Kuv Yuav Npaj Li Cas rau Ib Pawg txoj Kev Sib Tham?

Pawg sib tham yeej tseem ceeb rau EnglishConnect. Nyob hauv pawg sib tham, cov neeg kawm muaj cib fim xyaum sib tham txog tej yam uas muaj nqis. Thaum lawv sib ntsib, cov neeg kawm yuav ua siab loj, kawm los ntawm tus Ntsuj Plig, thiab ib leeg txhawb nqa ib leeg.

Hais lus Askiv pab cov neeg kawm vam meej thiab yog ib txoj kev tseem ceeb kom nrhiav lub txiaj ntsim txawj hais ntau yam lus. Koj hais tau lus Askiv yooj yim kom coj ib pawg sib tham. Yog xav tau, cov neeg kawm nyeem tau tej kev txhais lus nyob hauv cov ntawv rau cov neeg kawm EnglishConnect uas tau txhais ua lawv yam lus. Twb txhais lus rau tej lub hom phiaj, tej lub ntsiab cai txog kev kawm ntawv, tej lo lus, thiab tej lus piav yuav ua li cas.

Ua ntej koj pawg sib tham sib ntsib, nyeem txhua zaj lus hauv cov ntawv rau cov neeg kawm EnglishConnect. Nram qab no muaj tej yam kom pab koj npaj zoo:

1. Thov Vajtswv thiab nrhiav Nws txoj kev pab.

2. Xav seb koj yuav ua li cas kom txhawb nqa kev ntseeg, kev ua phooj ywg, thiab kev ua zoo zuj zus nyob hauv koj pawg.

   1. Kuv yuav ua li cas kom caw tus Ntsuj Plig?

   2. Kuv yuav ua li cas kom pab cov neeg kawm nrhiav thiab to taub tus Tswv txoj kev pab?

   3. Kuv yuav ua li cas kom cov neeg kawm ib leeg hlub thiab txhawb nqa ib leeg?

   4. Kuv yuav ua li cas kom pab cov neeg kawm hais lus Askiv thiab ua zoo zuj zus?

3. Kawm tej lub ntsiab cai txog kev kawm ntawv.

   1. Tau ua li cas kom thiaj paub txog lub ntsiab cai no?

   2. Kuv yuav ua li cas kom pab cov neeg kawm siv lub ntsiab cai no?

   3. Kuv yuav ua li cas kom siv lub ntsiab cai no thaum kuv qhia?

4. Rov qab kawm txog tej lo lus thiab tej txheej txheem hais lus.

   1. Kuv puas ua siab loj siv tej lo lus thiab tej txheej txheem hais lus thaum kuv nrog lwm tus sib tham?

5. Nyeem tej kev kawm 1–3.

   1. Kuv yuav ua li cas kom qhia txog txhua txoj kev kawm?

   2. Kuv yuav ua li cas kom faib lawv ua khub thaum lawv xyaum?

   3. Kuv yuav ua li cas kom txhawb nqa cov neeg kawm thaum lawv xyaum hais lus?

6. Nyeem txog “Kev Ntsuam Xyuas.”

   1. Kuv yuav ua li cas kom pab cov neeg kawm xav tias lawv txawj ua?

   2. Kuv yuav ua li cas kom pab cov neeg kawm siv “Kev Teev Kev Kawm Ntawv Koj tus Kheej” nyob hauv phau ntawv rau cov neeg kawm?

7. Rov qab nyeem “Ua Raws Li Kev Ntseeg Kom Xyaum Hais Lus Askiv Txhua Hnub.”

   1. Kuv yuav ua li cas kom pab cov neeg kawm ua “Kev Kawm Ntawv Koj tus Kheej” ua ntej pawg sib ntsib thiab xyaum hais lus Askiv txhua hnub?

   2. Kuv yuav ua li cas kom pab cov neeg kawm tso siab rau tus Tswv?

Nyeem “Tej Yam uas tej Pawg Siv Tau” hauv phau ntawv no. (Tej kev pab no los kuj muaj nyob hauv cov ntawv rau cov neeg kawm EnglishConnect.) Npaj kom paub tias koj yuav siv tej kev pab no zoo li cas. Zaj hu ua “Tej Kab Lus rau Ib Pawg Siv Thaum Sib Tham” los muaj tej kab lus yooj yim uas pab tau ib pawg sib tham lus Askiv. “Kev Hais Lus Askiv Thov Vajtswv” muaj tej txheej txheem hais lus yooj yim kom pab cov neeg kawm hais lus Askiv thov Vajtswv. Koj caw tau tib neeg kom nyeem zaj no kom npaj thov Vajtswv qhib los sis thov Vajtswv kaw.

Muaj tej kev pab thiab tej yam piv txwv ntxiv nyob hauv Txoj Moo Zoo cov Ntawv nyob ntawm englishconnect.org/teacher.

Phooj Ywg uas Tsis Ntseeg Li Peb

Kev tsom ntsoov rau kev kawm ntawv los ntawm kev ntseeg yog ib yam uas ua rau EnglishConnect txawv lwm yam. Koj pab tau tib neeg uas tsis ntseeg li peb thaum koj pab lawv xav txog vim li cas lub ntsiab cai txog kev kawm ntawv muaj nqis rau lawv. Koj siv tau “Tej Lo Lus ntawm tej lub Ntsiab Cai txog Kev Kawm Ntawv” nyob hauv cov ntawv rau cov neeg kawm EnglishConnect kom pab lawv to taub tej lo lus txog txoj moo zoo. Thaum tus Ntsuj Plig qhia koj, xav seb puas caw lawv qhia tias lawv kawm dab tsi thaum nej sib tham txog lub ntsiab cai txog kev kawm ntawv. Cia li saib taus lwm tus txoj kev ntseeg txhua lub sij hawm tiam sis cia li qhia txog koj txoj kev ntseeg hais tias Vajtswv pab tau lawv kawm lus Askiv.

Koj pom tau tej lub tswv yim ntxiv nyob hauv zaj lus piav txog phau ntawv Qhia Kuv txoj Moo Zoo; saib zaj lus “Lub Koom Txoos cov Mej Zeej txoj Kev Siv Qhia Kuv txoj Moo Zoo.”

Nrog cov Tub Hluas Ntxhais Hluas Ua Hauj Lwm

EnglishConnect pab tau cov tub hluas ntxhais hluas lub neej. Tej ceg txheem ntseeg, pawg ntseeg, thiab qhov chaw tshaj tawm txoj moo zoo yeej npaj tau tej pawg rau cov tub hluas ntxhais hluas xwb. Yog tias muab cov tub hluas ntxhais hluas thiab cov neeg laus koom ua ke, ces xav seb puas cia cov tub hluas ntxhais hluas nyob ua ke thaum lawv ua tej kev kawm xyaum hais lus.

Nco ntsoov kom ua raws li lub Koom Txoos tej tsab cai kom pov hwm cov tub hluas ntxhais hluas. Cov tub hluas ntxhais hluas (cov uas muaj hnub nyoog 18 rov haud thiab nyob hauv tsev) yuav tsum muaj ib daim ntawv rau niam txiv tso cai ua ntej koom koj pawg. Muaj tej daim ntawv no uas tau muab txhais ua ntau yam lus nyob ntawm englishconnect.org/resources/leader. Tsis tas li ntawd xwb, tej pawg EnglishConnect yuav tsum ua raws li lub Koom Txoos tsab cai uas qhia tias tsawg tshaj yuav tsum muaj ob tug neeg laus nyob thaum qhia tej pawg tej kev sib ntsib. Koj yuav tsum ua raws li tej tsab cai no yog tias ib pawg sib ntsib saum huab cua thiab.