O le a le Matafaioi a le Faiaoga?

Uunaia tagata aoao e saili ma iloa le fesoasoani a le Alii i le aoaoina o le Igilisi. Fautuaina i latou e faaaoga mataupu faavae o le aoaoina “e ala lava lea i le suesue ma le faatuatua foi” (Mataupu Faavae ma Feagaiga 88:118). Fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga. Valaaulia i latou e faasoa mai o latou aafiaga faatupu faatuatua. Faasoa atu ou aafiaga e uiga i le mauaina o le fesoasoani a le Alii. (Tagai i le vaega “Fesoasoani i Tagata Aoao e O Mai ia Iesu Keriso” mai le Aoao Atu i le Ala a le Faaola [2022].)

Valaaulia le Agaga e ala i le fesoasoani i tagata aoao e alolofa ma lagolago e le tasi le isi. Fesoasoani ia i latou ia lagona le alofa o le Atua. Fatu se siosiomaga faafeiloai lea e lagona ai e tagata aoao uma latou te auai. Ia faamasani i tagata aoao ma fesoasoani ia i latou ia iloa e le tasi le isi. Fesoasoani ia i latou e fausia le talitonuga mautinoa a o latou faataitai, faia ni mea sese, ma faaleleia faatasi. (Tagai i le vaega “Alofa Ia i Latou E te Aoaoina” mai le Aoao Atu i le Ala a le Faaola [2022].)

Fesoasoani i tagata aoao e faatino i le faatuatua e faataitai le Igilisi ma faaleleia. O nisi tagata aoao atonu e leai se talitonuga i o latou tomai e aoao ai le Igilisi. E mafai ona e fesoasoani. Pe a e tautala i le Igilisi ia i latou, e te faaalia lou faatuatua e mafai e le Atua ona fesoasoani ia i latou e aoao. Uunaia tagata aoao e tautatala i le Igilisi. Faaviivii a latou taumafaiga. Fesoasoani i tagata aoao e manatua le mafuaaga ua latou aoaoina ai le Igilisi. Fautuaina i latou e faatutu ni sini ma faataitai le Igilisi i aso taitasi. (Tagai i le vaega “Valaaulia le Aoao ma le Filiga” mai le Aoao Atu i le Ala a le Faaola [2022].)