“Hubad ni Joseph Smith sa Genesis 50: ‘Usa ka malagna ang pasanayon sa Ginoo nga akong Dios,’” Manwal sa Magtutudlo sa Seminary sa Daang Tugon (2026)
“Hubad ni Joseph Smith sa Genesis 50: ‘Usa ka malagna ang pasanayon sa Ginoo nga akong Dios,’” Manwal sa Magtutudlo sa Seminary sa Daang Tugon
Genesis 42–50: Leksiyon 36
Hubad ni Joseph Smith sa Genesis 50
“Usa ka malagna ang pasanayon sa Ginoo nga akong Dios”
Sa wala pa ang iyang pagkamatay, si Jose sa Ehipto nanagna nga sa ulahing mga adlaw ang Ginoo mopasanay ni Joseph Smith aron mohimo sa Iyang buluhaton. Madawat nato ang kaugalingon natong pagsaksi nga si Joseph Smith mao ang sulugoon sa Ginoo. Kini nga leksiyon makatabang sa mga estudyante nga mapalig-on ang ilang mga pagpamatuod nga gitawag sa Ginoo si Joseph Smith aron mahimong usa ka propeta.
Pagpangandam sa estudyante: Dapita ang mga estudyante nga isulat ang nabuhat ni Propeta Joseph Smith nga nakatabang nila aron mas maduol ngadto ni Jesukristo. Pwede nilang hangyoon ang usa ka sakop sa pamilya o higala nga ipakigbahin usab ang ilang mga hunahuna ug pagbati.
Posibleng mga Kalihokan sa Pagkat-on
Pagluwas sa katawhan sa Ginoo
Ikonsiderar ang pagpakita sa mga litrato ni Jose sa Ehipto ug ni Moises. Hangyoa ang mga estudyante nga ilhon kon sa unsang paagi gigamit sa Ginoo ang matag usa niini nga mga indibidwal isip usa ka manluluwas (usa ka tawo nga nagluwas sa uban). Dayon, ipakita ang litrato ni Joseph Smith ug pangutan-a ang mga estudyante kon giunsa siya paggamit sa Ginoo isip usa ka manluluwas. Sa kataposan, ipakita ang litrato ni Jesukristo, ang Manluluwas, ug paghisgot og mga paagi nga si Jesukristo miluwas kanato.
Human ipakigbahin sa mga estudyante ang ilang mga hunahuna, gamita ang mga litrato ug ang parapo sa ubos aron i-summarize ang mga panghitabo ug mga panagna diha sa Hubad ni Joseph Smith sa Genesis 50.
Sa kataposan sa iyang kinabuhi, si Jose sa Ehipto nanagna nga ang Ginoo mopasanay og duha ka propeta, nga mga kaliwat ni Jacob, aron sa pagtabang sa pagluwas sa Iyang katawhan gikan sa pagkaulipon. Moanhi si Moises aron luwason ang mga Israelinhon gikan sa pisikal nga pagkaulipon sa Ehipto (tan-awa sa HJS Genesis 50:24, 29). Dayon, sa ulahing mga adlaw, ang Ginoo moluwas sa Iyang katawhan gikan sa espirituwal nga kangitngit pinaagi ni Propeta Joseph Smith.
Aron tabangan ang mga estudyante sa pagsusi sa ilang nahibaloan ug gituohan bahin kang Joseph Smith, ikonsiderar ang pagdapit nila nga tubagon ang mosunod nga mga pangutana diha sa ilang mga journal sa pagtuon.
-
Unsa nga mga hunahuna o mga pagbati ang mosantop sa imong hunahuna kon maghunahuna ka bahin ni Propeta Joseph Smith?
-
Unsaon nimo paghulagway ang kahimtang karon sa imong pagpamatuod nga siya gitawag sa Dios aron mahimong usa ka propeta?
Samtang magtuon ka karon, paminawa ang mga impresyon gikan sa Espiritu nga nagpamatuod nga gitawag sa Ginoo si Joseph Smith isip usa ka propeta. Pwedeng magpadala og ideya ang Langitnong Amahan diha sa imong hunahuna o mga pagbati diha sa imong kasingkasing pinaagi sa Espiritu Santo nga nagsulti kanimo nga tinuod ang imong gitun-an.
Si Jose sa Ehipto nanagna bahin ni Joseph Smith
Dapita ang mga estudyante nga maghimo og blangko nga tsart nga parehas sa usa nga naa sa ubos diha sa ilang mga journal sa pagtuon. Pwedeng magparespares sa pagtrabaho ang mga estudyante o sa gagmayng grupo aron kompletohon ang tsart. Pwede nimong gamiton ang impormasyong nga naa sa tsart aron ipakita kon unsaon kini paghimo ug tabangi ang mga estudyante nga makadiskobre og mga tubag kon gikinahanglan.
Pwede nimong tabangan ang mga estudyante nga makita ang Apendiks sa Hubad ni Joseph Smith diha sa ilang mga kasulatan o sa Mga Tabang sa Pagtuon diha sa Librarya sa Ebanghelyo.
Pwede usab nimong pahinumdoman ang mga estudyante nga ang usa ka manalagna maoy usa ka tigpadayag ug propeta nga nakahibalo sa nangagi, kasamtangan, ug sa umaabot (tan-awa sa Mosiah 8:17), ang “bunga sa imong mga bat-ang” (HJS Genesis 50:27) nga nagpasabot sa kaliwatan ni Jose sa Ehipto o mga kaliwat, ang mga sinulat bahin sa binhi ni Jose nagtumong sa Basahon ni Mormon, ug ang mga sinulat bahin sa binhi ni Juda nagtumong sa Biblia (tan-awa sa HJS Genesis 50:31).
Basaha ang Hubad ni Joseph Smith sa Genesis 50:26–33 aron kompletohon ang mosunod nga tsart.
|
Panagna bahin ni Joseph Smith (lakip ang bersikulo): |
Posibleng mga paagi nga natuman kini nga panagna: |
|---|---|
Panagna bahin ni Joseph Smith (lakip ang bersikulo): “Siya pagatahoron sa hilabihan” (bersikulo 27) | Posibleng mga paagi nga natuman kini nga panagna: Minilyon sa mga tumutuo mikonsiderar ni Joseph Smith nga mahimong Propeta sa Pagpahiuli. |
Panagna bahin ni Joseph Smith (lakip ang bersikulo): “Siya modala kanila ngadto sa kasayoran sa mga pakigsaad nga Ako mihimo uban sa imong mga amahan” (bersikulo 28) | Posibleng mga paagi nga natuman kini nga panagna: Pinaagi sa gipahiuli nga pagkapari, makahimo kita og mga pakigsaad ngadto sa Dios pinaagi sa bunyag ug uban pang ordinansa. Usa sa mga katuyoan sa Basahon ni Mormon mao ang pagdala sa Balay ni Israel og kahibalo bahin sa mga pakigsaad sa Ginoo. |
Panagna bahin ni Joseph Smith (lakip ang bersikulo): “Ngadto kaniya Ako mohatag og gahom sa pagdala sa akong pulong” (bersikulo 30) | Posibleng mga paagi nga natuman kini nga panagna: Gipadayag sa Ginoo ang Basahon ni Mormon, ang Doktrina ug mga Pakigsaad, ang Hubad ni Joseph Smith, ug uban pang inspiradong mga sinulat pinaagi ni Joseph Smith. |
Panagna bahin ni Joseph Smith (lakip ang bersikulo): “Gikan sa kahuyang siya mahimo nga malig-on” (bersikulo 32) | Posibleng mga paagi nga natuman kini nga panagna: Gikan sa mapaubsanon nga sinugdanan ug gamay nga pormal nga edukasyon, si Joseph Smith nahimong bantogan nga propeta. |
Panagna bahin ni Joseph Smith (lakip ang bersikulo): “Sila nga maninguha sa paglaglag kaniya pagalibugon” (bersikulo 33) | Posibleng mga paagi nga natuman kini nga panagna: Kadtong nagtinguha sa pagdaot kang Joseph Smith ug sa iyang buluhaton dili magmalamposon. |
Isip kabahin sa inyong panaghisgotan, pwede nimong ipasabot nga ang pulong “mopasanay” gigamit og kapito ka higayon niini nga mga bersikulo. Ang pipila ka posibleng mga kahulogan alang niini nga hugpong sa mga pulong mao ang gitawag, gipili, o giandam sa paghimo og usa ka buluhaton nga modala sa katawhan sa Ginoo ngadto sa kaluwasan (bersikulo 33). Pwede usab nimong dapiton ang mga etudyante nga ilhon ang laing sumbanan pinaagi sa pagmarka kada higayon nga ang Ginoo ang mohimo sa buluhaton, sama sa “Ako mopasanay” (bersikulo 27) o “Ako mohatag og gahom” (bersikulo 30).
-
Unsa nga mga panagna ang mipatigbabaw kaninyo niini nga mga bersikulo? Ngano man?
Taliwala sa posibleng mga kamatuoran nga mahimong mahibaloan sa mga estudyante, ipasabot ang mosunod: Gipili ug giandam sa Ginoo si Joseph Smith aron sa pagpahinabo sa Basahon ni Mormon. Dapita ang mga estudyante nga ikonsiderar ang pagsulat niini nga kamatuoran tupad sa mga bersikulo 30–33.
-
Unsang mga kamatuoran ang imong mailhan bahin sa Ginoo gikan sa imong pagtuon mahitungod kang Joseph Smith?
-
Sa imong hunahuna, sa unsang paagi ang Basahon ni Mormon nagdala sa katawhan sa Ginoo ngadto sa kaluwasan?
-
Sa unsang paagi napanalanginan ang imong kinabuhi pinaagi sa Basahon ni Mormon?
Pagbaton og espirituhanon nga pagsaksi kang Propeta Joseph Smith
Si Elder Neil L. Andersen sa Korum sa Napulog Duha ka Apostoles mitudlo:
Ang matag tumutuo nagkinahanglan og espirituhanong pagmatuod sa balaanong misyon ug kinaiya ni Propeta Joseph Smith. Kini tinuod sa tanang henerasyon. (“Joseph Smith,” Liahona, Nob. 2014, 29–30)
-
Sa imong hunahuna, nganong importante para sa kada usa nato nga makadawat og espirituhanon nga kompirmasyon gikan sa Langitnong Amahan, pinaagi sa Espiritu Santo, bahin sa balaanong misyon ni Joseph Smith?
Ipakigbahin ang mosunod nga pamahayag ni Elder Andersen o ipasalida ang bidyo nga “Joseph Smith” diha sa ChurchofJesusChrist.org gikan sa time code nga 11:44 hangtod 12:48.
Si Elder Andersen mipakigbahin og duha ka paagi nga kita makabaton o makapalig-on sa atong pagpamatuod ni Propeta Joseph Smith.
Sa kabatan-onan nga naminaw karon o makabasa niining mga pulong sa umaabot nga mga adlaw, mohatag ko ninyo og piho nga hagit: Pagbaton og personal nga pagsaksi bahin ni Propeta Joseph Smith. Himoa nga ang inyong tingog motabang sa pagtuman sa propetikanhong mga pulong ni Moroni sa pagsulti og maayo bahin sa Propeta. Ania ang duha ka mga ideya: Una, pangita og kasulatan sa Basahon ni Mormon nga sa inyong pamati ug pagtuo tinuod gayud. Dayon ipaambit kini sa pamilya ug mga higala sa family home evening, seminary, ug sa inyong mga klase sa Young Men ug Young Women, moila nga si Joseph usa ka instrumento sa mga kamot sa Dios. Sunod, basaha ang pagpamatuod ni Propeta Joseph Smith diha sa Perlas nga Labing Bililhon. … Kini ang kaugalingong pagpamatuod ni Joseph sa unsay tinuod nga nahitabo. Basaha kini kanunay. (“Joseph Smith,” Liahona, Nob. 2014, 30)
Human mapakigbahin kini nga pamahayag, dapita ang mga estudyante nga mopili og usa sa mga sugyot ni Elder Andersen sa pagpalig-on sa ilang personal nga pagsaksi nga gitawag sa Ginoo si Joseph Smith isip usa ka propeta.
Opsiyon 1: Pangita og usa o daghang personal nga makahuloganon nga mga kasulatan diha sa Basahon ni Mormon. Paghimo og hulagway o pagsulat og parapo nga nagpasabot sa imong gipili. Apila ang imong mga hunahuna ug mga pagbati kon sa unsang paagi nakatabang nimo ang Basahon ni Mormon ug ang mga pagtulun-an niini aron makakat-on ka bahin sa gugma sa Manluluwas. Apila usab kon sa unsang paagi nakatabang kini nga makompirmar nga si Joseph maoy usa ka instrumento sa mga kamot sa Dios.
Opsiyon 2: Basaha ang pagpamatuod ni Joseph Smith nga narekord sa Joseph Smith—Kasaysayan 1:15–20 ug ang pagpamatuod ni Joseph Smith nga narekord sa Doktrina ug mga Pakigsaad 135:3. Paghimo og hulagway o pagsulat og parapo bahin kon unsa ang imong nakat-onan ug gibati kon sa unsang paagi gipili ug giandam sa Manluluwas si Joseph Smith aron mahimong propeta sa Pagpahiuli.
Pagpamatuod bahin ni Propeta Joseph Smith
Dihang makompleto na sa mga estudyante ang kalihokan, dapita sila nga ipakigbahin ang unsay ilang nahimo ngadto sa usa ka sakop sa klase.
Dayon, pwede nimong dapiton ang pipila ka estudyante nga gustong mopamatuod bahin kon sa unsang paagi gitawag ni Jesukristo si Joseph Smith aron mahimong usa ka propeta. Ang mosunod nga mga pangutana makatabang.
-
Unsay nakat-onan nimo karon nga nakapalig-on sa imong pagpamatuod kang Joseph Smith?
-
Sa unsang paagi ang pagbaton og pagpamatuod kang Joseph Smith nakapalig-on sa imong pagpamatuod kang Jesukristo?
Ikonsiderar ang pagtapos pinaagi sa imong pagpamatuod sa buluhaton sa Ginoo nga gihimo pinaagi kang Joseph Smith. Dapita ang mga estudyante nga padayong maminaw sa mga impresyon gikan sa Espiritu aron mapamatud-an nila sa ilang kaugalingon nga gitawag ni Jesukristo si Joseph Smith aron mahimong usa ka propeta.