Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Genesis 37–41: “Ang Ginoo Nag-uban kang Jose”

“Genesis 37–41: ‘Ang Ginoo Nag-uban kang Jose,’” Manwal sa Magtutudlo sa Seminary sa Daang Tugon (2026)

“Genesis 37–41: ‘Ang Ginoo Nag-uban kang Jose,’” Manwal sa Magtutudlo sa Seminary sa Daang Tugon

Genesis 37–41: Leksiyon 33

Genesis 37–41

“Ang Ginoo Nag-uban kang Jose”

Bisan og gibaligya isip usa ka ulipon, bakak nga giakusahan, ug gipriso, matarong gihapon nga nagkinabuhi si Jose ug nagpakita og hugot nga pagtuo sa Dios. Isip resulta, gipanalanginan ug gitabangan siya sa Ginoo nga makaya niya ang iyang mga pagsulay. Kini nga leksiyon makatabang sa mga estudyante nga mobati og paglaom nga pwedeng gamiton sa Ginoo ang ilang mga pagsulay aron panalanginan ang ilang mga kinabuhi.

Pagpangandam sa estudyante: Dapita ang mga estudyante nga hunahunaon ang mga pagsulay o mga hagit nga ilang giatubang o posibleng atubangon. Dapita silang mosulod sa klase nga andam nga ipakigbahin kon sa unsang paagi pwedeng gamiton o gigamit sa Ginoo ang mga hagit aron panalanginan ang ilang kinabuhi.

Posibleng mga Kalihokan sa Pagkat-on

Ang sugilanon sa asno

Ikonsiderar ang pagpakita og litrato sa usa ka asno samtang basahon sa estudyante ang mosunod nga parapo.

Dunay usa ka sugilanon bahin sa usa ka asno nga nahagbong sa lungag. Nahadlok ug dili makagawas, ang asno nagsiyaok ug nagtiyabaw. Human mangita og paagi aron maluwas ang asno, gisugdan sa tag-iya og butang og yuta ang bangag. Kada itsa sa pala nga puno og yuta motugdong kini sa buko-buko sa asno, nga nakapasamot og tiyabaw sa asno.

Sa dili pa mopadayon sa istorya, makatabang tingali sa mga estudyante ang paghunong og kadiyot ug pamalandongan ang istorya pinaagi sa pagtubag sa mga pangutana nga sama sa mosunod:

Imo bang makonsiderar nga ang mga pinala nga yuta maayo o dili maayo nga butang? Ngano man?
Unsay girepresentahan sa mga pala nga puno sa yuta diha sa atong mga kinabuhi?

Dapita ang usa ka estudyante nga basahon ang konklusyon sa sugilanon sa mosunod nga parapo.

Mokisikisi ang asno aron mahulog ang yuta nga naa sa iyang likod, maong magtapok sa ilalom ang yuta. Balikbalik kining gihimo sa asno, nga mokisikisi aron mangahagbong ang yuta ug pagtunob sa nagtubo nga bungdo, hangtod nga igo na ang gitas-on sa yuta aron makagawas ang asno gikan sa bangag.

Sa unsang paagi kini nga sugilanon may kalabotan sa mga pagsulay ug mga hagit nga gitugot sa Langitnong Amahan nga atong masinati?

Ikonsiderar ang pagpakita sa mosunod ug pagdapit sa mga estudyante nga kompletohon kini sa ilang kaugalingon.

Hunahunaa ang panahon sa imong kinabuhi nga ikaw adunay mga pagsulay o mga panahon sa pagkawala sa kadasig. Irekord ang imong mga tubag sa pipila sa mosunod nga mga pangutana diha sa imong journal sa pagtuon:

Unsaon nimo pagsanong niadto nga mga kasinatian?
Nganong lisod hinumdoman ang Ginoo kon nag-atubang ka og mga hagit?
Gikan sa mahangtoron nga panglantaw, sa unsang paagi posible nga gamiton sa Langitnong Amahan ang imong mga hagit aron panalanginan ang imong kinabuhi?

Samtang tun-an nimo ang kinabuhi ni Jose karon, tinguhaa ang pagpadayag gikan sa Espiritu Santo nga mohatag nimo og paglaom nga pwedeng himoon sa Langitnong Amahan ug ni Jesukristo bisan ang lisod nga mga pagsulay ngadto sa mga panalangin sa imong kinabuhi.

Katibuk-ang pagpasabot sa Genesis 37–41

Aron matabangan ang mga estudyante nga masabtan ang dagan sa istorya sa Genesis 37–41, pwede nimong ipakita ang lima ka mga litrato nga naa sa ubos. Ang mga estudyante mahimong magtinabangay isip usa ka klase o gagmayng grupo aron ihan-ay kini sa kronolohikal nga paagi. Dayon, pwede nimong hangyoon ang pipila ka estudyante nga gamiton ang mga imahe aron mubong i-summarize ang istorya sa Genesis 37–41.

Pwedeng gamiton sa mga estudyante ang mga summary sa ubos sa kada imahe o ulohan sa mga kapitulo sa pagtabang nila nga ma-summarize o sa pag-verify sa han-ay sa mga imahe.

Dihang 17 anyos si Jose, gikasinahan siya sa iyang mga igsoon kay paborito siya sa ilang amahan, si Jacob. Naglagot sila kang Jose kay gisulti niini nga nagdamgo siya nga moyukbo sila kaniya sa umaabot. Paglabay sa panahon, ilang gibaligya si Jose isip usa ka ulipon (tan-awa sa Genesis 37).

Si Jose gibaligya ngadto kang Potifar, usa ka opisyal sa Ehiptohanong Paraon. Sa kataposan si Jose nahimong tigdumala sa balay ni Potifar (tan-awa sa Genesis 39:1–4).

Ang asawa ni Potifar naibog kang Jose, pero wala supaka ni Jose ang balaod sa kaputli ug mipahilayo kaniya. Bakak nga giakusahan sa asawa ni Potifar si Jose nga gidagmalan siya, ug gibalhog siya [Jose] sa prisohan (tan-awa sa Genesis 39:7–20).

Samtang naa sa prisohan, gihubad ni Jose ang mga damgo sa mga sulugoon ni Paraon (tan-awa sa Genesis 40).

Duha ka tuig ang milabay, adunay damgo si Paraon nga wala niya masabti. Usa sa mga sulugoon ni Paraon, nga bag-o lang gibuhian gikan sa pagkapriso, ang miingon kang Paraon nga kaya ni Jose nga mohubad og mga damgo. Giingnan ni Jose si Paraon nga ang iyang damgo nagrepresentar og pito ka tuig nga maayong pag-ani ug pito ka tuig nga kagutom nga hapit nang moabot sa Ehipto (tan-awa sa Genesis 41).

Mga panalangin gikan sa atong mga pagsulay

Aron matabangan ang mga estudyante nga mailhan ang mga leksiyon nga atong makat-onan gikan sa kasinatian ni Jose, ikonsiderar ang pagbahinbahin sa mga estudyante ngadto sa gagmayng grupo ug sa paghatag o pagpakita sa mosunod nga mga instruksiyon ug mga pangutana.

Pahinumdom: Ang Leksiyon 34, “Genesis 39,” magpunting sa balaod sa kaputli.

Basaha ang mosunod nga mga bersikulo nga pangitaon kon giunsa pagtabang sa Ginoo si Jose panahon sa iyang mga pagsulay.
1. Genesis 39:1–6 (Human gibaligya si Jose isip usa ka ulipon sa iyang mga igsoon)
2. Genesis 39:20–23 (Human si Jose gibalhog sa prisohan ni Potifar)
3. Genesis 41:14–16, 25–32 (Human si Jose sa kataposan gipagawas sa prisohan)
Tubaga ang mosunod nga mga pangutana:
- Unsang mga kamatuoran ang atong makat-onan kon giunsa pagsanong ni Jose sa iyang mga hagit?
- Ngano sa imong hunahuna nga si Jose kinahanglang maghulat og daghang tuig aron madawat ang iyang gitinguha nga mga panalangin?
- Unsa nga ebidensiya ang imong nakita nga gitabangan sa Dios si Jose sa iyang mga pagsulay?
- Unsaon man ta pagtabang sa Langitnong Amahan ug ni Jesukristo sa susamang mga paagi kon kita makasinati og mga kalisdanan?

Paglakaw-lakaw ug paminawa ang mga estudyante samtang gihisgotan nila ang ilang mga tubag uban sa ilang mga grupo. Pasalamati sila sa pagpakigbahin sa ilang nakaplagan. Pahinumdomi ang mga estudyante nga ang Espiritu Santo makatudlo sa mga tawo og lainlaing mga kamatuoran gikan sa mao ra nga mga tudling sa kasulatan. Ang nahibiling bahin niini nga leksiyon magpunting sa kamatuoran nga kon kita matinud-anon, mahimong gamiton sa Dios ang atong mga pagsulay aron panalanginan ang atong mga kinabuhi ug ang uban.

Basaha ang Genesis 41:37–45, nga mangita sa ebidensiya kon sa unsang paagi gigamit sa Dios ang mga pagsulay ni Jose aron panalanginan siya ug ang uban.

Sa unsang paagi gipanalanginan sa Ginoo si Jose ug ang uban pinaagi sa iyang mga pagsulay?

Pagsukna og mga pangutana nga makatabang sa mga estudyante nga makakat-on bahin sa gahom ug kaluoy sa Dios gikan sa mga kamatuoran nga gitudlo. Ang mosunod nga mga pangutana maoy mga pananglitan nga mahimo nimong gamiton. (Para sa dugang nga pagbansay sa pagtabang sa mga estudyante nga makakat-on bahin sa gugma, gahom, ug kaluoy sa Ginoo, tan-awa ang “Tabangi ang mga estudyante sa pag-ila sa gugma, gahom, ug kaluoy sa Ginoo diha sa ilang mga kinabuhi” diha sa Pagpalambo sa mga Kahanas sa Magtutudlo.
Unsa sa imong hunahuna ang gusto ni Jose nga imong mahibaloan bahin sa Ginoo pagkahuman sa iyang mga giagian?
Sa unsang paagi makatabang ang mga pagsulay kanato aron mapalig-on ang atong relasyon sa Langitnong Amahan ug kang Jesukristo?

Basaha ang Doktrina ug mga Pakigsaad 90:24 ug ang mosunod nga pamahayag ni Elder Dieter F. Uchtdorf sa Korum sa Napulog Duha ka Apostoles. Pangitaa kon sa unsang paagi kini magamit ni Jose ug sa tanan nga nakasinati og mga pagsulay ug mga hagit.

Akong ipamatuod nga bisan kon usahay kita mobati nga gilubong sa mga pagsulay sa kinabuhi o gilibutan sa emosyonal nga kangitngit, ang gugma sa Dios ug ang mga panalangin sa gipahiuli nga ebanghelyo ni Jesukristo makahatag og usa ka butang nga halos dili nato mahanduraw. (“Ang Dios Mobuhat og Butang nga Dili Mahanduraw,” Liahona, Nob. 2020, 52)

Sa unsang paagi ang Doktrina ug mga Pakigsaad 90:24 ug ang pamahayag ni Elder Uchtdorf magamit ni Jose? Nganha kanimo?

Mga pananglitan sa modernong panahon

Hunahunaa ang imong mga kasinatian, o sa uban, diin nakita nimon nga gigamit sa Langitnong Amahan ang imong mga pagsulay aron mapanalanginan ang imong kinabuhi. Tubaga ang labing minos duha sa mosunod nga mga pangutana diha sa imong journal sa pagtuon:

Sa unsang paagi nimo nakita nga gigamit sa Langitnong Amahan ang mga pagsulay aron panalanginan ang mga kinabuhi sa mga tawo nga imong kaila? Unsay imong nakat-on gikan sa maong mga tawo?
Kon ang usa ka tawo nagsagubang karon og lisod nga pagsulay, unsay gusto nimong mahibaloan nila bahin sa Langitnong Amahan ug kang Jesukristo?
Unsa ang nagtabang kanimo sa pagpabilin nga matinud-anon ngadto sa Dios atol sa mga pagsulay nga imong nasinati sa imong kinabuhi?

Pwedeng dapiton ang mga estudyante sa pagpakigbahin sa ilang mga kasinatian uban sa ilang gibati para sa Manluluwas.

Dugang nga mga Kapanguhaan

Sa unsang paagi makatabang ang akong paglaom kang Jesukristo sa lisod nga mga panahon?

Si Presidente Dieter F. Uchtdorf, kanhi sa Unang Kapangulohan, mitudlo:

18:49

Kita naglaom diha ni Jesukristo, diha sa kamaayo sa Dios, diha sa mga pagpakita sa Balaang Espiritu, diha sa kahibalo nga ang mga pag-ampo pagadunggon ug pagatubagon. Tungod kay ang Dios nagmatinud-anon ug nagtuman sa Iyang mga saad sa nangagi, kita makalaom uban sa pagsalig nga ang Dios motuman sa Iyang mga saad ngari nato karon ug sa umaabut. Diha sa panahon sa kaluya, kita hugot nga mohupot sa paglaom nga ang tanang butang “maghiusa paglihok alang sa [atong] kaayohan” (Doktrina ug mga Pakigsaad 90:24) samtang kita mosunod sa mga tambag sa mga propeta sa Dios. Kini nga matang sa paglaom sa Dios, sa Iyang kamaayo, ug sa Iyang gahom makapadasig og balik kanato panahon sa malisod nga mga hagit ug maghatag og kalig-on niadtong kinsa mibati og kalisang tungod sa pagkabilanggo diha sa kahadlok, pagduhaduha, ug pagkawalay paglaom. (“Ang Walay Kinutoban nga Gahum sa Paglaum,” Liahona, Nob. 2008, 23)

Unsay akong mahimo aron mapalig-on ang akong hugot nga pagtuo atol sa lisod nga mga panahon?

Si Sister Michelle D. Craig, kanhi sa Kinatibuk-ang Kapangulohan sa Young Women, mipasabot:

11:15

Kon ang lisod nga mga panahon moabot, ako maningkamot sa paghinumdom nga ako mipili sa pagsunod ni Kristo sa wala pa ako moari sa kalibotan ug nga ang mga hagit sa akong hugot nga pagtuo, akong kahimsog, ug akong paglahutay tanan kabahin sa rason nga anaa ko diri. Ug ako sigurado nga dili maghunahuna nga ang mga pagsulay karon makapaduda sa gugma sa Dios alang kanako o makapausab sa akong hugot nga pagtuo ngadto sa pagduhaduha. Ang mga pagsulay wala magpasabot nga ang plano napakyas, kini kabahin sa plano nga gituyo sa pagtabang nako nga mangita sa Dios. Ako mahimong mas sama Kaniya kon ako molahutay nga mapailobon, ug hinaot pa, sama Niya, kon naa sa pag-antos, ako hugot kaayo nga mag-ampo. (“Kinasingkasing,” Liahona, Nob. 2022, 61–62)

Sa unsang paagi ko panalanginan sa Langitnong Amahan pinaagi sa akong mga pagsulay?

Si Presidente Thomas S. Monson (1927–2018) mitudlo:

18:18

Nasayod kita nga adunay panahon nga masinati nato ang hilabihang kasubo, nga kita magbangutan, ug masulayan kon asa kita kutob. Apan, kanang mga kalisdanan makausab nato alang sa mas maayo, makausab sa atong kinabuhi sa paagi nga gitudlo sa Langitnong Amahan nato, ug makapalahi nato kay sa unsa kita kaniadto—mas maayo kay sa kaniadto, mas masinabtonon kay sa kaniadto, mas mosimpatiya kay sa kaniadto, nga may mas lig-ong pagpamatuod kay sa kaniadto. (“Ikaw Dili Ko Kawangon, ni Biyaan Ko Ikaw,” Liahona, Nob. 2013, 87)

Dugang nga mga Kalihokan sa Pagkat-on

Mga summary sa linya sa istorya sa bidyo

Kon makabenepisyo ang mga estudyante sa pagkadungog og summary sa mga panghitabo sa Genesis 37–41, pwede ninyong tan-awon ang “Inspiradong mga Damgo ni Jose” (2:18) ug “Si Jose sa Ehipto” (2:51). Kini nga mga bidyo mahimong mopuli sa litrato nga kalihokan diha sa leksiyon.

2:17

2:50

Ang kinabuhi ni Jose isip usa ka nahisama ni Jesukristo

Aron tabangan ang mga estudyante nga mailhan ang mga paagi diin ang kinabuhi ni Jose susama sa kang Jesukristo, ikonsiderar ang pagpakita sa tsart sa ubos nga dunay mga pakisayran sa kasulatan lamang. Dayon, pwede nimong ipares-pares ang mga estudyante. Ang matag pares pwedeng mokuha og lainlaing bahin sa tsart, basahon ang pakisayran sa kasulatan, ug pangitaon ang pagkaparehas tali sa kinabuhi ni Jose ug sa kinabuhi ni Jesukristo. Ang pag-ila niini nga mga pagkaparehas makatabang sa mga estudyante nga mas mapalawom ang ilang pagsabot sa kinabuhi ug misyon ni Jesukristo.

Pahinumdom: Sa seksiyon nga Dugang nga mga Kalihokan sa Pagkat-on sa Leksiyon 35: “Genesis 42–46,” naay susama nga kalihokan nga nagpakita kon sa unsang paagi ang kinabuhi ni Jose padayon nga mahimong usa ka nahisama ni Kristo sa dihang iyang gipasaylo ang iyang mga igsoon ug giluwas ang iyang pamilya.

Jose sa Ehipto	Jesukristo
Jose sa Ehipto Genesis 37:3 (Gimahal pag-ayo sa iyang amahan)	Jesukristo Mateo 3:17
Jose sa Ehipto Genesis 37:4 (Gidumtan sa pipila sa iyang mga igsoon)	Jesukristo Isaias 53:3; Juan 1:11
Jose sa Ehipto Genesis 37:6–7 (Nakahibalo siya nga moabot ang panahon nga moyukbo kaniya ang iyang pamilya)	Jesukristo Mga Taga-Roma 14:11
Jose sa Ehipto Genesis 37:26–28 (Gitraydor niadtong labing suod niya tungod sa kwarta)	Jesukristo Mateo 26:14–16

Pagdumot ug pagkasina

Ang istorya ni Jose makatabang sa mga estudyante nga masabtan ang mga resulta sa pagdumot ug pagkasina ngadto sa uban. Pwede nimong pangutan-on ang mga estudyante kon nganong para nila ang mga igsoon ni Jose mibaligya kaniya isip usa ka ulipon didto sa Ehipto. Pwede dayon nilang basahon ang Genesis 37:4–5, 8, 11 nga mangita, ug markahan ang mga pulong nga naghulagway sa ilang gibati ngadto kang Jose.

Dayon pwede nimong ipasalida ang “Mga Mamumuo sa Ubasan” gikan sa time code nga 4:49 hangtod 5:44 ug paminawa ang unsay gitudlo ni Presidente Jeffrey R. Holland sa Kurom sa Napulog Duha ka Apostoles bahin sa pagdumot ug pagkasina.

15:23

Pwede nimong dapiton ang mga estudyante nga itandi ang mga magulang ni Jose ngadto sa magulang ni Joseph Smith, si Hyrum, ug sa magulang ni Nephi, si Sam. Si Hyrum ug Sam maoy mga magulang nga mapaubsanong misunod sa direksiyon sa ilang mga manghod.

Pwedeng pamalandongan sa mga estudyante ang mga paagi diin mahimong matental sila nga magdumot o masina ug kon unsaon sila pagtabang sa Manluluwas aron mabuntog ang maong mga pagbati.

Mga kapilian sa bidyo

Aron tabangan ang mga estudyante nga makakita og usa ka pananglitan kon unsaon sa Langitnong Amahan pagpanalangin kanato ug ang uban pinaagi sa atong mga pagsulay, ikonsiderar ang pagpasalida sa mosunod nga bidyo diha sa seksiyon nga “Mga pananglitan sa modernong panahon” sa leksiyon.

“Wheelz: Overcoming Is Possible [Wheelz: Posible ang Pagbuntog]” (7:13)

7:13

Human sa bidyo, pwedeng hisgotan sa mga estudyante kon giunsa pagtabang sa Ginoo kining batan-ong lalaki nga makita ang iyang mga pagsulay gikan sa lainlaing panglantaw.