Tus Xib Hwb lub Luag Hauj Lwm Yog Dab Tsi?

Pab cov neeg kawm nrhiav thiab to taub tus Tswv txoj kev pab kawm lus Askiv. Hais kom lawv siv tej lub ntsiab cai txog kev kawm ntawv “los ntawm kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118). Pab cov neeg kawm paub txog tus Tswv txoj kev hlub, lub hwj chim, thiab lub siab hlub nyob hauv lawv lub neej. Caw lawv qhia txog tej yam uas txhawb lawv txoj kev ntseeg lub zog. Qhia txog thaum koj tau txais tus Tswv txoj kev pab. (Saib feem hu ua “Pab cov Neeg Kawm Kom Lawv Los Cuag Yexus Khetos,” los ntawm Kev Qhia Raws Li tus Cawm Seej txoj Kev [2022].)

Caw tus Ntsuj Plig los pab cov neeg kawm kom ib leeg hlub thiab txhawb nqa ib leeg. Pab lawv hnov Vajtswv txoj kev hlub. Tsim ib qho chaw uas tag nrho cov neeg kawm xav tias lawv muaj feem nrog sawv daws. Cia li paub txog cov neeg kawm thiab pab lawv ib leeg paub ib leeg zoo. Pab lawv ua siab loj thaum lawv xyaum, ua yuam kev, thiab ua zoo zuj zus ua ib ke. (Saib feem hu ua “Hlub cov uas Koj Qhia,” los ntawm Kev Qhia Raws Li tus Cawm Seej txoj Kev [2022].)

Pab cov neeg ua raws li kev ntseeg kom xyaum hais lus Askiv thiab ua zoo zuj zus. Cov neeg kawm ib txhia los tej zaum lawv tsis ntseeg tias lawv txawj kawm lus Askiv. Koj pab tau lawv. Thaum koj hais lus Askiv rau lawv, cia li qhia tias koj ntseeg Vajtswv yuav pab lawv kawm. Txhawb nqa cov neeg kawm kom hais lus Askiv. Qhuas lawv. Pab cov neeg kawm nco ntsoov vim li cas lawv kawm lus Askiv. Txhawb nqa lawv kom cuab hom phiaj thiab xyaum hais lus Askiv txhua hnub. (Saib feem hu ua “Caw Kom Tib Neeg Rau Siab Kawm,” los ntawm Kev Qhia Raws Li tus Cawm Seej txoj Kev [2022].)