“Tej Yam Ntxim Xav Txog: Kev Nyeem Paj Lug hauv Phau Qub,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Kev Nyeem Paj Lug hauv Phau Qub,” Los, Nrog Kuv Mus—Siv hauv Tsev thiab lub Koom Txoos: Phau Qub 2026
Tej Yam Ntxim Xav Txog
Kev Nyeem Paj Lug hauv Phau Qub
Nyob hauv Phau Qub phau Chiv Keeb mus txog phau Exethaws, feem ntau yog zaj dab neeg—dab neeg uas piav txog tej xwm txheej keeb kwm uas hais txog tib neeg sab ntsuj plig. Nau-as ua ib lub nkoj, Mauxes coj cov neeg Ixayees khiav dim, Hanas tau thov Vajtswv kom muaj ib tug tub, thiab li ntawd. Piv nrog Yauj, peb nyeem ib txoj kev sau ntawv txawv. Nyob hauv tej phau no, cov neeg hauv Phau Qub tau sau tej paj lug kom qhia lawv txoj kev xav hauv siab hauv ntsws los sis sau tej lus qhia tej yuav muaj los yav tom ntej kom neeg nco txog tej lus ntawd.
Peb twb nyeem ob peb zaug uas lawv sau paj lug hauv tej phau sau keeb kwm hauv Phau Qub. Txij phau Yauj mus, peb yuav nyeem paj lug ntau ntxiv. Phau Yauj, Phau Ntawv Nkauj, thiab phau Paj Lug yuav luag tag nrho yog paj lug, ib yam li ib feem ntawm phau ntawv qhia txog tej yuav muaj los yav tom ntej xws li Yaxayas, Yelemis, thiab Amaus. Vim txoj kev nyeem paj lug txawv ntawm txoj kev nyeem ib zaj dab neeg, yeej yuav siv ib tug txheej txheem txawv kom to taub. Nram qab no yog tej lub tswv yim uas pab tau koj kawm lub ntsiab ntawm Phau Qub tej paj lug.
Kawm Paub txog Paj Lug Henplais
Qhov ib, tej zaum yuav pab koj yog koj paub tias paj lug Henplais nyob hauv Phau Qub tsis yog lus sib dhos, ib yam li lwm zaj paj lug. Thiab txawm tias lub suab dhia, kev siv tej lus, thiab kev rov qab siv tej lus yog tej yam hauv paj lug Henplais puag thaum ub, ntshe thaum txhais lus ces yus yeej tsis paub txog tej yam no. Tiam sis ib yam uas koj tseem nyeem tau yog txoj kev rov qab sau tej lub tswv yim thiab tej kev xav, tej lub sij hawm peb hu qhov no ua “txoj kev sib dhos.” Nov yog ib zaj lus piv txwv los ntawm phau Yaxayas:
[Auj Xi-oos], … cuab koj lub zog khov kho!
[Auj Yeluxalees], cia li hnav tej ris tsho uas zoo tshaj plaws! (Yaxayas 52:1)
Phau Ntawv Nkauj 29 muaj ntau kab lus uas sib dhos—xws li:
Tus Tswv lub suab muaj hwj chim loj kawg nkaus;
tus Tswv lub suab yog suab muaj hwv xyeej heev. (Phau Ntawv Nkauj 29:4)
Thiab nov yog ib zaug uas kev paub tias kab lus thib ob nrog kab lus thib ib sib dhos ua ke ua rau yus to taub zaj lus no yooj yim dua:
Kuv yog tus tso tej kev tshaib
kev nqhis los rau nej txhua lub nroog. (Amaus 4:6)
Hauv tej zaj lus piv txwv no, tus kws sau paj lug hais txog ib lub tswv yim ob zaug. Tus txheej txheem no yuav ua rau lub tswv yim ntawd muaj zog thiab qhov uas sib txawv pab kom piav tau ntxiv.
Tiam sis lwm lub sij hawm, ob kab uas sib piv siv tej lus zoo sib xws kom qhia txog tswv yim tsis sib thooj, ib yam li hauv zaj lus piv txwv no:
Lus mos lus muag ua rau kev chim ploj mus:
tiam sis lo lus nruj tsiv ua rau kev chim tawm tuaj. (Paj Lug 15:1)
Txoj kev sib dhos li no tsis yog lam tau lam ua xwb. Cov uas sau ntawv txhob txwm ua. Ua li no tau pab lawv qhia txog tej kev xav thiab tej lus tseeb ntawm sab ntsuj plig uas muaj zog thiab zoo nkauj heev. Yog li ntawd thaum koj pom kev sau ntawv sib dhos hauv Phau Qub, nug koj tus kheej seb yog li cas koj thiaj li to taub tus uas sau ntawv zaj lus. Piv txwv hais tias, Yaxayas hais li cas thaum muab tej lus “lub zog” piv rau “ris tsho uas zoo tshaj plaws” thiab “Xi-oos” piv rau “Yeluxalees”? (Yaxayas 52:1). Peb xav dab tsi txog lo lus “lus mos lus muag” yog peb paub tias “lo lus nruj tsiv” yog lo lus fab ntxeev? (Paj Lug 15:1).
Nws Txhawb Kuv tus Ntsuj Plig, los ntawm Walter Rane
Paj Lug Henplais Zoo Li Ib tug Phooj Ywg Tshiab
Ib txhia neeg muab kev nyeem paj lug piv rau txoj kev ntsib ib tug neeg tshiab. Yog li ntawd, Phau Qub cov paj lug yeej zoo li yus ntsib ib tug uas tuaj txawv teb chaws tuaj thiab muaj ib kab lig kev cai thiab yam lus uas txawv ntawm peb—thiab nws kuj muaj hnub nyoog ob txhiab xyoo. Tej zaum thaum xub thawj, tus neeg no yuav hais tej yam peb tsis to taub, tiam sis tej yam nws hais tseem muaj nqis thiab. Peb yuav tsum siv sij hawm ntau nrog nws, sim xav zoo li nws xav. Tej zaum peb yuav kawm hais tias nyob hauv peb lub siab, peb ib leeg to taub ib leeg zoo. Thiab yog tias peb ua siab ntev thiab muaj kev khuv leej, tus neeg tshiab no yuav los ua ib tug phooj ywg zoo.
Yog li ntawd, ua piv txwv, yog koj nyeem ib nqe los ntawm Yaxayas, ces cia li xav tias yog koj txoj kev ntsib ib tug phooj ywg tshiab. Nug koj tus kheej, “Kuv xav li cas?” Nqe ntawd ua rau koj xav li cas—txawm tias koj tsis to taub txhua lo lus? Ces rov qab nyeem dua, ob peb zaug yog ua tau. Xav seb koj puas nyeem nrov nrov; ib txhia neeg nrhiav tau tej lub ntsiab tshiab thaum lawv ua li ntawd. Saib tej lo lus uas Yaxayas tau xaiv, qhov tseem ceeb yog lo lus uas ua rau koj pom tau tej daim duab hauv koj lub siab. Cov duab ntawd ua rau koj xav li cas? Cov duab ntawd qhia dab tsi txog Yaxayas txoj kev xav? Koj yim kawm tej lus ntawm cov uas sau Phau Qub, koj yim kawm tias lawv txhob txwm xaiv lawv cov lus thiab tej txheej txheem kom sau lawv tej zaj lus kom tshoov neeg lub siab.
Paj lug yeej zoo li cov phooj ywg zoo vim cov paj lug pab peb to taub peb tej kev xav thiab peb lub neej. Paj lug hauv Phau Qub yeej muaj nqis heev rau qhov cov paj lug pab peb to taub peb tej kev xav uas tseem ceeb tshaj—tej kev xav uas pab peb nrog Vajtswv sib raug zoo.
Thaum koj kawm paj lug hauv Phau Qub, nco ntsoov tias txoj kev kawm vaj lug kub muaj nqis tshaj thaum ua rau peb xav los cuag Yexus Khetos. Cia li nrhiav tej lub cim, cov duab, thiab qhov tseeb uas txhawb koj txoj kev ntseeg Nws. Cia li mloog tus Vaj Ntsuj Plig Dawb Huv tej kev tshoov koj lub siab thaum koj kawm.
Ntawv Txawj Ntse
Ib hom paj lug hauv Phau Qub yog qhov uas cov kws kawm txuj kawm ci hu ua “ntawv txawj ntse.” Yauj, Paj Lug, thiab Tej Lus Qhia yog hom paj lug no. Cov ntawv nkauj qhia txog kev qhuas Vajtswv, kev tu siab, thiab kev teev hawm, tiam sis cov ntawv txawj ntse qhia txog lus ntuas los sis hais txog tej lus nug uas nyuaj teb heev. Piv txwv tias, phau ntawv Yauj hais txog Vajtswv txoj kev txim lij thiab vim li cas raug txom nyem. Phau Paj Lug hais lus ntuas txog kev nyob zoo, tsis hais tej lus uas muaj tswv yim uas tej tiam neeg tas los tau hais. Thiab phau Tej Lus Qhia hais txog lub hom phiaj ntawm lub neej no—thaum uas yus xav tias txhua yam tsis muaj nqis, peb nrhiav tau tej yam tseeb nyob qhov twg? Tsim nyog uas koj xav tias cov ntawv txawj ntse zoo li yus sib tham nrog cov xib fwb uas xav qhia tej yam txog Vajtswv thiab lub ntiaj teb uas Nws tau tsim rau koj—thiab tej zaum yuav pab koj to taub zoo dua li koj to taub ua ntej.