Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Genesisy 42–45: “Izaho no Josefa, rahalahinareo”

“Genesisy 42–45: -Izaho no Josefa rahalahinareo,-” Testamenta Taloha: Boky torolalana ho an’ny mpampianatra seminera (2026)

“Genesisy 42–45: (Izaho no Josefa rahalahinareo,(” Testamenta Taloha: Boky toralalana ho an’ny mpampianatra seminera

Genesisy 42–45: Lesona 35

Genesisy 42–45

“Izaho no Josefa, rahalahinareo”

A painting by Ted Henninger showing Joseph of Egypt surrounded by his brothers, smiling and showing forgiveness toward them.

Taona maro taorian’ny namarotana azy tany Egypta ho andevo, dia tafahaona tamin’ireo rahalahiny indray i Josefa. Afaka ny ho tezitra sy nitàna lolom-po izy noho ireo fijaliana rehetra nahazo azy. Kanefa, tahaka ny Mpamonjy, dia naleon’i Josefa namindra fo sy namela heloka ireo rahalahiny izay nanao ny tsy nety taminy. Ity lesona ity dia afaka manampy ireo mpianatra hanaraka ny ohatra nasehon’ny Mpamonjy amin’ny alalan’ny fahaizana mamela heloka kokoa.

Fanomanana ny mpianatra: Asao ny mpianatra hisaintsaina ny didin’ny Mpamonjy hoe “hamela ny olon-drehetra“ (Fotopampianarana sy Fanekempihavanana 64:10). Angataho izy ireo hitanisa ny sasany amin’ireo fitahiana niainan’izy ireo na ny hafa tamin’ny alalan’ny famelana olona iray.

Sahanasa fianarana azo atao

Josefa tany Egypta

Mba hanombohana ny fianarana dia asao ny mpianatra hamerina hijery vetivety ny tantaran’i Josefa tany Egypta ao amin’ny Genesisy 37–41. Azonao atao ny mangataka azy ireo hamintina ny fihetsika feno haratsiam-panahy nataon’ireo rahalahin’i Josefa sy ireo tranga izay nahatonga an’i Josefa ho mpanapaka faharoa manerana an’i Egypta.

Ireo sary nomerika hita ao amin’ny Lesona 33: Genesisy 37–41 dia azo ampiasaina mba hanampiana ny mpianatra hamintina ny tantara.

Inona avy ireo fijaliana nahazo an’i Josefa noho ny zavatra nataon’ny rahalahiny?
Inona no mety ho tsapanao momba ny olona nanao izany taminao?
Inona no mety hahasarotra ny famelana heloka olona iray?

Eritrereto hoe manao ahoana ny fihetsika ataonao mahazatra rehefa misy olona manao na miteny zavatra mandratra anao. Rehefa mandalina ianao androany dia henoy tsara izay fahatsapana rehetra voarainao avy amin’ny Fanahy Masina mba hanampy anao hamantatra ny fomba azonao hanarahana ny ohatra nasehon’ny Mpamonjy hamela heloka.

Tafahaona indray tamin’ireo rahalahiny i Josefa

Avereno jerena ity famintinana manaraka ity ary halalino ireo andinin-tsoratra masina miaraka aminy.

Famintinana 1: Taona maro taorian’ny namarotan’izy ireo an’i Josefa ho andevo, dia nankany Egypta ny rahalahiny mba hitady fanampiana amin’ny mosary. Rehefa nijoro teo anatrehan’i Josefa izay efa mpanapaka faharoa manerana an’i Egypta ireo rahalahiny dia tsy nahalala azy. Naneho ny alahelony sy ny nenina nahazo azy ireo noho ny zavatra nataony tamin’i Josefa taona maromaro talohan’izay ireo rahalahiny, tsy nahalala akory hoe nahafantatra azy ireo sy nahazo izay nolazainy i Josefa.

Vakio ny Genesisy 42:21–24, ary jereo ny fihetsika nataon’i Josefa rehefa nahare ireo rahalahiny niresaka ny fomba nitondran’izy ireo azy.

Famintinana 2: Nanome sakafo ho an’ny fianakaviana i Josefa saingy nampiditra an’i Simeona am-ponja ary nanome toromarika ireo rahalahiny hafa tsy hiverina any Egypta raha tsy mitondra an’i Benjamina, zandrin’izy ireo faralahy. Nandeha nody ireo ny rahalahiny, kanefa rehefa tsy nanana sakafo intsony ny fianakaviana dia niverina tany Egypta niaraka tamin’i Benjamina izy ireo.

Vakio ny Genesisy 43:30, ary tadiavo ny fihetsik’i Josefa rehefa nahita an’i Benjamina rahalahiny.

Famintinana 3: Nitsapa ny fitiavan’ireo rahalahiny an’i Benjamina i Josefa tamin’ny fanendrikendrehana azy ho nangalatra ary nandrahona ny handefa azy tany am-ponja. Nanolotra ny ainy hisolo an’i Benjamina i Joda.

Vakio ny Genesisy 45:1–2, dia tadiavo ny fihetsik’i Josefa rehefa nahita an’i Joda nanolon-tena hanolotra ny ainy ho fiarovana an’i Benjaminaizy

Rehefa avy nanana fahafahana nandalina ireo famintinana ny mpianatra, dia azonao atao ny manasa azy ireo hifanakalo hevitra momba ity fanontaniana manaraka ity.

Inona momba ny Ray any An-danitra sy i Jesoa Kristy no nanampy an’i Josefa ny fahatsiarovana azy rehefa nifanerasera tamin’ireo rahalahiny izy?

Mamela heloka ny Ray any An-danitra sy i Jesoa Kristy

Ireto soratra masina manaraka ireto dia mampiseho ny toetra mamela heloka ananan’ny Ray any An-danitra sy i Jesoa Kristy. Azonao atao ny mampiseho ireo soratra masina ireo ny mpianatra mba hohalalininy na mangataka azy ireo hitady ny andinin-tsoratra masina azy ireo manokana mikasika ny toetra mamela heloka ananan’ny Ray any An-danitra sy i Jesoa Kristy.

Vakio ireto soratra masina manaraka ireto dia tadiavo ny zavatra hanampy ny olona iray niharan’ny fampijaliana raha fantany mikasika ny Ray any An-danitra sy i Jesoa Kristy.

Lioka 6:36

Efesiana 4:31–32

Kolosiana 3:13

Inona no ho zarainao avy amin’ireo andinin-tsoratra masina ireo?

Vakio ny Genesisy 45:3–8 sy 9–15, ary tadiavo izay navalin’i Josefa ny rahalahiny.

Inona no azontsika ianarana mikasika ny fahatongavana tahaka ny Ray any An-danitra sy i Jesoa Kristy avy amin’ny ohatra nasehon’i Josefa?

Mety hahita fahamarinana isan-karazany ny mpianatra. Isaory izy ireo amin’ny zavatra zarainy ary anontanio azy ireo ny antony mahatonga azy hihevitra fa fotopampianarana sy fitsipika manan-daja tsara ho fantatsika izany. Raha tsy milaza izany ny mpianatra dia zarao ireto fahamarinana manaraka ireto ary soraty eo amin’ny solaitrabe: Lasa tahaka ny Ray any An-danitra sy i Jesoa Kristy isika rehefa mamela ny hafa.

Afaka mamela ny hafa isika rehefa miantehitra amin’ny Mpamonjy

Manampy antsika hahatakatra ny fomba hianteherana amin’ny Mpamonjy rehefa mamela ny hafa ny Filoha Russell M. Nelson.

17:18

Raha toa tsy ho vita ny hamela heloka amin’izao fotoana izao dia mangataha hery amin’ny alalan’ny ran’ny sorompanavotan’i Jesoa Kristy mba hanampy anareo. Raha manao izany ianareo dia mampanantena fiadanana manokana sy fitomboan’ny fahavitrihana ara-panahy aho.

Rehefa nanao ny sorompanavotana ho an’ny olona rehetra ny Mpamonjy dia nanokatra ny lalana Izy mba hahafahan’ireo izay manaraka Azy mahazo ilay heriny manasitrana sy mampahery ary manavotra. Ireo tombontsoa ara-panahy ireo dia azon’ireo rehetra izay mikatsaka ny hihaino Azy sy hanaraka Azy. (“Ny herin’ny fahavitrihana ara-panahy,” Liahona, Mey 2022, 100)

Inona ny fanampiana entin’ny fampianaran’ny Filoha Nelson ho antsika mikasika ny famelana ny hafa?
Inona ny torohevitra omenao ny hafa raha manahirana azy ny mamela heloka? Toroinao hevitra hanao inona izy ireo mba hianteherany amin’ny Mpamonjy?

Raha mila fanampiana mikasika ilay fanontaniana farany ny mpianatra dia azonao atao ny mandrisika azy ireo hijery ny torohevitry ny Tompo ao amin’ny Fotopampianarana sy Fanekempihavanana 64:9–11, indrindra fa ny andininy 11.

Asao ny mpianatra hizara ny zavatra niainany izay nahafahany na nahafahan’ny olona fantany namela heloka. Mety ho tsara ny mampatsiahy ny mpianatra tsy hizara antsipirian-javatra mahakasika loatra ny tenany manokana na ny olona fantany. Azonao atao koa ny mizara ny zavatra niainanao manokana.

Ampio izahay hamela heloka an-kalalahana

Mba hanampiana ny mpianatra hisaintsaina ny zavatra nianarany sy tsapany mikasika ny fahatongavana tahaka ny Ray any An-danitra sy i Jesoa Kristy dia azonao aseho ny sasany amin’ireto sahanasa manaraka ireto mba ho vitain’ny mpianatra ao amin’ny diary fandalinany soratra masina.

Saintsaino ombam-bavaka izay mety ho fahatsapana voarainao nandritra ny fotoana nandalinanao androany. Asao ny Fanahy Masina hanampy anao hamantatra izay fiovana mila entinao eo amin’ny fiainanao. Mangataha fanampiana amin’ny Ray any An-danitra hampitombo ny fahaizanao mamela ny hafa.

Misafidiana iray amin’ireto sahanasa manaraka ireto mba hovitaina ao anatin’ny diary fandalinanao soratra masina.

Manorata andiam-pehezan-teny fohy mamintina ny fitahiana voarainao noho ny ezaka nataonao mba hamela ny hafa. Ataovy lisitra ny zavatra nataonao mba hampandraisana anjara ny Mpamonjy tamin’izany ezaka izany. Araka ny fahatsapanao dia inona no zavatra tsara tadidiana amin’ny fotoana manaraka izay tokony hamelanao olona?
Eritrereto ombam-bavaka raha misy olona eo amin’ny fiainanao tokony havelanao heloka. Manorata andiam-pehezan-teny fohy izay milaza ny fihetseham-ponao mikasika ny famelana heloka izany olona izany. Inona no hitanao fa mety manakantsakana anao tsy ho afaka hamela heloka? Mitanisà fomba vitsivitsy ahafahanao mitady ny fanampian’ny Mpamonjy amin’ny ezaka ataonao.
Manorata naoty kely afaka manampy ny namana iray izay sahirana mamela heloka ny hafa. Hazavao amin’ny fomba fohy ny mampitovy ny safidy nataon’ Josefa amin’ny an’ny Mpamonjy tamin’ny famelana heloka ny rahalahiny. Ampidiro ao ny andian-tsoratra masina izay nanan-danja taminao tamin’ny ezaka nataonao hamela heloka ny hafa.

Afaka manasa mpianatra vitsivitsy izay vonona ianao mba hizara ny zavatra nosoratan’izy ireo. Farano amin’ny fanasana ny mpianatra hanao asa araka izay bitsika ara-panahy rehetra mety ho voarain’izy ireo ny lesona. Azonao atao ny mizara fijoroana ho vavolom-belona ny amin’ny fitahiana afaka ny ho azontsika rehefa manaraka ny ohatra nasehon’ny Mpamonjy hamela heloka ny hafa isika.

Loharanom-pitaovana fanampiny

Inona ihany koa no tokony hotadidiako eo am-piezahana hamela heloka ny hafa?

16:13

Mampatsiahy antsika ny Filoha Jeffrey R. Holland ao amin’ny Kôlejin’ny Apôstôly Roambinifolo hoe:

“Aza manameloka, dia tsy hohelohina hianareo,” hoy i Kristy raha nampianatra tamin’ny andron’ny Testamenta Vaovao. Ary tamin’izao androntsika izao: “Izaho Tompo dia hamela izay tiako havela heloka, fa takiana aminareo kosa ny hamela ny olon-drehetra.” Manan-danja kosa anefa ho an’ny sasany aminareo izay miaina ao anatin’ny fahoriambe ny mieritreritra ny zavatra tsy nolazainy. Tsy nilaza Izy hoe: “Tsy mahazo mahatsapa fahoriana lalina na alahelo lalina avy amin’ireo zavatra niainana tena mandratra izay nihatra taminareo noho ny zavatra nataon’ny hafa ianareo.” Tsy nilaza koa Izy hoe: “Mba hamelana heloka tanteraka dia tsy maintsy manohy fifandraisana mandratra fo na miverina miaina toe-javatra feno fanararaotana sy manimba ianareo.” Kanefa na dia eo aza ny fanafintohinana faran’izay mahatsiravina mety hitranga amintsika, dia tsy afaka mandresy ny fahoriantsika isika raha tsy rehefa mametraka ny tongotsika eo amin’ny lalan’ny fahasitranana marina ihany. Ilay lalana dia ilay lalan’ny famelan-keloka izay nandehanan’i Jesoa avy any Nazareta, izay miantso antsika tsirairay avy hoe: “Avia, manaraha Ahy.” (“Ny fanompoana fampihavanana,” Liahona, nôv. 2018, 78–79)

Ahoana no fomba hitahian’ny Mpamonjy ahy rehefa mamela heloka ny hafa aho?

Nampianatra izao ny Filoha Russell M. Nelson hoe:

“Raiko ô, mamela ny helony, fa tsy fantany izay ataony” (Lioka 23:34).

Ireo teny notenenin’i Jesoa Kristy Mpamonjy ireo, nandritra ny naha-teo ambony hazo fijaliana Azy, dia manome antsika maodely arahina eo amin’ny fiainantsika. Nampianatra antsika hitia ny fahavalontsika izy, hanao soa amin’izay mankahala antsika, ary hitondra am-bavaka ireo izay manisy ratsy antsika mihitsy aza.

Rehefa misafidy ny hamela heloka ny hafa isika dia mamela ny Tompo hanala ilay poizina ao anatin’ny fanahintsika. Mamela Azy isika hampitony sy hanalefaka ny fontsika mba hahafahantsika mahita ny hafa toy ny zanak’Andriamanitra sy toy ny rahalahy na anabavy, indrindra fa ireo izay nanao ratsy antsika.

… Manasa anao aho mba hieritreritra amim-bavaka raha misy olona tokony havelanao heloka na olona tokony hangatahanao mba hamela anao. Mampanantena aho fa hanafaka anao amin’ny fahatezerana, ny lolom-po ary ny fanaintainana ny Mpamonjy. Hitondra fiadanana ho anao ny Andrian’ny Fiadanana.

… Enga anie isika hitodika any amin’ilay Tompo nitsangana tamin’ny maty eo am-panampiany antsika hiaina ny fifaliana sy ny fahagagana avy amin’ny famelan-keloka. (Facebook, 2 apr. 2023, facebook.com/russell.m.nelson)

Sahanasa fianarana fanampiny

Genesisy 48–49; Tsodranon’ny fisoronana

Fanamarihana: Hampianarina ao anatin’ny lesona Tsodranon’ny patriarika ny fanomezan’i Jakoba tsodranon’ny patriarika an’ireo zanany lahy. Mifantoka amin’ny tsodranon’ny fisoronana amin’ny ankapobeny ity sahanasa ity.

Mba hanampiana ny mpianatra hahatakatra ny herin’ny tsodranon’ny fisoronana, dia azonao atao ny manasa azy ireo hamaky ny Genesisy 48:8–16, ka hitady ireo tsodranon’ny fisoronana izay nomen’i Jakoba (nantsoina hoe Israely tamin’izay) an’i Josefa, Efraima, ary i Manase.

Tamin’ny fomba ahoana no nitahiana anao na ny olona fantatrao tamin’ny tsodranon’ny fisoronana?

Afaka mizara ny zavatra niainany toy ny tsodrano ataon’ny raim-pianakaviana, fanasitranana ny marary, na fanokanana ho amin’ny antso na fanendrena ny mpianatra. Asao ny mpianatra hizara ny fomba nanampian’ny tsodranon’ny fisoronana azy ireo hahatsiaro ho akaiky kokoa ny Ray any An-danitra sy i Jesoa Kristy. Azonao atao ny mampahatsiahy ny mpianatra fa ny Filoha Dallin H. Oaks tao amin’ny Fiadidiana voalohany dia nampianatra fa:

Tokony hanao ihany koa izay hisian’ny fifandraisan’ny mpianakavy feno fitiavana ny raim-pianakaviana mba hananan’ny olona ao amin’ny fianakaviana faniriana hangataka tsodrano amin’ny rain’izy ireo. Ary tokony hanao izay hisian’ny tsodranon’ny fisoronana bebe kokoa ao amin’ny fianakaviana ireo ray aman-dreny. (“Ny herin’ny fisoronana,” Liahona, Mey 2018, 67).

Ny enta-mavesatra avy amin’ny fandavana hamela heloka

Raha hahazoan’ny mpianatra tombony ny fahatakarana hoe mitondra enta-mavesatra tsy ilaina zakaina isika rehefa mandà ny hamela heloka, dia azonao atao ny mampiseho ireto lesona ampiasana zavatra azo tsapain-tanana ireto.

Angataho ny mpianatra hanamboatra fiaramanidina amin’ny taratasy. Asio vola, vato kely na zavatra mavesatra miraikitra eo amin’ny ilan’ilay fiaramanidina. Angataho ny mpianatra hanipy moramora ilay fiaramanidina hanidina eny ampita ao amin’ilay efitrano. Raiso avy eo ilay fiaramanidina dia esory ilay zavatra naraikitra taminy. Angataho ny mpianatra hanipy ilay fiaramanidina indray. Azonao atao ny manasa ny mpianatra hizara ny fomba hanehoan’io lesona ampiasana zavatra azo tsapain-tanana io fa ilaina ny mamela heloka. Azo ampidirina ao anatin’ny fanontaniana hifanakalozan-kevitra ireto manaraka ireto:

Nahoana no manakana ilay fiaramanidina tsy hanidina tsara na dia lanja maivana kely iray aza? Inona no hifandraisan’izany amin’ny fandàvana hamela heloka?
Rehefa manao asa amim-pinoana isika mba hamelana heloka olona, dia ahoana no fomba hitahian’ny Mpamonjy ny ezaka ataontsika?

Josefa amin’ny maha-tandindon’i Kristy azy

Ao amin’ny lesona 33: Genesisy 37–41 ny mpianatra dia mety namorona tabilao hanampiana azy ireo hamantatra ireo fomba maha-tandindon’i Kristy i Josefa. Mba hanamafisana ny fandalinana nataon’izy ireo dia asehoy ity tabilao manaraka ity miaraka amin’ny andinin-tsoratra masina irery ihany. Azonao atao ny manasa ny mpianatra hamintina ireo andinin-tsoratra masina miaraka amin’ny namana iray na ao anatina vondrona iray. Ny fahitana ny fiainan’i Josefa tahaka ny fanehoana an’ohatra na tandindon’i Kristy dia hanampy ny mpianatra ahita ny heriny rehefa miatrika fanamby.

Josefa tany Egypta	Jesoa Kristy
Josefa tany Egypta Genesisy 45:3–5 (Namela izay nanao ratsy azy i Josefa)	Jesoa Kristy Môzià 26:30
Josefa tany Egypta Genesisy 45:1–5 (Nampahafantatra ny tenany tamin’ireo rahalahiny i Josefa rehefa tonga teo aminy fanindroany izy ireo)	Jesoa Kristy Matio 24:30–31
Josefa tany Egypta Genesisy 47:13–19 (Namonjy ny olona tamin’ny fanomezana azy ireo hanina i Josefa)	Jesoa Kristy Jaona 6:35, 51