“Genesis 29–33: ‘Ipatigbabaw ang Dios Labaw sa Tanan,’” Manwal sa Magtutudlo sa Seminary sa Daang Tugon (2026)
“Genesis 29–33: ‘Ipatigbabaw ang Dios Labaw sa Tanan,’” Manwal sa Magtutudlo sa Seminary sa Daang Tugon
Genesis 24–33: Leksiyon 32
Genesis 29–33
“Ipatigbabaw ang Dios Labaw sa Tanan”
Ang propeta nga si Jacob maoy usa ka ehemplo sa pagtugot sa Dios nga mopatigbabaw sa iyang kinabuhi. Naningkamot siya pag-ayo aron maminyo diha sa pakigsaad, maangkon ang mga panalangin sa Ginoo diha sa iyang adlaw-adlaw nga buluhaton, ug mohimo sa unsay gipabuhat kaniya sa Ginoo aron maayo ang mga relasyon sa iyang pamilya. Kini nga leksiyon makatabang sa mga estudyante nga madugangan ang ilang kaandam sa pagpatigbabaw sa Dios diha sa ilang kinabuhi.
Pagpangandam sa estudyante: Ikonsiderar ang pagdapit sa mga estudyante nga ilista ang mga paagi nga naimpluwensiyahan sa Dios ang ilang kinabuhi. Kon gustong makakat-on og dugang ang mga estudyante bahin niini nga hilisgotan, pwede nilang paminawon, tan-awon, o basahon ang mga bahin sa pakigpulong ni Presidente Russell M. Nelson nga, “Ipatigbabaw ang Dios Labaw sa Tanan” (18:51).
Mga bidyo: “Ipatigbabaw ang Dios Labaw sa Tanan” (18:51) gikan sa time code nga 12:18 hangtod 13:02, “Si Jacob ug ang Iyang Pamilya” (3:00)
Posibleng mga Kalihokan sa Pagkat-on
Ang mga impluwensiya sa atong kinabuhi
Ikonsiderar ang pagdapit sa mga estudyante sa paghimo og lista diha sa ilang journal sa pagtuon sa pipila ka mga impluwensiya diha sa ilang kinabuhi. Tingali iapil nila ang ilang mga higala, mga magtutudlo, mga magtatambag, mga personalidad sa media, mga ginikanan, mga propeta, ang Ginoo, ug bisan ang kaugalingon nilang mga hunahuna ug mga ambisyon.
Dayon dapita sila nga mahunahunaong i-rank ang impluwensiya sa matag aytem nga naa sa lista. Pwedeng ibutang sa mga estudyante ang numero 1 para sa labing lig-on nga impluwensiya sa ilang kinabuhi, dayon numero 2, ug uban pa. O pwedeng isulat sa mga estudyante ang mga pulong nga “taas,” “kasarangan,” o “ubos” aron ipakita ang gidak-on sa impluwensiya sa kada aytem.
Sa dili pa nila basahon ang mosunod nga pamahayag, makatabang tingali ang pagpasabot nga ang pagtugot sa Dios nga mopatigbabaw mao ang pagtugot Niya nga mahimong labing dako nga impluwensiya sa atong kinabuhi.
Basaha ang mosunod nga dinasig nga mga pangutana ni Presidente Russell M. Nelson. Pamalandongi kon unsaon nimo kini pagtubag.
Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugotan ang Dios nga maoy mahimong labing importante nga impluwensya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa inyong buhaton sa matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on? (“Ipatigbabaw ang Dios Labaw sa Tanan,” Liahona, Nob. 2020, 94).
Dapita ang mga estudyante sa pagsulat sa ilang mga tubag niining mga pangutanaha diha sa ilang mga journal sa pagtuon. Mahimong maglakip kini sa mga paagi nga andam silang tugotan ang Dios nga mopatigbabaw o mahimong labing dako nga impluwensiya sa ilang kinabuhi. Pwede usab silang maglakip og mga paagi nga dili sila andam ug kon nganong lisod kini para nila.
Tinguhaa ang giya sa Espiritu Santo aron hatagan ka og mga panglantaw ug tabang sa bisan unsa sa imong mga kabalaka o mga kalisdanan, ug sa pagtabang nimo nga mobati og dugang nga tinguha sa pagtugot Kaniya nga mas mopatigbabaw sa imong kinabuhi.
Ang ehemplo ni Jacob
Dihay usa ka okasyon, diin si Jacob “nahadlok ug nabalaka pag-ayo” (Genesis 32:7), nabalaka sa kaluwasan niya ug sa iyang pamilya. Siya “nakigdumog” (Genesis 32:25) tibuok gabii, nga determinadong makuha ang mga panalangin sa Ginoo alang sa lisod nga kahimtang nga iyang giatubang. (Tun-an nimo ang dugang niini nga sitwasyon sa ulahing bahin sa leksiyon.) Agig tubag, ang Ginoo misaad nga tabangan si Jacob, pero Iya usab nga giusab ang ngalan ni Jacob.
Basaha ang Genesis 32:28 ug markahi kon unsa ang giusab sa Ginoo sa ngalan ni Jacob ug kon ngano.
Ikonsiderar ang pagdapit sa mga estudyante sa pagsulat diha sa ilang mga kasulatan nga ang usa sa mga kahulogan sa ngalan nga Israel mao ang “Ipatigbabaw ang Dios labaw sa tanan.”
Kini nga leksiyon nagpasabot og tulo ka bahin sa kinabuhi ni Jacob, o Israel, diin iyang gitugotan ang Dios nga mopatigbabaw. Samtang magtuon ka, pangitaa ang mga pananglitan sa mosunod nga baroganan: Kay andam kita nga tugotan ang Dios nga mopatigbabaw sa atong kinabuhi, Siya mopanalangin kanato sa tanang butang.
Pag-andam og mga kopya sa mosunod nga mga handout ug buhata ang usa sa mga mosunod:
-
Ihatag kini nga mga handout sa tulo ka estudyante o grupo sa mga estudyante sa sayo pa ug dapita sila nga giyahan ang klase pinaagi sa materyal.
-
Dapita ang mga estudyante nga kompletohon ang tanang tulo ka kalihokan diha sa gagmayng grupo.
-
Hatagi ang mga estudyante og sukaranang pagpasabot sa tulo ka handout ug tugoti ang mga estudyante nga mopili og usa o duha nga tun-an. Ang usa ka paagi sa paghatag og katibuk-ang pagpasabot mao ang pagtan-aw sa “Si Jacob ug ang Iyang Pamilya” (3:00).
Kon gitun-an sa mga estudyante kining tulo ka seksiyon uban sa grupo, dapita sila nga ipakigbahin ang ilang nakat-onan ug kon sa unsang paagi kini makahuloganon ngadto kanila. Kon dili nila natural nga hisgotan kini, pangutan-a sila sa ilang nakat-onan bahin sa Ginoo.
Ikonsiderar ang paghangyo sa mga estudyante nga ipakigbahin ang ubang pananglitan nga ilang nakita sa mga tawo nga gitugotan ang Dios nga mopatigbabaw sa ilang kinabuhi.
Pagtugot sa Dios nga mopatigbabaw diha sa imong kinabuhi
Paggahin og higayon sa pagpamalandong sa unsay imong nakat-onan o gustong mahinumdoman gikan niini nga leksiyon. Tinguhaa ang giya sa Espiritu Santo samtang idugang nimo ang imong mga hunahuna diha sa imong entry sa journal gikan sa sinugdanan sa leksiyon. Apila ang mga rason kon nganong gusto nimong mopatigbabaw ang Dios diha sa imong kinabuhi. Pwede usab nimong ilakip ang imong gibati aron mahimong madugangan ang imong tinguha nga tugotan ang Dios nga mopatigbabaw diha sa imong kinabuhi.
Kon dili ra kaayo kini personal, dapita ang mga estudyante sa pagpakigbahin sa ilang mga hunahuna. Ikonsiderar usab ang pagpakigbahin sa imong kaugalingong mga hunahuna ug pagpamatuod.