Faatomuaga o le Faamanatuga

Sa faalauiloa atu e Iesu le faamanatuga i tagata na faapotopoto e faalogo ia te Ia. Sa Ia faamanuia le areto ma le uaina ma faatonuina Ona soo e tufatufa atu i le motu o tagata e toatele. Ona Ia aoao mai lea, “Afai tou te faia pea nei mea amuia outou, ona ua atiae outou i luga o la’u papa” (3 Nifae 18:12). E ui lava sa na o sina taimi puupuu o Iesu ma sa Nifae, ae sa Ia faaaluina le taimi e toe faatautaia ai le faamanatuga i tagata i le aso na sosoo ai, lea e faaalia ai le taua o lenei sauniga.

Na aoao mai Elder Gerrit W. Gong e uiga i le taua o le manatuaina o le Faaola e ala i le sauniga o le faamanatuga:

O vaiaso taitasi, i le aai ma feinu ai i le faamanatuga, tatou te osifeagaiga ai e manatua pea o Ia. O le utuvai mai i le toeitiiti 400 o mau faasino i le upu manatua, o auala nei e ono e mafai ona tatou manatua ai pea o Ia.

Muamua, e mafai ona tatou manatua pea o Ia e ala i le i ai o le talitonuga i Ana feagaiga, folafolaga, ma faamautinoaga. …

Lua, e mafai ona tatou manatua pea o Ia e ala i le faailoa atu ma le agaga faafetai o Lona aao i o tatou olaga atoa. …

Tolu, e mafai ona tatou manatua pea o Ia e ala i le faalagolago pe a faamautinoa mai e le Alii ia i tatou, “O ia o lē ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou” [Mataupu Faavae, ma Feagaiga 58:42]. …

Lona fa, ua Ia valaaulia i tatou ia manatua o loo Ia faafeiloaia i tatou i taimi uma i le aiga. …

Lima, e mafai ona tatou manatua pea o Ia i le Sapati e ala i le faamanatuga. …

Ma le mea mulimuli, lona ono, ua valaaulia i tatou e lo tatou Faaola ia manatua pea o Ia e pei ona Ia manatua pea i tatou. (“Manatua Pea o Ia,” Liahona, Me 2016, 108–10)

Vitio

10:49

Pese

“E Maeu le Poto ma le Alofa,” Viiga, nu. 109

4:8

Na tuuina mai e Iesu Keriso ia i tatou le faamanatuga e fesoasoani tatou te manatua ai o Ia. Fai le tamaitusi lenei e fesoasoani ai ia te oe ia migao ma mafaufau i Lona alofa pe a e tagofia le faamanatuga i vaiaso taitasi.