Mbledhja e Izraelit

Për të mësuar më shumë se si anëtarët e Kishës janë pjesë e shtëpisë së Izraelit, mund të studioni bisedën e Presidentit Rasëll M. Nelson “Lejojeni Perëndinë të Triumfojë”. Çfarë do të thotë për ju të jesh pjesë e “Izraelit”? Mund të lexoni ose të dëgjoni gjithashtu tekstet e himneve që flasin rreth Izraelit, të tilla si “Shëlbues i Izraelit”, “Izrael, Per’ndia po Th’rret” dhe “Shpres’ e Izraelit”, duke e zëvendësuar fjalën “Izrael” me “mbajtës të besëlidhjeve” për të parë se çfarë idesh mund t’ju vijnë.

Plaku Dejvid A. Bednar ka dhënë mësim rreth rëndësisë së zgjedhjes për të qenë pjesë e popullit të besëlidhjes së Perëndisë duke ndjekur ligjet e Tij: “Kemi si thirrjen e Perëndisë ashtu edhe përgjigjen tonë individuale ndaj asaj thirrjeje, dhe shumë mund të thirren, por pak të zgjidhen. Të jemi apo të bëhemi të zgjedhur nuk është një status i veçantë që na jepet. Përkundrazi, ju dhe unë përfundimisht mund të zgjedhim që të zgjidhemi nëpërmjet ushtrimit të drejtë të lirisë sonë të zgjedhjes morale.” Çfarë bekimesh na vijnë teksa “zgjedhim që të zgjidhemi” si pjesë e shtëpisë së Izraelit? Çfarë mund të bëni tjetër që të zgjidhni për t’u zgjedhur?

Mund të lexoni së bashku pjesën e bisedës së Presidentit Nelson “Zgjedhjet për Përjetësinë”, ku ai flet për etiketimet. Pastaj, shikojini etiketat e ushqimeve ose të kutive të tjera dhe bisedoni rreth mënyrës se si ndikojnë etiketat e këtyre artikujve tek ajo që ne mendojmë për to. Cilat ishin ato tri etiketime që Presidenti Nelson na tha se duhet të kenë përparësi mbi gjithë etiketimet e tjera? Si mund të na ndihmojë etiketimi “fëmijë i besëlidhjes” që të kuptojmë bekimet që mund të vijnë nga të qenit pjesëtarë të shtëpisë së Izraelit? Lexoni tek 3 Nefi 20:25–27 dhe diskutoni se çfarë na mësojnë këto vargje rreth asaj që pret Zoti prej nesh si fëmijë të Tij të besëlidhjes.

Ndonëse besëlidhja e përjetshme e Perëndisë është bërë me njerëz të caktuar përgjatë shekujve, gjithkush mund të jetë pjesë e saj. Plaku Kuentin L. Kuk dha mësim: “Ata që e pranojnë ungjillin e Jezu Krishtit, pavarësisht nga prejardhja, bëhen pjesë e Izraelit të mbledhur”. Mund të shqyrtoni mesazhin e Plakut Kuk “Të Mblidhen të Sigurt në Shtëpi” për të mësuar më shumë rreth rëndësisë së të qenit pjesë e Izraelit të mbledhur. Diskutojeni atë që mësoni.

Zanafilla 48–49; Galatasve 3:14, 27–29; Jakobi [LiM] 5; 3 Nefi 20–23

Rasëll M. Nelson, “Besëlidhja e Përjetshme”, Liahona, tetor 2022, f. 4–11; Mesazhi i Përmuajshëm për revistën Liahona, tetor 2022, f. 1–6

Presidenti Nelson ka folur shpesh rreth rëndësisë së mbledhjes së Izraelit. Ai ka shpallur: “Zoti po mbledh ata që do të zgjedhin ta lejojnë Perëndinë që të jetë ndikimi më i rëndësishëm në jetën e tyre. Për shekuj, profetët e kanë parashikuar këtë mbledhje dhe ajo po ndodh pikërisht tani! Si një prelud thelbësor për Ardhjen e Dytë të Zotit, ajo është vepra më e rëndësishme në botë!” Mendoni rreth asaj se çfarë mund të nënkuptojë fraza që kjo është “vepra më e rëndësishme” në tokë. Si mund t’ju ndihmojë kjo njohuri që të vendosni se si t’i shpenzoni kohën, talentet, energjinë dhe burimet tuaja?

Mund të studioni tek 3 Nefi 10:5–6 dhe Doktrina e Besëlidhje 29:1–8 dhe të diskutoni se si po e mbledh Zoti popullin e Tij në ditët e fundit. Çfarë ngjashmërish ka mbledhja e Izraelit me klloçkën që mbledh zogjtë e saj? Teksa i përsiatni këto fragmente të shkrimeve të shenjta dhe këtë pyetje, këqyreni figurën shoqëruese të klloçkës dhe zogjve. Tregojini njëri‑tjetrit hollësi të tjera nga figura që duken të rëndësishme. Si ju ndihmojnë këto hollësi që të kuptoni se çfarë do Zoti që ne të japim mësim rreth mbledhjes? Në ç’mënyrë kemi mbrojtje fizike dhe shpirtërore teksa mblidhemi me shenjtorë të tjerë?

Mund të shikoni materialin filmik “Jesus Christ Prophesies of the Gathering of Israel” [“Jezu Krishti Profetizon për Mbledhjen e Izraelit”] për të mësuar më shumë rreth mbledhjes në kohën tonë. Çfarë na mëson Shpëtimtari në këtë rrëfim rreth asaj se si do të përmbushet mbledhja e Izraelit? Bisedoni rreth asaj që mësoni dhe si ka lidhje me ne sot.

Efesianëve 1:10; 1 Nefi 22:7–12; Doktrina e Besëlidhje 27:13; 133:26–32; Nenet e Besimit 1:10

Rasëll M. Nelson, “Mbledhja e Izraelit të Shpërndarë”, Liahona, nëntor 2006, f. 79–81; Konferenca e Përgjithshme, tetor 2006, f. 106–110

“Jezus’ Izraelin në Sh’pi do Ftoj”, Eja, Më Ndiq – Për Individët dhe Familjet: Dhiata e Vjetër 2022, f. 125–127

Plaku Ronald A. Rasband ka theksuar rëndësinë e punës misionare për të ndihmuar në mbledhjen e Izraelit. Ai tha: “Ne po i mbledhim fëmijët e Perëndisë në këto ditë të fundit që ata të mund të kenë ‘bekime [që] derdh[en] mbi kokat e tyre’ [3 Nefi 10:18] dhe premtimet e ‘pasuri[ve të] përjetësisë’ [Doktrina e Besëlidhje 78:18]. Nga kjo rrjedh se, për ta mbledhur Izraelin, ne kemi nevojë për misionarë, shumë më tepër sesa ata që po shërbejnë [aktualisht]. … Si Apostull i Zotit Jezu Krisht, ju kërkoj që të shërbeni si misionarë në mbledhjen e Izraelit.” Merreni parasysh se si mund ta ndihmoni Zotin ta mbledhë popullin e Tij, me apo pa një thirrje formale si misionar/e. Shënojini mbresat që merrni dhe veproni sipas tyre.

Lexoni së bashku te Doktrina e Besëlidhje 18:10–16 dhe tregojini njëri‑tjetrit mbresat tuaja për atë se si ndihet Perëndia rreth fëmijëve të Tij. Pse puna e mbledhjes së fëmijëve të Tij është kaq e rëndësishme për Të? Çfarë gjejmë te këto vargje që na frymëzojnë të ndihmojmë që Izraeli të mblidhet?

Si ndihmojmë ne që Izraeli të mblidhet? Merrni parasysh këtë shpjegim të fuqishëm nga Presidenti Nelson: “Në çfarëdo kohe që bëni çfarëdo gjëje që e ndihmon cilindo – në çdonjërën prej anëve të velit – të hedhë një hap drejt bërjes së besëlidhjeve jetike me Perëndinë dhe marrjes së ordinancave të veta thelbësore të pagëzimit dhe tempullit, ju po ndihmoni që Izraeli të mblidhet. Kaq e thjeshtë është.” Mund të jetë zbavitëse po të bëni një listë me veprimtari që janë pjesë e mbledhjes së Izraelit. Shihni se cili apo cila mund të bëjë listën më të gjatë! Mund t’i tregoni njëri‑tjetrit edhe disa gjëra që keni bërë këtë javë, ose që planifikoni të bëni javën e ardhshme, për të ndihmuar për veprën e madhe të mbledhjes së Izraelit. (Shembujt mund të përfshijnë mësimdhënien në një klasë në Fillore ose në Shkollën e së Dielës, bërjen e historisë familjare, frekuentimin në tempull, shpërndarjen e një shkrimi të shenjtë në rrjetet sociale ose të ndihmuarit e dikujt në nevojë.) Çfarë bekimesh keni parë teksa e keni ndihmuar Perëndinë në veprën e mbledhjes së popullit të Tij tek Ai?

Isaia 11:11–12; Jeremia 16:14–16

Church History Topics, “The Gathering of Israel”, Gospel Library [Biblioteka e Ungjillit]

Rasëll M. Nelson, “Pjesëmarrja e Motrave në Mbledhjen e Izraelit”, Liahona, nëntor 2018, f. 68–70