy ao amin’ny tempoly. Afaka manampy fitahiana hafa izay tonga ao an-tsainy ka omen’ny Tompo antsika amin’ny alalan’ny tempoly izy ireo.

Hevero ny manasa ny mpianatra hizara ny sary nataony sy ny fitahiana nosoratany amin’ny namany na amin’ny vondrona madinika. Na ho solon’izany dia manaova sarina renirano eny amin’ny solaitrabe ary angataho ny mpianatra hanoratra ireo fitahiana izay tonga ao an-tsainy eo amin’izany sary izany. Afaka manampy ireo fitahiana izay tiany ho tadidiana amin’ny sary nataony avy amin’izay nozarain’ny namany ny mpianatra.

Inona avy ireo fitahiana nanaitra anao?

Asao ny mpianatra hieritreritra ny valin’ireto fanontaniana manaraka ireto ao anatin’ny fotoana fohy alohan’ny hametrahanao izany fanontaniana izany aminy. Eo am-pizarana dia mety hametraka fanontaniana toy izao manaraka izao amin’izy ireo ianao: “Nahoana no manan-danja aminao izany?” “Nisy olona hafa nanana traikefa nitovy tamin’izany ihany koa ve?” sy hoe “Inona no tianao hanampiana izay efa nozaraina teo?”

Raha mipetraka amin’ny toerana lavitra ny tempoly ny mpianatra ary betsaka amin’izy ireo no tsy mbola nandeha tany amin’ny tempoly noho ny halavirana, ary tsy mahalala olona maro efa avy tany amin’ny tempoly izy ireo, dia ovay ilay fanontaniana faharoa hanontaniana mikasika ireo fitahiana niainan’ny mpianatra na ny olona fantany raha teo am-piomanana hitsaoka any amin’ny tempoly izy ireo.
Amin’ny fomba ahoana no manasitrana na manome aina ireo fitahiana notononinao ireo?
Oviana ianao na ny olona fantatrao no niaina ny iray tamin’ireo fitahiana avy amin’ny Tompo tamin’ny alalan’ny fitsaohana tany amin’ny tempoly ireo?

Inona no zavatra tsapanao mikasika ny tempoly

Hamaranana ny lesona dia hevero ny mikaroka toerana malalaka eo amin’ilay sary nataonao na ao amin’ny diary fandalinanao hanoratanao ny fahatsapanao mikasika ny fandehanana sy fitsaohana any amin’ny tempoly sy ny fandraisana fitahiana avy amin’ny Tompo. Katsaho ny fanampian’ny Fanahy Masina ahafahanao manoratra tsara sy mazava ny fihetseham-ponao.

Azonao atao ny manasa izay mpianatra mazoto hizara ny eritreriny sy ny fijoroany ho vavolombelona. Hevero ny hizara ny anao ihany koa.

Loharanom-pitaovana fanampiny

Aiza no ahafahako mamantatra bebe kokoa mikasika ny tempoly sy ireo fitahiana omen’ny Tompo antsika amin’ny alalan’ny tempoliny?

Raha te hamantatra bebe kokoa dia jereo ny pejin’ny tranonkalan’ny Fiangonan’i Jesoa Kristy ho an’ny Olomasin’ny Andro Farany natokana ho an’ny tempoly: https://folky.shop/temples

Ny loharanom-pitaovana ao amin’ny Lohahevitry ny Filazantsara mikasika ny tempoly dia: https://folky.shop/study/manual/gospel-topics/temples

Thomas S. Monson, “Fitahiana avy amin’ny Tempoly,” Liahona, Ôkt. 2010, 12–19

Ahoana no fomba hifandraisan’ny tempoly amin’ny Tompo?

Nampianatra ny Filoha Russell M. Nelson hoe:

Ny tempoly dia tranon’ny Tompo. Ny fototra iorenan’ny ôrdônansy sy ny fanekempihavanan’ny tempoly rehetra—izay ivon’ny drafitry ny famonjena —dia ny Sorompanavotan’i Jesoa Kristy. Ny asa rehetra izay ataontsika, ny lesona, ny zavatra rehetra izay ataontsika ao am-piangonana, dia manondro ny Tompo sy ny tranony masina. (“Personal Preparation for Temple Blessings,” Ensign, Mey 2001, 32).

Sahanasa fianarana fanampiny

Fanombohana amin’ny fomba hafa

Raha tsapanao fa mety hahasoa ny mpianatra dia hevero ny manomboka amin’ity sahanasa manaraka ity:

Alaivo sary an-tsaina hoe manasa anao hiditra ho kômity misahana ny zatovo ao amin’ny tsatòkanao ny filohan’ny tsatòkanao. Manahy izy fa misy sasany amin’ny tanora ao amin’ny tsatòkanao no tsy te handeha any amin’ny tempoly ary tsy mikasa ny hanao fanekempihavanana fanampiny ao amin’ny tempoly aoriana kely ao. Manasa anao mba hifanakalo hevitra ny amin’ireto manaraka ireto izy:

Nahoana ny tanora sasany no tsy mazoto handeha any amin’ny tempoly?

Manasa anao ny filohan’ny tsatòkanao mba hitadidy ireo antony ireo raha manao ireto manaraka ireto ianao:

Mandalina ireo fitahiana samihafa omen’ny Tompo antsika amin’ny alalan’ny tempoly.
Mamoròna peta-drindrina kely hanampiana ny zatovo mba ho te handeha any amin’ny tempoly. Azon’ny filohan’ny tsatòka atao ny manome tahadikan’izany peta-drindrina izany ho an’ny zatovo rehetra ao amin’ny tsatòka mandritra ny fampaherezam-panahy manokana.

Ny sary ataon’ny mpianatra mandritra ny lesona dia azo atao peta-drindrina na azon’izy ireo atao ihany koa ny manoritsoritra hafa any amin’ny faran’ny lesona.

Fanaovana sy fitandremana ireo fanekempihavanana

Raha tsapanao fa ilaina ny mifantoka amin’ny maha zava-dehibe ny fitandremana fanekempihavanana hanomanana antsika amin’ny tempoly, dia asehoy ny mpianatra ny sarin’ny tempoly.

Nahoana ny tempoly no masina na toerana masina?

Vakio ny Ezekiela 44:5–9 ary tadiavo izay afaka miditra sy tsy afaka miditra ny tempoly masina araka izay nolazain’ny Tompo. Hazavao fa ny fehezanteny hoe “ny vahiny, tsy mifora fo sy nofo” ao amin’ny andininy 9 dia ilazana ireo olona tsy Israelita izay tsy nanao fanekempihavanana hanaraka ny Tompo.

Araka izany andinin-tsoratra masina izany, inona no fitsipika azontsika ianarana mikasika ny olona afaka miditra ny tranon’ny Tompo? (Mety hilaza izany amin’ny fomba hafa ny mpianatra, kanefa aoka ho mazava tsara fa raha manao sy mitandrina fanekempihavanana amin’ny Tompo isika, dia hamela antsika hiditra ao amin’ny tranony masina Izy.)
Nahoana araka ny hevitrao no manana fenitra tsy maintsy hajaintsika ny Tompo alohan’ny hidirantsika ao amin’ny tranony?

Angataho hamerina hijery ireo fanontaniana momba ny fahazoan-dalana hidirana ny tempoly ny mpianatra, ka hitady ireo fenitra ilaintsika iainana mba ho mendrika hitsaoka ao amin’ny tempoly. Asao izy ireo hametraka izay fanontaniana ananany. Angataho izy ireo hizara ny fihetseham-pony fa ny fiainana araka ireo fenitra ireo dia hanomana antsika hanao fanekempihavanana fanampiny amin’ny Tompo ao amin’ny tempoly.