Kuv Yuav Ua Li Cas Kom Coj Ib Pawg txoj Kev Sib Tham?

Koj yuav siv phau EnglishConnect 1 rau cov Neeg Kawm los sis EnglishConnect 2 rau cov Neeg Kawm kom pab coj pawg kawm lus Askiv. Txhua zaj lus los yuav tsum ua li no:

Tos Txais Neeg: Ua siab dawb siab zoo tos txais cov neeg kawm thiab ua rau txhua tus paub cov tshiab. Cia li ua kom lawv paub tias koj yuav hais lus Askiv thiab caw txhua tus hais lus Askiv ntau npaum li hais tau. Qhia txog lub ntsiab ntawm koj zaj lus qhia me ntsis.

Thov Vajtswv: Caw ib tug neeg kawm hais lus nrov thov Vajtswv. Xaiv ib tug neeg kawm uas txaus siab hais lus Askiv thov Vajtswv. Koj caw tau tus neeg ua ntej kom npaj kawm “Kev Hais Lus Askiv Thov Vajtswv” nyob hauv cov ntaub ntawv ntxiv tom kawg ntawm tej phau ntawv rau cov neeg kawm.

Lub Ntsiab Cai txog Kev Kawm Ntawv: Nyeem thiab sib tham txog lub ntsiab cai txog kev kawm ntawv uas nyob hauv “Personal Study” (Kev Kawm Ntawv Koj tus Kheej) zaj lus hauv phau ntawv rau cov neeg kawm. Lub hom phiaj ntawm lub ntsiab cai txog kev kawm ntawv yog kom caw tus Ntsuj Plig los thaum nej hais thiab kawm ua ke “los ntawm kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118).

Coj yam ntxwv seb yuav ua li cas kom sib tham txog lub ntsiab cai thaum koj qhia me ntsis koj yuav ua li cas teb ib lo lus nug. Siv tej lus thiab tej kab lus yooj yim.

Caw cov neeg kawm qhia tias lawv xav li cas ib leeg hais rau ib leeg. Cov neeg kawm siv lawv yam lus sib tham los tau. Yog tias lawv txaus siab, cov neeg siv tau tej lo lus los sis kab lus Askiv thaum lawv sib tham.

Kev Kawm thib 1: Coj cov neeg kawm uas tej kev kawm nyob hauv “Conversation Group” (Pawg Sib Tham) zaj lus nyob hauv phau ntawv rau cov neeg kawm. Txhua yam kev kawm npaj cov neeg kawm rau qhov uas yuav ua tom qab. Tej kev kawm pab cov neeg kawm zuj zus los ntawm kev xyaum rov qab hais dua ntxiv mus txog thaum lawv txawj sib tham lawv tus kheej.

Nyob hauv kev kawm thib 1, pab cov neeg kawm rov qab hais tej lo lus thiab tej txheej txheem hais lus nyob hauv zaj “Kev Kawm Ntawv Koj tus Kheej” hauv phau ntawv rau cov neeg kawm. Lub hom phiaj yog kom npaj cov neeg kawm rau tej kev kawm thib 2 thiab 3 thaum koj pab lawv to taub ob peb lo lus tseem ceeb thiab hais tej kab lus.

Kev Kawm thib 2: Nyob hauv kev kawm thib 2, cov neeg kawm siv tej lo lus thiab tej txheej txheem hais lus kom xyaum siv xov xwm nug thiab teb tej lus nug nrog tus khub. Lub hom phiaj yog kom cov neeg kawm tsim tej kab lus Askiv ntau npaum li lawv hais tau.

Txhawb nqa cov neeg kawm kom hloov tus khub thiaj li muaj cib fim ntau xyaum hais lus. Thaum koj nrog cov neeg kawm sib tham, cia li nrhiav cov uas xav tau kev txhawb nqa ntxiv. Cia li txhawb lawv lub siab.

Kev Kawm thib 3: Nyob hauv kev kawm thib 3, cov neeg kawm muaj cib fim siv tej lo lus thiab tej kab lus kom sib tham raws li yuav ua hauv lub neej tiag tiag. Lub hom phiaj yog kom cov neeg kawm hais lus Askiv sib tham txog tej yam uas muaj nqis.

Txhawb nqa cov neeg kawm kom hloov tus khub thiaj li muaj cib fim ntau xyaum hais lus. Thaum kev kawm thib 3 tas lawm, xav kom tag nrho cov neeg kawm hais lus Askiv tsis saib hauv lawv tej phau ntawv. Pawg ntawd yuav tsum muaj zog txaus thaum cov neeg kawm sib tham thiab xyaum ua ke. Thaum koj nrog cov neeg kawm sib tham, tej zaum koj yuav pom tias ib txhia to taub zoo thiab txawj ua kev kawm ntawd. Xav seb puas twv cov neeg kawm no kom to taub ntxiv thaum lawv hais lus ntau me ntsis los sis ua kev kawm ntawd txog lwm yam. Piv txwv hais tias, thaum cov neeg kaum xyaum ntsib ib tug neeg tshiab, hais kom lawv xyaum sib tham zoo li lawv ntsib ib tug phooj ywg tshiab los yog ib tug thawj coj ua hauj lwm tshiab.

Ntsuam xyuas: Pab cov neeg kawm ntsuam xyuas lawv ua zoo li cas. Pab lawv xav tias lawv ua tau thaum koj qhia lawv tias lawv ua tau dab tsi zoo dua. Pab cov neeg kawm siv “Personal Study Tracker” (Kev Teev Kev Kawm Ntawv Koj tus Kheej) kom cuab hom phiaj rau kev xyaum hais lus txhua hnub.

Muab Siab rau Ntseeg Kom Xyaum Hais Lus Askiv Txhua Hnub: Nyeem nqe lus ntawd nrov rau koj pawg. Hais tias koj ntseeg tias tus Tswv pab tau lawv kawm lus Askiv. Caw lawv xyaum hais lus Askiv txhua hnub thiab npaj rau zaj lus tom ntej thaum ua tej kev kawm “Personal Study” (Kev Kawm Ntawv Koj tus Kheej) tiav lawm.

Thov Vajtswv: Caw ib tug neeg kawm hais lus Askiv thov Vajtswv kaw. Xaiv ib tug neeg kawm uas txaus siab ua los sis ib tug uas koj twb caw ua li no ua ntej.

Twb siv tej lub ntsiab cai tseeb txog kev kawm yam lus tshiab kom tsim tej zaj lus qhia EnglishConnect. Koj yuav ua zoo thaum koj ua raws li tej zaj lus qhia thiab tsim ib qho chaw uas muaj kev ntseeg, kev ua phooj ywg, thiab kev ua zoo zuj zus.