Cov Lus Nug uas Nug Ntau

Koj tsis tas ua ib tug xib hwb ua ntej koj los ua ib tug xib hwb EnglishConnect. Tej zaum koj tsis tau qhia lus Askiv ua ntej thiab tsis paub tseeb yuav ua li cas kom pib. Tsis ua li cas. Tej zaj lus EnglishConnect los twb ua tib zoo tsim kom siv tej lub ntsiab cai qhia yam lus thiab tej lub ntsiab cai ntawm sab ntsuj plig kom pab koj muaj peev xwm ua. Koj tsis tas muaj txuj ci tag nrho. Koj tsis tas paub teb txhua lo lus nug. Koj txoj hauj lwm yog kom saib xyuas tib neeg txoj kev kawm txawj hais lus thaum muab cib fim rau lawv xyaum hais lus. Koj tsis tas qhia tej kev cai siv lus los sis to taub txhua yam txog lus Askiv. Tiam sis, cia li tsim ib qho chaw rau cov neeg kawm txaus siab hais lus Askiv thiab kawm los ntawm tej yam lawv hais ua yuam kev.

Kev qhia lus Askiv thaum siv lus Askiv xwb los yeej ua li ntawd nyob thoob plaws lu ntiaj teb. Muaj tseeb tiag, qhov no yog ib txoj koob hmoov vim tias ua rau cov neeg kawm hnov thiab siv lus Askiv ntau zog. Nco ntsoov hais lus Askiv yooj yim xwb. Siv cov duab, siv tes, thiab lub cev kom pab cov neeg kawm thiaj li to taub tej lo lus thiab tej txheej txheem hais lus tshiab. Koj muab duab rau lawv siab, kos duab, los sis ua yeeb yam los tau. Koj hais kom cov neeg nyeem tej yam uas tau txhais lus nyob hauv EnglishConnect 1 rau cov Neeg Kawm los sis EnglishConnect 2 rau cov Neeg Kawm los tau, los sis siv ib phau ntawv txhais lus nyob saum huab cua. Qhov no kuj yuav qhia cov neeg kawm kom paub siv tej kev pab nrhiav tau tej lus teb. Tsis txhob hais lus piav kom ntev. Tiam sis, coj yam ntxwv rau cov neeg kawm kom lawv paub ua dab tsi.

Nco ntsoov tias nej kawm ua ke. Caw cov neeg kawm thov tus Tswv kom txhawb nqa lawv. Vim koj yog lawv tus xib hwb, koj coj tau yam ntxwv rau lawv txog kev ntseeg thiab kev siv zog. Kev hais lus Askiv nrog cov neeg kawm yeej yog ib yam yus ua los ntawm kev ntseeg. Tus Tswv yuav foom koob hmoov rau koj thiab cov neeg kawm thaum nej muab siab rau ntseeg hais lus Askiv.

Koj yuav pab cov neeg kawm ntau tshaj thaum koj tsom ntsoov rau kev hais lus Askiv kom tas mus li hauv pawg sib tham. Koj ua tau li no thaum koj coj yam ntxwv txog qhov no. Ua zoo npaum li koj ua tau kom hais lus Askiv xwb. Hais tej lo lus uas yooj yim hais thiab hais tej kab lus uas tsis ntev. Maj mam hais thiab rov qab hais tej kab lus ntau zaus. Sau tej lo lus thiab kab lus tseem ceeb rau ntawm daim txiag. Koj muab duab rau lawv siab, kos duab, los sis ua yeeb yam los tau. Tsis txhob hais lus piav kom ntev thiab txhob txhais txhua yam koj hais. Yog tias yuav tsum siv lawv yam lus, cia li thov tso cai ua ntej thiab tsis txhob hais lawv yam lus pes tsawg ces rov qab hais lus Askiv. Hais kom cov neeg kawm hais lus Askiv ntau npaum li lawv hais tau thiab tsis txhob ntshai ua yuam kev. Pab lawv pom tias lawv muaj peev xwm ua, thiab qhuas lawv txoj kev siv zog. Yog tias cov neeg kawm xav tau kev pab ntxiv, cia li hais kom lawv nyeem hauv tej phau ntawv rau cov neeg kawm, vim nyob haud twb muab txhais ua lawv yam lus. Thaum koj tsom ntsoov rau txoj kev pab cov neeg kawm los ntawm tej yam lawv ua, koj yuav tsis tas siv lawv yam lus ntau pes tsawg.

Kev qhia ib pawg uas hais ntau yam lus yeej yog ib lub cib fim zoo kom txhawb nqa lawv hais lus Askiv vim Askiv yog yam lus uas txhua tus hais tau hauv pawg ntawd. Ua lawv tus xib hwb, siv phau ntawv rau cov neeg kawm uas yog lus Askiv. Pab cov neeg kawm siv phau ntawv rau cov neeg kawm uas yog lawv yam lus, yog tias muaj, yog li ntawd lawv yuav kawm los ntawm tej lus uas tau muab txhais. Yog tias ua tau, cia li faib cov neeg kawm ua tej pawg me me kom siv lawv yam lus sib tham txog lub ntsiab cai txog kev kawm ntawv, tiam sis ua tib zoo kom tsis txhob cia ib tug nyob nws ib leeg. Yog tias tsuas muaj ib tug neeg uas hais ib yam lus hauv koj pawg, cia pawg ntawd hais lus Askiv yooj yim kom sib tham txog lub ntsiab cai txog kev kawm ntawv txhua tus thiaj li koom tau.

Kom kawm lus Askiv zoo dua, cov neeg kawm yuav tsum xyaum txhua hnub. Hais kom cov neeg kawm ua li no txhua hnub thaum lawv nrhiav tej yam yooj yim siv lus Askiv thaum lawv ua tej yam hauv lawv lub neej (saib zaj lus “Xyaum Txhua Hnub”). Ua piv txwv, cov neeg kawm xaiv tau kom saib TV los sis mloog nkauj uas yog lus Askiv. Koj pab tau cov neeg kawm siv tej lub tswv yim txhawb nqa lawv txoj kev kawm txhua hnub “Personal Study Tracker” nyob hauv zaj lus cev hauv phau ntawv rau cov neeg kawm. Siv tej lub tswv yim no kom pab cov neeg kawm nrhiav tau tej yam uas muaj nqis heev kom xyaum hais lus Askiv txhua hnub.

Nyob hauv koj pawg kev sib ntsib, caw cov neeg kawm thiab xyaum hais lus Askiv txhua hnub thiab nug seb lawv tau ua li cas. Tej zaum koj yuav xav nug ob peb tug neeg kawm qhia txog tej yam uas lawv ua rau lawv txoj kev xyaum hais lus txhua hnub. Tej zaum koj yuav xav tsim ib qho chaw saum huab cua, xws li pawg qhov chaw sib tham, rau cov neeg kawm nyob hauv koj pawg. Nrog koj cov thawj coj tham seb puas muaj tej kev tsim nyog pab koj pawg sib txuas lus txhua lub lim tiam los ntawm tej kev xa lus los sis lwm yam. Koj txhawb nqa cov neeg kawm los tau thaum lawv ua raws li lawv tej lub hom phiaj, tiam sis, nco ntsoov tias, lawv yeej lav ris lawv txoj kev kawm ntawv.

Nrog lub Koom Txoos cov thawj coj tham kom txiav txim siab txog tej kev tsim thiab kev khiav tej pawg EnglishConnect. Qhov zoo tshaj, muaj ob tug neeg laus ua xib hwb rau txhua pawg. Xav seb cov neeg kawm xav tau dab tsi thiab cov hauv zej zog pab tau npaum li cas thaum koj txiav txim siab txog qhov uas yuav sib ntsib qhov twg, kev teem sij hawm, thiab qhia sai npaum li cas.

Tej zaj lus EnglishConnect ntev li 60 mus txog 90 feeb. Ua raws li tej kev teem sij hawm nyob hauv txhua txoj kev kawm. Tsis txhob tshem tej kev kawm; cia li siv sij hawm qhov tsawg kawg nkaus kom tsis sib ntsib ntev thiab tsuas siv lub sij hawm ntev yog tias tshuav sij hawm.

Lus cim: Nrog cov neeg uas saib xyuas lub txheej xwm tham thiab xav seb cov neeg kawm xav tau dab tsi thiab cov neeg zej zog muaj peev xwm ua li cas thaum nej txiav txim siab txog tej no.

Feem ntau, tej pawg sib ntsib ib zaug txhua lub lim tiam. Yog tias xav tau, tej pawg sib ntsiab ntau dua los tau. Kom tej pawg kev sib ntsib pab tau zoo tshaj plaws, cov neeg kawm yuav tsum muaj sij hawm txaus ua ntej rov qab sib ntsib kom ua “Personal Study” tiav lawm.

EnglishConnect 1 thiab 2 nyias muaj nyias 25 zaj lus. Yog tias txhua pawg sib ntsib ib zaug txhua lub lim tiam, ces yuav siv rau lub hlis kom kawm ib theem tas lawm. Yog tias tej pawg sib ntsib ob zaug txhua lub lim tiam, ces yuav siv peb lub hlis kom tas lawm. Yog tias xav tau, ces koj faib tau lub txheej xwm kom me zog, los yog ua tej zaj lus me dua. Piv txwv hais tias, tej zaum koj yuav xav tsim ib pawg uas yuav sib ntsib ib zaug txhua lub lim tiam rau peb lub hlis xwb kom kawm tas tshooj 1 mus txog 3. Kev ua li no pab tau cov neeg kawm rau siab.

Lus cim: Thaum teem sij hawm rau ib pawg txoj kev sib ntsib uas tsis pib ntawm tshooj 1, xav seb puas pib qhia zaj 1 thaum teem sij haw rau koj pawg kawm. Qhov no yuav pab cov neeg kawm paub siv phau kawm ntawv. Nrog cov neeg uas saib xyuas lub txheej xwm tham thiab xav seb cov neeg kawm xav tau dab tsi thiab cov neeg zej zog muaj peev xwm ua li cas thaum nej txiav txim siab txog tej no.

Yog tias xav tau, tej pawg kawm ntau tshaj ib zaj lus nyob hauv pawg kev sib ntsib. Tiam sis, kom tej pawg kev sib ntsib pab tau zoo tshaj plaws, cov neeg kawm yuav tsum muaj sij hawm txaus ua ntej rov qab sib ntsib kom ua “Personal Study” tiav lawm.

Siab “Kuv pawg yuav tsum sib ntsib pes tsawg zaus?” kom paub ntxiv txog kev teem sij hawm thiab kev qhia sai npaum li cas.

Cov neeg uas kawm EnglishConnect 1 yuav tsum paub nyeem lawv yam lus thiab txawj nyeem tsiaj ntawv Askiv thiab to taub tej lo lus Askiv yooj yim. EnglishConnect 2 yog rau cov neeg kawm uas txawj hais tej kab lus yooj yim thiab teb tej lus nug Askiv. Kom txiav txim yog tias ib tug neeg kawm puas tsim nyog koom EnglishConnect 1 los sis EnglishConnect 2, koj siv tau kev xam phaj seb txawj hais lus zoo npaum li cas nyob hauv ntaub ntawv ntxiv tom kawg B.

EnglishConnect 3 yog ib txoj kev qhia theem nrab uas pab cov neeg kawm txawj hais lus Askiv txaus mus kawm ntawv. Yog xav koom EnglishConnect 3, cov neeg kawm yuav tsum sau npe thiab tau qhab nias tsim nyog koom thaum xeem ntawv seb yog theem twg. Cov neeg kawm sau npe nyob ntawm englishconnect.org/join los tau.

EnglishConnect muaj peb theem kom pab cov neeg uas kawm vam meej. EnglishConnect 1 thiab 2 pab cov neeg uas kawm muaj txuj ci txawj hais lus Askiv qib yooj yim. EnglishConnect 3 yog ib txoj kev qhia theem nrab uas pab cov neeg kawm txawj hais lus Askiv txaus mus kawm ntawv. Qhov no pab cov neeg kawm npaj rau BYU–Pathway Worldwide. (Kawm ntxiv txog BYU–Pathway Worldwide nyob ntawm byupathway.org.)

EnglishConnect 3 yog ib chav kawm uas tsis them nqi ntau uas sib ntsib kom sib tham saum huab cua los sis hauv lub tsev sib ntsib. EnglishConnect 3 muaj tej kev pab kawm nyob saum huab cua kom pab nyeem ntawv, sau ntawv, mloog, thiab hais lus. Cov neeg kawm tau sau npaum li lawv nyiam xwb. Cov neeg kawm rov qab kawm EnglishConnect 3 ntau npaum li lawv nyiam kom ua raws li lawv tej lub hom phiaj. Kev kawm EnglishConnect 3 tiav yuav ua rau cov neeg kawm tsis tas xeem ntawv lus Askiv thaum lawv sau npe xav mus rau BYU–Pathway Worldwide.

Kom npaj rau EnglishConnect 3, cov neeg kawm yuav tau kawm EnglishConnect 1 thiab 2 tiav lawm—tsis hais tej kev kawm hauv phau ntawv rau kev kawm ntawv, qhov tseem ceeb yog tej kev kawm nyeem ntawv thiab sau ntawv. Txhawb nqa cov neeg uas kawm EnglishConnect 2 kom sau npe kawm EnglishConnect 3 nyob ntawm englishconnect.org/join.

EnglishConnect 3 yog muab dhau los ntawm BYU–Pathway Worldwide nrog cov thawj coj hauv zej zog thiab lub Koom Txoos cov tub txib pab. Cov thawj coj uas xav qhia EnglishConnect 3 hauv lawv cheeb tsam yuav ua hauj lwm nrog cov neeg saib xyuas kev pab neeg txom nyem thiab kev vam tau yus tus kheej nyob hauv lawv cheeb tsam.

Tej zaj lus no los twb tsim kom cov neeg kawm koom tau ib pawg EnglishConnect thaum twg los tau. Yog tias cov neeg kawm xav koom tej pawg tom qab tau pib lawm, cia li tos txais lawv, muab phau EnglishConnect 1 rau cov Neeg Kawm los sis EnglishConnect 2 rau cov Neeg Kawm rau lawv (los sis qhia lawv paub siv phau ntawv ntawd nyob hauv Txoj Moo Zoo cov Ntawv), thiab pab lawv koom tes. Koj los sis ib tug neeg kawm pab tau cov neeg tshiab koom ua ke nrog nej pawg thaum nej qhia tus ntawd paub ua li cas npaj rau zaj lus qhia tom ntej. Tsis tas li ntawd, cov neeg kawm yeej xaiv tau kom rov qab kawm ib theem yog tias lawv xav xyaum ntxiv.

Tej lub sij hawm cov neeg kawm raug teeb meem uas ua nyuaj rau lawv tuaj koom ib pawg, thiab lawv tsis tshua xav rov qab los vim lawv txaj muag los sis lawv ntshai. Tej zaum lawv xav tias lawv twb tsis nyob ntev dhau lawm thiab lawv kawm tsis tau tej yam uas tau qhia thaum lawv tsis nyob. Cia li tiv tauj lawv thiab caw cov neeg kawm kom rov qab los rau zaj lus qhia tom ntej tsis hais lawv tsis nyob ntev npaum li cas. Txhawb nqa lawv thiab hais lus zoo rau lawv. Qhia lawv tias twb tsim EnglishConnect kom cov neeg kawm koom thaum twg los tau. Cov neeg kawm rov qab pib los tau thaum lawv rov los koom nej pawg thiab npaj rau zaj lus qhia tom ntej. Cia li xav seb puas caw ib los sis ob peb tug mej zeej hauv nej pawg kom hu mus rau tus neeg kawm uas tsis nyob thiab txhawb nqa nws.

Lus cim: Tsis txhob qhia ib tug neeg xov xwm yog tias nws tsis tau sau ntawv tso cai ua li ntawd.

Cov neeg kawm ib txhia yuav tsum siv sij hawm ntxiv kom to taub thiab hais ib yam lus. Cov neeg no yuav kawm zoo tshaj plaws yog lawv ua “Personal Study” ua ntej lawv tuaj koom tej pawg sib tham. Caw lawv xyaum hais tej lo lus thiab tej txheej txheem hais lus ua ntej pawg sib ntsib. Thaum ua tej zaj lus qhia, muab cov neeg kawm faib kom nrog cov neeg kawm uas pab tau lawv thiab yuav txhawb nqa lawv. Txhawb nqa cov neeg kawm txhua tus kom ua ntau npaum li lawv ua tau thiab lees tej yam lawv ua yuam kev vim yog ib feem ntawm tus txheej txheem kawm ntawv. Tej zaum koj yuav xaiv kom rov qab ua tej kev kawm ib zaug ntxiv. Hais rau tag nrho cov neeg kawm tias yuav tsum ua “Personal Study” ua ntej lawv tuaj koom ib pawg sib tham tom ntej kom lawv thiaj li kawm tau zoo zuj zus.

Thaum koj nrog cov neeg kawm sib tham, tej zaum koj yuav pom tias ib txhia to taub zoo thiab yooj yim rau lawv ua tau tej kev xyaum hais lus. Xav seb puas twv cov neeg kawm no kom to taub ntxiv thaum lawv hais lus ntau me ntsis los sis ua kev kawm ntawd txog lwm yam. Piv txwv hais tias, thaum cov neeg kaum xyaum ntsib ib tug neeg tshiab, hais kom lawv xyaum sib tham zoo li lawv ntsib ib tug phooj ywg tshiab los yog ib tug thawj coj ua hauj lwm tshiab. Cov neeg kawm no kuj pab tau lawv txoj kev txawj hais lus Askiv thaum lawv txhawb nqa cov neeg uas kawm tsis sai npau li lawv. Yeej yuav pab txhua tus neeg kawm yog lawv qhia lwm tus thiab pab lwm tus xyaum hais tej lo lus thiab tej txheej txheem hais lus Askiv.

Yeej yuav muaj cov neeg kawm uas lawv txoj kev txawj hais lus Askiv tsis zoo ib yam thiab qhov no yog ib lub cib fim rau lawv ib leeg pab ib leeg. Kev sib pab li ntawd yuav ua rau lawv ua phooj ywg zoo thiab ua zoo zuj zus. Txhua tus yeej pab tau. Piv txwv hais tias, cov neeg kawm ib txhia pab tau lwm tus ua siab loj vim tias lawv kam hais lus ua yuam kev. Cia li muab cov neeg kawm faib kom tsis zoo ib yam txhua zaus. Koj faib tau cov neeg kawm kom muaj theem yuav luag zoo ib yam thiaj pab tau lawv ob leeg kom txawj. Los sis kom muab lawv faib tau kom tsis muaj theem zoo ib yam. Tus uas tsis tshua txawj hais yuav txais kev txhawb nqa thiab tej lus qhia zoo. Tus uas txawj hais lus yuav txais kev pab los ntawm kev qhia lwm tus thiab yuav tsum siv lus Askiv piav rau tus ntawd. Nco ntsoov tias, qhov us muaj neeg uas txawj hais lus Askiv tsis zoo ib yam yeej yog ib lub cib fim zoo rau cov neeg uas kawm ib leeg pab ib leeg.

Tsis txhob hais txog tej kev cai siv lus ntau los sis siv sij hawm ntau hais txog tej kev cai no, tiam sis hais kom cov neeg kawm nco txog tej txheej txheem hais lus xwb. Cov neeg kawm yuav tsis ua yuam kev ntau yog lawv siv tej txheej txheem hais lus. Yeej zoo dua yog yus xyaum hais lus thiab tsis hais txog yam lus ntawd xwb. Tej lus piav txog tej kev cai siv lus los yuav tsum hais lus yooj yim thiab hais lus tsis ntev. Yog koj qhia ib lub ntsiab cai, cia li hais tej kab lus los ua yam ntxwv rau lawv xyaum thiab caw cov neeg uas kawm kom xyaum hais lus siv lub ntsiab cai ntawd. Cov neeg yeej kawm zoo tshaj thaum lawv hnov thiab xyaum hais lus Askiv.

Tsis txhob siv sij hawm ntau kho lawv txoj kev hais lus. Cia li hais rau cov neeg kawm kom lawv nco ntsoov tias qhov uas tib neeg to taub lawv hais yeej zoo tseem ceeb tshaj qhov uas lawv hais tau tej lus zoo tshaj plaws. Txhawb nqa cov neeg kawm kom xyaum hais lus thaum lawv kawm ntawv lawv tus kheej lawv thiaj li xyaum tau raws li lawv nyiam. Nco ntsoov tias yog cov neeg kawm txhawj txog lawv hais zoo li cas, ces tej zaum lawv yuav tsis xav xyaum sib tham. Hais kom cov neeg kawm siv tej kev xyaum hais lus nyob saum huab cua nyob ntawm englishconnect.org/learner/resources.

Siv QuickReg (quickreg.englishconnect.org) kom sau npe thiab saib xyuas koj pawg EnglishConnect. QuickReg yog ib txoj kev sau pe hauv tej pawg uas muab los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Koj siv tau QuickReg kom:

• Tsim ib pawg: Xaiv hnub, sij hawm, thiab qhov chaw uas koj pawg yuav sib ntsib.

• Saib xyuas ib pawg: Saib xov xwm txog cov neeg thiab kho xov xwm txog ib pawg.

• Caw tib neeg los koom: Yuav tshaj tawm txog koj pawg nyob saum huab cua nyob ntawm englishconnect.org/join. Koj muab tau ib qhov kev txuas kom caw tib neeg sau npe rau koj pawg.

• Faib cov ntawv pov thawj: Thaum koj pawg tiav lawm, koj yuav tau thiab muab cov ntawv pov thawj luam tawm.

EnglishConnect 1 thiab 2: Thaum tej pawg no kawm tiav lawm, cov neeg kawm txais tau cov ntawv pov thawj. Cov thawj coj, cov saib xyuas, los sis cov xib hwb muab tau cov ntawv pov thawj no. Muaj tej lub teb chaws uas tsis pom zoo faib cov ntawv pov thawj EnglishConnect. Thov saib tej kev cai hauv zej zog ua ntej koj muab cov ntawv pov thawj (saib englishconnect.org/leader/approved-locations).

Lus cim: Kom yuav thiab faib cov ntawv pov thawj, koj pawg yuav tsum sau npe nyob hauv QuickReg nyob ntawm quickreg.englishconnect.org. (Saib “Kuv yuav ua li cas kom sau npe thiab saib xyuas kuv pawg EnglishConnect?” nyob hauv Tej Lus Nug uas Nug Ntau no.)

EnglishConnect 3: Cov neeg kawm txais tau cov ntawv pov thawj tias tau kawm tiav thaum lawv kawm tej theem ntawd tiav lawm. Kev kawm EnglishConnect 3 tiav yuav ua rau cov neeg kawm tsis tas xeem ntawv lus Askiv thaum lawv sau npe xav mus rau BYU–Pathway Worldwide.