“Yim Hli Ntuj 3–9. ‘Koj Tau Los … rau tej lub Sij Hawm Zoo Li No’: Exethaws,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Yim Hli Ntuj 3–9. ‘Koj Tau Los … rau tej lub Sij Hawm Zoo Li No,’” Los, Nrog Kuv Mus: Phau Qub 2026

Niam Vaj Ntxwv Exethaws Cawm Yehauvas cov Neeg, los ntawm Sam Lawlor

Yim Hli Ntuj 3–9: “Koj Tau Los … rau tej lub Sij Hawm Zoo Li No”

Exethaws

Tej zaum peb yuav xav tias ntau yam xwm txheej hauv phau ntawv Exethaws yog los ntawm kev muaj hmoov zoo los sis lam yog li ntawd xwb. Yog li cas koj thiaj piav tau tias ib tug ntxhais ntsuag Yudais los ua tus niam vaj ntxwv rau teb chaws Pawxias thaum lub sij hawm uas nws pab tau cawm nws cov neeg dim kev puas tsuaj? Vim li cas Exethaws tus kwv tij Maudekhais hnovtxoj kev npaj tua tus vaj ntxwv? Tej yam no puas yog vim nkawd muaj hmoov xwb, los sis puas yog ib feem ntawm Vajtswv txoj kev npaj? Txwj Laug Ronald A. Rasband hais tias: “Tej yam uas yus xav tias lam tau lam muaj xwb, yeej yog vim ib Leej Txiv Saum Ntuj Ceeb Tsheej uas hlub peb coj peb kev. … Tus Tswv paub txhua yam [me me] hauv peb lub neej.” (“Los ntawm lub Ntuj Ceeb Tsheej tus Txheej Txheem,” Liyahaunas, Kaum Ib Hlis Ntuj 2017, 56). Tej zaum peb tsis pom tus Tswv txhais tes hauv “txhua yam me me.” Tiam sis peb kawm los ntawm Exethaws tias Nws coj peb kev thiab pab peb npaj “rau tej lub sij hawm zoo li no” (Exethaws 4:14) thaum peb yuav ua ib qho cuab yeej hauv Nws txhais tes uas yuav ua tau Nws tej hauj lwm.

Yog xav nyeem ib zaj lus piav txog phau Exethaws, saib “Exethaws” nyob hauv Phau Qhia txog Vaj Lug Kub.

Tej Tswv Yim Pab Qhia hauv Tsev thiab lub Koom Txoos

Exethaws

Tus Tswv xav kuv mus rau tej qhov chaw kom foom koob hmoov rau lwm tus.

Thawj Tswj Hwm Dieter F. Uchtdorf qhia tias peb txhua tus “nyias muaj nyias qhov tshwj xeeb thiab nyias muaj nyias ib txoj hauj lwm tseem ceeb uas [peb] ib leeg ua tau xwb. … Tus Tswv muab hauj lwm rau koj thiab paub vim li cas. Tej zaum muaj neeg uas koj ib leeg xwb muaj peev xwm yuav tshoov lawv lub siab. Tej zaum tsis muaj leej twg paub ua ib yam li koj ua tau” (“Lift Where You Stand,” Liyahaunas, Kaum Ib Hlis Ntuj 2008, 56).

Thaum koj nyeem Exethaws zaj dab neeg, xav seb zaj lus no hais txog nws li cas. Nrhiav tej yam uas tus Tswv ua kom nws thiaj li pab tau cawm cov neeg Yudais (saib, ua piv txwv, Exethaws 2:21–23; 3:10–14; 4:14–16). Ces xav seb Nws tau ua li cas kom muab cib fim rau koj foom koob hmoov rau lwm tus. Nws tau coj koj mus ua dab tsi kom muaj xwm txheej los sis nrog lwm tus sib raug zoo “rau tej lub sij hawm zoo li no”? (Exethaws 4:14). Yog koj muaj tus yawg suab txoj koob hmoov lawm, xav seb koj puas nyeem kom kawm ntxiv txog tus Tswv tej hauj lwm rau koj ua. Koj ua tau dab tsi kom ua txoj hauj lwm no?

Kuj saib “For Such a Time as This” (vidi-aus), ChurchofJesusChrist.org.

Peb kawm ntxiv thaum peb ua tsis yog mloog xwb. Txwj Laug David A. Bednar ntuas cov xib fwb: “Tsis yog peb yuav tsum xav tias ‘Kuv yuav tsum qhia dab tsi rau lawv?’ Tiam sis, peb yuav tsum nug peb tus kheej tias ‘Kuv yuav caw lawv ua dab tsi? Kuv yuav nug tej yam twg kom coj tus Vaj Ntsuj Plig Dawb Huv los nrog lawv nyob, yog tias lawv kam ua li tau caw lawv?’” (nyob hauv Kev Qhia Raws Li tus Cawm Seej txoj Kev, 25). Yog koj qhia koj tsev neeg los sis ib chav kawm txog Exethaws, koj yuav nug dab tsi kom yuav pab lawv kawm?

Maudekhais saib Hamas caij nees hla txoj kev — “Thaum Hamas paub hais tias Maudekhais tsis hawm nws … ces [Hamas] chim heev” (Exethaws 3:5).

Exethaws 3; 5:9–14; 7

Kev muab hlob thiab kev chim siab ua rau yus raug puas tsuaj.

Nyob hauv phau ntawv Exethaws, peb kawm los ntawm Exethaws thiab Maudekhais txoj kev ntseeg, tiam sis peb kawm los ntawm Hamas txoj kev muab hlob thiab chim siab thiab. Thaum koj nyeem Exethaws 3; 5:9–14, nco qab ntsoov Hamas txoj kev xav, nws cov lus, thiab tej yam nws ua. Tej ntawd qhia dab tsi txog nws thiab nws tej kev xav hauv siab? Nws tau raug dab tsi? (saib Exethaws 7). Qhov uas koj nyeem txog Hamas tej zaum yuav tshoov koj lub siab kom koj xav seb dab tsi ua rau koj xav thiab ua tej yam koj xav thiab ua. Koj puas txais kev tshoov siab kom hloov? Yog li cas koj thiaj yuav tig mus rau Leej Txiv Saum Ntuj Ceeb Tsheej kom txais kev pab?

Kuj saib Paj Lug 16:32; Amas 5:28.

Exethaws 3–4; 5:2–3; 8:11–12

Txoj kev yoo mov qhia tias kuv cia siab rau thiab ntseeg tau tus Tswv.

Cia li xav txog vim li cas Exethaws thiab cov neeg Yudais txiav txim siab yoo mov (saib Exethaws 3:13; 4:1–3, 10–17). Txoj kev yoo mov tau ua li cas kom lawv tau koob hmoov? (saib Exethaws 5:2–3; 8:11–12). Vim li cas tus Tswv nug kom peb yoo mov? (saib Tej Ntsiab Lus thiab tej Lus Nug, “Yoo Mov thiab Nyiaj Yoo Mov,” Txoj Moo Zoo cov Ntawv). Xav seb koj yuav ua li cas kom txoj kev yoo mov yuav ua rau koj tau koob hmoov loj dua hauv koj lub neej.

Kuj saib Yaxayas 58:6–12; “Fasting: Young Single Adult Ward, Amanda” (vidi-aus), ChurchofJesusChrist.org.

Exethaws 3:1–11; 4:10–17; 5:1–4; 9:17–19

Yuav tsum ua siab loj kom ua qhov yog.

Thaum Maudekhais thiab Exethaws mob siab ntseeg thiab txhawb pab nkawd cov neeg, ntshe cov neeg phem yuav muab nkawd tua tuag. Tej zaum tej yam uas peb xaiv yuav tsis raug kev pham npaum li ntawd, tiam sis yus tseem yuav tsum ua siab loj thaum yus ua qhov yog. Koj kawm dab tsi los ntawm Exethaws 3:1–4; 4:10–17 txog txoj kev ua siab loj xaiv qhov yog? Cia li nco txog tej yam uas Maudekhais thiab Exethaws raug tom qab nkawd ua siab loj (saib Exethaws 3:5–11; 5:1–4). Exethaws thiab Maudekhais yuav tsum paub dab tsi txog Vajtswv kom thiaj li xaiv li ntawd?

Xav txog tej lub sij hawm thaum koj yuav tsum ua siab loj kom ua raws li qhov yog. Koj kawm dab tsi los ntawm Exethaws thiab Maudekhais uas yuav pab koj ua siab loj ntseeg tus Tswv?

Exethaws txoj kev ua siab loj ua rau txhua tus muaj “ib hnub zoo siab” (saib Exethaws 9:17–19). Txoj kev ua siab loj zoo li Yexus Khetos tau pab koj li cas kom muaj “ib hnub zoo siab”?

Kuj saib “Courage,” “Dare to Stand Alone” (ob qho vidi-aus), Txoj Moo Zoo cov Ntawv; “Tso Siab Ruaj Nrees rau Kev Ntseeg,” Cov Nkauj Qhuas Vajtswv, zaj 118.

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

Tej Tswv Yim Pab Qhia cov Me Nyuam

Exethaws 2:5–7

Kuv txawj pab kuv tsev neeg.

Tej zaum koj yuav txais kev tshoov siab kom siv Exethaws 2:7 thaum qhia koj cov me nyuam txog kev pab nej tsev neeg, ib yam li Maudekhais tau pab Exethaws. Tej zaum nej yuav xav nyeem nqe vaj lug kub ua ke los sis siv koj tus kheej cov lus kom qhia txog lub ntsiab lus. Ces tej zaum koj thiab koj cov me nyuam yuav xav txog nej tsev neeg uas xav tau kev pab. Cia li npaj kom pab lawv.

Exethaws 3:1–11; 4:10–17

Tus Tswv pab tau kuv ua siab loj.

Exethaws thiab Maudekhais tej yam ntxwv pab tau koj cov me nyuam to taub tias kev ua siab loj txhais tias yus ua qhov yog txawm tias yus ntshai los yog. Xav seb puas sau kab lus Maudekhais ua siab loj thaum nws … thiab Exethaws ua siab loj thaum nws … . Thaum nej nyeem zaj dab neeg txog Exethaws ua ke, tej zaum koj cov me nyuam yuav xav tias tias yuav hais li cas kom ob kab lus no kom tiav. Tej zaum nej yuav xav nyeem Exethaws 3:1–11; 4:10–17 los sis “Niam Vaj Ntxwv Exethaws” (nyob hauv Cov Dab Neeg hauv Phau Qub, 166–70) los sis cov duab nyob ntawm tus txheej txheem qhia no. Ces sau Kuv yuav ua siab loj thaum kuv … , thiab caw kom koj cov me nyuam xav txog tej yam uas Leej Txiv Saum Ntuj Ceeb Tsheej xav kom lawv ua uas yuav tsum ua siab loj kom ua taus. Tej zaum ib zaj nkauj txog kev ua siab loj, xws li “Dare to Do Right” (Children’s Songbook, 158), yuav pab lawv.

2:45
Queen Esther
Tej zaum koj kuj yuav xav kawm txog tej lub sij hawm thaum Yexus Khetos ua siab loj—piv txwv tias, thaum Nws tau raug txom nyem rau peb tej kev txhaum thiab saum tus ntoo khaub lig (saib Mathais 26:36–39; 27:33–35). Nug kom koj cov me nyuam qhia txog ib lub sij hawm thaum lawv ua siab loj, thiab qhia txog tej lub sij hawm hauv koj lub neej thiab.

Exethaws 4:1–3, 10–17

Txoj kev yoo mov yuav ua rau peb tau tus Tswv cov koob hmoov.

Tej zaum txoj kev nyeem Exethaws 4:1–3, 10–17 yuav pab qhia koj cov me nyuam txog kev yoo mov. Vim li cas Exethaws thiab cov neeg Yudais yoo mov? Qhia koj cov me nyuam vim li cas koj yoo mov. Tej zaum koj yuav xav nug lawv seb lawv yuav ua li cas kom qhia txog kev yoo mov rau ib tug phooj ywg uas tsis paub txog qhov ntawd. Peb yuav ua li cas kom pab peb cov phooj ywg to taub tej koob hmoov uas los ntawm kev yoo mov?
Txhawb nqa koj cov me nyuam kom lawv xav txog ib yam uas lawv xav tau tus Tswv txoj kev pab ua. Hais kom lawv yoo mov txog qhov ntawd lwm Hnub Caiv yoo mov.

Niam Vaj Ntxwv Exethaws sawv ntawm tus vaj ntxwv — Vim tias Exethaws ua siab loj, nws thiaj li cawm tus Tswv cov neeg dim.

Exethaws 4:14

Kuv ua tau ib rab cuab yeej hauv Vajtswv txhais tes.

Pab koj cov me nyuam to taub tias thaum Exethaws ntshai, Maudekhais txhawb nws thiab qhia tias tus Tswv pab kom nws los ua tus niam vaj ntxwv “rau tej lub sij hawm zoo li no” (Exethaws 4:14). Tej uas Maudekhais hais txhais li cas? Sib tham ua ke txog qhov uas yog li cas Exethaws thiaj li yog ib rab cuab yeej hauv Vajtswv txhais. Yog li cas peb thiaj li yuav ua cuab yeej rau tus Tswv siv?
Yog li cas koj thiaj pab tau koj cov me nyuam kom to taub tias ib rab cuab yeej yog dab tsi? Tej zaum koj yuav xav caw kom ib tug neeg ntaus nkauj siv tej cuab yeej ua suab nkauj los sis muab ib daim duab txog ib tug neeg siv ib lub cuab yeej rau lawv saib. Ces tej zaum nej yuav xav sib tham seb qhov uas ua ib rab cuab yeej hauv Vajtswv txhais tes txhais li cas.

Yog xav tau ntxiv, saib phau xov xwm Phooj Ywg rau lub hli no.

Niam Vaj Ntxwv Exethaws, los ntawm Minerva Teichert, © William thiab Betty Stokes

Lub Koom Haum Me Nyuam Yaus phab ntawv ntxim ua: Tus Tswv pab tau kuv ua siab loj. — Niam Vaj Ntxwv Exethaws, los ntawm Minerva Teichert, © William thiab Betty Stokes