E Faapefea Ona Ou Saunia mo se Vaega o Talanoaga?

O le vaega o talanoaga e taua i le aafiaga o le EnglishConnect. I le vaega o talanoaga, e maua e tagata aoao ni avanoa e faataitai ai ni talanoaga anoa. A o latou feiloai, e mafai e tagata aoao ona maua le to’a, aoao mai le Agaga, ma lagolago e le tasi le isi.

O le tautala i le Igilisi e fesoasoani i tagata aoao e alualu i luma ma o se auala taua lea e saili ai le meaalofa o gagana. E mafai ona e taitaia se vaega o talanoaga e faaaoga ai le Igilisi faigofie. Afai e manaomia, e mafai e tagata aoao ona vaai i faaliliuga i tusi lesona a le tagata aoao o le EnglishConnect i a latou lava gagana. Ua saunia le faaliliuga mo faamoemoega, mataupu faavae o le aoaoina, vaogagana, ma faatonuga.

A o lei fono lau vaega o talanoaga, iloilo vaega taitasi i tusi lesona a le tagata aoao o le EnglishConnect. O nisi nei o laasaga e fesoasoani ia te oe e saunia ai:

1. Tatalo ma saili le fesoasoani a le Atua.

2. Mafaufau pe faapefea ona e uunaia le faatuatua, faaaumea, ma le tuputupu ae i le vaega.

   1. E mafai faapefea ona ou valaaulia le Agaga?

   2. E mafai faapefea ona ou fesoasoani i tagata aoao e saili ma iloa le fesoasoani a le Alii?

   3. E mafai faapefea ona ou fesoasoani i tagata aoao ia alolofa ma lagolago e le tasi le isi?

   4. E mafai faapefea ona ou fesoasoani i tagata aoao e tautatala i le Igilisi ma faaleleia?

3. Suesue le mataupu faavae o le aoaoina.

   1. Na faapefea ona ou aafia i lenei mataupu faavae?

   2. E mafai faapefea ona ou fesoasoani i tagata aoao e faaaoga lenei mataupu faavae?

   3. E mafai faapefea ona ou faaaogaina lenei mataupu faavae i la’u aoaoga?

4. Iloilo vaogagana ma mamanu.

   1. Pe mafai ona ou faaaogaina ma le mautinoa ia vaogagana ma mamanu i se talanoaga?

5. Faitau gaoioiga 1–3.

   1. E faapefea ona ou faataitaia gaoioiga taitasi?

   2. O le a faapefea ona ou faapagaina tagata aoao mo se faataitaiga?

   3. E faapefea ona ou lagolagoina tagata aoao a o latou faataitai?

6. Iloilo le vaega o le “Iloiloga”.

   1. E faapefea ona ou fesoasoani i tagata aoao ia lagona le faamanuiaina?

   2. E faapefea ona ou fesoasoani i tagata aoao e faaaoga le “Tulitatao o le Suesuega Faaletagata Lava ia” i le tusi lesona a le tagata aoao?

7. Iloilo le vaega o le “Galue i le Faatuatua e Faataitai ai le Igilisi i Aso Taitasi”.

   1. E faapefea ona ou uunaia tagata aoao e fai le vaega o “Suesuega Faaletagata Lava Ia” a o lei feiloai le vaega ma faataitai le Igilisi i aso taitasi?

   2. O le a faapefea ona ou uunaia tagata aoao e faalagolago i le Alii?

Iloilo le vaega “Punaoa o Vaega” i le tusi lesona lenei. (O nei punaoa o loo aofia ai foi i tusi lesona a le tagata aoao o le EnglishConnect.) Fuafua pe faapefea ona e faaaogaina nei punaoa. O le vaega “Fasifuaitau o Vaega o Talanoaga” o loo aofia ai ni fasifuaitau faigofie e mafai ona fesoasoani i le vaega e fegalegaleai ai i le Igilisi. O le“tatalo i le Igilisi” e aofia ai ni mamanu faigofie e fesoasoani ai i tagata aoao e tatalo i le Igilisi. E mafai ona e valaaulia tagata auai e toeiloilo le vaega lenei e saunia ai e tuuina atu tatalo amata po o tatalo faaiu.

O punaoa faaopoopo faafaiaoga ma faataitaiga o loo maua i le Gospel Library ma le englishconnect.org/teacher.

Uo o Isi Faatuatuaga

O se taulaiga i le aoaoina e faavae i le faatuatua o se tasi lea o mea e tulagaese ai le EnglishConnect. E mafai ona e faaaofia ai tagata mai talaaga o faatuatuaga eseese e ala i le fesoasoani ia i latou e toe manatunatu pe faapefea ona faatatau le mataupu faavae o le aoaoina ia i latou. E mafai ona e faaaogaina le “Faaopoopoga o Mataupu Faavae o le Aoaoina” i tusi lesona a le tagata aoao o le EnglishConnect e fesoasoani ai ia latou malamalama i faaupuga o le talalelei. Pe a taialaina ai e le Agaga, mafaufau e valaaulia i latou e faasoa mai mea ua latou aoaoina a o e talanoaina le mataupu faavae o le aoaoina. Ia faaali atu i taimi uma le faaaloalo mo talitonuga o isi a o faasoa atu lou faatuatua e mafai e le Atua ona fesoasoani ia i latou e aoao le Igilisi.

E mafai ona e maua manatu faaopoopo i le faatomuaga o le tusi lesona o le Tala’i La’u Talalelei ; tagai i le vaega “Faaaogaina o le Tala’i La’u Talalelei e Tagata o le Ekalesia.”

Galulue ma le Autalavou

O le EnglishConnect e mafai ona faamanuiaina ai olaga o le autalavou. O siteki, uarota, ma misiona e mafai ona faatulagaina vaega mo na o le autalavou lava. Afai e tuufaatasi vaega o le autalavou ma tagata matutua, mafaufau e faavasega faatasi le autalavou mo gaoioiga faataitai.

Manatua e mulimuli i aiaiga faavae a le Ekalesia mo le puipuia o le autalavou. O tamaiti (18 tausaga po o lalo ifo ma o loo nonofo i le fale) e tatau ona i ai se fomu o le maliega a matua ua sainia a o lei auai atu i le vaega. O loo maua fomu i le tele o gagana i luga o le initoneti englishconnect.org/resources/leader. Ma le isi, o kosi o le EnglishConnect e tatau ona mulimuli i aiaiga faavae a le Ekalesia e faapea e le itiiti ifo ma le toalua ni tagata matutua faatuatuaina e i ai pea i taimi o fonotaga faalevaega. E tatau ona e mulimuli i nei aiaiga faavae e tusa lava pe o fono i le initoneti le vaega.