“Genesis 39: Pagbuntog sa Tentasyon,” Manwal sa Magtutudlo sa Seminary sa Daang Tugon (2026)
“Genesis 39: Pagbuntog sa Tentasyon,” Manwal sa Magtutudlo sa Seminary sa Daang Tugon
Genesis 37–41: Leksiyon 34
Genesis 39
Pagbuntog sa Tentasyon
Human si Jose nahimong tigdumala sa balay ni Potifar, gitental siya sa asawa ni Potifar aron supakon ang balaod sa kaputli. Nakahibalo si Jose nga kon magpadala niana nga tentasyon usa ka “pagpakasala batok sa Dios” ug gipili niyang moikyas gikan sa tentasyon (tan-awa sa Genesis 39:9, 12). Kini nga leksiyon makatabang sa mga estudyante nga mapakita ang ilang debosyon sa Dios pinaagi sa pagbuntog sa tentasyon nga supakon ang balaod sa kaputli.
Pagpangandam sa estudyante: Dapita ang mga estudyante nga hunahunaon nga gihangyo sila nga pangulohan ang usa ka panaghisgot sa ilang klase Sunday School bahin sa lainlaing paagi sa ilang pagbatok sa mga tentasyon ni Satanas. Dapita ang mga estudyante nga maghunahuna og tulo ka paagi nga ipakigbahin nila sa klase.
Posibleng mga Kalihokan sa Pagkat-on
Mga tentasyon nga atong giatubang
Ikonsiderar ang paghangyo sa klase nga maghimo og lista diha sa pisara sa mga tentasyon nga giatubang sa mga batan-on karon. Aron tabangan ang mga estudyante nga mas makahunahuna sa mga tentasyon nga personal nilang giatubang ug kon unsaon nila pagtubag niini, pwede nimong dapiton ang matag estudyante nga kompletohon ang mosunod nga kalihokan diha sa usa ka papel.
Pagpili og tentasyon ug pagsulat og mubo, reyalistikong senaryo diin ang usa ka tinedyer mahimong mag-atubang niana nga tentasyon.
Kolektaha ang mga senaryo ug iapud-apod kini pag-usab diha sa klase.
Basaha ang imong bag-ong senaryo. Sa likod sa papel, isulat kon unsay nakapalisod sa pagbuntog niana nga tentasyon. Pagsulat usab og duha ka butang nga pwede nimong iawhag nga buhaton sa usa ka tawo aron sa pagtabang kanila sa pagbatok o pagbuntog niana nga tentasyon.
Ipasabot sa mga estudyante nga bisan og dili nila maatubang ang sama nga tentasyon nga nalista diha sa senaryo, pwede nilang magamit ang susama nga tambag sa ilang kaugalingon nga mga sitwasyon. Tabangi ang mga estudyante nga masusi ang ilang kaugalingong abilidad sa pagbatok o pagbuntog sa tentasyon.
Hunahunaa ang mga tentasyon nga personal nimong giatubang.
-
Unsay imong gihimo, o mahimo, aron makabaton og kusog gikan sa Langitnong Amahan ug kang Jesukristo aron sa pagbatok niadto nga mga tentasyon?
Pwede nimong dapiton ang mga estudyante nga idugang sa ilang gisulat sa senaryo uban ang kaugalingon nilang mga kasinatian. Awhaga sila nga padayong magdugang og mga ideya sa ilang senaryo samtang ilang tun-an ang Genesis 39. Pahibaloa sila nga samtang nagtinguha sila sa tabang sa Espiritu Santo, Siya makadasig nila gamit ang mga ideya sa pagbatok ug pagbuntog pa gani sa mga tentasyon nga ilang giatubang.
Ang kasinatian ni Jose sa tentasyon
Kon mogamit ka og mga hulagway sa pag-summarize sa mga panghitabo sa kinabuhi ni Jose diha sa Leksiyon 33: “Genesis 37–41,” ikonsiderar ang pagpakita niini pag-usab. Dapita ang mga estudyante sa pag-summarize sa unsay ilang nahinumdoman bahin kon giunsa pagpanalangin sa Ginoo si Jose diha sa panimalay ni Potifar. Kon nagkinahanglan og tabang ang mga estudyante, dapita sila nga basahon ug i-summarize ang Genesis 39:1–6.
Basaha ang Genesis 39:7–8, nga mangita kon unsay nahitabo kang Jose human siya mahimong tigdumala sa panimalay ni Potifar.
-
Unsa nga tentasyon ang giatubang ni Jose?
Ipasabot nga giatubang ni Jose ang tentasyon sa pagsupak sa balaod sa kaputli. Tabangi ang mga estudyante sa pagpamalandong kon unsay ilang nasabtan bahin sa balaod sa kaputli pinaagi sa pagdapit nila sa paghimo sa mosunod.
Sa imong journal sa pagtuon, isulat kon unsaon nimo pagpasabot sa balaod sa kaputli ug kon nganong importante kini.
Dihang mahuman na og sulat ang mga estudyante, ikonsiderar ang pagpakita sa mosunod nga pamahayag. Dapita ang mga estudyante sa pagbasa niini sa ilang kaugalingon, nga mangita sa mga panglantaw nga pwede nilang idugang sa ilang gisulat sa ilang mga journal sa pagtuon.
Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili nagpahayag sa mosunod bahin sa balaod sa kaputli:
Ang balaod sa kaputli nagpahayag nga ang Dios nagtugot sa sekswal nga kalihokan tali lamang sa usa ka lalaki ug usa ka babaye kinsa minyo.
Gawas sa kaminyoon tali sa usa ka lalaki ug usa ka babaye, sayop ang paghikap sa pribado, sagrado nga mga bahin sa lawas sa lain nga tawo bisan kon nagsinina. Sa inyong mga pagpili mahitungod kon unsa ang inyong buhaton, tan-awon, basahon, paminawon, hunahunaon, i-post, o i-text, likayi ang bisan unsa nga tuyo nga makapaaghat og mahigalon nga mga emosyon diha sa uban o sa inyong kaugalingon. Kini naglakip sa pornograpiya sa bisan unsang matang. (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 23, 25)
-
Sa imong hunahuna, ngano kaha nga gihatagan man kita sa Dios og balaod sa kaputli?
-
Unsa ang pipila ka paagi nga si Satanas motental sa kabatan-onan sa pagsupak sa balaod sa kaputli?
Ang posible nga mga tubag nga ihatag sa mga estudyante maglakip sa pagkuha o pagpadala sa dili angay nga mga litrato, pagtan-aw o pagpaminaw og media nga nagsugyot o klaro sa sekswal nga paagi, dili pag-isip nga sagrado ang sekso o sekswal nga mga pagbati. Kon naay mga pangutana ang mga estudyante bahin sa pagkaibog sa sama og sekso, makatabang tingali ang pagpasabot nga “ang pagbati og pagkaibog sa sama og sekso dili sala. Kon [ang usa ka tawo] aduna niini nga mga pagbati ug dili [kini] ipadayon o lihokon, [sila] nagsunod sa sagrado nga balaod sa kaputli sa Langitnong Amahan” (Alang sa Kalig-onan sa mga Kabatan-onan: Usa ka Giya sa Paghimo og mga Pagpili, 27).
Basaha ang Genesis 39:9–12, nga mangita kon giunsa pagbatok ni Jose ang tentasyon nga supakon ang balaod sa kaputli.
Ang Genesis 39:9 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
-
Unsay imong nakat-onan gikan sa ehemplo ni Jose?
Mailhan tingali sa mga estudyante ang mga kamatuorang sama sa: Ang atong debosyon sa Dios mohatag nato og kusog sa pagbatok sa tentasyon nga supakon ang balaod sa kaputli (bersikulo 9).
Pwedeng markahan sa mga estudyante diha sa ilang mga kasulatan kon unsay nahimo sa debosyon ni Jose ngadto sa Dios, pananglitan, sa bersikulo 8 (“midumili si Jose”), bersikulo 10 (“wala gayod manumbaling si Jose”), ug bersikulo 12 (“miipsot ug midagan si Jose ngadto sa gawas”).
Aron tabangan ang mga estudyante nga tubagon ang mosunod nga pangutana, pwede nimo silang hatagan og senaryo nga magamit nila aron mopakigbahin kon sa unsang paagi mahimo sa usa ka tawo ang tulo ka butang nga gibuhat ni Jose. Ang posible nga senaryo mahimong maglakip sa pagdapit sa pagtan-aw og sine, pasundayag, o konsyerto diin gigamit ang imoral nga mga hulagway ug mga pulong. Ang lain pang posible nga senaryo mao ang paglakip sa pagbati nga pagpamugos nga magpadala sa dili angay nga mga teksto o mga litrato sa imong mga kaedad.
-
Unsa ang pipila ka paagi nga masunod nato ang ehemplo ni Jose dihang makaatubang ta og tentasyon?
Paglig-on sa atong abilidad sa pagsunod sa balaod sa kaputli
Aron matabangan ang mga estudyante nga mapalawoman ang ilang pagsabot niini nga kamatuoran, iapud-apod ang kauban nga handout ngadto sa mga estudyante. Ikonsiderar ang pagpares-pares sa mga estudyante ug pag-asayn sa kada paresan nga tutokan ang usa sa mga pangutana diha sa handout.
Dapita ang mga estudyante nga ipakigbahin ang unsay ilang nakat-onan ngadto sa ilang kapares.
Ang Manluluwas makatabang nato sa pagbuntog sa tentasyon
Mahimong adunay mga estudyante nga nanlimbasog sa pagtuman sa balaod sa kaputli ug kinahanglan nga mobati og paglaom sa paghinulsol ug pagbuntog sa pagkaadik. Ipamatuod ang mahigugmaon, mapailobon, ug mapasayloon nga kinaiya sa Langitnong Amahan ug ni Jesukristo. Ikonsiderar ang pagpasalida sa bidyo nga “Ang Tentasyon Mawala samtang Atong Tinguhaon si Kristo sa Matag Hunahuna” (2:57), anaa sa ChurchofJesusChrist.org. Dapita ang mga estudyante nga pangitaon kon sa unsang paagi ang Manluluwas makahatag nato og paglaom.
Si Elder Dale G. Renlund sa Korum sa Napulog Duha ka Apostoles mitudlo kon sa unsang paagi ang Manluluwas makahatag og paglaom niadtong nanlimbasog sa pagtuman sa mga sugo sa Dios.
Bisan unsa kita kadugay nga nahilayo sa dalan o unsa ka layo kita nga nahisalaag, sa higayon nga modesisyon kita sa pag-usab, ang Dios motabang kanato nga makabalik. Gikan sa panglantaw sa Dios, pinaagi sa sinsero nga paghinulsol ug sa pagpadayon sa unahan uban ang pagkamakanunayon kang Kristo, sa higayon nga mabalik na sa dalan, sama ra kini nga wala gayod kita mopalayo. Ang Manluluwas mobayad sa atong mga sala ug mopalingkawas kanato gikan sa umaabot nga pagkunhod sa kalipay ug mga panalangin. (“Magpili Kamo Niining Adlawa,” Liahona, Nob. 2018, 106)
-
Unsay gusto nimong masabtan sa usa ka tawo kinsa mibati nga nawad-an og paglaom tungod sa kanhi nilang mga pagpili gikan sa pamahayag ni Elder Renlund?
-
Unsay nakatabang nimo nga masuklan ang tentasyon nga pwede nimong isugyot sa ubang mga tawo?
Paghimo og plano nga tumanon ang balaod sa kaputli
Aron tabangan ang mga estudyante sa paghimo og plano nga lihokon ang unsay gitudlo kanila sa Espiritu bahin sa pagtuman sa balaod sa kaputli, hatagi sila og pipila ka minuto sa pagtubag sa mosunod nga mga pangutana diha sa ilang mga journal sa pagtuon.
-
Unsay imong nakat-onan nga makatabang nimo sa pagtuman sa balaod sa kaputli o pagbatok sa uban pang tentasyon?
-
Unsay imong nakat-onan bahin sa pagkahimong mahinalaron ngadto sa Dios?
-
Unsaon nimo pagsugod sa paggamit sa imong nakat-onan ug gibati karon?
Awhaga ang mga estudyante nga iapil ang Langitnong Amahan ug si Jesukristo sa ilang mga paningkamot sa pagbatok sa tentasyon. Ikonsiderar ang pagpakigbahin sa imong pagpamatuod sa abilidad sa Manluluwas sa pagtabang kanato nga mabuntog ang tentasyon ug sa Iyang mahigugmaon nga kaluoy sa pagtabang nato nga maghinulsol.
Isag-ulo
Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Unsaon nako paghimo kining dakong pagkadaotan, ug makasala batok sa Dios?” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”