Tus Neeg Kawm Ua tej Yam Twg?

Vim koj yog ib tug xib hwb EnglishConnect, koj yuav tsum to taub tias cov neeg kawm yuav ua dab tsi koj thiaj pab tau lawv txawj kawm. Cov neeg yuav kawm tau zoo thaum lawv ua tej kev kawm lawv tus kheej, koom nrog tej pawg sib tham, thiab xyaum hais lus Askiv txhua hnub. Txhua zaj lus nyob hauv EnglishConnect 1 rau cov Neeg Kawm thiab EnglishConnect 2 rau cov Neeg Kawm los muab faib ua ob feem: “Personal Study” (Kev Kawm Ntawv Koj tus Kheej) thiab “Conversation Group” (Pawg Sib Tham). Saib tshooj “Lus Cev” nyob hauv cov ntawv rau cov neeg kawm EnglishConnect kom pab koj to taub tus neeg uas kawm.

daim duab uas qhia tias kev kawm ntawv koj tus kheej thiab pawg sib tham yog ib tug txheej txheem uas rov qab ua ntau zaus

Nrhiav Kev Kawm los ntawm Kev Kawm Ntawv thiab Kev Ntseeg

Lub hauv paus ntawm EnglishConnect yog kev pab cov neeg kawm “nrhiav kev kawm, twb yog los ntawm kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118). Txhua zaj lus nyob hauv EnglishConnect siv ib lub ntsiab cai txog kev kawm ntawv. Tej no yog tej lub ntsiab cai ntawm sab ntsuj plig uas pab peb tso siab rau tus Tswv kom ua rau peb txawj kawm thiab qhia. Tej lub ntsiab cai txog kev kawm ntawv yuav pab peb to taub peb muaj peev xwm hloov los ua leej twg thiab tus Cawm Seej txoj kev muaj peev xwm pab peb. Tej lub ntsiab cai txog kev kawm ntawv uas peb yuav kawm thiab xyaum nyob hauv EnglishConnect yog li no:

Koj Yog Vajtswv Ib tug Me Nyuam

Kuv yog Vajtswv ib tug me nyuam uas muaj peev xwm thiab lub hom phiaj nyob mus ib txhis.

(Saib Loos 8:16–17; “Tsev Neeg: Ib zaj Lus Tshaj Tawm rau lub Ntiaj Teb.”)

Muab Siab rau Ntseeg Yexus Khetos

Yexus Khetos pab tau kuv ua txhua yam thaum kuv muab siab rau ntseeg Nws.

(Saib Filipis 4:13; Ethaws 12:27; Maulaunais 7:33.)

Lav Ris Kev Kawm

Kuv muaj hwj chim xaiv, thiab kuv lav ris kuv txoj kev kawm.

(Saib 2 Nifais 2:14, 16; Lus Qhuab Qhia thiab Kev Khi Lus 58:27–28.)

Ib Leeg Hlub thiab Qhia Ib Leeg

Kuv kawm tau los ntawm tus Vaj Ntsuj Plig Dawb Huv thaum kuv hlub, qhia, thiab kawm nrog lwm tus.

(Saib Yauhas 13:34–35; Yauhas 14:26–27; Lus Qhuab Qhia thiab Kev Khi Lus 84:106; 88:77, 122–23.)

Mus Lawm Tom Hauv Ntej

Nrog Vajtswv txoj kev pab, kuv thiaj li muaj cuab kav mus lawm tom hauv ntej thaum kuv raug tej kev cov nyom.

(Saib 2 Nifais 31:20; 32:9; Lus Qhuab Qhia thiab Kev Khi Lus 50:41–42.)

Sab Laj Nrog tus Tswv

Kuv yuav kawm tau zoo dua ntxiv thaum kuv nrog Vajtswv sab laj txog kuv tej hauj lwm.

(Saib Paj Lug 3:5–6; Mathais 7:7–8; Amas 37:37.)

Kev Kawm Ntawv Yus tus Kheej

Ua ntej sib ntsib hauv tej pawg sib tham, cov neeg kawm ua tej “Personal Study” (Kev Kawm Ntawv Koj tus Kheej) nyob hauv phau ntawv rau cov neeg kawm. Nyob hauv tshooj no, cov neeg kawm ib lub ntsiab cai txog kev kawm ntawv, cim ntsoov tej lo lus, thiab xyaum hais tej kab lus.

Kev cim ntsoov tej lo lus thiab xyaum tej txheej txheem hais lus yeej yog tej yam uas ntxim ua thaum nyob yus tus kheej. Tej no pab cov neeg kawm txawj ua li lawv kawm tau.

Tej Pawg Sib Tham

Nyob hauv pawg sib tham, cov neeg ua tej kev kawm “Conversation Group” (Tej Pawg Sib Tham) hauv lawv phau ntawv. Nyob ua ke hauv tej pawg me me los sis ib khub, cov neeg kawm sib tham txog ib lub ntsiab cai txog kev kawm ntawv, rov qab xyaum tej lo lus thiab tej txheej txheem hais lus, thiab xyaum sib tham. Txhua yam kev kawm npaj cov neeg kawm rau qhov uas yuav ua tom qab. Thaum ib pawg sib tham tas lawm, cov neeg kawm yuav tsum ntsuam xyuas lawv txoj kev txawj hais thiab cuab hom phiaj kom xyaum txhua hnub.

Xyaum Txhua Hnub

Kom kawm lus Askiv zoo dua, cov neeg kawm yuav tsum xyaum txhua hnub. Kom ua tau li no txhua hnub, cov neeg kawm yuav tsum nrhiav kev kom hais lus Askiv txhua hnub. Piv txwv hais tias, thaum lawv mloog nkauj, lawv mloog tau lus Askiv los tau. Cov neeg kawm kuj muaj sij hawm hais lus Askiv thaum lawv sib tham hauv tsev, ua hauj lwm thiab hauv lub koom txoos. (Saib tej lub tswv yim ntxiv nyob hauv tshooj “Study Suggestions” nyob hauv cov ntawv rau cov neeg kawm EnglishConnect.) Qhov tseem ceeb ntawm kev xyaum txhua hnub yog kev pab cov neeg kawm nrhiav tej kev kom siv lus Askiv thaum lawv ua tej yam txhua hnub.

Ua ib feem ntawm lawv txoj kev xyaum txhua hnub, cov neeg ua tau tej yam hauv “Personal Study” (Kev Kawm Ntawv Koj tus Kheej) nyob hauv phau ntawv rau cov neeg kawm. Lawv kuj ua tau tej kev kawm thiab tej kev ntsuas kev kawm nyob saum huab cua nyob ntawm englishconnect.org/learner/resources thiab nyob hauv EnglishConnect 1 Phau Kawm Ntawv thiab EnglishConnect 2 Phau Kawm Ntawv.