O a Mea e Fai e le Tagata Aoao?

I le avea ai ma se faiaoga o le EnglishConnect, e tatau ona e malamalama i mea o le a fai e tagata aoao ina ia mafai ona e fesoasoani ia i latou ia faamanuiaina. O le a sili atu ona faamanuiaina tagata aoao pe a latou faamaeaina gaoioiga o suesuega faaletagata lava ia, auai i le vaega o talanoaga, ma atiina ae se mausa o le faataitaia o le Igilisi i aso taitasi. O lesona taitasi i le EnglishConnect 1 mo Tagata Aoao ma le EnglishConnect 2 mo Tagata Aoao ua vaevaeina i ni vaega se lua: “Personal Study” (Suesuega Faaletagata Lava Ia) ma le “Conversation Group” (Talanoaga a le Vaega). Toe iloilo le “Faatomuaga” i tusi lesona a le tagata aoao o le EnglishConnect e fesoasoani e te malamalama ai i le aafiaga o le tagata aoao.

o le ata o loo faaalia ai o le suesuega faaletagata lava ia ma le talanoaga a le vaega o se faagasologa faifaipea

Saili le Aoaoina e ala i le Suesue ma le Faatuatua

O le faavae o le aafiaga i le EnglishConnect o le fesoasoani lea i tagata aoao e “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). O lesona uma i le EnglishConnect e faatotonugalemu i se mataupu faavae o le aoaoina. O mataupu faavae faaleagaga nei e fesoasoani ia i tatou e faalagolago ai i le Alii e faateleina ai lo tatou gafatia e aoao mai ma aoao atu. O mataupu faavae o le aoaoina e mafai ona fesoasoani tatou te malamalama ai i lo tatou gafatia moni ma le tomai o le Faaola e fesoasoani ai ia i tatou. O mataupu faavae o le aoaoina o le a tatou suesue ma faataitaia i aafiaga o le EnglishConnect e aofia ai:

O Oe o se Atalii/Afafine o le Atua

O au o se atalii/afafine o le Atua e i ai gafatia ma faamoemoega e faavavau.

Tagai i le Roma 8:16–17; “O Le Aiga: O Se Folafolaga i le Lalolagi.”)

Faatino le Faatuatua ia Iesu Keriso

E mafai e Iesu Keriso ona fesoasoani ia te au e faia mea uma pe a ou faatinoina le faatuatua ia te Ia.

(Tagai Filipi 4:13; Eteru 12:27; Moronae 7:33.)

Faia le Tiutetauave

Ua ia te a’u le mana e filifili ai, ma e nafa a’u ma lo’u lava aoaoina.

(Tagai i le 2 Nifae 2:14, 16; Mataupu Faavae ma Feagaiga 58:27--28.)

Alofa ma Aoao e le Tasi le Isi.

E mafai ona ou aoao mai le Agaga Paia ao ou alofa, aoao atu, ma aoao faatasi ma isi.

(Tagai Ioane 13:34–35; Ioane 14:26–27; Mataupu Faavae ma Feagaiga 84:106; 88:77, 122–23.)

Fetaomi Atu i Luma

Faatasi ai ma le fesoasoani a le Atua, e mafai ai ona ou uunai atu i luma e tusa lava pe ou te feagai ma faafitauli.

Tagai i le 2 Nifae 31:20; Mosaea 32:9; Mataupu Faavae ma Feagaiga 50:41--42.)

Filifili ma le Alii

Ou te faaleleia lo’u aoaoina e ala i le fefautuaai ma le Atua i aso taitasi e uiga i a’u taumafaiga.

(Tagai Faataoto 3:5–6; Mataio 7:7–8; Alema 37:37.)

Suesuega Faaletagata Lava Ia

A o lei auai atu i le vaega o talanoaga, e faamae’a e tagata aoao le vaega o le “Personal Study” (Suesuega Faaletagata Lava Ia) i le tusi lesona a le tagata aoao. I le vaega lenei, e suesue ai e tagata aoao se mataupu faavae o le aoaoina, tauloto le vaogagana, ma faataitai le faaaogaina o mamanu o fuaiupu.

O le taulotoina o vaogagana ma le faataitaiga o mamanu o gaoioiga ia e sili ona faia i suesuega faaletagata lava ia. O lenei mea e mafai ai e tagata aoao ona malamalama lelei i manatu faavae i lo latou lava saoasaoa.

Vaega o le Talanoaga

I le talanoaga a le vaega, e faamaea e tagata aoao gaoioiga i le “Conversation Group” (Vaega o Talanoaga) i le tusi lesona a le tagata aoao. Galulue i vaega toalaiti po o paga, e talanoaina e tagata aoao se mataupu faavae o le aoaoina, iloilo vaogagana ma mamanu o fuaiupu, ma faataitai talanoaga. O gaoioiga taitasi e saunia ai tagata aoao mo le isi gaoioiga. I le faaiuga o talanoaga taitasi a le vaega , e iloilo ai e tagata aoao lo latou alualu i luma ma faatutu ni sini mo faataitaiga i aso taitasi.

Faataitaiga i Aso Taitasi

Ina ia sili atu le aoaoina o le Igilisi, e manaomia e tagata aoao ona atiina ae se mausa o le faataitai i aso taitasi. Ina ia faavaeina lenei mausa, e manaomia e tagata aoao ona saili ni auala e faaaoga ai le Igilisi i a latou gaoioiga i aso taitasi. Mo se faataitaiga, a latou faalogologo i musika, e mafai ona latou faalogologo i le Igilisi. E mafai foi e tagata aoao ona faia ni talanoaga faigofie i le Igilisi i le fale, galuega, po o le lotu. (Tagai i manatu faaopoopo i le vaega “Fautuaga mo Suesuega” i tusi lesona a le tagata aoao o le EnglishConnect.) O le ki i faataitaiga i aso taitasi o le fesoasoani lea i tagata aoao e saili ni auala e faaaoga ai le Igilisi i a latou faiga masani.

I le avea ai ma se vaega o a latou faataitaiga i aso taitasi, e mafai e tagata aoao ona faamaea le vaega “Personal Study” (Suesuega Faaletagata Lava Ia) i le tusi lesona a le tagata aoao. E mafai foi ona latou faamaeaina gaoioiga o lesona ma faavasegaga i le initoneti i le englishconnect.org/learner/resources ma i le EnglishConnect 1 Workbook ma le EnglishConnect 2 Workbook.