Phau Ntawv Nkauj 1–2; 8; 19–33; 40; 46

Thaum koj nyeem Phau Ntawv Nkauj, tej zaum koj yuav pom tias cov kws sau ntawv hais txog kev ntshai, kev tu siab, thiab kev ntxhov siab npaum li cas. Tej kev xav li no tsis muaj dab tsi txawv, tsis hais cov neeg ntseeg los yog. Tiam sis qhov uas tshoov peb lub siab txog Phau Ntawv Nkauj yog qhov uas tej lus ntawd qhia tej yam uas kho tau peb tej teeb meem, tsis hais kev tso siab plhuav rau tus Tswv. Thaum koj nyeem Phau Ntawv Nkauj 1; 23; 26–28; 46, cia li sau:

• Tej lus caw kom tso siab rau tus Tswv.

• Tej lus uas piav txog Nws.

• Tej lus uas piav txog kev kaj siab lug, kev muaj zog, thiab lwm yam koob hmoov uas Nws foom pub.

• Tej lus uas piav txog cov neeg uas tso siab rau Nws.

Koj yeej yuav xav nrhiav tej lus uas ua rau koj pom duab hauv koj lub siab thiab tej lub cim uas Phau Ntawv Nkauj siv kom qhia txog tus Cawm Seej. Piv txwv hais tias, nyob hauv Phau Ntawv Nkauj 23, tej lus xws li “so hauv lub tshav uas muaj zaub mos nyoos ntsuab xiab” los sis “pas dej ntshiab uas nyob ntsiag to” (nqe 2) ua rau koj xav li cas? “Tus pas” thiab “tus cwj nrig” uas tsom kwm (nqe 4) piv txog dab tsi? Qhov uas hais tias peb “lub khob” (nqe 5) puv nplua mias txhais li cas?

Ntau zaj nkauj piav txog Yexus Khetos lub neej hauv ntiaj teb no. Cov neeg ntseeg Khetos nyob hauv Phau Tshiab tau to taub tej yam no thiab. Cia li xav seb puas nyeem tej nqe vaj lug kub no. Nrhiav kev sib txuas ntawm cov lus hauv cov ntawv nkauj no thiab tus Cawm Seej lub neej:

• Phau Ntawv Nkauj 2:1–3 thiab Tes Hauj Lwm 4:24–28

• Phau Ntawv Nkauj 2:7 thiab Tes Hauj Lwm 13:30–33

• Phau Ntawv Nkauj 22:1 thiab Mathais 27:45–46

• Phau Ntawv Nkauj 22:7–8 thiab Mathais 27:39–43

• Phau Ntawv Nkauj 22:16 thiab Lukas 23:32–33

• Phau Ntawv Nkauj 22:18 thiab Mathais 27:35

• Phau Ntawv Nkauj 31:5 thiab Lukas 23:46

Koj kawm dab tsi los ntawm tej kev sib txuas no? Muaj tej lus qhia txog tej yuav muaj los yav tom ntej thiab tej lus cog tseg hauv cov vaj lug kub uas tseem tsis tau muaj lawm? Koj kawm dab tsi ntawm tej kev cog lus no uas ua rau koj muaj kev cia siab rau lub neej yav tom ntej?

Qhov uas koj nyeem Phau Ntawv Nkauj 8; 19; 33 tej zaum yuav tshoov koj lub siab kom xav txog tej yam uas tus Tswv tsim uas zoo kawg nkaus. Tsom ntsoov rau koj tej kev xav thaum koj ua li ntawd. Tej zaum koj kuj yuav xav hu nkauj los sis xav txog cov lus ntawm ib zaj nkauj uas hais txog cov nkauj, ib yam li “Koj Zoo Kawg Nkaus” (Cov Nkauj Qhuas Vajtswv, 30). Tus Tswv tej kev tsim ua li cas kom “tshaj tawm txog Vajtswv lub yeeb koob” rau koj? (Phau Ntawv Nkauj 19:1).

Nov yog lwm zaj nkauj uas tau tshoov siab los ntawm Phau Ntawv Nkauj:

• Phau Ntawv Nkauj 23: “Tus Tswv Yug Yaj Zov Kuv” (Cov Nkauj Qhuas Vajtswv, zaj 39)

• Phau Ntawv Nkauj 23:6; 150: “Praise to the Lord, the Almighty” (Hymns, zaj 72)

• Phau Ntawv Nkauj 26:8: “We Love Thy House, O God” (Hymns, zaj 247)

• Phau Ntawv Nkauj 27:1: “Tus Tswv yog Qhov Kaj” (Cov Nkauj Qhuas Vajtswv, zaj 31)

• Phau Ntawv Nkauj 33:1–6; 95:1–6: “Rau Ntiaj Teb txoj Kev Zoo Nkauj” (Cov Nkauj Qhuas Vajtswv, zaj 21)

• Phau Ntawv Nkauj 37:3–9: “Be Still, My Soul” (Hymns, zaj 124)

• Phau Ntawv Nkauj 148: “Txhua Yam Peb tus Vajtswv Tsim Muaj” (Cov Nkauj Qhuas Vajtswv, zaj 20)

Nyob hauv Phau Ntawv Nkauj, tej lus zoo li tim khawv, kev cai, lus txib, thiab kev txiav txim hais txog tus Tswv txoj lus. Cia li xav txog qhov no thaum koj nyeem Phau Ntawv Nkauj 19:7–11. Tej nqe no ua rau koj xav dab tsi txog tus Tswv txoj lus? Phau Ntawv Nkauj 29 qhia dab tsi rau koj txog Nws lub suab? Raws li koj xav, tus Tswv txoj lus los sis lub suab puas yog raws li tej lus piav no?

Vim tau ua Yeluxalees lub tuam tsev saum ib lub roob, nqe lus “tus Tswv lub roob” (Phau Ntawv Nkauj 24:3) hais txog lub tuam tsev los sis Vajtswv lub xub ntiag. Koj to taub dab tsi txog Phau Ntawv Nkauj 24? Koj xav tias “txhais tes uas huv si, thiab siab dawb huv” txhais li cas? (nqe 4). Thaum koj nyeem Phau Ntawv Nkauj 26–27, koj kawm dab tsi ntxiv txog tus Tswv lub tsev?

Tej thaum, peb yuav poob siab thaum peb kawm tias peb yuav tsum ua neeg dawb huv koj thiaj li nkag mus rau Vajtswv lub xub ntiag. Peb sawv daws muaj teeb meem, thiab tsis muaj leej twg ua zoo tag nrho. Koj nrhiav kev cia siab dab tsi nyob hauv Txwj Laug David A. Bednar zaj lus “Clean Hands and a Pure Heart”? (Liyahaunas, Kaum Ib Hlis Ntuj 2007, 80–83). Koj yuav siv nws zaj lus li cas kom pab ib tug neeg uas ntxhov siab vim nws xav ua neeg zoo tag nrho? Xav seb koj yuav ua li cas kom txais tus Cawm Seej txoj kev pab kom muaj “txhais tes uas huv si, thiab siab dawb huv.”

Kuj saib Bradley R. Wilcox, “Kev Tsim Nyog Tsis Yog Kev Zoo Tag Nrho,” Liyahaunas, Kaum Ib Hlis Ntuj 2021, 61–67.

• Xav seb puas sau Tus Tswv yog … Caw kom koj cov me nyuam xav seb yuav u li cas kom sau kab lus ntawd tiav thaum siv tej nqe vaj lug kub zoo li no: Phau Ntawv Nkauj 23:1; 27:1; 28:1; 28:7; 32:7; 46:1. Tej nqe no qhia dab tsi rau peb txog qhov uas tus Tswv pab peb li cas?

• Tej zaum koj yuav xav nrog koj cov me nyuam tham seb tus yaj yuav tsum muaj dab tsi kom nyob nyab xeeb thiab muaj zog. Ces, thaum nej nyeem Phau Ntawv Nkauj 23 ua ke, pab koj cov me nyuam muab tej yam uas tus tswv yug yaj ua piv rau tus yaj thiab tej yam uas Yexus ua rau peb. Peb yuav tsum ua li cas thiaj nyob nyab xeeb thiab muaj zog ntawm sab ntsuj plig? Hu ib zaj nkauj ua ke uas yuav pab lawv tawm tswv yim, xws li “I Feel My Savior’s Love” (Children’s Songbook, 74–75).

• Thaum koj nyeem Phau Ntawv Nkauj 24:3 ua ke, tej zaum koj cov me nyuam yuav xav nrhiav tej lus uas pab lawv xav txog lub tuam tsev. Lawv kuj saib tau ib daim duab txog lub tuam tsev. Ces tej zaum nej yuav xav nyeem nqe 4 ua ke kom kawm seb leej twg muaj cai nkag mus hauv lub tuam tsev. Tej zaum nej yuav xav sib tham seb vim li cas yus txhais tes lo av thiab peb yuav muab ntxuav li cas. Peb ua li cas kom peb sab ntsuj plig los av? Tus Cawm Seej ua li cas kom pab ntxuav peb sab ntsuj plig?

• Yog koj muaj me nyuam yaus, tej zaum koj yuav xav caw kom lawv ua yeeb yam zoo li lawv quaj thaum koj nyeem Phau Ntawv Nkauj 30:5, “Thaum tsaus ntuj muaj kev quaj ntsuag.” Ces hais kom lawv muaj kev zoo siab thaum koj nyeem, “Tiam sis thaum kaj ntug muaj kev zoo siab.” Rov qab hais nqe no ob peb zaug.

• Muab ib daim duab txog tus Cawm Seej rau lawv saib, thiab qhia koj cov me nyuam seb Nws tau ua li cas rau koj kom pab koj zoo siab. Tej zaum koj yuav xav cia txhua tus me nyuam tuav daim duab thiab qhia seb Yexus tau ua li cas rau lawv kom pab lawv zoo siab.

• Pab koj cov me nyuam cim thawj kab lus los ntawm Phau Ntawv Nkauj 46:10: “Cia li ua siab tus, thiab paub tias kuv yog Vajtswv.” “Ua siab tus” txhais li cas? Tej zaum nej yuav xav siv sij hawm sim ua siab tus. Tej zaum nej kuj yuav xav sib tham txog tej lub sij hawm thaum nej “ua siab tus” kom thiaj li sib raug zoo nrog Vajtswv ntxiv. Cia li pab koj cov me nyuam xav txog tej lub sij hawm thaum lawv yuav “ua siab tus” thiaj li nrog Leej Txiv Saum Ntuj Ceeb Tsheej sib raug zoo.