“Genesis 28: Mga Pakigsaad uban sa Ginoo,” Manwal sa Magtutudlo sa Seminary sa Daang Tugon (2026)
“Genesis 28: Mga Pakigsaad uban sa Ginoo,” Manwal sa Magtutudlo sa Seminary sa Daang Tugon
Genesis 24–33: Leksiyon 31
Genesis 28
Mga Pakigsaad uban sa Ginoo
Human ang iyang kinabuhi gihulga sa iyang igsoon nga si Esau, si Jacob gisugo sa iyang mga ginikanan nga molangyaw ngadto sa yutang natawhan sa iyang inahan aron mangita og pangasaw-onon. Samtang nagbiyahe, siya adunay usa ka panan-awon nga nagdala kaniya sa pagsulod ngadto sa pakigsaad ni Abraham uban sa Dios. Kini nga leksiyon makatabang sa mga estudyante nga mobati og dugang nga tinguha sa paghimo og mga pakigsaad uban sa Dios diha sa templo.
Pagpangandam sa estudyante: Ikonsiderar ang pagdapit sa mga estudyante nga rebyohon ang mga saad sa pakigsaad ni Abraham (Abraham 2:8–11). Pwedeng awhagon ang mga estudyante nga sulayan ug ipasabot ngadto sa usa ka sakop sa pamilya ang bahin sa pakigsaad ni Abaraham ug kon nganong importante kini para nila.
Posibleng mga Kalihokan sa Pagkat-on
Nganong dunay mga pakigsaad?
Mahimo kang magsugod sa klase pinaagi sa pagpakita og litrato sa templo ug pagkanta sa kanta sa Primary nga “Gusto Ko nga Makita ang Templo” (Songbook sa mga Bata, 99).
Dayon ipakita ang mosunod nga prompt. Dapita ang mga estudyante nga pilion ang pamahayag nga labing tinuod kanila. Sa laing paagi, mahimo nimong ipakigbahin ang unang bahin lamang sa prompt, ug ang mga estudyante makahuman sa pamahayag sa usa o duha ka kapahayag nga tukma nga nagpakita sa ilang mga pagbati ug mga hunahuna.
Kon maghunahuna ko mahitungod sa pag-adto sa templo sa umaabot aron mohimo og mga pakigsaad uban sa Dios, ako:
-
Wala kahibalo kon unsay hunahunaon. Wala ko maghunahuna og maayo bahin niini.
-
Naghinam-hinam na. Naghandom gayod ko niana nga adlaw.
-
Kulbaan ko og gamay. Wala ko kahibalo kon unsay dahoman.
-
Wala koy makita nga dakong punto niini.
Hatagi ang mga estudyante og panahon sa pagsulat sa ilang mga tubag. Dapita ang mga estudyante nga magtinguha og inspirasyon gikan sa Espiritu Santo atol sa leksiyon. Ang Espiritu Santo makatabang nila sa pagpasalamat sa kaimportante sa paghimo og mga pakigsaad uban sa Dios.
Damgo ni Jacob
Dapita ang mga estudyante sa pagsulat sa mosunod nga dili kompleto nga kamatuoran diha sa ilang mga journal sa pagtuon. Mahimo usab nimong isulat kini diha sa pisara ug idugang niini kining sa tibuok leksiyon.
Niini nga leksiyon, imong tun-an ang kabahin ni Jacob sa Genesis 28. Sa Genesis 28:3–4, 12–20, ang Dios mitukod og pakigsaad ngadto kang Jacob, nga gidawat ni Jacob. Gikan niini nga asoy, atong makat-onan ang importante nga mga leksiyon kabahin sa bili sa paghimo og mga pakigsaad uban sa Dios. Samtang magtuon ka niini nga leksiyon, pangita og mga paagi aron makompleto kini nga kamatuoran: Samtang kita mohimo ug motuman kita sa mga pakigsaad uban sa Dios, Siya …
Hangyoa ang mga estudyante sa pagpakigbahin kon unsay ilang nahinumdoman mahitungod sa pakigsaad sa Ginoo nga gihimo ni Abraham. Alang sa piho nga mga detalye niini nga pakigsaad, tan-awa sa Leksiyon 23: “Genesis 12, 17.” Human sa pagpakigbahin sa mga estudyante, i-summarize ang mosunod nga paragraph sa imong kaugalingong mga pulong.
Bisan si Jacob mao ang apo ni Abraham, tingali gibati niya nga ang mga panalangin sa pakigsaad ni Abraham dili maabot niya. Si Jacob wala pa maminyo diha sa pakigsaad. Usab, ang panagsumpaki bahin sa katungod sa pagkapanganay ug panalangin migiya ni Esau sa pagtinguha sa pagpatay ni Jacob (Genesis 27:41). Sa pagpanalipod ni Jacob ug pagseguro nga siya adunay oportunidad nga maminyo diha sa pakigsaad, ang mga ginikanan ni Jacob misugo kaniya nga mohawa sa balay ug mobiyahe og daghang gatosan ka milya ngadto sa lugar nga natawhan sa iyang inahan (tan-awa sa Genesis 27:42–46; 28:1–2). Kini nga panaw modala ni Jacob ngadto sa layo gikan sa Canaan, ang yuta nga maoy gisaad kaniya sa katungod sa pagkapanganay.
Basaha ang Genesis 28:10–15, nga mangita sa unsay nasinati ni Jacob usa ka gabii atol sa iyang panaw.
Ikonsiderar ang pagdapit sa mga estudyante sa pagdrowing og hulagway sa unsay nakita ni Jacob sa iyang damgo. Mahimong ipakigbahin sa mga estudyante ang ilang gidrowing ngadto sa usa ka kapares ug ipasabot kon unsay ilang nasabtan sa mga bersikulo.
Mahimo dayon nimong ipakita ang mosunod nga imahe isip usa ka hulagway sa panan-awon.
-
Unsa nga mga saad nga gikan sa pakigsaad ni Abraham ang gitanyag sa Ginoo ngadto ni Jacob niini nga mga bersikulo?
-
Unsa ang dugang nga mga saad ang gihatag sa Ginoo kang Jacob sa bersikulo 15?
Mahimo nimong dapiton ang mga estudyante sa pagdugang niining dugang nga mga saad ngadto sa ilang kamatuoran. Mahimo nimong ilista ang mga tubag diha sa pisara. Ang mga tubag mahimong maglakip sa makauban nato, manalipod ug moatiman kanato, dili mobiya kanato.
-
Ngano kaha nga kini nga mga saad mahimong makahuloganon kaayo ngadto ni Jacob niining higayona?
Aron matabangan ang mga estudyante nga mas masabtan kini nga mga saad, dapita sila sa pagkompleto sa mosunod nga kalihokan nga magkapares o gagmay nga mga grupo. Mahimo nimong awhagon ang mga estudyante sa pagpangita og dugang nga mga kasulatan o mga pamahayag nga mokompirmar niini nga mga saad.
Tun-i ang mosunod nga mga kasulatan ug pamahayag, nga mangita kon sa unsang paagi mapalawon ang imong pagsabot sa mga saad sa Ginoo nga gihimo ni Jacob.
Juan 14:18
Mga Buhat 17:27 (timan-i sa Hubad ni Joseph Smith)
Si Elder Dale G. Renlund sa Korum sa Napulog Duha ka Apostoles miingon:
Samtang maglakaw kamo sa dalan sa pakigsaad, gikan sa bunyag ngadto sa templo ug sa tibuok kinabuhi, mosaad ako kaninyo og gahom sa pagbuntog sa kinaiyanhong pamaagi sa kalibotan—gahom sa pagkat-on, gahom sa paghinulsol, ug gahom nga mabalaan, ug gahom nga makakaplag og paglaom, kahupay, ug gani kamaya samtang mag-atubang kamo sa mga hagit sa kinabuhi. Mosaad ako kaninyo ug sa inyong pamilya og proteksyon batok sa impluwensiya sa kaaway, ilabina kon ang templo maoy unang tumong sa inyong kinabuhi. (“Pagkab-ot sa Gahom sa Dios pinaagi sa mga Pakigsaad,” Liahona, Mayo 2023, 37)
Mahimong makatabang alang sa mga estudyante sa pagsabot nga ang paghimo og mga pakigsaad dili makaluwas nato gikan sa mga hagit sa kinabuhi. Hinoon, gitudlo ni Elder D. Todd Christofferson nga kini nga mga pakigsaad mohatag og “dakong paglaom nga makalikay sa malikayan nga kasubo sa usa ka bahin ug malamposong mosagubang sa dili malikayan nga mga kaalaot sa kinabuhi sa laing bahin” (“Nganong Mahinungdanon ang Dalan sa Pakigsaad,” Liahona, Mayo 2021, 117).
-
Hain niini nga mga saad ang labing makahuloganon nganha kanimo?
Ang mga pagbati ni Jacob mahitungod sa iyang kasinatian
Tingali makatabang ang pagpakita sa mosunod nga pamahayag ug mga pangutana. Dapita ang mga estudyante sa pagbasa ug sa paghisgot nga magpares o gagmay nga mga grupo. (Ikonsiderar ang pagpakigbahin ngadto sa mga estudyante nga ang mga pulong nga “nahadlok” ug “pagkabalaan” nagpasabot nga si Jacob nahingangha. Ang “makalilisang” mas maayong hubaron og “makapahingangha.”)
Basaha ang Genesis 28:16–21, nga mangita sa reaksiyon ni Jacob tungod sa iyang kasinatian.
-
Unsa nga mga pagbati mahitungod sa Ginoo ang imong nakita sa gipahayag ni Jacob?
-
Sa unsang paagi nga kini nga mga pagbati makadasig kaniya sa paghimo og pakigsaad uban sa Ginoo?
Human ang mga estudyante adunay higayon sa paghisgot, mahimo nimong dapiton ang pipila sa pagpakigbahin diha sa klase kon unsay ilang nakat-onan.
Ang paghatag og mga oportunidad alang sa mga estudyante sa pagpakigbahin sa usag usa kon unsay ilang nakat-onan makadugang og pagsalig sa pag-apil diha sa mga panag-istoryahanay bahin sa ebanghelyo. Alang sa dugang nga pagbansay kon unsaon pagdasig ang mga estudyante sa pagpakigbahin ngadto sa uban, tan-awa sa “Awhaga ang mga tigkat-on sa pagpaambit sa mga kamatuoran nga ilang nakat-onan,” diha sa Pagpalambo sa mga Kahanas sa Magtutudlo. (Pagtudlo sumala sa Pamaagi sa Manluluwas [2022], 35)
-
Unsa nga mga pulong o mga hugpong sa mga pulong gikan sa mga bersikulo 16–21 nga may kalabotan sa mga templo sa modernong panahon?
Mahimong ipasabot sa mga estudyante ang mga pulong o mga hugpong sa mga pulong nga sama sa “pagkamatuod ang Ginoo ania niining dapita” (bersikulo 16); “ang balay sa Dios” ug “ang ganghaan sa langit” (bersikulo 17); “Bethel” (bersikulo 19), buot pasabot “balay sa Dios” (tan-awa sa footnote 19a); ug “naghimo ug usa ka panumpa” (bersikulo 20). Tingali ganahan nimong dapiton ang mga estudyante sa pagmarka niini nga mga hugpong sa mga pulong diha sa ilang mga kasulatan.
Mahimong dugangan sa mga estudyante ang ilang mga drowing sa panan-awon pinaagi sa pagsulat og “balay sa Dios,” “ganghaan sa langit,” o “templo” bisan asa duol sa ubos sa hagdanan.
Maghimo og mga pakigsaad uban sa Ginoo
Dapita ang mga estudyante sa pagbuhat sa mosunod nga kalihokan diha sa ilang mga journal sa pagtuon. Tingali makatabang ang pagsulti sa mga estudyante nga mamalandong sila niini nga mga tubag sa umaabot nga leksiyon. Gamiton sa mga estudyante kon unsay ilang gisulat dinhi sa pagkompleto sa pagsukod sa kahibalo nga kalihokan sa Leksiyon 37 “Sukda ang Imong Nakat-onan 2.”
Aron maandam ang mga estudyante sa pagsulat sa ilang mga tubag, mahimong ipakigbahin nimo ang mosunod nga parapo sa imong kaugalingong mga pulong.
Samtang mibiya si Jacob sa panimalay sa iyang mga ginikanan ug milakaw sa iyang kaugalingon, mihimo siya og mga pakigsaad uban sa Dios. Ang Dios misaad nga ubanan, atimanon, ug panalipdan si Jacob. Sa pipila ka mubo nga katuigan, mag-atubang ka og daghang kapilian bahin sa unsay sunod buhaton sa imong kinabuhi. Lakip niini nga mga desisyon mao ang oportunidad sa paghimo og mga pakigsaad uban sa Dios diha sa templo. Hunahunaa kining higayona sa imong umaabot samtang motubag ka sa mosunod nga mga pangutana diha sa inyong journal sa pagtuon:
-
Unsa ang gisaad nga mga panalangin ang imong nasinati gikan sa pagpaningkamot sa pagsunod sa imong mga pakigsaad uban sa Dios o pinaagi sa pagserbisyo diha sa templo?
-
Unsa kaha nga mga sitwasyon ang inyong atubangon sa umaabot diin makabenepisyo ka gikan sa pag-atiman ug pagpanalipod nga gisaad sa Dios ngadto sa mga tawo nga mohimo og mga pakigsaad ngadto Kaniya?
Ikonsiderar ang pagpakigbahin sa imong pagpamatuod kon giunsa nimo pagsinati ang mga saad nga may kalabotan sa paghimo ug pagtuman sa mga pakigsaad uban sa Ginoo.