“Yim Hli Ntuj 24–30. ‘Kuv Yuav Piav tej uas tus Tswv Hais rau Kuv’: Phau Ntawv Nkauj 49–51; 61–66; 69–72; 77–78; 85–86,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Yim Hli Ntuj 24–30. ‘Kuv Yuav Piav tej uas tus Tswv Hais rau Kuv,’” Los, Nrog Kuv Mus—Siv hauv Tsev thiab lub Koom Txoos: Phau Qub 2026
Cawm tus uas Ploj Lawm, los ntawm Michael Malm
Yim Hli Ntuj 24–30: “Kuv Yuav Piav tej uas tus Tswv Hais rau Kuv”
Phau Ntawv Nkauj 49–51; 61–66; 69–72; 77–78; 85–86
Cov uas sau Phau Ntawv Nkauj qhia txog lawv tej kev xav hauv lawv nruab siab thaum lawv sau paj lug. Lawv twb sau txog txoj kev poob siab, kev ntshai, thiab kev khuv xim. Tej thaum, lawv xav tias Vajtswv tau tso lawv tseg, thiab tej zaj muaj kev chim siab los sis kev txhawj heev. Yog tias koj tau xav li no, nyeem Phau Ntawv Nkauj yuav pab koj paub tias koj tsis nyob ib leeg. Tiam sis koj kuj yuav nyeem cov nkauj uas yuav txhawb koj lub siab thaum koj xav li ntawd, rau qhov cov uas sau nkauj yeej qhuas tus Tswv rau Nws txoj kev zoo, xav tsis thoob txog Nws lub hwj chim, thiab zoo siab rau Nws txoj kev hlub tshua. Lawv paub tias peb ris lub nra ntawm kev phem thiab kev txhaum tiam sis tus Tswv “ua zoo rau peb, thiab zam peb lub txim” (Phau Ntawv Nkauj 86:5). Lawv to taub tias kev ntseeg tus Tswv tsis txhais tias koj yuav tsis muaj teeb mem, kev txhaum, thiab kev ntshai. Kev ntseeg tus Tswv txhais tias yus yuav paub tig mus rau leej twg thaum yus raug tej yam ntawd.
Tej Tswv Yim Pab Qhia hauv Tsev thiab lub Koom Txoos
Phau Ntawv Nkauj 49; 62:5–12
Kev txhiv dim tsuas los ntawm Yexus Khetos xwb.
Phau Ntawv Nkauj 49 muaj ib zaj lus rau “tus hlob tus yau, tus nplua nuj tus pluag” (nqe 2). Koj xav tias zaj lus no txhais li cas? Koj xav tias Phau Ntawv Nkauj 62:5–12 piav dab tsi ntxiv txog zaj lus ntawd?
Thaum koj nyeem cov ntawv nkauj no tej zaum yuav ua rau koj xav txog tej yam uas ntxias peb kom tso siab rau lwm yam thiab tsis tso siab rau Vajtswv kom txhiv peb dim (saib Phau Ntawv Nkauj 49:6–7). Koj lub neej tau hloov li cas los ntawm koj zaj lus tim khawv hais tias “Vajtswv … yuav cawm kom [koj] dim ntawm txoj kev tuag lub hwj chim”? (Phau Ntawv Nkauj 49:15).
Phau Ntawv Nkauj 51; 85–86
Vim tus Cawm Seej muaj kev hlub tshua, kuv yuav txais kev zam txim.
Vaj Ntxwv Daviv sau Phau Ntawv Nkauj 51 tom qab nws to taub nws xav tau kev zam txim heev—ib yam uas peb txhua tus xav tau. Tej nqe twg piav txog koj tej kev xav? Koj kawm dab tsi hauv zaj nkauj no uas ua rau koj muaj kev cia siab tias yuav txais kev zam txim?
Tej zaum koj yuav xav nyeem Phau Ntawv Nkauj 51 thiab nrhiav tej yam qhia txog kev hloov siab lees txim. Sau ntawv txog tej yam uas koj nrhiav tau. Saib seb koj puas yuav sau ntawv ntxiv thaum nyeem Thawj Tswj Hwm Russell M. Nelson zaj lus “Peb Muaj Peev Xwm Ua Zoo Dua thiab Ua Neeg Zoo Dua” (Liyahaunas, Tsib Hlis Ntuj 2019, 67–69).
Koj yuav hais li cas kom piav tau tias txoj kev txais kev zam txim los ntawm Khetos zoo li cas? Yog koj xav tau kev pab piav txog koj tej kev xav, tej zaum koj yuav xav nyeem Phau Ntawv Nkauj 51:1–2, 7–12; 85:2–9. Ib txhia neeg nyiam kos duab los sis nrhiav duab uas qhia txog lawv tej kev xav; tej zaum koj yuav xav sim ua li ntawd. Tej zaum koj kuj yuav xav hu los sis mloog ib zaj nkauj txog tus Cawj Seej, xws li “Kuv Zoo Siab Yexus Hlub Kuv” (Cov Nkauj Qhuas Vajtswv, zaj 82).
Yog peb yuav hloov siab lees txim, peb yuav tsum ntseeg tias Yexus Khetos muaj peev xwm ntxuav tau peb ua neeg huv thiab ntseeg tias Nws mam ua li ntawd. Koj kawm dab tsi nyob hauv Phau Ntawv Nkauj 86:5, 13, 15 uas pab koj paub tias tus Cawm Seej muaj peev xwm zam txim rau koj thiab yuav ua li ntawd?
Kuj saib Amas 36; Petus F. Meurs, “Nws Kho Tau Kuv!,” Liyahaunas, Tsib Hlis Ntuj 2023, 39–41.
Phau Ntawv Nkauj 51:13–15; 66:5–20; 71:15–24
Kuv zaj lus tim khawv txog Yexus Khetos pab tau lwm tus los cuag Nws.
Xav seb yog li cas koj tau txais koj zaj lus tim khawv txog Yexus Khetos thiab Nws lub hwj chim theej txhoj. Ces, thaum koj kawm Phau Ntawv Nkauj 51:13–15; 66:5–20; 71:15–24, xav seb koj yuav ua li cas kom caw lwm tus los “saib tej uas Vajtswv twb ua tas los lawm” (Psalm 66:5). Yog tias koj “piav tej uas [tus Tswv] tau hais rau [koj]” (Phau Ntawv Nkauj 66:16), koj yuav hais li cas?
Koj xav tias tej lus “piav [Nws] txoj kev ncaj ncees tas hnub” txhais li cas? (Phau Ntawv Nkauj 71:24).
Kuj saib Amas 26.
“Los ntawm no, kuv yuav piav tej uas [Vajtswv] hais rau kuv lawm rau nej mloog” (Phau Ntawv Nkauj 66:16).
Phau Ntawv Nkauj 63; 69; 77–78
Tus Tswv yuav pab kuv thaum kuv xav tau kev pab.
Muaj cov ntawv nkauj uas piav tias yus xav li cas thaum yus nyob deb ntawm Vajtswv thiab xav tau Nws txoj kev pab (saib Phau Ntawv Nkauj 63:1, 8; 69:1–8, 18–21; 77:1–9). Nyob hauv Phau Ntawv Nkauj 63; 69; 77–78, koj kawm dab tsi txog tej yam uas tau nplij cov uas sau ntawv nkauj lub siab?
Thaum koj ntxhov siab, txoj kev “nco ntsoov [tus Tswv] tej hauj lwm” thiab Nws “tej txuj ci tseem ceeb uas [Nws] ua yav tas los lawm” pab koj li cas? (Phau Ntawv Nkauj 77:11). Piav txog ib txhia ntawm tej txuj ci no nyob hauv Phau Ntawv Nkauj 78. Thaum koj nyeem txog tej ntawd, cia li xav seb dab tsi pab koj “cia siab rau Vajtswv” (nqe 7).
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Vim hnub Sunday no yog hnub Sunday thib tsib rau lub hli no, xav kom cov xib hwb hauv lub Koom Haum Me Nyuam Yaus siv tej yam ntxim kawm uas nyob hauv “Ntaub Ntawv Ntxiv tom Kawg B: Npaj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej.”
Phau Ntawv Nkauj 51; 86:5, 13, 15
Thaum kuv xaiv tsis yog, Yexus pab kuv hloov siab.
-
Kom pab koj cov me nyuam kawm tej yam tseeb txog txoj kev hloov siab lees txim nyob hauv Phau Ntawv Nkauj 51, tej zaum koj yuav xav kos duab txog ib lub plawv loj. Ces koj pab koj cov me nyuam sau tej yam phem uas Dab Ntxwg Nyoog ntxias kom peb uas hauv lub plawv ntawd. Peb yuav ua li cas kom tej yam no tawm ntawm peb lub siab? Hais kom koj cov me nyuam kom nrhiav lo lus “siab” nyob hauv Phau Ntawv Nkauj 51:10, 17. Sib tham seb tej nqe no qhia dab tsi txog txoj kev hloov siab lees txim. Cia koj cov me nyuam muab cov lus hauv lub siab lwv thiab sau lo lus tshiab uas qhia txog tej yam uas Yexus ua kom pab peb hloov thaum peb hloov siab lees txim.
-
Tej zaum koj kuj xav pab koj cov me nyuam kawm seb txoj kev “muaj siab mos siab muag” txhais li cas (Phau Ntawv Nkauj 51:17). Tej zaum lawv yuav xav sim rhuav qhib ib yam dab tsi uas muaj lub plhaub tawv, ib yam li ib lub qe los sis ib lub txiv ntoo. Koj pab tau lawv muab lub plhaub tawv piv rau tej yam uas ua rau peb tsis hnov Leej Txiv Saum Ntuj Ceeb Tsheej txoj kev hlub. Peb yuav ua li cas kom qhib peb lub siab rau Nws?
-
Tej zaum nej yuav xav saib ib daim duab txog tus Cawm Seej ua ke thiab nug koj cov me nyuam seb lawv yuav siv tej lus twg kom piav txog Nws. Caw kom lawv nrhiav tej lus uas piav txog Nws nyob hauv Phau Ntawv Nkauj 86:5, 13, 15. Vim li cas peb yuav tsum paub tej yam no txog Nws?
Phau Ntawv Nkauj 61:2–3
Yexus Khetos yog kuv lub pob zeb.
-
Tej zaum koj cov me nyuam yuav nyiam kos duab txog tej lub cim nyob hauv Phau Ntawv Nkauj 61:2–3. Yog li cas Yexus Khetos zoo li ib lub “pob zeb” (nqe 2), ib qhov chaw “tiv thaiv,” thiab “lub chaw faj xwm”? (nqe 3).
“Koj yog tus tiv thaiv kuv, koj yog kuv lub chaw faj xwm” (Phau Ntawv Nkauj 61:3).
Phau Ntawv Nkauj 66:16; 77:11; 78:6–7
“Kuv yuav nco ntsoov [tus Tswv] tej hauj lwm uas tseem ceeb.”
-
Hais kom koj cov me nyuam qhia txog cov vaj lug kub cov dab neeg uas lawv nyiam tshaj (tej zaum cov duab los ntawm Phau Muaj Duab txog Txoj Moo Zoo yuav pab). Tej zaj dab neeg no qhia dab tsi rau peb txog tus Tswv? Tej zaum nej yuav xav nyeem Phau Ntawv Nkauj 66:16 ua ke thiab sim teb lo lus nug “Tus Tswv tau ua dab tsi rau kuv”?
-
Thaum nej nyeem Phau Ntawv Nkauj 77:11; 78:6–7 ua ke, tej zaum nej yuav xav qhia seb neb ua li cas kom “nco tus Tswv tej hauj lwm” (Phau Ntawv Nkauj 77:11), thiab Nws tej hauj lwm uas Nws ua hauv koj lub neej. Yog li cas lub cim nco txog pab peb “ib txwm nco ntsoov”? (Maulaunais 4:3; 5:2).
Phau Ntawv Nkauj 71:8
Kuv txawj qhia lwm tus txog Yexus Khetos.
-
Tom qab koj nyeem Phau Ntawv Nkauj 71:8 nrog koj cov me nyuam, caw kom lawv kos duab txog ib lub qhov ncauj loj. Hais kom lawv sau tej lus los sis kos duab hauv lub qhov ncauj kom “puv” thiab piv txog tej yam peb ua tau kom qhia lwm tus txog Yexus Khetos.
-
Tej zaum koj yuav xav muab ib daim duab txog Yexus Khetos rau lawv saib. Tej zaum tus neeg uas tuav daim duab yuav xav piav ib yam uas nws paub txog Yexus Khetos. Peb yuav ua li cas kom pab lwm tus paub txog tej no?
Cov me nyuam yaus muaj ntau yam uas lawv xav qhia. “Thaum cov me nyuam kawm ib yam dab tsi tshiab, lawv yeej xav qhia rau lwm tus. Txhawb nqa txoj kev xav ua li no thaum koj muab cib fim rau cov me nyuam ib leeg qhia ib leeg txog txoj moo zoo tej lub ntsiab cai, thiab qhia rau lawv tsev neeg thiab cov phooj ywg. Thov kom lawv qhia koj txog lawv tej kev xav thiab tej yam uas lawv ua hauv lawv lub neej raws li tej lub ntsiab cai uas koj qhia. Koj yuav kawm tias lawv muaj tswv yim uas yooj yim, dawb huv, thiab muaj hwj chim” (Qhia Raws Li tus Cawm Seej txoj Kev, 32).
Phau Ntawv Nkauj 86:7
Leej Txiv Saum Ntuj Ceeb Tsheej hnov thiab teb kuv tej lus thov.
-
Feem ntau cov ntawv nkauj zoo li txoj kev thov Vajtswv. Thaum koj nyeem Phau Ntawv Nkauj nrog koj cov me nyuam, tej zaum koj yuav xav qhia tej yam peb siv tau kom sib tham nrog lwm tus uas nyob deb, ib yam li lub xov tooj los sis ib tsab ntawv. Ces nyeem Phau Ntawv Nkauj 86:7. Peb ua li cas kom “hu rau” Leej Txiv Saum Ntuj Ceeb Tsheej? Nws teb peb li cas?
-
Nej kuj hu ib zaj nkauj ua ke txog kev thov Vajtswv, ib yam li “A Child’s Prayer” (Children’s Songbook, 12–13; kuj saib Susan H. Porter, “Thov Vajtswv, Nws Nyob Ntawd,” Liyahaunas, Tsib Hlis Ntuj 2024, 77–79). Cia ib leeg qhia ib leeg txog sij hawm thaum Vajtswv teb nej tej lus thov.
Yog xav tau ntxiv, saib phau xov xwm Phooj Ywg rau lub hli no.