Yauj 1–3; 12–14; 19; 21–24; 38–40; 42

Tej tshooj uas qhib phau ntawv Yauj hais ntau txog Dab Ntxwg Nyoog lub luag hauj lwm ua peb tus yeeb ncuab los sis tus neeg liam; tsis piav txog kev sib tham tiag tiag ntawm Vajtswv thiab Dab Ntxwg Nyoog. Thaum koj nyeem tej yam uas Dab Ntxwg Nyoog hais txog Yauj (saib Yauj 1:9–11; 2:4–5), tej zaum koj yuav xav nug koj tus kheej, “Vim li cas kuv thiaj muab siab rau ntseeg Vajtswv?” Vim li cas thiaj txaus ntshai yog peb mloog tus Tswv lus tsuas yog kom ua li Dab Ntxwg Nyoog tau hais?

Muaj dab tsi uas tshoov koj lub siab txog Yauj tej kev xav txog nws tej kev sim siab? (saib Yauj 1:20–22; 2:9–10).

Yauj cov phooj ywg hais tias tej zaum Vajtswv rau txim rau nws (saib Yauj 4–5; 8; 11). Koj xav tias lub tswv yim no muaj teeb meem dab tsi? Nyeem Yauj cov lus teb nyob hauv tshooj 12–13. Yauj paub dab tsi txog Vajtswv ua rau nws thiaj li tso siab rau Vajtswv? Koj paub dab tsi txog Vajtswv uas pab koj kov yeej tej kev cov nyom?

Tej thaum peb kawm tej yam tseeb tseem ceeb nyob hauv tej lub caij nyuaj tshaj. Cia li xav txog tej kev sim siab Yauj piav txog nyob hauv Yauj 19:1–22 thiab tej lus tseeb nws tshaj tawm txog nyob hauv nqe 23–27. Yog li cas koj thiaj paub tias koj tus Txhiv Dim muaj sia nyob? Qhov uas koj paub li no hloov koj lub neej li cas?

Tej zaum koj yuav xav hu los sis mloog ib zaj nkauj txog Yexus Khetos, xws li “Kuv Paub Yexus Tseem Muaj txoj Sia” (Cov Nkauj Qhuas Vajtswv, zaj 53). Tej lus twg hauv cov nkauj qhuas Vajtswv no pab koj xav txog Nws?

Kuj saib Lus Qhuab Qhia thiab Kev Khi Lus 121:1–12; 122.

Nyob hauv Yauj 21–24, koj yuav nyeem txog Yauj thiab nws cov phooj ywg txoj kev sib cav. Kev sib cav no hais txog ib lo lus nug uas neeg coob tau nug: Vim li cas neeg ncaj ncees raug kev txom nyem?

Txawm tias peb tsis muaj tag nrho cov lus teb, nyob hauv Yexus Khetos txoj moo zoo uas tau muab txum tim rov qab los, peb muaj tej lus tseeb uas pab peb to taub tej kev sim siab thiab kev txom nyem. Nram qab no muaj tej nqe vaj lug kub uas muaj tej lus tseeb no. Tej nqe vaj lug kub no qhia dab tsi rau koj txog Leej Txiv Saum Ntuj Ceeb Tsheej thiab Nws txoj hau kev?

• 2 Nifais 2:11–13

• Mauxiyas 23:21–23; 24:10–16

• Ethaws 12:27

• Lus Qhuab Qhia thiab Kev Khi Lus 58:3–5

• Anplaham 3:22–26

Tej zaum koj yuav xav nyeem Thawj Tswj Hwm Spencer W. Kimball tej lus qhia txog kev sim siab nyob hauv “Tragedy or Destiny?” (Teachings of Presidents of the Church: Spencer W. Kimball [2011]), 11–21).

Raws li tej yam uas koj tau kawm, koj yuav teb li cas rau lo lus nug “Vim li cas Vajtswv cia neeg ncaj ncees raug kev txom nyem?”

Yauj chim siab vim nws cov phooj ywg liam nws (saib Yauj 16:1–5; 19:1–3), ces Yauj nug Vajtswv vim li cas nws yuav tsum raug kev txom nyem ntau ua luaj li (saib Yauj 19:6–7; 23:1–9; 31). Tus Tswv tsis tau teb meej txog qhov no nyob hauv phau Yauj. Tiam sis Nws twb qhia ib zaj lus tseem ceeb nyob hauv tshooj 38–40. Koj xav tias zaj lus ntawd muaj lub ntsiab dab tsi? Piv txwv hais tias, koj kawm dab tsi los ntawm tus Tswv tej lus nug nyob hauv Yauj 38:1–7, 18–24?

Koj yuav nyeem hais tias tus Tswv hais rau Yauj txog tej yam uas Nws tau tsim thiab lwm yam hauj lwm zoo kawg nkaus (saib Yauj 38–39). Tej zaum koj yuav xav saib tej yam uas Nws tsim ntawd (los sis duab txog). Tej yam no pab koj xav txawv li cas txog Vajtswv? txog koj tej kev sim siab? Tej no uas rau Yauj hloov nws txoj kev xav li cas? (saib Yauj 42:1–6; kuj saib Mauxes 1:8–10).

Nov yog ob zaj lus los ntawm lub Tuam Rooj Sab Laj uas pab hloov peb txoj kev xav: Tamara W. Runia, “Saib Vajtswv Tsev Neeg Thaum Siv Tsom Iav Pom Qhov Kom Dav” (Liyahaunas, Kaum Ib Hlis Ntuj 2023, 62–69); Russell M. Nelson, “Xav Txog Tej Yam Xilethi-aus!” (Liyahaunas, Kaum Ib Hlis Ntuj 2023, 117–20). Nyob rau hauv ob zaj lus no, cia li nrhiav ib yam dab tsi uas koj yuav nco qab lwm zaus koj xav tias koj tej kev sim siab nyuaj heev. Koj yuav ua li cas kom nco ntsoov tej yam uas koj tau kawm?

• Hais kom koj cov me nyuam qhia rau koj seb lawv paub dab tsi txog Yauj. Yog tias lawv xav tau kev pab, tej zaum koj qhia tau lawv txog Yauj 1:1, 13–22; 2:7–10 los yog “Yauj” (nyob hauv Cov Dab Neeg hauv Phau Qub, 145–47). Yauj tau ua li cas thaum raug tej kev cov nyom ? (saib Yauj 1:21; 2:10).

  

  1:55

• Yauj rau siab ntseeg thaum nws raug tej kev cov nyom vim tej yam nws paub txog tus Tswv. Tej zaum koj thiab koj cov me nyuam yuav xav saib duab txog Yexus Khetos txoj kev nrog lwm tus sib tham (xws li daim duab nram qab los sis cov duab nyob hauv Phau Muaj Duab txog Txoj Moo Zoo). Sib tham txog tej yam uas nej paub txog Nws thiab Nws zoo li cas. Nov yog tej nqe uas qhia seb Yauj paub dab tsi txog tus Tswv: Yauj 12:10, 13, 16; 19:25–27. Vim li cas qhov uas paub tej no txog Nws muaj nqis?

• Yauj nug ib lo lus tseem ceeb nyob hauv Yauj 14:14. Tej zaum koj thiab koj cov me nyuam yuav xav qhia seb nej yuav teb Yauj li cas. Tej zaum nej yuav xav nrhiav tswv yim nyob hauv Amas 11:42–44, nyob hauv zaj vidi-aus “In a Coming Day” (Txoj Moo Zoo cov Ntawv), los sis hauv ib zaj nkauj txog Kev Sawv Rov Qab Los, ib yam li “Did Jesus Really Live Again?” (Children’s Songbook, 64).

1:11

• Thaum Yauj tu siab, nws cov phooj ywg hais tias Vajtswv rau txim rau nws rau qhov nws tau ua txhaum (saib Yauj 22:5). Yog tias peb yog Yauj cov phooj ywg, peb yuav ua li cas kom pab nws? Yog li cas p tej lus thiaj pab tau lwm tus thaum lawv tu siab? (saib Yauj 16:5). Xav seb puas muab daim duab hauv tus txheej txheem qhia no thaum nej sib tham txog cov lus nug no.

• Xav seb puas hais kom koj cov me nyuam piav txog tej cwj pwm zoo ntawm ib tug phooj ywg zoo thiab piav txog ib tug phooj ywg uas zoo li no. Ces tej zaum nej yuav xav saib ib daim duab txog Yexus Khetos. Vim li cas Yexus yog ib tug phooj ywg zoo rau peb txhua tus? Tej zaum nej yuav xav txog ib tug neeg uas raug tej yam nyuaj tam sim no. Npaj seb nej yuav ua li cas kom ua ib tug phooj ywg zoo li Khetos rau nws.

• Tom qab nej nyeem Yauj 19:23–27, tej zaum koj thiab koj cov me nyuam yuav xav sib tham seb vim li cas nej paub tias peb tus Txhiv Dim muaj sia nyob. Tej zaum nej yuav xav ua hauj lwm ua ke kom muab nej zaj lus tim khawv (los sis cov duab txog tus Cawm Seej) tso rau hauv ib phau ntawv (saib nqe 23).

• Tej zaum nej kuj yuav xav hu ib zaj nkauj uas ua tim khawv txog tus Cawm Seej, xws li “Kuv Paub Yexus Tseem Muaj Txoj Sia” (Cov Nkauj Qhuas Vajtswv, zaj 53). Sib tham txog tej kab lus los ntawm zaj nkauj ntawd uas txhawb nqa nej txoj kev ntseeg Nws. Vim li cas yuav tsum nco ntsoov tias Yexus Khetos muaj txoj sia nyob?