“Aoaoga e Uiga i le Salamo ma le Papatisoga,” Aafiaga o Suesuega o le Vaiaso Paia (2026)
Aso Lua
Aoaoga e Uiga i le Salamo ma le Papatisoga
“Ou te molimau atu ua poloaiina e le Tama tagata uma, i soo se mea o i ai, ia salamo ma talitonu mai ia te a’u. Ma o soo se tasi e talitonu mai ia te a’u, ma papatisoina, o ia lava lea o le a faaolaina” (3 Nifae 11:32–33).
I le taimi o Lana asiasiga i le atu Amerika, sa aoao atu ai e Iesu Keriso ia Nifae ma isi soo e uiga i le papatisoga, ma faapea atu, “Ou te tuu atu ia te oe le mana e te papatiso ai nei tagata pe a ou toe alu a’e i le lagi” (3 Nifae 11:21). Na aoao mai Iesu e tatau ona faia le papatisoga e ala i le faatofuina i le pule tatau. A o Ia aoao atu i soo Lana aoaoga faavae, sa Ia fetalai foi e uiga i le taua o le salamo: “E ao ina outou salamo … ma avea e pei o se tamaitiiti, a leai e le mafai lava ona outou mautofi i le malo o le Atua” (3 Nifae 11:38).
I le konafesi aoao ia Aperila 2019, na aoao mai ai Peresitene Russell M. Nelson e faapea, o le salamo o le ala lea e suia ai ma avea ma tagata sili atu:
Pe a fetalai mai Iesu ia te oe ma au ia “salamo,” o loo Ia valaaulia i tatou e suia o tatou mafaufau, lo tatou malamalama, o tatou agaga—e oo lava i le ala tatou te manava ai. O loo Ia fetalai mai ia i tatou ia suia le ala tatou te alolofa ai, mafaufau, auauna atu, faaalu o tatou taimi, taulima o tatou [taitoalua], aoao a tatou fanau, ma e oo lava i le tausia o o tatou tino.
E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e tupu; o se faagasologa. O le ki lea i le fiafia ma le filemu o le mafaufau. Pe a o faatasi ma le faatuatua, e tatala e le salamo lo tatou avanoa i le mana o le Togiola a Iesu Keriso. (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67)
Mau ma Fesili
Ua aoao mai Peresitene Nelson e faapea o le salamo “o le ki lea i le fiafia ma le filemu o le mafaufau.” Na faapefea ona aumaia e le salamo nei faamanuiaga i lou olaga?
Vitio
Pese
“A’oa’o Mai ia Ou Ui i le Malamalama,” Viiga, nu. 187
Gaoioiga mo Tamaiti
O le salamo o se tasi lea o meaalofa sili ona matagofie ua tuuina mai e le Tama Faalelagi ia i tatou! A tatou faia se filifiliga sese, e mafai ona faamagaloina i tatou i le fai atu faamalie atu, faia o mea tatou te mafaia e faasa’o ai, ma tatalo mo le faamagaloga. Ona o Iesu Keriso, ua mafai ai ona tatou salamo i taimi uma ma toe taumafai. Faitau le tala lenei e iloa ai pe na faapefea ona salamo Karolaina ina ua uma ona faia se filifiliga sese.