Yim Hlis Ntuj 31–Cuaj Hlis Ntuj 6. ‘Ib Puas Tsav Yam uas Muaj Sia, Cia Li Qhuas tus Tswv’”: Phau Ntawv Nkauj 102–103; 110; 116–119; 127–128; 135–139; 146–150,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
Yim Hlis Ntuj 31–Cuaj Hlis Ntuj 6. ‘Ib Puas Tsav Yam uas Muaj Sia, Cia Li Qhuas tus Tswv,’” Los, Nrog Kuv Mus: Phau Qub 2026
Rov Qab Los Tswm Seeb, los ntawm Kelsy thiab Jesse Lightweave
Yim Hlis Ntuj 31–Cuaj Hlis Ntuj 6: “Ib Puas Tsav Yam uas Muaj Sia, Cia Li Qhuas tus Tswv”
Phau Ntawv Nkauj 102–103; 110; 116–119; 127–128; 135–139; 146–150
Lub npe ntawm yam lus Yudais rau Phau Ntawv Nkauj yog Tehillim, ib lo lus Henplais uas txhais tias “qhuas.” Lo lus no muaj lub ntsiab zoo li lo lus hallelujah (uas txhais tias “qhuas Yehauvas” los sis “qhuas tus Tswv”). Yog tias koj yuav tsum xaiv ib lo lus qhia txog lub ntsiab ntawm Phau Ntawv Nkauj, lo lus qhuas yuav yog ib lo lus zoo siv. Muaj ib txhia cov ntawv nkauj uas siv tej lus caw kom “cia li qhuas tus Tswv” (qhov tseem ceeb saibPhau Ntawv Nkauj 146–50), thiab txhua phau ntawv nkauj pab tau koj pe hawm thiab qhuas tus Tswv. Phau Ntawv Nkauj hais kom peb kom lees tus Tswv lub hwj chim, Nws txoj kev hlub tshua, thiab tej yam zoo uas Nws tau ua. Peb yeej yuav them Nws tsis tau rau tag nrho tej no, tiam sis peb qhuas tau Nws. Nyias muaj nyias txoj kev qhuas Vajtswv—tej zaum yus yuav hu nkauj, thov Vajtswv, los sis hais lus tim khawv. Ua li ntawd yuav pab kom koj tso siab plhuav rau tus Tswv thiab coj raws li Nws qhia. Txawm hais tias lo lus “cia li qhuas tus Tswv” txhais li cas hauv koj lub neej los, koj nrhiav tau kev tshoov siab thaum koj nyeem thiab xav txog Phau Ntawv Nkauj.
Tej Tswv Yim Pab Qhia hauv Tsev thiab lub Koom Txoos
Phau Ntawv Nkauj 102–3; 116
Tus Tswv nplij kuv lub siab thaum kuv raug kev txom nyem.
Cia li xav hais tias Phau Ntawv Nkauj 102:1–11 hais li cas kom piav txog tej kev ntxhov siab thiab kev nyob yus ib leeg thaum muaj tej teeb meem. Tej zaum koj los sis lwm tus uas koj paub tau muaj tej kev xav li no. Thaum koj nyeem Phau Ntawv Nkauj 102:12–28; 103; 116, nrhiav tej kab lus uas pab koj ua siab loj hu txog tus Tswv lub npe thaum koj raug tej kev sim siab (saib Phau Ntawv Nkauj 116:13). Tej zaum koj yuav xav sau, cim ntsoov, los sis qhia lwm tus txog tej lus uas pab koj cia siab rau Nws.
Kuj saib Yaxayas 25:8; Henplais 2:17–18; Amas 7:11–13; Camille N. Johnson, “Yexus Khetos Yog Kev Pab Dim,” Liyahaunas, Tsib Hlis Ntuj 2023, 81–83; “Kev Kaj Siab Nyob Qhov Twg?” (Cov Nkauj Qhuas Vajtswv, zaj. 47).
Carl Heinrich Bloch (1834-1890), Yexus Khetos Kho Neeg Mob Nyob ntawm Npexathas, 1883, pleev roj rau daim ntaub, 100 3/4 × 125 1/2 yas tes. Brigham Young University Museum of Art, yuav los ntawm cov nyiaj uas Jack R. thiab Mary Lois Wheatley pub, 2001.
Phau Ntawv Nkauj 110; 118
Yexus Khetos yog tus uas ua kom muaj raws li tej lus uas tau hais nyob hauv Phau Ntawv Nkauj.
Cov Ntawv Nkauj muaj tej nqe uas qhia txog Yexus Khetos lub neej thiab Nws txoj hauj lwm qhuab qhia. Nov yog ob peb zaj lus piv txwv:
-
Phau Ntawv Nkauj 110:1–4 (saib Mathais 22:41–45; Henplais 5:4–10; 6:20)
-
Phau Ntawv Nkauj 118:22 (saib Mathais 21:42; Tes Hauj Lwm 4:10–11; 1 Petus 2:7)
-
Phau Ntawv Nkauj 118:25–26 (saib Mathais 21:9)
Tej nqe no qhia dab tsi rau koj txog Yexus Khetos? Vim li cas qhov uas koj paub li no txog Nws tseem ceeb heev?
Phau Ntawv Nkauj 119
Vajtswv tej lus yuav pab kuv taug Nws txoj kev.
Phau Ntawv Nkauj 119 muaj ntau kab lus uas piv peb lub neej rau ib txoj kev rov qab mus rau Leej Txiv Saum Ntuj Ceeb Tsheej. Thaum koj nyeem, nrhiav tej lo lus xws li “taug kev,” “txoj kev,” “ko taw,” thiab “tawv dhau.” Xav txog koj lub neej—koj tau nyob qhov twg, koj nyob qhov twg tam sim no, thiab koj lub neej yuav zoo li cas thaum yav tom ntej. Koj kawm dab tsi los ntawm phau ntawv nkauj no txog koj txoj kev rov qab mus tsev? Koj tau kawm dab tsi los ntawm kev ntsia lwm tus lub neej? Raws li zaj nkauj no hais, Vajtswv tau muab dab tsi rau koj pab koj ua raws li Nws txoj kev?
Xav txog ib lub sij hawm thaum koj tau raws ib txoj kev los sis siv ib daim qhia kev uas pab tau koj mus txog koj qhov chaw uas yuav tsum mus. Lub sij hawm ntawd qhia dab tsi rau koj txog txoj kev coj raws li Vajtswv txoj kev?
Muaj ntau nqe vaj lug kub uas tus Tswv thiab Nws cov yaj saub qhia txog ib txoj kev. Nov yog ob peb yam piv txwv: Cia li xav seb puas nrhiav tej kab lus no thiab sau ntawv los sis qhia rau lwm tus txog tej yam uas koj tau kawm.
|
Vaj Lug Kub |
Kuv kawm dab tsi txog txoj kev rov qab mus cuag Vajtswv |
|---|---|
Vaj Lug Kub Paj Lug 4:11–19 | |
Vaj Lug Kub Mathais 7:13–14 | |
Vaj Lug Kub | |
Vaj Lug Kub | |
Vaj Lug Kub | |
Vaj Lug Kub |
Tej yam tseeb no yuav pab tau koj ua raws nraim li Vajtswv txoj kev?
Koj kawm dab tsi ntxiv los ntawm Thawj Tswj Hwm Russell M. Nelson tej lus ntuas nram qab no?
“Yog peb xav kom peb lub neej huaj vam, peb yuav tsum ua raws li Vajtswv txoj kev. Tus Tswv hais tias, ‘Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai’ [Lus Qhuab Qhia thiab Kev Khi Lus 6:36]. Thiab tus Sau Ntawv Nkauj sau tias, ‘Koj txoj lus zoo ib yam li lub teeb uas taws ua kuv ntej thiab ci rau kuv txoj hau kev’ [Phau Ntawv Nkauj 119:105]. …
“Nyob hauv nej lub neej, nej yuav muaj tej yam nyuaj thiab yuav ua yuam kev. Cov vaj lug kub pab nej paub thaum nej ua yuam kev thiab pab nej ua qhov yog. Nej thiaj li tsis txhob ua yuam kev ntxiv. Nej ua tib zoo kawm cov vaj lug kub. Ces nej mam li hloov siab lees txim thiab kho kom rov qab zoo li qub uas yuav tsum ua kom taug ‘txoj kev ti thiab nqaim uas yuav coj mus rau txoj sia nyob mus ib txhis’ [2 Nifais 31:18]” (“Living by Scriptural Guidance,” Ensign, Kaum Ib Hlis Ntuj. 2000, 17).
Kuj saib Dieter F. Uchtdorf, “Tus Tub Ua Txhaum thiab txoj Kev Mus Tsev,” Liyahaunas, Kaum Ib Hlis Ntuj. 2023, 86–88.
Phau Ntawv Nkauj 134:36
Tus Tswv yeej muaj hwj chim tshaj tej mlom.
To taub seb vim li cas, nyob hauv Phau Ntawv Nkauj 135:15–18, qhov ntawd hais tias yeej tsis tsim nyog tso siab rau tej vaj tswv cuav. Koj yuav raug ntxias tso siab rau dab tsi uas zoo li ib tug mlom? Tej zaum koj yuav xav sau txog tej yam uas tus Tswv ua tau, uas cov uas sau ntawv nkauj tau hais txog nyob hauv Phau Ntawv Nkauj 134–36. Nws tau ua tej yam dab tsi rau koj uas muaj hwj chim?
Phau Ntawv Nkauj 139
Tus Tswv paub tej kev xav hauv kuv lub siab.
Koj nrhiav tau dab tsi nyob hauv Phau Ntawv Nkauj 139 uas pab koj to taub tias tus Tswv paub txog koj—koj tej kev xav thiab ua, kev muaj zog thiab kev qaug zog? Tej lus tseeb no pab koj lub neej thiab koj tej kev xaiv li cas?
Phau Ntawv Nkauj 146:50
“Cia li qhuas tus Tswv.”
Thaum koj nyeem cov ntawv nkauj kawg uas qhuas Vajtswv no, cia li xav txog tej yam uas qhia vim li cas koj yuav tsum qhuas tus Tswv. Vim li cas peb yuav tsum qhuas Nws? Koj yuav ua tej yam twg kom qhuas tau Nws?
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Phau Ntawv Nkauj 102:1–2
Tus Tswv nplij kuv lub siab thiab ua rau kuv muaj kev cia siab.
-
Tej zaum koj thiab koj cov me nyuam yuav xav nyeem Phau Ntawv Nkauj 102:1–2, es nrhiav seb tus Tswv pab peb li cas thaum peb raug xwm txheej nyuaj. Yog li cas peb thiaj yuav nrhiav tau Nws txoj kev pab? Tej zaum nej yuav xav sib tham txog tej lub sij hawm thaum nej tau xav txais kev pab thiab xav tias Vajtswv tau hnov nej tej lus thov.
Phau Ntawv Nkauj 119:105
Vajtswv txoj lus zoo li ib lub teeb.
-
Tej zaum koj cov me nyuam yuav muaj kev lom zem sib tham txog seb lawv xav li cas thaum nyob ib qhov chaw tsaus ntuj nti. Los sis tej zaum lawv yuav xav sib tham txog tej yam uas nyuaj ua thaum tsis pom kev. Tej zaum koj yuav xav caw lawv ua dab tsi thaum lawv qi qhov muag, xws li kos ib daim duab. Peb kawm dab tsi los ntawm Phau Ntawv Nkauj 119:105 txog txoj kev kaj thiab Vajtswv txoj lus?
-
Nrhiav dab tsi uas Leej Txiv Saum Ntuj Ceeb Tsheej tau muab rau peb kom pab peb taug raws nraim li Nws txoj kev nyob hauv tej nqe no: Phau Ntawv Nkauj 119:47–48; 119:105; 1 Nifais 11:25; 2 Nifais 31:20. Peb yuav ua li cas kom taug raws nraim li Vajtswv txoj kev?
-
Tej zaum koj cov me nyuam yuav nyiam saib cov duab txog tej yam uas tau hais nyob hauv Phau Ntawv Nkauj 119:105. Lawv kuj muab cov duab tso kom raws li hais thaum lawv nyeem nqe ntawd. Nej kuj hu tau ib zaj nkauj uas hais txog tej ntawd ua ke, xws li “Qhia Kuv Los Ua Raws Li Vajtswv txoj Lus” (Phau Nkauj Qhuas Vajtswv, 140) los sis “I Will Walk with Jesus” (Txoj Moo Zoo cov Ntawv).
Phau Ntawv Nkauj 139:1–3, 23–24
Leej Txiv Saum Ntuj Ceeb Tsheej thiab Yexus Khetos paub kuv thiab hlub kuv.
-
Cia li xav seb puas sau ntawv txog tej yam uas koj paub txog koj cov me nyuam txhua leej. Thaum koj nyeem tej yam ntawm daim ntawv, hais kom koj cov me nyuam twv seb koj piav txog leej twg. Ces, tom qab nej nyeem Phau Ntawv Nkauj 139:1–3 ua ke, tej zaum koj yuav xav sau ntawv txog tej yam uas Leej Txiv Saum Ntuj Ceeb Tsheej thiab Yexus paub txog peb.
-
Sau tej lo lus hauv Phau Ntawv Nkauj 139:23–24 rau ib daim ntawv los sis ib daim txiag. Caw koj cov me nyuam kos ib txoj kab rau tej lo lus uas qhia txog tej yam uas Vajtswv ua tau rau peb. Vim li cas peb xav kom Vajtswv ua tej no rau peb?
Phau Ntawv Nkauj 146:1, 5–9
Kuv qhuas tau tus Tswv.
-
Tej zaum koj cov me nyuam yuav xav qhia txog tej lub sij hawm thaum leej twg tau qhuas lawv los sis qhia rau lawv hais tias lawv ua ib yam dab tsi zoo. Sib tham txog tej yam zoo uas nej pom nyob hauv Phau Ntawv Nkauj 146:6–9 uas tus Tswv tau ua (pab koj cov me nyuam to taub tej lo lus uas lawv tsis paub). Caw koj cov me nyuam sib tham txog lwm yam uas Nws ua rau peb. Yog li cas peb thiaj yuav qhuas Nws rau tej yam ntawd?
Kawm tom tsev: qhia rau lwm tus. Thawj Tswj Hwm Russell M. Nelson tau qhia tias peb yuav tsum kho peb lub tsev kom ua “lub hauv paus rau txoj kev kawm txoj moo zoo” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liyahaunas, Kaum Ib Hlis Ntuj 2018, 13). Lub lim tiam no koj ua tau dab tsi kom kawm ntxiv txog Phau Ntawv Nkauj koj tus kheej los sis nrog koj tsev neeg? Tom qab koj kawm, cia xav seb puas qhia rau lwm tus txog tej yam uas koj tau kawm thiab xav. Koj qhia tau thaum koj sib tham, ntaus ntawv, los sis siv social media, los sis hais tom lub koom txoos.
Yog xav tau ntxiv, saib phau xov xwm Phooj Ywg rau lub hli no.