O Fesili e Fesiligia Soo

E te le manaomia se poto masani faafaiaoga e avea ai ma se faiaoga i le EnglishConnect. Atonu e te lei aoaoina muamua le Igilisi ma lagona le le mautinoa pe faapefea ona amata. E le afaina lea. O lesona o le EnglishConnect ua mamanuina ma le faaeteete ma le magafagafa lelei e faaaoga ai mataupu faavae o le aoaoina atu o gagana ma mataupu faavae faaleagaga e fesoasoani ia te oe ina ia faamanuiaina. E le manaomia ona avea oe ma se tagata tomai silisili. E te le tau iloa le tali i fesili uma. O lau matafaioi o le faagaoioia lea o le atinaega o le gagana e ala i le tuuina atu o avanoa mo faataitaiga. E te le tau aoaoina atu le kalama pe malamalama i mea uma e uiga i le Igilisi. Nai lo lena, ia taulai atu i le fatuina o se siosiomaga lea e lagona ai e tagata aoao le toafimalie e tautatala i le Iigilisi ma aoao mai a latou mea sese.

O le aoao atu o le Igilisi e faaaoga ai na o le Igilisi e taatele i le lalolagi atoa. O le mea moni, e mafai ona avea lenei mea o se faamanuiaga aua e faateleina ai le aofai o le Igilisi e faalogo ma faaaoga e tagata aoao. Manatua e tautala i se Igilisi faigofie. Faaaoga mea faitino, taga o lima, ma gagana o le tino e fesoasoani ai i tagata aoao ia malamalama i upu ma mamanu fou. E mafai ona e faaali atu se ata, tusi se ata, pe faatino. E mafai ona e faasino atu tagata aoao i punaoa ua faaliliuina i le EnglishConnect 1 mo Tagata A’oa’o po o le EnglishConnect 2 mo Tagata A’oa’o, pe e mafai foi ona e faaaogaina se lomifefiloi i luga o le initoneti. O lenei mea o le a aoao ai foi tagata aoao i le auala e faaaoga ai punaoa o loo maua e sue ai tali. Aloese mai faamatalaga uumi. Nai lo lena, ia faaali atu i tagata aoao le mea e fai e ala i le faataitaia.

Manatua o loo outou aoao faatasi. Valaaulia e le aunoa tagata aoao e liliu atu i le Alii mo se lagolago. I le avea ai ma o latou faiaoga, e mafai ona avea oe ma se faataitaiga o le faatuatua ma taumafaiga. O le tautala i le Igilisi ma tagata aoao o se faatinoga o le faatuatua. O le a faamanuia oe ma tagata aoao e le Alii a o outou galulue i le faatuatua e tautala i le Igilisi.

O le a tele lou fesoasoani i tagata aoao pe a e tautala i le Igilisi i le vasega atoa. E mafai ona e faia lenei mea e ala i le setiina o se faataitaiga. Fai le mea sili e te mafaia e tautala ai na o le Igilisi. Faaaoga upu faigofie ma fuaiupu pupuu. Tautala lemu ma fai soo fuaitau. Tusi upu ma fuaitau autu i luga o le laupapa. E mafai foi ona e faaaogaina se mea faitino, tusi se ata, pe faatino. Aloese mai faamatalaga uumi ma le faaliliuina o upu uma e te faia. Afai e tatau ona e faaaogaina le gagana moni, fesili muamua i le faatagaga ma faaaoga le gagana moni i se taimi itiiti e mafai ai ona toe foi lea i le Igilisi. Uunaia tagata aoao e tautatala i le Igilisi i le tele latou te mafaia ma aua le fefe i le faia o mea sese. Fesoasoani ia latou iloa le manuia ma viia a latou taumafaiga taitasi. Afai e manaomia e tagata aoao nisi fesoasoani, faasino i latou i tusi lesona a le tagata aoao, lea e mafai ona latou maua ai anomea i a latou lava gagana. Ao e taulai atu i le fesoasoani i tagata aoao e aoao e ala i le faia, o le a itiiti ifo le manaomia ona e faaaogaina lau gagana moni.

O le aoaoina o se vaega o gagana e tele o se avanoa matagofie lea e uunaia ai le tautala i le Igilisi aua o le Igilisi o le gagana masani lea i le vaega. I le avea ai ma se faiaoga, faaaoga le lomiga Igilisi o le tusi lesona a le tagata aoao. Fesoasoani i tagata aoao e faaaoga le tusi lesona a le tagata aoao i la latou lava gagana, pe afai o maua, ina ia mafai ona latou malamalama mai faaliliuga. Afai e mafai, tuu tagata aoao i ni vaega toalaiti e talanoaina le mataupu faavae o le aoaoina i a latou lava gagana, ae ia mautinoa e leai se tasi e faaesea. Afai e na o le tasi le tagata o se gagana faapitoa i le vaega, tuu atu i lena vaega e talanoaina le mataupu faavae o le aoaoina i le Igilisi faigofie ina ia aofia uma ai.

Ina ia aoao le Igilisi, e manaomia e tagata aoao ona atiina ae se mausa o le faataitai i aso taitasi. Uunaia tagata aoao e faatulaga lenei mausa e ala i le sailia o ni auala faigofie e tuufaatasia ai le Igilisi i a latou gaoioiga o aso taitasi (tagai i le vaega o le “Faataitaiga o Aso Uma”). Mo se faataitaiga, e mafai e tagata aoao ona filifili e matamata i ata pe faalogologo i musika i le Igilisi. E mafai ona e uunaia tagata aoao e faaaoga le lisi o manatu e faaleleia ai suesuega i aso taitasi o loo maua pe a maea le “Personal Study Tracker” i le faatomuaga i le tusi lesona a le tagata aoao. Faaaoga le lisi lenei e musuia ai tagata aoao e saili ni auala fatufatuai ma anoa e faataitai ai i aso taitasi.

I le taimi o le fonotaga a le vaega, valaaulia tagata aoao e suesue ma faataitai le Igilisi i aso taitasi ma tulitatao a latou taumafaiga. E mafai ona e fai atu i ni nai tagata aoao e faasoa mai ni mea patino sa latou faia mo faataitaiga i aso taitasi. Atonu e te mafaufau e fatu se avanoa i le initoneti, e pei o se talanoaga faavaega, mo tagata aoao i le vaega. Fefautuaai ma ou taitai e suʻe auala talafeagai e fesoasoani ai i le vaega ia tumau le fesoʻotai i le gasologa o le vaiaso e ala i savali tusitusia faaleavaega po o isi ala. E mafai ona e lagolagoina tagata aoao a o latou galulue e ausia a latou sini, ae ia manatua, e iu lava ina nafa i latou ma lo latou lava aoaoina.

Fefautuaai ma taitai o le Ekalesia i le lotoifale e faia ni faaiuga e uiga i le faatulagaina ma le faafoeina o vaega o le EnglishConnect. E masani lava e toalua faiaoga matutua e tatau ona tofia i vaega taitasi. Mafaufau i manaoga o tagata aoao ma le gafatia i le lotoifale a o e faia filifiliga e uiga i nofoaga, faasologa, ma le saoasaoa.

O lesona EnglishConnect e mafai ona eseese mai le 60 i le 90 minute. Mulimuli i faasologa o taimi ua lisiina mo gaoioiga taitasi. Aua nei aveesea soo se gaoioiga; faaaoga faigofie le taimi aupito laitiiti ua fautuaina mo se fonotaga puupuu a le vaega ma faaaoga le taimi umi e fautuaina atu pe a lava le taimi.

Manatua: Fefautuaai ma i latou o loo vaaia le polokalama ma mafaufau i manaoga o tagata aoao ma le gafatia i le lotoifale a o e faia nei faaiuga.

E masani lava, e faatasi i le vaiaso ona fono vaega. Afai e manaomia, e mafai e vaega ona fono soo. Mo fonotaga faalevaega ina ia sili atu ona aoga, e manaomia e tagata aoao ona lava se taimi i le va o fonotaga e faamaea ai le vaega o le “Personal Study”.

O le EnglishConnect 1 ma le 2 e tofu ma lesona e 25. Afai e faatasi i le vaiaso ona fono ia vaega, o le a alu ai le ono masina e faamaea ai le vaega e tasi. Afai e faalua i le vaiaso ona feiloai ia vaega, o le a alu ai le tolu masina. Afai e manaomia, e mafai ona e vaevaeina le polokalama i ni vaega laiti, po o ni iunite. Mo se faataitaiga, e mafai ona e filifili e amata se vaega o le a feiloai mo na o le tolu masina e faatasi i le vaiaso e faamaea ai iunite 1 e oo i le 3. O le faaaogaina o lenei faiga e mafai ona fesoasoani i tagata aoao e tumau ai le tuuto.

Manatua: Pe a faatulagaina se fonotaga faalevaega e le amataina i le iunite 1, mafaufau e amata le faasologa o lesona a lau vaega i le lesona 1. O le a fesoasoani lea e aoao faamasani ai tagata aoao i le auala e faaaoga ai le tusi lesona. Fefautuaai ma i latou o loo vaaia le polokalama ma mafaufau i manaoga o tagata aoao ma le gafatia i le lotoifale a o e faia nei faaiuga.

Afai e manaomia, e mafai e vaega ona sili atu ma le tasi le lesona i le taimi o se fonotaga faalevaega. Mo fonotaga faalevaega ina ia sili atu ona aoga, e manaomia e tagata aoao ona lava se taimi a o lei faia le fonotaga a le vaega e faamaea ai le vaega “Personal Study”

Tagai i le “E faafia ona feiloai la’u vaega?” mo nisi faamatalaga i le faasologa o lesona ma le saoasaoa.

O le EnglishConnect 1 e manaomia ai le faitautusi i le gagana moni a le tagata ma le tomai e faitau ai le alafapeta Igilisi ma upu faavae Igilisi. O le EnglishConnect 2 e mo tagata aoao o e e mafai ona fai mai ni fuaiupu autu ma tali atu i fesili autu i le Igilisi. Ina ia filifili pe tatau i se tagata aoao ona auai i le EnglishConnect 1 po o le EnglishConnect 2, e mafai ona e faaaogaina le faatalanoaga o le atamai i le tautala i le faaopoopoga B.

O le EnglishConnect 3 o se kosi faaleogalua lea e fesoasoani i tagata aoao e atiina ae tomai faaakatemia o le Igilisi. Ina ia auai i le EnglishConnect 3, e tatau i tagata aoao ona faaaoga ma ausia se togi e agavaa ai i le suega o le tulaga. E mafai e tagata aoao ona talosaga i le englishconnect.org/join.

O le EnglishConnect e tele tulaga e fesoasoani ai i tagata auai ia alualu i luma. O le EnglishConnect 1 ma le 2 e fesoasoani i tagata a’oao e atiina ae ni tomai autu mo talanoaga i le Igilisi. O le EnglishConnect 3 o se kosi faaleogalua lea e fesoasoani i tagata aoao e atiina ae tomai faaakatemia o le Igilisi. E fesoasoani i tagata aoao e saunia mo le BYU–Pathway Worldwide. (Aoao atili i le BYU–Pathway Worldwide i le byupathway.org.)

O le EnglishConnect 3 o se kosi taugofie, e faaaoga ai le initoneti ma se talanoaga faatasi i le initoneti po o se falelotu i le lotoifale. O le EnglishConnect 3 e aofia ai punaoa e aoao ai i luga o le initoneti faatasi ai ma manatu faaalia patino i le faalogo, tautala, faitau, ma le tusitusi. E mafai e tagata aoao ona alualu i luma i le kosi i lo latou lava saoasaoa. E mafai e tagata aoao ona toe aveina le kosi o le EnglishConnect 3 i le tele o taimi e manaomia ai ina ia ausia a latou sini. O le faamaeaina o le EnglishConnect 3 e mafai ai e tagata aoao ona alofia le faavasegaga i le Igilisi pe a talosaga i le BYU–Pathway Worldwide.

Ina ia saunia mo le EnglishConnect 3, e tatau i tagata aoao ona faamaea le EnglishConnect 1 ma le 2—e aofia ai gaoioiga o le apigaluega, aemaise lava gaoioiga faitau ma tusitusi. Uunaia tagata aoao o le EnglishConnect 2 e talosaga i le EnglishConnect 3 i le englishconnect.org/join.

O le EnglishConnect 3 o loo ofoina atu e ala i le BYU–Pathway Worldwide e galulue faatasi ai ma taitai i le lotoifale ma faifeautalai o auaunaga a le Ekalesia. O taitai e fiafia i ai e mafai ona galulue faatasi ma pule o le uelefea ma le ola tutoatasi i o latou eria e tuuina atu le EnglishConnect 3 i o latou nofoaga.

Ua mamanuina lesona ina ia mafai ai e tagata aoao fou ona auai i se vaega o le EnglishConnect i soo se taimi. Afai e mananao tagata aoao e auai pe a uma ona amata vaega, faafeiloai i latou, tuu atu ia i latou le EnglishConnect 1 mo Tagata Aoao po o le EnglishConnect 2 mo Tagata Aoao (pe faaali atu ia i latou le auala e maua ai le tusi lesona i le Gospel Library), ma fesoasoani ia i latou e auai. E mafai e oe po o se isi tagata aoao ona fesoasoani i tagata aoao fou e tuufaatasia ma le vaega e ala i le faaali atu ia i latou o le auala e saunia ai mo le lesona e sosoo ai. Ma le isi, e mafai e tagata aoao ona filifili e toe fai se tulaga pe afai latou te manaomia nisi faataitaiga.

O nisi taimi e i ai luitau o tagata aoao e faigata ai ona auai i le vaega, ma e tele lava ina latou le mananao e toe foi mai ona o le maasiasi po o le fefe. Atonu latou te manatu ua tele naua mea ua latou misia ma ua le mafai ona latou mauaina. Aapa atu ma valaaulia tagata aoao e le o i ai e o mai i le lesona e sosoo ai e tusa lava po o le a le tele ua latou misia. Tuu atu le lagolago ma le faamalosiauga. Faamautinoa atu ia i latou o le EnglishConnect ua mamanuina ina ia mafai ai e tagata aoao ona toe auai i soo se taimi. E mafai e tagata aoao ona toe amata e ala i le auai i le vaega ma saunia mo le lesona e sosoo ai. Mafaufau e valaaulia se tagata se toatasi pe sili atu o le vaega e faafesootai le tagata aoao e le o i ai ma faailoa atu le lagolago.

Manatua: Aua nei faasoaina atu se faamatalaga fesootai a se tagata e aunoa ma lana faatagaga tusitusia.

O nisi tagata aoao e manaomia le tele o le taimi e malamalama ai ma tautala i se gagana. O nei tagata aoao o le a sili ona faamanuiaina mai le faamaeaina o le vaega “Personal Study” a o lei auai i vaega taitasi o talanoaga. Valaaulia i latou e faataitai le vaogagana ma mamanu o fuaiupu a o lei feiloai le vaega. I le taimi o le lesona, faapaga nei tagata aoao ma isi tagata aoao o e e mafai ona tuuina atu le faamalosiauga ma le lagolago. Uunaia tagata aoao uma ia faia le tele latou te mafaia ma ia talia mea sese o se vaega o le faagasologa o le aoaoina. E mafai foi ona e filifili e toe iloilo ma toe fai ia gaoioiga. Faamanatu i tagata aoao uma o le faamaeaina o le vaega “Personal Study” a o lei auai i le isi vaega o talanoaga e taua tele i lo latou alualu i luma.

A o e galue ma tagata aoao, atonu e te matauina o nisi e malamalama lelei ma faigofie ona faamaea gaoioiga faataitai. Mafaufau e luitauina nei tagata aoao e faaloloto lo latou aoaoina e ala i le faaaofia ai o nisi faamatalaga po o le faia o le gaoioiga lava lea e tasi i se anotusi ese. Mo se faataitaiga, pe a faataitai e tagata aoao le feiloai atu i se tasi, fai atu ia i latou e faataitai le feiloai i se uo fou po o se pule fou. O nei tagata aoao e mafai foi ona faamautuina lo latou malamalama i le Igilisi e ala i le lagolagoina o tagata aoao o e o loo aoaoina i se saoasaoa e telegese. E mafai ona manuia tagata aoao uma mai le aoaoina o se tupulaga ma fesoasoani i isi e faataitai le vaogagana ma mamanu i le Igilisi.

O le i ai o tagata aoao e eseese tulaga o le tomai e tautatala ai i le Igiisi o se mea masani ma o se avanoa mo i latou e fesoasoani ai le tasi i le isi. O le fesoasoani i le tasi ma le isi e mafai ona faafaileleina ai le faaaumea ma le tuputupu ae. E tofu tagata uma ma se mea e ofo atu. Mo se faataitaiga, o nisi tagata aoao atonu e mafai ona fesoasoani i isi ia lagona le mautinoa ona ua latou naunau e faia ni mea sese. Faapaga tagata aoao i auala eseese. E mafai ona outou faapaga tagata aoao ma se tasi i se tulaga talitutusa e fesoasoani ia i latou e faateleina faatasi o latou tomai. Pe e mafai foi ona e faapaga tagata aoao ma se tasi i se tulaga ese. O le tagata aoao e maualalo le tulaga o le a manuia mai manatu faaalia ma le lagolago. O le tagata aoao e maualuga le tulaga o le a manuia mai le aoaoina o se tupulaga ma faamatala i le Igilisi. Manatua, o le i ai o se vaega e eseese tomai e tautatala ai i le Igilisi o se mea masani ma e mafai ona avea o se avanoa matagofie mo tagata aoao e manuia ai mai le fesoasoani i le tasi ma le isi.

Nai lo le tuuina atu o faatonuga uumi o le kalama po o le faaaluina o le tele o le taimi e talanoa ai e uiga i tulafono, toe faasino tagata aoao i mamanu. O le a aloese tagata aoao mai le tele o mea sese e ala i le mulimuli i mamanu. E sili atu ona lelei le aʻoaʻoina e ala i le faataitaia o le gagana, nai lo le talanoa e uiga i le gagana. Soo se faamalamalamaga e uiga i le kalama e tatau ona faigofie ma manino ma aoga. Afai e te aoaoina atu se mataupu faavae, tuu atu ni fuaiupu faataitai ma valaaulia tagata aoao e faataitai le faaaogaina o le mataupu faavae. E sili atu ona manuia tagata aoao mai le faalogo ma faataitai le Igilisi.

Aua le faaaluina se taimi tele e faasa’o ai le faaleoga. Faamanatu i tagata aoao o le malamalama e sili atu le taua nai lo le saʻo atoatoa o le faaleoga. Uunaia tagata aoao e faataitai le faaleoga i le taimi o a latou suesuega faaletagata lava ia ina ia mafai ona latou faataitai i lo latou lava saoasaoa. Ia manatua afai e soona popole tagata aoao e uiga i lo latou faaleoga, atonu latou te le mananao e faataitai le talanoaga. Uunaia tagata aoao e faaaoga vaega faaleo i luga o le initoneti englishconnect.org/learner/resources.

Faaaoga le meafaigaluega QuickReg (quickreg.englishconnect.org) e lesitala ai ma pulea lau vaega o le EnglishConnect. O le QuickReg o se meafaigaluega e lesitala ai vaega ua saunia e Le Ekalesia a Iesu Keriso o le Au Paia o Aso e Gata Ai. E mafai ona e faaaogaina le QuickReg e:

• Fatu ai se vaega: Filifili le aso, taimi, ma le nofoaga o lau vaega.

• Pulea ai se vaega: Maimoa i faamatalaga a le tagata auai ma faafou faamatalaga o vaega.

• Valaaulia ai tagata e auai: O le a lisiina lau vaega i le initoneti i le englishconnect.org/join. E mafai ona e faasoa atu se sootaga e valaaulia ai tagata e lesitala mo lau vaega.

• Tufatufa tusi faamaonia: I le faaiuga o lau vaega, e mafai ona e faaaogaina ma lolomi ia tusi faamaonia.

O le EnglishConnect 1 ma le 2: I le faaiuga o le vaega, e mafai e tagata aoao ona maua tusi faamaonia o le auai. O taitai, tagata tomai faʻapitoa po o faiaoga a mafai ona tufaina atu tusi faamaonia. O nisi atunuu e le mafai ona faamaonia ai le tufatufa atu tusi faamaonia o le EnglishConnect. Faamolemole ia iloilo tulaga manaomia faaletulafono i le lotoifale a o lei tauaaoina atu tusi faamaonia (tagai englishconnect.org/leader/approved-locations).

Manatua: Ina ia maua ma tufatufa atu tusi faamaonia, e tatau ona lesitala lau vaega i le meafaigaluega o le QuickReg i le quickreg.englishconnect.org. (Tagai “E faapefea ona ou lesitala ma pulea laʻu vaega o le EnglishConnect?” i le vaega lenei o le FFS.)

EnglishConnect 3: E mafai e tagata aoao ona ausia tusi faamaonia o le faamaeaina pe a latou faamaeaina tulaga manaomia i le kosi. O le faamaeaina o le EnglishConnect 3 e mafai ai e tagata aoao ona alofia le faavasegaga i le Igilisi pe a talosaga i le BYU–Pathway Worldwide.