“E Mafai Faapefea Ona Ou Faaleleia La’u Aoao Atu?,” EnglishConnect mo Faiaoga (2023)
“E Mafai Faapefea Ona Ou Faaleleia La’u Aoao Atu?,” EnglishConnect mo Faiaoga
E Mafai Faapefea Ona Ou Faaleleia La’u Aoao Atu?
E pei lava o le a faaleleia atili tagata aoao i le aluga o taimi, o le a faateleina foi lou mautinoa ma faaleleia i le aluga o taimi. O le a lagolagoina oe e le Alii a o e auauna atu ma fesoasoani i tagata aoao i lau vaega. O le a Ia aoao oe i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). Ia faatuatua o le a fesoasoani le Tama Faalelagi ia te oe a o e sailia le Agaga ma galue ia faaleleia atili.
Auala mo le Aoaoina Atu o se Gagana
O nisi nei o auala mo le aoaoina atu o le Igilisi. E le pei o vasega o gagana e taulai atu i aoaoga o le kalama, faataitaiga o vaogagana, po o faataitaiga o faaleoga, o talanoaga a le EnglishConnect e taulai atu vaega e fesoasoani ai i tagata aoao e faaaoga le gagana i ni auala anoa. A o e faaaogaina nei auala, o le a mafai ona e fesoasoani sili atu i tagata aoao.
Tautala i le Igilisi
O le tautala i le Igilisi e fesoasoani i tagata aoao e alualu i luma ma o se auala taua lea e saili ai le meaalofa o le tautala i gagana. Fai le mea sili e te mafaia e tautala ai na o le Igilisi ma valaaulia tagata aoao e faia foi faapea. Faaaoga upu faigofie ma fuaiupu pupuu. Tautala lemu ma toe fai upu ma fasifuaitau pe a manaomia. A uma ona e faia se fesili, tuu atu i tagata aoao le tele o le taimi e mafaufau ma tali mai ai. Faaaoga upu ma mamanu o loo faataitaia i le taimi nei e tagata aoao. A o e taitaia gaoioiga, e mafai ona e faasino atu tagata aoao i faatonuga o gaoioiga ua faaliliuina o loo tuuina atu i tusi lesona a le tagata aoao o le EnglishConnect.
Faataitai Gaoioiga
O le faaali atu i tagata aoao o le mea e fai e masani ona sili atu ona aoga nai lo le ta’u atu ia i latou o le mea e fai. Faaaoga le faataitaiga o le talanoaga i le amataga o gaoioiga taitasi e faataitai ai mea o le a faia e tagata aoao a o latou faataitaia. E mafai ona e faia matafaioi uma e lua i le talanoaga, pe e mafai foi ona e fai atu i tagata aoao e fesoasoani ia te oe e faaali atu.
Uunaia talanoaga
O le a vave ona maua e tagata aoao le to’a ma aoao atili a o latou faataitaia le faaaogaina o le gagana. Aua le popole i le faasa’oina o mea sese uma; na o le fesoasoani lava i tagata aoao e auai i talanoaga. Pulea lou taimi ina ia faaaluina le tele o taimi o vaega i talanoaga faapaaga.
Lagolago le Fai Soo
O le faataitai o le fai soo e fausia ai le mautinoa ma le lelei o le tautala. Uunaia tagata aoao e fesuiai paga ma toe faataitai. O le fesuisuiai o paga e tuuina atu ai i tagata aoao nisi avanoa e faalogo ma fai atu ai ni mea fou. Pe a faaaoga e tagata aoao mea latou te iloa i tagata eseese, e fesoasoani ia i latou e faamautu ai mea o loo latou aoaoina. E faateleina ai foi lo latou mautinoa ma faafaileleina ai le faaaumeaina.
Faamalosia Tagata Aoao
E manaomia e tagata aoao ona lagonaina lou alofa ma le faamalosiauga. Fesoasoani i tagata aoao e faatoilalo le fefe e ala i le viia o taumafaiga uma e tautala i le Igilisi. Matau ma auai i vaega taitasi ma faalogo a o faataitai e tagata aoao i le tasi ma le isi. Ia faaviivii soo i latou. Faataitai ma i latou ma fesoasoani ia i latou ia manuia. Faailoa atu auala uma o loo latou aoaoina ma faaleleia. A o e alofa ma uunaia tagata aoao, ua e fatuina se siosiomaga o le faatuatua, faaaumea, ma le tuputupu ae.
Faaleleia atili i le avea ma se Faiaoga FaaKeriso
I le avea ai ma se faiaoga i le EnglishConnect, ua ia te oe se avanoa tulaga ese e auauna atu ai i isi. O mataupu faavae o le aoao atu faaKeriso e faatatau ia te oe. E mafai ona e aoao ma faaaoga mataupu faavae mai le punaoa o le Aoao Atu i le Ala a le Faaola (2022). I lalo o le taitaiga a lou taitai perisitua, e mafai ona e auai i fonotaga a le aufono a faiaoga. E mafai foi ona e iloiloina i lea taimi ma lea taimi le auala o loo e faia ai ma faailoa mai vaega e mafai ona e faaleleia e ala i le faaaogaina o le “Alualu i Luma o se Faiaoga e Faapei o Keriso—O Se Iloiloga Faaletagata Lava Ia” (Aoao Atu i le Ala a le Faaola, 37). Ia iloa le vaega o loo e lelei ai. Faailoa vaega e te manao e faaleleia ma fai ni fuafuaga patino e faaaoga ai mea o loo e aoaoina.
Manatua, o le mea aupito sili ona taua e mafai ona e faia o le alofa i tagata aoao ma saili ina ia taitaiina e le Agaga a o e uunaia le faatuatua, faaaumea, ma le tuputupu ae.