Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Jeremia 31: Hanoratra ny lalàny ao am-pontsika Izy

“Jeremia 31: Hanoratra ny lalàny ao am-pontsika Izy,” Testamenta Taloha: Boky torolalana ho an’ny mpampianatra seminera (2026)

“Jeremia 31: Hanoratra ny lalàny ao am-pontsika Izy,” Testamenta Taloha: Boky torolalana ho an’ny mpampianatra seminera

Jeremia 31–33; 36–38; Fitomaniana 1; 3: Lesona 134

Jeremia 31

Hanoratra ny lalàny ao am-pontsika Izy

Ahoanao no mety ho fihetsiky ny olona iray raha mahalala ao an-tsainy ny filazantsaran’i Jesoa Kristy izy fa tsy mahatsapa izany ao am-pony? Azo heverina ve ny hanaovany zavatra na dia tsy mahatsapa ny herin’ny fitiavan’ny Mpamonjy aza izy? Miova toy ny ahoana ny zavatra ataontsika rehefa mahatsapa ny fitiavan’ny Ray any An-danitra sy i Jesoa Kristy ao am-potsika isika? Ny Jeremia 31 dia mampanantena antsika fa rehefa mitodika amin’ny Tompo isika dia hosoratany ao am-potsika ny lalàny (jereo ny Jeremia 31:18, 33). Ity lesona ity dia afaka manampy ny mpianatra hahatakatra ny hevitry ny hoe manana ny filazantsaran’ny Mpamonjy misoratra ao am-pon’izy ireo.

Fanomanana ny mpianatra: Asao hametraka ity fanontaniana ity amin’ny fianakaviany sy ny namany ny mpianatra: “Inona no maha-samy hafa ny fahalalana ny fahamarinan’ny filazantsara ao an-tsainao sy ny fahatsapana izany ao am-ponao?” Afaka miomana hizara izay nifanakalozany hevitra izy ireo.

Sahanasa fianarana azo atao

Mahalala zavatra ao an-tsaintsika ary mahatsapa izany ao am-pontsika

Mba hanombohana ny fampianarana dia entano ny mpianatra hamaly ity fanontaniana manaraka ity.

Inona avy ny trangan-javatra mety hahalalantsika fa tokony hanao zavatra iray isika kanefa sarotra amintsika ny manao izany?

Mety hizara ohatra toy izao ny mpianatra hoe mandeha matory ara-potoana, misakafo ara-pahasalamana, na mamita ny enti-mody alohan’ny fotoana farany tokony hamitana izany. Ampio ny mpianatra hahatakatra fa zavatra efa mahazatra ny mitolona mba hampifanaraka ny zavatra ataontsika amin’ny zavatra fantatsika fa marina. Mitombina ihany koa izany mahakasika ny fahalalana sy ny fanaovana zavatra araka ny zavatra fantantsika momba ny filazantsaran’i Jesoa Kristy. Mety ho fantantsika ny zavatra takin’ny filazantsaran’ny Mpamonjy kanefa tsy miaina araka izany foana isika. Na izany aza anefa dia afaka miezaka isika mba hanana ny Mpamonjy sy ny filazantsarany hitaona antsika amin’ny zavatra rehetra ataontsika.

Tsy hita taratra foana amin’ny zavatra ataontsika ny zavatra fantantsika mikasika ny fanarahana ny Mpamonjy. Nametraka fanontaniana izay mety ananantsika indraindray ao anatin’izany toe-javatra izany ny Loholona D. Todd Christofferson ao amin’ny Kôlejin’ny Apôstôly Roambinifolo:

Inona no azonao atao mba hahatonga ny filazantsaran’i Jesoa Kristy tsy ho fitaomana eo amin’ny fiainanao fotsiny fa ho fitaomana mifehy mihitsy ary indrindra indrindra ho ivon’ny tena maha ianao anao? (“When Thou Art Converted,” Liahona, Mey 2004, 11)

Rehefa mandalina ny Jeremia 31 ianao dia asao ny Fanahy Masina hanampy anao hahita fomba hanaovanao ny filazantsaran’ny Mpamonjy ho “ivon’ny maha ianao anao mihitsy.”

Nilaza mialoha ny fitahian’ny Mpamonjy ho an’i Israely i Jeremia

Ho an’ity sahanasa fandalinana ity dia azonao atao ny mandrindra ny mpianatra anaty vondrona ahitana olona telo. Asao ny mpianatra tsiarairay ao anatin’ilay vondrona hamaky ny iray amin’ireto andalan-tsoratra masina ireto, ary hizara ny valim-panontaniana nomen’izy ireo amin’ireo mpianatra hafa ao amin’ny vondrona.

Taorian’ny fampitandremana ny amin’ireo voka-dratsy izay hianjady amin’ny olon-dratsy amin’ny andro farany (jereo ny Jeremia 30:23–24) dia naminany i Jeremia fa hanangona indray ny vahoakan’ny fanekempihavanany ho eo Aminy indray ny Tompo.

Vakio ireto andalan-tsoratra masina manaraka ireto ary jereo izay zavatra hataon’ny Tompo ho an’ny vahoakany:

Jeremia 31:1–3

Jeremia 31:6–10

Jeremia 31:17–20

Inona avy ny sasantsasany amin’ireo fampanantenana izay hitanao?
Inona no ampianarin’izany fanasana izany mikasika ny Tompo?

Vakio ny Jeremia 31:31–33 ary jereo ny fomba hanehoan’ny Tompo ny hatsaram-pony feno fitiavana amin’ny vahoakan’ny fanekempihavanany.

Ahoana no hamintinanao ity fampianarana ity mba ho lasa fanambarana fahamarinana?

Ampio ny mpianatra hahita fa nampanantena hanangona antsika ho eo Aminy ny Tompo amin’ny maha vahoakan’ny fanekampihavanana antsika ary hanoratra ny lalàny ao am-pontsika.
Inona no hevitry ny hoe manana ny lalàn’ny Tompo misoratra ao am-potsika araka ny hevitrao?

Mety hizara hevitra samihafa ny mpianatra. Ampio ny mpianatra hahatakatra fa ny andian-teny hoe misoratra ao am-pontsika (jereo ny andininy 33) dia mety hilazana ny fiovam-po, ny fandalovana fiovana ary ny faniriana hanatanteraka ny sitrapon’ny Ray any An-danitra sy i Jesoa Kristy amin’ny fontsika manontolo. Mety ho tianao ny manamarika fa nampiasa fanoharana mitovy amin’izany ihany koa i Paoly rehefa namariparitra ny Olomasina tany Korinto ho “epistilin’i Kristy … tsy nosoratana tamin’ny ranomainty … tsy teo amin’izay tena vato fisaka, fa teo amin’izay vato fisaka nofo, dia ny fo” (2 Korintiana 3:3).

Misoratra ao am-ponao ve ny filazantsaran’ny Mpamonjy?

Mampisehoa fahatakarana

Hevero ny hanome fahafahana ny mpianatra hanao fanazaran-tena hamaly ilay fanontaniana nosafidiany. Azonao ampiarahana amin’ny mpianatra nandalina fanontaniana hafa ny mpianatra.

Azonao atao ny manasa ny mpianatra hizara ny fomba ahafahan’ny zavatra nianarany manampy olona iray hanao tsy tapaka ny zavatra fantany fa marina. Mba hanampiana ny mpianatra hampiseho izay nianarany sy tsapany dia azonao atao ny mampiseho ireto torolalana manaraka ireto.

Valio ao anatin’ny diary fandalinanao soratra masina ny iray na ny maromaro amin’ireto fanontaniana manaraka ireto:

Inona no porofo hotadiavinao hanamarinana fa manoratra ny lalàny ao am-ponao ny Tompo?
Inona ny zavatra tsapanao fa tokony hataonao hanasana ny Mpamonjy hanoratra ny filazantsarany ao am-ponao?

Azonao atao ihany koa ny mangataka mpianatra vonona ny hizara ny traikefa nananany tamin’ny famantarany fa nanoratra ny lalàny tao am-pony ny Mpamonjy. Azonao zaraina ny fomba nahitanao ny Tompo nanoratra ny lalàny tao am-ponao. Amporisiho ny mpianatra hangataka fanampiana avy amin’ny Tompo ary handray andraikitra manoloana ny fahatsapana voarainy.

Loharanom-pitaovana fanampiny

Inona ny asa mampiseho fa nosoratan’ny Tompo ato am-poko ny lalàny?

Nizara izao ny Loholona Dale G. Renlund ao amin’ny Kôlejin’ny Apôstôly Roambinifolo:

Ny fiovam-po ho an’ny Tompo dia miantomboka amin’ny fanoloran-tena tsy voahozongozona amin’ Andriamanitra ary arahan’ny fanaovana izany fanoloran-tena izany ho isan’ny maha isika antsika. Ny fanamafisan’orina ny fanoloran-tena toy izany ho ao anatintsika dia dingana arahina mandritra ny androm-piainana ary mitaky faharetana sy fibebahana tsy an-kiato. Amin’ny farany, izany fanoloran-tena izany dia lasa anisan’ny maha izy azy antsika, raiki-tapisaka amin’ny fahatsapantsika ny tenantsika manokana, ary hitoetra mandrakariva ao amin’ny fiainantsika. Fa tsy misy hafa amin’ny tsy hanadinoantsika na oviana na oviana ny anarantsika na inona na inona zavatra eritreretintsika, no tsy anadinontsika na oviana na oviana ny fanoloran-tena izay efa voasokitra ao am-pontsika. …

Ny fanekempihavanana dia mampifikitra antsika amin’ny Mpamonjy, ary manampy antsika hanaraka ilay lalana izay mitondra mankany amin’ny fonenantsika any an-danitra. Ny herin’ny fanekempihavanana dia manampy antsika hihazona fiovam-po mahery vaika, hampiorim-paka ny fiovam-pontsika amin’ny Tompo, ary handray ny endrik’i Kristy misoritra bebe kokoa eo amin’ny tarehintsika. Saingy ny fanoloran-tena tsy natao tamin-kitsim-po tamin’ny fanekempihavanana nataontsika dia tsy hanome antsika na inona na inona. (“Fanoloran-tena tsy voahozongozona amin’i Jesoa Kristy,” Liahona, Nôv. 2019, 22, 23)

Nampianatra ny Loholona Kelly R. Johnson ao amin’ny Fitopololahy hoe:

Torak’izany koa, ireo izay manana finoana sy manana ny tenin’ Andriamanitra lalim-paka ao am-pon’izy ireo dia afaka ny hitsentsitra sy handresy ireo zana-tsipika mirehitra izay azo antoka fa halefan’ilay fahavalo mba hamotika antsika. Raha tsy izany, ny finoantsika, ny fanantenana, sy ny faharesen-dahatra ao amintsika dia mety tsy haharitra, ary … isika ihany koa dia mety ho lasibatra.

Nianatra aho fa ny fananana ny tenin’ Andriamanitra lalim-paka ao amin’ny fanahiko, miampy finoana ny Tompo Jesoa Kristy sy ny Sorompanavotany dia mamela ahy hahazo sy hampiasa ny herin’ Andriamanitra mba handresena ny fahavalo sy ny zava-drehetra izay mety hakany fanahy ahy. Rehefa miatrika fanamby isika dia afaka miantehitra amin’ny fampanantenan’ny Tompo. …

Nitombo hery sy afaka nanohitra ireo fakam-panahin’i Satana ny Mpamonjy tamin’ny alalan’ny fiomanana. Rehefa manaraka ny ohatry ny Mpamonjy isika ary miomana amin’ny alalan’ny fandalinana ny tenin’ Andriamanitra sy mampiorim-paka ny finoantsika, dia afaka ihany koa mahazo sy mampiasa ny herin’ Andriamanitra mba hanoherana ny fakam-panahy. (“Hery maharitra,” Liahona, Nôv. 2020, 113)

Sahanasa fianarana fanampiny

Fomba hafa hanombohana ny lesona

Safidy 1

Mba hanombohana ny fotoam-pianarana dia azonao atao ny mampiseho ny sarin’ny Filoha Henry B. Eyring sy ny Filoha Gordon B. Hinckley. Zarao ity tantara manaraka ity izay notantarain’ny Filoha Eyring tamin’ny fotoana nandevenana ny Filoha Hinckley.

Fony aho tompon’andraikitra nisahana ny fampianarana ny filazantsara ho an’ny zatovontsika tamin’ny fandaharam-pianaran’ny seminera maneran-tany, dia hoy izy tamiko sady nokasihiny tamin’ny fanondrony ny tratrako, “Hal a!Nahoana ianao no tsy miezaka kokoa mampiditra ny filazantsara ao am-pon’izy ireo?” (“Things Will Work Out,” Liahona [Ho fahatsiarovana: Filoha Gordon B. Hinckley, Mar. 2008], Médiathèque de l’Évangile)

Asao ny mpianatra hifanakalo hevitra amin’ny fanontaniana toy izao manaraka izao:

Inona araka ny hevitrao ny dikan’ny hoe manana ny filazantsaran’ny Mpamonjy ao am-ponao?
Nahoana no zava-dehibe amin’ny zatovo ny mandray ny filazantsara ao am-pony?

Amporisiho ny mpianatra hikaroka ireo fampanantenana avy amin’ny Mpamonjy amin’ny alalan’ny mpaminany Jeremia ary hanasa ny Fanahy hanampy azy ireo hamantatra ireo fahamarinana ao amin’ny filazantsara izay afaka ny ho tsapany ao am-pony.

Safidy 2

Azonao atao ihany koa ho solon’izany ny manomboka amin’ny alalan’ny fanasana ireo mpianatra mba hanao sary fo mafy sy fo malefaka eny amin’ny solaitrabe. Azonao zaraina fa ao amin’ny soratra masina, ny fo matetika dia tandindon’ny “saina sy ny finiavan’ny olona” (Torolalana ho an’ny soratra masina, “Fo,” Médiathèque de l’Évangile). Mba hanomanana ny mpianatra handalina ny fomba hanoratan’ny Tompo ny lalàny ao am-pontsika dia azonao atao ny mametraka fanontaniana toy izao manaraka izao:

Nahoana no manan-danja ny toe-pontsika?
Raha mafy ny fontsika dia inona no azontsika atao mba hikatsahana ny fanampian’ny Tompo hampalefaka izany?

Mahatsapa ny fampanantenan’ny Tompo ao am-pontsika

Ity sahanasa manaraka ity dia afaka manampy ny mpianatra handalina ny sasany amin’ireo fitahiana lehibe nampanantenain’ny Tompo an’ny vahoakan’ny fanekempihavanany. Safidio ny sasany na ny rehetra amin’ireto andalan-tsoratra masina manaraka ireto ary soraty amin’ny taratasy izany. Alamino hiara-hiasa tsiroaroa na ho ao anaty vondrona kely ny mpianatra. Asao ny vondrona tsirairay avy hisafidy taratasy ary handalina ilay andalana. Afaka miomana hizara ny fitahiana hitany ny vondrona.

Jeremia 31:13–14

Jeremia 31:16–17

Jeremia 31:34

Jeremia 32:17–19

Jeremia 32:26–27

Jeremia 33:6–8

Rehefa vita ny fandalinana ireo andinin-tsoratra masina dia afaka manoratra ny toko sy andinin-tsoratra masina sy ny fitahiana avy amin’ny Tompo eny amin’ny solaitrabe ny solon-tena iray avy amin’ny vondrona tsirairay.

Ny feon-kiran’ny filazantsara ao am-pontsika.

5:42

Afaka mizara ohatra avy amin’ny fiainany ny mpianatra.

Ny hery maharitry ny lalàn’ny Tompo misoratra ao am-po

Mety hahazo tombony avy amin’ny fandalinana ohatra vitsivitsy ana olona izay nanana ny lalàn’ny Tompo nisoratra tao am-pony ny mpianatra. Azonao atao ny manasa ny mpianatra hizara tantara ao amin’ny soratra masina mikasika ny olona na vondron’olona izay namela ny Mpamonjy hanoratra ny lalàny tao am-pon’izy ireo. Raha mila taridalana fanampiny ny mpianatra dia azonao atao ny mizara ohatra tahaka ny hoe:

Ny mpianatra tao Jerosalema taorian’ny fitsanganan’ny Mpamonjy tamin’ny maty (jereo ny Asan’ny Apostoly 2:37–42).
Ny Lamanita tamin’ny andron’ny Mpanjaka Lamônia (jereo ny Almà 23:5–8).
Ny Nefita taorian’ny nisehoan’ny Mpamonjy (jereo ny 4 Nefia 1:2, 15–18).

Rehefa avy nizara ny ohatra nosafidiany ny mpianatra dia azonao atao ny manontany azy ireo ny lesona azontsika ianarana avy amin’ny zavatra tsapan’ireo olona sy ny zavatra nataony ka nitondra ho amin’ny fiovam-pon’izy ireo.