“Tasi le Lafu ma le Leoleo Mamoe e Toatasi,” Aafiaga o Suesuega o le Vaiaso Paia (2026)
Aso Tofi
Tasi le Lafu ma le Leoleo Mamoe e Toatasi
“Ua i ai ia te a’u ni isi mamoe ua lē o i lenei lotoa; e ao foi ona ou aumai i latou; ma o le a latou faalogo i lo’u leo; ma o le a tasi le lafu, ma tasi le leoleo mamoe” (3 Nifae 15:21).
Sa ta’u atu e Iesu Keriso i sa Nifae o i latou o “mamoe” sa ia faasino i ai ina ua Ia aoao atu i Ierusalema, “Ua i ai ia te a’u ni isi mamoe ua lē o i lenei lotoa; e ao foi ona ou aumai i latou” (3 Nifae 15:21). Na tautino mai ma le alofa e Iesu e faapea “e tasi le lafu, ma tasi le leoleo mamoe” ma vavalo e uiga i le faapotopotoina o Isaraelu i aso e gata ai.
O se tasi o auala e mafai ona tatou fesoasoani ai i le faapotopotoina o Isaraelu o le faasoa atu lea o le savali o le Tusi a Mamona, e pei ona valaaulia ai i tatou e fai e Elder Ronald A. Rasband:
A’u uo pele, i le avea ai ma se Aposetolo a le Alii, ou te valaaulia outou ia mulimuli i lo tatou perofeta pele, o Peresitene Nelson, i le faalilofia o le lalolagi i le Tusi a Mamona. Ua matua tele naua le manaoga; e tatau ona tatou galulue nei. Ou te folafola atu o le a outou auai i le galuega “aupito silisili i le lalolagi,” o le faapotopotoina o Isaraelu, e pei ona musuia ai oe e aapa atu ia i latou o e ua “taofia mai le upumoni ona ua latou le iloa le mea e maua ai.” Latou te manaomia lau molimau ma le tautinoga i le ala ua suia ai e lenei tusi lou olaga ma faalatalata atili atu ai oe i le Atua, Lona filemu, ma Lana “tala o le olioli tele” [1 Nifae 13:37].
Ou te molimau atu o le mamanu paia na saunia ai le Tusi a Mamona i Amerika anamua e oo mai e folafola atu le afioga a le Atua, e aumai agaga i le Alii o Iesu Keriso ma Lana talalelei toefuataiina “i le aso nei.” (“O Le Aso Nei,” Liahona, Nov. 2022, 27)
Mau ma fesili
O ai e mafai ona e faasoa atu i ai le talalelei a Iesu Keriso i lenei vaitau o le Eseta? E mafai ona faia lenei mea e ala i se faatinoga faigofie o le agalelei, faasoa atu o se savali faagaeetia, po o le valaaulia o se tasi e tapuai faatasi ma oe i lenei Aso Sa o le Eseta.
Vitio
Pese
“Pele i le Leoleo Mamoe,” Viiga, nu. 135
Gaoioiga mo Tamaiti
O Iesu o le Leoleo Mamoe Lelei, ma o i tatou o Ana mamoe. Sa alofa o Ia ia sa Nifae, e pei lava ona Ia alofa i tagata i Ierusalema. Po o fea lava e te nofo ai, e silafia ma alofa foi Iesu ia te oe!
Ia taaalo nei i se taaloga e uiga i mamoe! Faaaoga polo vavae e fai ma mamoe faafoliga ma faataapeape faataamilo i se laulau. Tuu se ata o Iesu i le ogatotonu. Faaaoga ni mimitivai [straws] e feula ai mamoe ia Iesu ina ia mafai ona latou faapotopoto latalata uma atu ia te Ia!