“O Aoaoga e Uiga i le Tulafono Maualuga,” Aafiaga o Suesuega o le Vaiaso Paia (2026)
Aso Lulu
O Aoaoga e Uiga i le Tulafono Maualuga
“O lea ou te manao ia outou atoatoa e pei lava o a’u, po o lo outou Tamā o lē o i le lagi e atoatoa.(3 Nifae 12:48).
E pei o soo o Iesu o e na faapotopoto e faalogologo i le Lauga i luga o le Mauga i Kalilaia, o tagata o e na faapotopoto i le malumalu i Nuumau sa ola i le tulafono a Mose. Ae a o ia aoao atu, sa valaaulia e Iesu tagata ia ola i se tulafono maualuga atu, ma fetalai atu: “O ia mea o taimi anamua, ia sa i lalo o le tulafono, ua faataunuuina uma ia te a’u. Ua faate’a atu mea tuai, ma ua faafouina mea uma” (3 Nifae 12:46-47).
I le taimi o le konafesi aoao ia Aperila 2023, sa fautuaina ai i tatou e Peresitene Russell M. Nelson ia tatou ola i se ala maualuga atu ma paia atu. Sa ia aoao mai:
“I le avea ai ma soo o Iesu Keriso, e tatau ona avea i tatou ma faataitaiga o le auala e fegalegaleai ai ma isi— aemaise lava pe a i ai ni o tatou eseesega o manatu. O se tasi o auala sili ona faigofie e faailoa ai se soo monio Iesu Keriso o le ala e taulimaina ai ma le alofa e lena tagata isi tagata.
Na faamanino mai e le Faaola lenei mea i Ana lauga i itulagi uma e lua. “Amuia e faatupuina le filemu,” na Ia fetalai ai [Mataio 5:9]. …
E manino lava le savali a le Faaola: O Ona soo moni e atiae, siitia, faamalosiau, faatauanau, ma musuia—e tusa lava po o le a le faigata o le tulaga. O soo moni o Iesu Keriso o e faatupuina le filemu. …
… O le auala tatou te taulimaina ai le tasi ma le isi e taua moni lava! O le auala tatou te talanoa atu ai ma e uiga i isi i le aiga, i le lotu, i le galuega, ma luga o le initoneti, e afaina moni lava. O le asō, ua ou talosagaina i tatou e fegalegaleai ma isi i se auala maualuga atu, ma paia atu. (“Manaomia e Faatupuina le Filemu,” Liahona, Me 2023, 98–99)
Mau ma fesili
A o faitauina aoaoga o loo i luga a Iesu, o le a se mea na e mafaufau i ai pe lagona ua musuia oe e fai e mulimuli ai ia Iesu Keriso?
Vitio
Pese
“Mulimuli Mai ia te A’u,” Viiga, nu. 62
Gaoioiga mo Tamaiti
Na aoao mai le Faaola e tatau ona tatou alolofa atu i isi. O le a se mea e mafai ona e faia e faaalia ai le alofa i se tasi i lenei vaiaso? Fai se tatalo ma fai se fuafuaga e fesoasoani ai ia i latou. O nisi nei o manatu:
-
Faasoa atu se meaai mama e sili ona e fiafia i ai.
-
Valaaulia i latou e taaalo pe faaalu se taimi faatasi ma oe.
-
Tusi pe tusia se ata o se faamatalaga agalelei mo i latou.