“Sukda ang Imong Nakat-onan 7: Job–Ecclesiastes,” Manwal sa Magtutudlo sa Seminary sa Daang Tugon (2026)
“Sukda ang Imong Nakat-onan 7: Job–Ecclesiastes,” Manwal sa Magtutudlo sa Seminary sa Daang Tugon
Mga Panultihon 1–4; 15–16; 22; 31; Ecclesiastes 1–3; 11–12: Leksiyon 112
Sukda ang Imong Nakat-onan 7
Job–Ecclesiastes
Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Langitnong Amahan ug ni Jesukristo. Kini nga leksiyon makatabang sa mga estudyante nga mamalandong sa ilang mga tumong nga gitakda ug sa paglambo nga ilang nasinati atol sa ilang bag-ohay nga pagtuon sa Daang Tugon.
Pagpangandam sa estudyante: Dapita ang mga estudyante sa pagtambong sa klase nga andam sa pagpakigbahin og asoy o pagtulun-an sa Daang Tugon nga adunay epekto sa ilang espirituwal nga pag-uswag.
Posibleng mga Kalihokan sa Pagkat-on
Ang pagtuon sa imong mga estudyante sa Job hangtod Ecclesiastes nagpunting tingali sa lainlaing resulta kay sa gisukod niini nga leksiyon. Kon mao, ipahiangay ang mga kalihokan sa pagsukod sa paglambo sa nasinati sa mga estudyante gikan sa mga resulta nga gipunting sa inyong klase.
Niini nga leksiyon, makabaton og higayon ang mga estudyante nga masukod ang ilang paglambo sa mosunod nga bahin:
-
Ipasabot nga ang Pagkabanhaw mao ang bahin sa plano sa Langitnong Amahan. (Timan-i: Kini nga kalihokan gibase sa mga pagtulun-an sa Leksiyon 98: “Job 14, 19.”)
-
Pagbati og mas dakong tinguha sa pagsimba sa Langitnong Amahang ug kang Jesukristo. (Timan-i: Kini nga kalihokan gibase sa usa ka sugyot gikan sa Leksiyon 101: “Pasiuna sa Mga Salmo, Bahin 2.” Nakatabang usab tingali sa mga estudyante ang uban leksiyon gikan sa Mga Salmo ug uban pang basahon sa Daang Tugon aron modako ang ilang tinguha nga simbahon ang Ginoo.)
-
Tun-i ang mga kasulatan sa regular nga paagi sa inyong kaugalingon. (Timan-i: Kini nga kalihokan gibase sa mga pagtulun-an gikan sa Leksiyon 107: “Salmo 119.” Bisag wala tun-i sa klase kana nga pihong leksiyon, ang kanunay nga pagdapit sa mga estudyante nga sukdon ang ilang personal nga pagtuon sa kasulatan makatabang sa ilang spirituwal nga pag-uswag.)
Regular nga pagsusi
Sa pagsugod sa leksiyon, ikonsiderr ang pagtabang sa mga estudyante nga makita ang bili sa regular nga pagsusi sa importanteng mga butang, imbes magpokus lang niini dihang anaa nay problema. Pwede kang magpakita og hulagway sa usa ka butang nga nagkinahanglan og regular nga pagsusi. O pwede kang mag-asoy og personal nga istorya kon sa unsang paagi ka gipanalanginan pinaagi sa paggahin og panahon sa pagsusi sa usa ka butang.
-
Nganong importante ang regular sa pagsusi sa mosunod nga mga butang? Unsay posibleng mahitabo kon dili ta mogahin og panahon sa pagsusi niini?
-
Mga Sakyanan
-
Pag-uswag aron makahuman og high school
-
Pisikal nga kahimsog (pananglitan, mata, dalunggan, ngipon, ug katibuk-ang kahimsog)
Pwede nimong ibalhin sa espirituwal nga mga butang ang panaghisgot sa klase pinaagi sa pagpangutana og sama sa:
-
Para nimo, nganong importante ang regular nga pagsusi sa atong espirituwal nga pag-uswag?
-
Sa unsang paagi makatabang ang pagkahibalo sa atong pag-uswag, apil ang mga kinahanglang natong usbon?
Paggahin og panahon sa pagsusi kon sa unsang paagi nakatabang nimo ang imong pagtuon sa Daang Tugon aron mouswag sa espirituwal karong tuiga. Samtang imong susihon ang imong pag-uswag, pwede nimong pamalandongan o isulat ang imong mga tubag sa usa o kapin pa sa mosunod nga mga pangutana:
-
Unsay imong nakat-onan bahin sa Langitnong Amahan ug kang Jesukristo nga importante para nimo?
-
Naa bay pihong mga asoy sa kasulatan o mga pagtulun-an nga nakatandog nimo? Kon mao, sa unsang paagi?
-
Malipayon ba ka sa imong nahimong pag-uswag? Unsa may hinungdan nga miabot ka niining puntoha, o unsay imong mahimo aron matabangan ka nga makuha ang mga resulta nga imong gitinguha?
Human sa panahon sa pagpamalandong ug pagsulat, pagdapit og mga boluntaryo sa pagpakigbahin sa pipila sa ilang mga hunahuna ug impresyon.
Ipasabot nga ang Pagkabanhaw kabahin sa plano sa Langitnong Amahan
Ikonsiderar ang pagsulat sa mosunod nga mga pangutana diha sa pisara. Imbes ipatubag sa mga estudyante ang pangutana, dapita sila sa pagpakigbahin kon kinsa kahay posibleng mangutana niini o sa unsang mga situwasyon nga ipangutana kini sa usa ka tawo.
-
Mabuhi pa ba ta pag-usab human kita mamatay?
Tabangi ang mga estudyante nga masabtan nga ang atong kahibalo bahin sa Pagkabanhaw ni Jesukristo makatabang nato sa pagtubag niining pangutanaha.
Ang mosunod nga kalihokan makatabang sa mga estudyante sa pagpasabot sa ilang nasabtan bahin sa Pagkabanhaw ni Jesukristo. Sa Leksiyon 98: “Job 14, 19,” misulat tingali og parapo ang mga estudyante agi og tubag sa pangutana ni Job: “Kon mamatay ang tawo, mabuhi pa ba siya?” (Job 14:14). Dapita ang mga estudyante sa pagrebyo sa maong parapo diha sa ilang mga journal sa pagtuon ug basahon ang mga pakisayran sa kasulatan nga ila tingaling giapil diha sa ilang tubag.
Kon walay gisulat nga tubag ang mga estudyante sa pangutana ni Job, ikonsiderar ang paghatag sa mosunod nga mga pakisayran sa kasulatan aron ilang basahon.
-
1 Mga Taga-Corinto 15:20–22
Human ang pipila ka minuto sa pagrebyo sa mga estudyante sa ilang gisulat o sa mga kasulatan sa ibabaw, dapita sila sa pagpili og numero tali sa usa hangtod sa upat. Bahina sa gagmayng grupo ang mga estudyante nga lainlain og numero. Dapita sila nga ipakigbahin ngadto sa ilang grupo kon unsaon nila pagpasabot ang Pagkabanhaw ug ang tahas ni Jesukristo niini sa situwasyon sa ubos nga motukma sa numero nga ilang gipili.
-
Usa ka classmate sa eskwelahan nga nakuryoso sa pagtulun-an sa atong simbahan bahin sa kinabuhi human mamatay
-
Usa ka higala sa trabaho ang bag-o lang nahibalo nga adunay makamatay nga sakit ang ilang igsoon
-
Gagmayng bata diha sa klase sa primary
-
Pagsulti diha sa lubong sa usa sa imong mga apohan
Human makahigayon ang mga estudyante sa pagpakigbahin ngadto sa usag usa, pwede nimong hangyoon ang pipila ka estudyante nga andam mopakigbahin sa ilang nakat-onan gikan niini nga kasinatian. Tingali maglakip kini sa bag-ong panabot nga ilang nakat-onan bahin kang Jesukristo ug sa Pagkabanhaw o usa ka butang nga ilang nakat-onan pinaagi sa pagpasabot niini ngadto sa uban.
Pagbati og mas dakong tinguha sa pagsimba sa Langitnong Amahang ug ni Jesukristo
Ingon nga bahin sa Leksiyon 101: “Pasiuna sa Mga Salmo, Bahin 2,” nagsugod na tingali ang mga etudyante sa paghimo og bidyo, balak, drowing, meme, o uban pang ekspresyon sa ilang mga hunahuna ug pagbati bahin sa Langitnong Amahan ug kang Jesukristo. Dapita ang mga estudyante sa pagpangita o paghinumdom sa ilang proyekto. Ipakita ang mosunod nga mga instruksiyon ug mga pangutana nga tubagon sa mga estudyante diha sa ilang journal sa pagtuon. Pwede kang magpatukar og mananoy nga musika samtang gihimo kini sa mga estudyante.
Paggahin og panahon sa paghunahuna bahin sa imong kasinatian sa paghimo niini. Dapita ang Espiritu Santo nga tabangan kang mahinumdoman ang mga pagbati nga imong gipahayag.
-
Unsay imong nakat-onan o gibati bahin sa Langitnong Amahan ug kang Jesukristo sukad nga imong gihimo kini nga ekspresyon sa pagsimba?
-
Unsa nga kausaban, kon anaa, ang imong nabantayan kalabot sa imong paghunahuna o pagbati bahin sa Langitnong Amahan ug kang Jesukristo sukad nga gihimo nimo ni? Unsay imong gibati karon?
-
Samtang nagtan-aw sa imong proyekto, unsay gusto nimong idugang? Unsay imong usbon?
Pwede nimong hatagan og higayon ang andam nga mga estudyante nga wala pa tingali makapakigbahin sa ilang gihimo, kon unsa nga bahin sa kasinatian ang makahuluganon para nila, o kon unsay ilang gibati.
Personal nga magtuon sa mga kasulatan nga regular
Sa Leksiyon 107: “Mga Salmo 119,” naghimo tingali ka og leksiyon nga naggamit og butang [object lesson] pinaagi sa pagpadulom sa mga suga sa lawak klasehan ug pag-on og lampara o flashlight. Kon mao, ikonsiderar ang pagsubli niini nga leksiyon nga naggamit og butang ug hangyoa ang mga estudyante sa pagbasa sa Salmo 119:105. Dapita sila sa pagpakigbahin kon unsay ilang nahinumdoman gikan sa maong leksiyon, lakip kon sa unsang paagi ang pulong sa Dios sama og kahayag sa atong kinabuhi.
Sa maong leksiyon gidapit tingali ang mga estudyante sa paghimo og personal nga tumong sa pagtuon o sa pagpamalandong sa ilang pag-uswag sa tumong nga ilang nang gitakda. Dapita sila sa pagsusi kon kumusta na ang ilang tumong sa pagtuon ug kon sa unsang paagi ni mitabang nila. Aron mahimo kini, pwede nimong ipakita ang mosunod nga mga instruksiyon.
Sa imong journal sa pagtuon, isulat kon kumusta na ang imong pagtuon sa kasulatan. Pwede nimong iapil ang mga tubag sa pipila sa mosunod:
-
Kumusta ang imong kanunay nga pagtuman sa imong tumong?
-
Gibati ba nimo nga gigiyahan ka sa Ginoo samtang magtuon ka sa mga kasulatan? Ngano o nganong dili?
-
Unsang mga babag ang imong giatubang, kon anaa man?
-
Sa unsang paagi nimo pauswagon ang imong pagtuon sa kasulatan?
Dapita ang mga estudyante sa pagpakigbahin sa ilang mga hunahuna. Kon mopakigbahin sila og mga kalamposan, ikonsiderar ang pagpangutana og sama sa “Sa unsang paagi kini nakaapekto sa imong kinabuhi?” o “Unsay imong gihimo aron makab-ot ni nga resulta?” Kon ipakigbahin nila ang giatubang nilang mga kalisdanan, ikonsiderar ang pagdapit sa klase nga mangita og mga kasulatan, mga pamahayag gikan sa mga lider sa Simbahan, o sa pagpakigbahin og personal nga mga kasinatian nga pwedeng makatabang. Paningkamot sa pagmugna og usa ka palibot diin maningkamot ang mga estudyante nga tabangan ug suportahan ang usag usa.
Ikonsiderar sab ang pagpakigbahin sa imong mga tumong sa pagtuon sa kasulatan ug ingon man mga kasinatian.