“Sukda ang Imong Nakat-onan 2: Genesis 12–50; Abraham 1–2,” Manwal sa Magtutudlo sa Seminary sa Daang Tugon (2026)
“Sukda ang Imong Nakat-onan 2: Genesis 12–50; Abraham 1–2,” Manwal sa Magtutudlo sa Seminary sa Daang Tugon
Genesis 42–50: Leksiyon 37
Sukda ang Imong Nakat-onan 2
Genesis 12–50; Abraham 1–2
Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Langitnong Amahan ug ni Jesukristo. Kini nga leksiyon gituyo sa pagtabang sa mga estudyante nga pamalandongan ang mga tumong nga ilang gitakda ug ang paglambo nga ilang nasinati atol sa ilang pagtuon sa Genesis 12–50 ug Abraham 1–2.
Pagpangandam sa estudyante: Dapita ang mga estudyante nga mosulod sa klase nga andam ipakigbahin ang mga paagi diin sila miuswag sa espirituwal tungod sa ilang pagtuon sa Daang Tugon ug Perlas nga Labing Bililhon karong tuiga. Pwede nimong isugyot nga ilang irebyo ang ilang mga journal sa pagtuon o mga mubo nga sulat diha sa ilang mga kasulatan aron matabangan silang mabantayan ang ilang pagtubo ug pagkat-on.
Posibleng mga Kalihokan sa Pagkat-on
Ang pagtuon alang sa imong klase sa Abraham 1–2 ug Genesis 12–50 nagtutok tingali sa laing mga resulta kay sa mga resulta nga gisukod niini nga leksiyon. Kon mao, ipahaom ang mga kalihokan aron masukod ang paglambo sa mga estudyante nga nasinati gikan sa mga resulta nga gitutokan sa inyong klase.
Niini nga leksiyon, makabaton og higayon ang mga estudyante nga masukod ang ilang paglambo sa mosunod nga tulo ka bahin:
-
Mopasabot sa kaimportante sa mahangtorong kaminyoon diha sa plano sa Langitnong Amahan. (Hinumdomi: Kini nga kalihokan gibase sa mga pagtulun-an gikan sa Leksiyon 9: “Genesis 1:28–2:25” ug Leksiyon 29: “Genesis 24.”)
-
Mobati og dugang tinguha sa paghimo ug pagtuman sa mga pakigsaad uban sa Dios. (Hinumdomi: Kini nga kalihokan gibase sa mga pagtulun-an gikan sa Leksiyon 23: “Genesis 12, 17” ug Leksiyon 31: “Genesis 28.”)
-
Moapil diha sa pagpundok sa Israel. (Hinumdomi: Kini nga kalihokan gibase sa mga pagtulun-an gikan sa Leksiyon 24: “Abraham 2:9–11.”)
Pagkahimong mas susama ni Jesukristo
Ang pag-ila kon sa unsang paagi nga ang paglambo sa mga estudyante sa espirituhanong paagi makatabang sa ilang pagpaningkamot nga mahimong mga disipulo ni Jesukristo. Aron matabangan sila sa paghimo niini, ikonsiderar ang pagpakita sa mosunod nga mga hulagway. Sa laing paagi, pwedeng magdrowing ang mga estudyante og hulagway sa duha ka kahoy diha sa ilang mga journal sa pagtuon: usa ka linghod nga kahoy ug usa ka hingkod na nga kahoy.
Hunahunaa nga kini nga mga litrato sa parehas nga kahoy gikuha pipila pa ka tuig ang gintang sa usag usa. Sa inyong mga journal sa pagtuon, ilista ang bisan unsang ebidensya nga imong makita nga nagtubo ang maong kahoy.
Pwedeng magtrabaho nga magparespares ang mga estudyante o bahinon sa gagmayng grupo aron ipakigbahin ang ilang mga lista ug aron tubagon ang mosunod nga mga pangutana.
-
Unsaon nato pagtandi kini nga mga litrato sa kahoy ngadto sa atong espirituhanon nga paglambo nga mas mahimong sama sa Langitnong Amahan ug ni Jesukristo?
-
Unsa ang pipila ka paagi nga atong mailhan kon sa unsang paagi ang atong pagtubo sa espirituhanong paagi ug nahimong mas sama sa Langitnong Amahan ug ni Jesukristo?
Ipasabot nga mailhan nato ang atong espirituwal nga paglambo pinaagi sa pagrebyo sa unsay atong nakat-onan bahin sa Langitnong Amahan ug ni Jesukristo ug kon sa unsang paagi kini nakatabang nato nga mapauswag ang atong relasyon ngadto Kanila.
Dapita ang mga estudyante nga mogahin og pipila ka minuto sa pagrebyo sa unsay ilang nakat-onan ug nagamit gikan sa kasinatian sa seminary karong tuiga. Mahimo nila kini pinaagi sa pagtan-aw sa ilang mga kasulatan ug mubo nga mga sulat.
-
Unsay imong nakat-onan sa seminary nga nakatabang nimo sa pag-uswag sa espirituhanong paagi ug mahimong mas sama kang Jesukristo?
-
Unsa nga ebidensiya sa espirituwal nga paglambo ang imong nabantayan sa imong kinabuhi?
Ipasabot ang kaimportante sa mahangtorong kaminyoon diha sa plano sa Langitnong Amahan
Kini nga pagbansay makatabang sa mga estudyante nga mapasabot ang kaimportante sa mahangtorong kaminyoon diha sa plano sa Langitnong Amahan. Dapita ang mga estudyante nga tan-awon ang imahe nga ilang gidrowing sa Leksiyon 29: “Genesis 24.” Hatagi og panahon ang mga estudyante sa pagrebyo sa unsay ilang nakat-onan bahin sa kaminyoon diha sa Leksiyon 9: “Genesis 1:28–2:25” ug Leksiyon 29: “Genesis 24.”
Pwedeng irebyo sa mga estudyante ang bisan unsang mubo nga mga sulat o mga panglantaw nga ilang girekord diha sa ilang mga journal sa pagtuon. Pwede usab nilang irebyo ang mosunod nga mga bersikulo ug ang bisan unsa nga ilang gimarkahan niini:
Genesis 1:27–28
Genesis 2:18, 21–24
Doktrina ug mga Pakigsaad 49:15–17
Doktrina ug mga Pakigsaad 131:1–4
Aron tabangan ang mga estudyante sa pagpasabot sa ilang pagsabot sa mahangtorong kaminyoon, ipakigbahin ang senaryo nga sama sa mosunod: Pwede nimong ipahaom ang senaryo base sa panginahanglan sa imong mga estudyante.
Karong adlawa sa eskwelahan, nag-istorya mo sa pipila nimo ka higala bahin sa inyong mga plano sa umaabot. Miingon ka nga usa sa imong mga plano ang magminyo. Usa sa imong mga higala ang nangutana: “Morag dako man kag potensyal kon magtrabaho. Nganong gusto man kang magminyo?”
-
Gamit ang imong nakat-onan bahin sa mahangtorong kaminyoon diha sa plano sa Langitnong Amahan, unsaon nimo pagtubag ang imong higala?
Ang mga estudyante mahimong mogahin og pipila ka minuto aron planohon ang ilang mga tubag. Awhaga ang mga estudyante sa pagpangita og pipila ka kasulatan nga ilang natun-an diha sa Daang Tugon o uban pang lugar. Hangyoa sila nga ipakigbahin kadtong mga kasulatan isip kabahin sa ilang mga pagpasabot.
Ikonsiderar ang pagpares-pares sa mga estudyante. Dapita ang kada estudyante nga magpraktis sa pagpasabot kon unsay ilang isulti ngadto sa ilang higala.
Mobati og dugang tinguha sa paghimo ug pagtuman sa mga pakigsaad uban sa Dios
Ang mga estudyante mahimong magdrowing og imahe sa damgo ni Jacob isip kabahin sa Leksiyon 31: “Genesis 28.” Pwede silang motan-aw sa ilang imahe isip kabahin sa ilang pagrebyo sa mga pakigsaad. Pwede usab nimong ipakita ang mosunod nga mga hulagway. Dapita ang mga estudyante nga isulti ang ilang nahimdoman gikan sa panghitabo nga gipakita bahin sa paghimo ug pagtuman sa mga pakigsaad (tan-awa usab sa Leksiyon 23: “Genesis 12, 17”). Kon makatabang, pwedeng rebyohon sa mga estudyante ang Genesis 28:10–21.
Pwede nimong pahinumdoman ang mga estudyante nga mihimo og pakigsaad si Jacob uban sa Dios human mibiya sa balay sa iyang mga ginikanan ug nagkinaugalingon. Isip kabahin sa Leksiyon 31:Genesis 28, gipamalandongan sa mga estudyante ang ilang kahigayonan sa paghimo og mga pakigsaad uban sa Dios diha sa templo. Ang mga estudyante mahimong adunay gisulat nga mga tubag diha sa ilang mga journal sa pagtuon sa mosunod nga mga pangutana:
-
Unsa ang gisaad nga mga panalangin ang imong nasinati gikan sa pagpaningkamot nga tumanon ang imong mga pakigsaad uban sa Dios o pinaagi sa pagserbisyo diha sa templo?
-
Unsa nga mga sitwasyon ang imo tingaling maatubang sa umaabot diin makabenepisyo ka gikan sa pag-atiman ug proteksiyon nga gisaad sa Dios sa mga tawo nga mohimo og mga pakigsaad uban Kaniya?
Kon haom, dapita ang mga estudyante nga rebyohon ang mga tubag nga ilang girekord. Human sa igong panahon, hatagi ang mga estudyante og papel ug mga sobre alang sa mosunod nga kalihokan.
Gamit ang imong nakat-onan bahin sa paghimo ug pagtuman sa mga pakigsaad uban sa Dios, sulati ang imong kaugalingon nga imong ablihan pagkahuman sa high school. Isulat kon nganong importante para nimo ang paghimo ug pagtuman sa mga pakigsaad uban sa Dios diha sa templo ug sa tibuok nimong kinabuhi. Apila kon sa unsang paagi ang paghimo og mga pakigsaad uban sa Dios makadugang sa imong pag-akses sa Iyang paggiya, pag-atiman, ug proteksiyon.
Moapil sa pagpundok sa Israel
Sa Leksiyon 24: “Abraham 2:9–11,” ang mga estudyante tingali naghimo og plano nga moapil sa pagpundok sa Israel. Kon mao, hatagi og panahon ang mga estudyante nga rebyohon ang ilang mga plano. Apil tingali sa ilang mga plano ang mga paagi sa pagpakigbahin sa ebanghelyo, sa pagtabang sa uban sa paghimo o pagtuman sa mga pakigsaad uban sa Ginoo, o sa pagpanalangin sa uban pinaagi sa buhat sa templo ug family history. Ang mga estudyante nga wala pa makahimo og plano mahimong mogamit sa mosunod nga visual aron makahimo og usa.
Mahimong nakahimo ka og mga plano nga moapil sa pagpundok sa Israel. Pamalandonga kini nga mga plano pinaagi sa pagkompleto sa mosunod nga graphic diha sa imong journal sa pagtuon.
Dapita ang pipila ka estudyante nga gustong mopakigbahin kon unsa ang ilang mga kasinatian sa paghimo sa ilang mga plano ug kon sa unsang paagi nakaapekto nila ang maong mga kasinatian. Hangyoa ang mga estudyante nga ipakigbahin kon sa unsang paagi ang pag-apil sa pagpundok sa Israel nakaimpluwensiya sa ilang pagbati para sa Langitnong Amahan ug ni Jesukristo.
Dapita ang mga estudyante nga padayon nga tinguhaon ang tabang sa Espiritu Santo aron masayod sa mga paagi nga makaapil sila sa pagpundok sa Israel. Awhaga ang mga estudyante nga wala pa tingali makahimo sa ilang plano nga magsugod na karon. Pagpamatuod sa mga panalangin nga ihatag sa Ginoo kanila ug sa uban samtang ilang buhaton ang ilang mga plano.