Familja

Lexojeni dhe përsiateni vargun te Moisiu 5:12. Merrini parasysh të vërtetat dhe mësimet e rëndësishme që këta prindër mund t’u kenë mësuar fëmijëve të tyre. Motra Tamara Runia dha mësim se “familjet janë një laborator i dhënë nga Perëndia ku ne po i zbulojmë gjërat, kështu që hapat e gabuar dhe llogaritjet e gabuara jo thjesht që mund të ndodhin, por ka të ngjarë që të ndodhin. Dhe a nuk do të jetë interesante nëse, në fund të jetës sonë, ne mund të shohim se ato marrëdhënie, madje ato çaste sfiduese, ishin pikërisht gjërat që na ndihmuan të bëhemi më shumë si Shpëtimtari ynë? … Marrëdhëniet familjare [janë] një mjet [i] fuqishëm për të na dhënë ato mësime për të cilat erdhëm këtu që t’i mësojmë.” Si mendoni ju, pse familjet janë thelbësore për planin e Perëndisë? Si ju kanë ndihmuar përvojat tuaja në familjen tuaj të rriteni dhe të bëheni më shumë si Ati Qiellor dhe Jezu Krishti? Si mund të ndikojë të menduarit për jetën tuaj familjare si një “laborator” në mënyrën se si i shihni papërsosuritë e familjes suaj?

Presidenti Gordon B. Hinkli dha këtë këshillë: “Zoti ka urdhëruar që ne duhet të martohemi, që të jetojmë së bashku në dashuri, paqe dhe harmoni, që të kemi fëmijë dhe t’i rritim ata në rrugët e Tij të shenjta. … Në fund të fundit, ky është qëllimi i ungjillit. Familja është një krijim i Perëndisë. Është krijimi bazë. Mënyra për të forcuar kombin, është forcimi i shtëpive të njerëzve.” Diskutoni pse Perëndia na dërgoi në tokë në familje dhe si ndihmon kjo që plani i Tij të përmbushet. Si mund të ndihmojë forcimi i shtëpive tona në forcimin e komuniteteve tona? Për ta ilustruar këtë ide, mund të luani një lojë që kërkon të punoni së bashku. Për shembull, mund të krijoni një nyjë njerëzore (të formoni një rreth dhe të bëni që gjithsecili të kapë duart e dy njerëzve të ndryshëm) dhe të punoni së bashku për t’u zgjidhur pa e lëshuar dorën e njëri‑tjetrit. Ose mund të organizoheni në një rresht, pa folur, bazuar në ndonjë karakteristikë (të tilla si rendi i muajit të lindjes, ngjyra e syve ose gjatësia). Më pas flisni se si të punuarit së bashku si familje ndihmon në përmbushjen e qëllimeve të Atit Qiellor për fëmijët e Tij.

Doktrina e Besëlidhje 49:15–17; Moisiu 2:27–28

D. Tod Kristoferson, “Përse Martesa, Përse Familja”, Liahona, maj 2015, f. 50–53

Lexojini rrëfimet vijuese të prindërve që mësuan fëmijët e tyre: Mosia 1:2–8; Helamani 5:4–12. (Mund të lexoni edhe te Ligji i Përtërirë 6:4–7; 11:19–21; Isaia 54:13; 2 Nefi 25:26 për ide shtesë rreth prindërimit.) Çfarë parimesh të ungjillit dhanë mësim këta prindër? Përse këto parime janë të rëndësishme që fëmijët t’i mësojnë sot? Si mund t’i ndihmoni fëmijët tuaj ose njerëzit tuaj të tjerë të dashur që t’i mësojnë dhe jetojnë ato të vërteta? Ju mund të sillni ndërmend edhe prindër të tjerë shembullorë që njihni. Çfarë mësoni prej tyre rreth mënyrës se si prindërit e drejtë i mësojnë fëmijët e Perëndisë?

Presidenti Rasëll M. Nelson ka këshilluar: “Mos u përpiqni t’i vini nën kontroll fëmijët tuaj. Në vend të kësaj, i dëgjoni ata, i ndihmoni të mësojnë ungjillin, i frymëzoni ata dhe i udhëhiqni drejt jetës së përjetshme. Ju jeni mjetet e Perëndisë për t’u kujdesur për fëmijët me të cilët Ai ju ka besuar. Lëreni ndikimin e Tij hyjnor të qëndrojë në zemrën tuaj, ndërsa [i] mësoni dhe bindni të tjerët.” Si mund ta nderoni mirëbesimin që ju ka dhënë Perëndia, duke ua mësuar me zell ungjillin fëmijëve tuaj? Si mund ta respektoni lirinë e zgjedhjes së fëmijëve tuaj ndërsa i drejtoni ata drejt jetës së përjetshme? Merreni në shqyrtim se si mund ta lini ndikimin e Tij që t’ju udhëheqë çdo ditë në përpjekjet tuaja.

Lexoni së bashku te Moisiu 3:21–24. Më pas lexoni këtë mendim nga Plaku Nil L. Andersen: “Që nga fillimi fare, Perëndia e [filloi] martesën midis një burri dhe një gruaje – Adamit dhe Evës. Ai i përcaktoi qëllimet e martesës që të shtrihen përtej kënaqësisë dhe arritjes vetjake të të rriturve dhe, më e rëndësishme, duke përparuar drejt një vendndodhjeje ideale ku fëmijët të linden, rriten dhe ushqehen shpirtërisht. Familjet janë thesari i qiellit.” Mund të përdorni një kuti thesari ose të shikoni figurën shoqëruese ndërsa flisni për fragmentin e shkrimit të shenjtë dhe thënien nga Plaku Andersen. Më pas mund të shkruani një gjë që mund të ndihmojë të krijohet një mjedis ideal që fëmijët të mësojnë ungjillin dhe të rriten në të.

Shikojeni figurën shoqëruese dhe flisni pse themeli i një shtëpie është kaq i rëndësishëm. Plaku Ted R. Kelister ka dhënë mësim: “Si prindër, ne duhet të jemi mësuesit dhe shembujt kryesorë të ungjillit për fëmijët tanë – jo peshkopi, Shkolla e së Dielës, Të Rejat apo Të Rinjtë, por prindërit. Si mësuesit e tyre kryesorë të ungjillit, ne mund t’u mësojmë atyre për fuqinë dhe realitetin e Shlyerjes – për identitetin e tyre dhe fatin e tyre hyjnor – dhe duke vepruar kështu, t’u japim një themel prej shkëmbi mbi të cilin të ndërtojnë. Në fund të fundit, shtëpia është mjedisi i përkryer për mësimdhënien e ungjillit të Jezu Krishtit.” Mund të flisni për rëndësinë e mundësive të strukturuara të mësimdhënies së ungjillit, por të diskutoni edhe se si mësimdhënia ndaj fëmijëve tanë ndodh shpesh në mënyrë të natyrshme ndërsa përfshihemi në veprimtaritë tona të përditshme. Tregojini përvojat që keni pasur me çastet e mësimdhënies joformale, dhe çfarë keni mësuar nga këto përvoja. Si mund të ndihmojnë këto biseda të rregullta e të natyrshme për të siguruar që fëmijët dhe rinia të kenë një themel të fortë ungjilli mbi të cilin të ndërtojnë dëshmitë e veta? Shënojini idetë tuaja dhe veproni sipas çfarëdo përshtypjeje që merrni.

Fjalët e Urta 22:6; Efesianëve 6:1–4; Mosia 4:14–15; 3 Nefi 18:21; Doktrina e Besëlidhje 88:119–120

M. Rasëll Ballard, “Kujtoni Atë që Është Më e Rëndësishmja”, Liahona, maj 2023, f. 105–107

Diter F. Uhtdorf, “Jezu Krishti Është Forca e Prindërve”, Liahona, maj 2023, f. 55–59

Dejvid A. Bednar, “Më të Zellshëm dhe më të Përfshirë në Shtëpi”, Liahona, nëntor 2009, f. 17–20.

“Shtëpia dhe Familja”, te Mësimdhënia sipas Mënyrës së Shpëtimtarit (2022), f. 30–31

Presidenti Nelson ka premtuar: “Për shkak të planit të madh të Perëndisë për lumturinë, familjet mund të vulosen në tempuj dhe të përgatiten që të kthehen për të banuar në praninë e Tij të shenjtë përgjithmonë. Kjo është jeta e përjetshme! Ajo përmbush dëshirat më të thella të shpirtit njerëzor – dëshirën natyrore për shoqërimin e vazhdueshëm me anëtarë të dashur të familjes së një individi.” Merreni parasysh gëzimin që mund të keni me “shoqërimin e vazhdueshëm” me familjen tuaj. Ku jeni në shtegun për ta arritur këtë synim? Cili është hapi tjetër i familjes suaj në atë shteg? Nëse keni një situatë të vështirë familjare ku një “shoqërim [i] vazhdueshëm” me dikë mund t’ju duket gjithçka përveçse diçka ideale, si mund ta ftoni fuqinë e Shpëtimtarit për të ndihmuar në shërimin e marrëdhënieve tuaja familjare?

Ju mund të shikoni së bashku materialin filmik “Families Can Be Together Forever” [“Familjet Mund të Jenë së Bashku Përgjithmonë”] (3:10). Flisni rreth këshillës së Presidentit Henri B. Ajring, për dashurinë brenda një familjeje. Çfarë na kujtojnë fjalët e fundit të Presidentit Ajring në materialin filmik? Më pas lexojeni këtë mësim nga Presidenti Nelson: “Kjo jetë është koha për t’u përgatitur për shpëtim dhe ekzaltim. Ndërsa shpëtimi është një çështje individuale, ekzaltimi është një çështje familjare.” Ju mund të argëtoheni duke përgatitur diçka së bashku, si për shembull të bëni një ëmbëlsirë të parapëlqyer ose të përgatitni një vakt të parapëlqyer. Më pas mund të flisni pse përgatitja shpirtërore është thelbësore për të marrë ekzaltimin dhe për të qenë së bashku përgjithmonë si familje.

Doktrina e Besëlidhje 131:1–4; 132:15–20

Henri B. Ajring, “Tempullin Shum’ Dua t’Shoh”, Liahona, maj 2021, f. 28–31

D. Tod Kristoferson, “Fuqia Vulosëse”, Liahona, nëntor 2023, f. 19–22