Genesis 42–45

• Unsa ang pipila ka paagi nga nag-antos si Jose tungod sa gibuhat sa iyang mga igsoon?

• Unsay imong bation kon ang usa ka tawo mohimoniini kanimo?

• Unsay makapalisod sa pagpasaylo sa usa ka tawo?

Pamalandongi kon unsay sagad nimong tubag kon adunay mohimo o mosulti og butang nga makapasakit kanimo. Samtang magtuon ka karong adlawa, hatagi og pagtagad ang bisan unsang impresyon nga imo tingaling madawat gikan sa Espiritu Santo aron tabangan ka nga makahibalo kon unsaon nimo pagsunod ang ehemplo sa Manluluwas sa pagpasaylo.

Aron tun-an ang istorya sa panagkita pag-usab ni Jose ug sa iyang mga igsoon, pwede nimong bahinon ang mga estudyante sa tulo ka grupo. Ang kada estudyante sa grupo mahimong magtuon og usa sa tulo ka summary ug mga tudling sa kasulatan. Dayon pwedeng tudloan sa mga estudyante ang ubang sakop sa grupo sa ilang bahin sa istorya.

Sa laing paagi, pwede nimong ipasalida ang animated video nga “Si Jose ug ang Kagutom” (2:26) gikan sa time code nga 00:00 hangtod 01:41 diha sa ChurchofJesusChrist.org.

2:26

Rebyoha ang mosunod nga mga summary ug tun-i ang kaubang mga bersikulo.

Summary 1: Daghang tuig human nila gibaligya si Jose isip usa ka ulipon, ang iyang mga igsoon mibyahe ngadto sa Ehipto aron mangita og kahupayan tungod sa kagutom. Dihang gipresentar ang ilang kaugalingon sa atubangan ni Jose, nga karon ikaduha na sa magmamando sa tibuok Ehipto, wala makaila ang mga igsoon kaniya. Kay wala mahibalo nga si Jose nakaila ug nakasabot nila, gipahayag sa mga igsoon ang ilang kaguol ug pagmahay sa ilang gihimo kaniya daghang tuig na ang milabay.

Basaha ang Genesis 42:21–24, nga mangita kon unsay reaksyon ni Jose dihang nadungog niya ang iyang mga igsoon nga naghisgot kon giunsa nila siya pagtratar.

Summary 2: Mihatag si Jose og pagkaon para sa pamilya apangipriso si Simeon ug gisugo ang ubang igsoon nga dili mobalik sa Ehipto gawas kon ilang dad-on ang kinamanghorang igsoon, si Benjamin, uban kanila. Mipauli ang mga managsoon, pero dihang nahutdan na usab og pagkaon ang pamilya, mibalik sila sa Ehipto uban ni Benjamin.

Basaha ang Genesis 43:30, nga mangita kon unsay reaksyon ni Jose dihang iyang nakita ang iyang igsoon nga si Benjamin.

Summary 3: Gisulayan ni Jose kon gimahal ba sa iyang mga igsoon si Benjamin pinaagi sa pagpasangil nga nangawat siya ug gihadlok niya nga prisohon. Gitanyag ni Juda ang iyang kinabuhi agig puli kang Benjamin.

Basaha ang Genesis 45:1–2, nga mangita kon unsay reaksyon ni Jose human gitanyag ni Juda ang iyang kinabuhi aron protektahan si Benjamin.

• Unsa untay makatabang kang Jose aron mahinumdoman ang Langitnong Amahan ug si Jesukristo dihang naatubang niya ang iyang mga igsoon?

Basaha ang mosunod nga mga kasulatan, nga mangita kon unsay makatabang sa usa ka tawo nga gibuhatan og dili maayo aron masayod bahin sa Langitnong Amahan ug ni Jesukristo.

Lucas 6:36

Mga Taga-Efeso 4:31–32

Mga Taga-Colosas 3:13

• Unsay imong ipakigbahin gikan niini nga mga bersikulo?

Basaha ang Genesis 45:3–8 ug 9–15, nga mangita kon giunsa pagtubag ni Jose ang iyang mga igsoon.

• Unsay atong makat-onan bahin sa pagkahimong sama sa Langitnong Amahan ug ni Jesukristo gikan sa ehemplo ni Jose?

Aron tabangan ang mga estudyante nga masabtan kini nga kamatuoran, pwede nimong ipasalida ang bidyo nga “Pagpasaylo sa Uban: Usa ka Mensahe sa Pasko sa Pagkabanhaw gikan ni Presidente Russell M. Nelson” (5:01) gikan sa ChurchofJesusChrist.org.

5:2

Ang laing opsiyon mao ang pagtuon sa mosunod nga pamahayag.

Gitabangan kita ni Presidente Russell M. Nelson nga masabtan kon unsaon nato pagsalig sa gahom sa Manluluwas kon kita mopasaylo sa uban.

17:17

Kon ang kapasayloan sa karon ingon og imposible, pangayo og gahom pinaagi sa makatubos nga dugo ni Jesukristo sa pagtabang kaninyo. Kon kini inyong buhaton, mosaad ko og personal nga kalinaw ug usa ka kusog nga espirituhanong paglambo.

Sa dihang ang Manluluwas mitubos sa tanang kaatawhan, Siya miabli og usa ka dalan diin kadtong mosunod Kaniya makagamit sa Iyang makaayo, makalig-on ug makatubos nga gahom. Kini nga espirituhanong mga kahigayonan maanaa sa tanan kinsa magtinguha sa pagpaminaw Kaniya ug pagsunod Kaniya. (“Ang Gahom sa Kadasig sa Espirituhanong Paglambo,” Liahona, Mayo 2022, 100)

• Sa unsang paagi ang mga pagtulun-an ni Presidente Nelson makatabang nato sa pagpasaylo sa uban?

• Unsay itambag nimo nga buhaton sa usa ka tawo kon naglisod sila sa pagpasaylo? Unsay imong ikarekomendar nga ilang buhaton aron mosalig sa Manluluwas?

Mainampoong pamalandongan ang bisan unsang impresyon nga madawat nimo samtang nagtuon karon. Dapita ang Espiritu Santo sa pagtabang nimo nga mahibaloan ang bisan unsang kausaban nga kinahanglan nimong himoon. Pangayo og tabang sa Langitnong Amahan nga dugangan ang imong abilidad sa pagpasaylo sa uban.

Pagpili og usa sa mosunod nga mga kalihokan nga kompletohon diha sa imong journal sa pagtuon.

• Pagsulat og mubo nga parapo nga mo-summarize kon sa unsang paagi napanalanginan ka tungod sa imong mga paningkamot nga mopasaylo sa uban. Ilista kon unsay imong gihimo sa paglakip sa Manluluwas sa imong mga paningkamot. Para nimo, unsay importanteng hinumdoman sa sunod higayon nga kinahanglan nimong pasayloon ang usa ka tawo?

• Sa mainampoong paagi ikonsiderar kon aduna bay usa ka tawo sa imong kinabuhi nga kinahanglan nimong pasayloon. Pagsulat og mubo nga parapo nga nagpaila sa imong gibati bahin sa pagpasaylo niana nga tawo. Unsay imong nailhan nga mahimong makapugong sa imong katakos sa pagpasaylo? Ilista ang pipila ka paagi nga makapangayo ka og tabang sa Manluluwas sa imong mga paningkamot.

• Pagsulat og mubo nga sulat nga makatabang sa usa ka higala nga naglisod sa pagpasaylo sa usa ka tawo. Ipasabot sa daklit kon sa unsang paagi ang pagpili ni Jose sa pagpasaylo sa iyang mga igsoon parehas sa Manluluwas. Pag-apil og usa tudling sa kasulatan nga nahimong makahuloganon kanimo sa imong mga paningkamot nga mopasaylo sa uban.