Los, Nrog Kuv Mus
Cuaj Hlis Ntuj 21–27. “Ib txoj Hauj Lwm Zoo Kawg Nkaus thiab Ib Qho Txuj Ci Xav Tsis Thoob”: Yaxayas 13–14; 22; 24–30; 35

“Cuaj Hlis Ntuj 21–27. ‘Ib txoj Hauj Lwm Zoo Kawg Nkaus thiab Ib Qho Txuj Ci Xav Tsis Thoob’: Yaxayas 13–14; 22; 24–30; 35,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Cuaj Hlis Ntuj 21–27. ‘Ib txoj Hauj Lwm Zoo Kawg Nkaus thiab Ib Qho Txuj Ci Xav Tsis Thoob,’” Los, Nrog Kuv Mus: 2026

Vajtswv thiab Yexus Khetos tshwm sim rau tus tub hluas Joseph Smith

Koog Ntoo Dawb Ceev, los ntawm Brent Borup

Cuaj Hlis Ntuj 21–27: “Ib txoj Hauj Lwm Zoo Kawg Nkaus thiab Ib Qho Txuj Ci Xav Tsis Thoob”

Yaxayas 13–14; 22; 24–30; 35

Ib yam uas Vajtswv hais kom cov yaj saub ua yog ceeb toom txog tej yam yus raug thaum ua txhaum. Rau cov yaj saub nyob hauv Phau Qub, ntau zaus lawv yuav tsum qhia cov neeg kav teb kav chaw ntawm tej nceeg vaj tias lawv yuav tsum hloov siab lees txim. Yog ib txoj hauj lwm uas txaus ntshai, tiam sis Yaxayas tsis ntshai, thiab nws tej lus ceeb toom rau tej nceeg vaj hauv nws hnub nyoog—tsis hais Ixayees, Yudas, thiab lwm tej teb chaws ib puag ncig—muaj zog (saib Isaiah 13–23).

Tiam sis, Yaxayas kuj muaj ib zaj lus txog kev cia siab. Txawm tias twb muaj raws li tej uas nws tau hais txog cov nceeg vaj txoj kev raug puas tsuaj, Yaxayas tau pom ib lub sij hawm thaum yuav muab tej yam zoo txum tim rov qab los thiab. Tus Tswv yuav caw Nws cov neeg rov qab los cuag Nws. Nws yuav ua “lub tiaj suab zeb uas kub heev … ua pas dej, thiab thaj av qhuav yuav txhawv dej txhua qhov” (Yaxayas 35:7). Nws yuav ua “ib txoj hauj lwm zoo kawg nkaus thiab ib qho txuj ci xav tsis thoob” (Yaxayas 29:14), uas rov qab muab Ixayees tej koob hmoov uas Nws tau cog lus tseg rau lawv txum tim rov qab los. Yaxayas thiab txhua tus uas nyob hauv lub caij nyoog ntawd yeej tsis tau pom txoj hauj lwm zoo kawg nkaus no. Tiam sis peb pom niaj hnub no. Muaj tseeb tiag, peb ua ib feem ntawm txoj haum lwm no.

lub cim rau txoj kev kawm

Tej Tswv Yim Pab Qhia hauv Tsev thiab lub Koom Txoos

Yaxayas 13:1–11, 19–22; 14:1–20

Kev muab hlob thiab kev nyiam khoom ntiaj teb yuav ploj mus.

Hauv Yaxayas lub caij nyoog, Npanpiloos yog ib lub nceeg vaj uas muaj zog nrog ib tug nom uas muaj hwj chim thiab. Tam sim no Npanpiloos muaj puag thaum ub xwb. Ces vim li cas Yaxayas zaj lus rau Npanpiloos, nyob hauv Yaxayas 13–14, tseem ceeb rau peb hnub no? Vim tias Npanpiloos yog ib lub cim txog kev muab hlob, kev qias dub, thiab kev txhaum, tej yam uas tseem nyob ib puag ncig peb niaj hnub nim no. Xav txog lub cim no thaum koj nyeem Yaxayas 13:1–11, 19–22; 14:1–20. Tej zaum koj yuav xav nug tej yam xws li no:

  • Tus vaj ntxwv ntawm Npanpiloos txoj kev muab hlob thiab Dab Ntxwg Nyoog txoj kev muab hlob sib xws li cas? (saib Yaxayas 14:4–20; Mauxes 4:1–4). Koj kawm tej lus ceeb toom dab tsi txog koj tus kheej nyob hauv tej nqe no?

  • Yog li cas tus Cawm Seej thiaj pab tso koj “dim ntawm [koj] tej kev lwj siab, [thiab] kev txom nyem ”? (Yaxayas 14:3).

Yexus Khetos tus uas tau sawv rov los tshwm sim rau Maivliag nyob ze Nws lub ntxa

“Nws rhuav txoj kev tuag kom puas tsuaj mus ib txhis” (Yaxayas 25:8).

Yaxayas 22:22–23; 24:21–23; 25:6–8; 26:19; 28:16

Yexus Khetos yog tus Mexiyas uas Vajtswv cog lus tias Nws yuav txib los.

Ntau zaus Yaxayas tej lus qhia hais txog tus Cawm Seej ntiag tug hauj lwm, tsis hais Nws txoj kev theej txhoj, txoj Kev Sawv Rov Los, thiab txoj Kev Los Zaum Ob. Koj xav txog tej yam twg hauv Nws txoj hauj lwm thaum koj nyeem tej nqe no: Yaxayas 22:22–23; 24:21–23; 25:6–8; 26:19; 28:16? Koj nrhiav tau lwm tej nqe vaj lug kub twg uas ua rau koj nco qab txog tus Cawm Seej?

Cia cov neeg kawm muaj cib fim ua tim khawv txog Yexus Khetos. “Qhov uas yus yog ib tug uas qhia txog Yexus Khetos txoj moo zoo txhais hais tias yus pab lwm tus to taub thiab cia siab rau Nws tej lus qhia, lub hwj chim txhiv dim, thiab txoj kev hlub uas zoo tag nrho.” (Kev Qhia Raws Li tus Cawm Seej txoj Kev, 8). Ib txoj kev yooj yim uas koj siv tau yog txhua zaus koj qhia nug ib lo lus xws li “Koj nrhiav tau dab tsi hauv cov vaj lug kub lub lim tiam no uas qhia koj txog tus Cawm Seej?” Ces cia cov neeg kawm qhia txog tej yam uas muaj los thiab pab txhawb nqa txhua tus txoj kev ntseeg .

Yaxayas 24:1–12; 28:1–8; 29:7–13; 30:8–14

Kev tso tus Tswv tseg yuav ua rau peb sab ntsuj plig raug xwm txheej ceev.

Vim Nws hlub peb, tus Tswv xa Yaxayas mus ceeb toom cov neeg khi lus tias lawv tsis coj raws li tus Tswv. Sim saib koj puas nrhiav tau tej lus ceeb toom txog sab ntsuj plig nyob hauvYaxayas 24:5; 29:13; 30:8–12. Vim li cas tej cwj pwm thiab tej yam no ua rau peb sab ntsuj plig raug xwm txheej ceev?

Kom ceeb toom txog tej xwm txheej uas los thaum tib neeg tso tus Tswv tseg, Yaxayas tau siv tej zaj lus piv txwv uas yooj yim nco ntsoov. Thaum koj kawm tej zaj lus ntawd, nug koj tus kheej seb kev tso tus Tswv tseg zoo li cas:

  • Lub ntiaj teb uas puas tsuaj (Yaxayas 24:1–12).

  • Vwm loj vwm leg (Yaxayas 28:7–8).

  • Tshaib plab thiab nqhis dej (Yaxayas 29:7–10).

  • Ib lub lauj kaub av los sis phab ntsa uas tawg (Yaxayas 30:13–14).

Vim li cas koj yuav tsum nyob ze tus Tswv?

Yaxayas 29; 30:18–26; 35

lub cim txog seminary
Tus Tswv kho tau tej yam uas xiam lawm los sis tawg.

Koj puas tau xiam ib yam dab tsi uas koj ntshai tias koj yuav nrhiav tsis tau ntxiv? Los sis tej zaum ib yam dab tsi tawg los poob, thiab koj txhawj tias yuav kho tsis tau qhov ntawd. Thaum peb tso tus Tswv tseg, Dab Ntxwg Nyoog xav kom peb xav tias peb yeej rov qab mus cuag tus Tswv tsis tau los sis peb tsis tsim nyog txais kev kho mob. Tiam sis, Yaxayas qhia txog tej yam zoo kawg nkaus uas tus Tswv yuav ua kom pab peb rov qab los cuag Nws. Koj kawm dab tsi los ntawm Yaxayas 29:13–24; 30:18–26; 35 txog tus Tswv, Nws txoj kev hlub, thiab Nws lub hwj chim? Tej zaum koj yuav xav nrhiav tej nqe lus rau tej nqe vaj lug kub no uas pab koj muaj kev cia siab thaum koj xav txais kev kho. Koj kuj nyeem tau Muam Amy A. Wright zaj lus “Khetos Kho Yam Twg uas Puas Lawm” (Liyahaunas, Tsib Hlis Ntuj 2022, 81–84).

Ib yam uas tus Tswv qhia txog Nws lub hwj chim thiab txoj kev hlub tshua yog los ntawm txoj Kev Muab Txoj Moo Zoo Txum Tim Rov Qab Los. Yaxayas 29 muaj ob peb nqe vaj lug kub piv txwv txog lub caij muab txoj moo zoo txum tim rov qab los. Piv txwv hais tias:

Raws li koj xav, vim li cas tej lus “zoo kawg nkaus” thiab “xav tsis toob” (Yaxayas 29:14) yog tej lus zoo qhia txog tus Tswv txoj kev txum tim Nws txoj moo zoo rov qab los? Koj ua tau dab tsi kom muaj raws li tej lus qhia txog Kev Muab txoj Moo Zoo Txum Tim Rov Qab Los? Yog xav tau tswv yim, nyeem hauv Txawj Laug Gerrit W. Gong zaj lus “Txhua Haiv Neeg, Txhua Xeem Neeg, thiab Txhua Yam Lus” (Liyahaunas, Kaum Ib Hlis Ntuj. 2020, 38–41).

Kuj saib “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los” (Txoj Moo Zoo cov Ntawv); “Kaj Ntug Plaws Lawm,” Cov Nkauj Qhuas Vajtswv, zaj 1.

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

lub cim rau cov me nyuam tshooj

Tej Tswv Yim Pab Qhia cov Me Nyuam

Yaxayas 14:3; 25:8–9; 28:16

Yexus Khetos cawm tau kuv dim kev txhaum thiab kev tuag.

  • Koj yuav ua li cas kom pab koj cov me nyuam pom tus Cawm Seej hauv Yaxayas tej lus sau? Tej zaum koj yuav xav pab lawv nrhiav tej nqe uas pab lawv nco qab txog Nws nyob hauv Yaxayas 14:3; 25:8; los sis 28:16. Tej zaum lawv yuav xav muab tej nqe no nyob hauv Yaxayas piv rau lwm nqe vaj lug kub uas qhia txog tus Cawm Seej, xws li Mathais 11:28–30; 1 Kauleethaus 15:53–57; Hilamas 5:12. Tus Tswv tau ua tej yam zoo kawg nkaus twg rau peb?

  • Tom qab nej nyeem Yaxayas 25:8–9 ua ke, nej kuj saib tau cov duab txog tus Cawm Seej thaum Nws nyob hauv Khexemanes, saum tus ntoo khaub lig, thiab tom qab Nws txoj Kev Sawv Rov Los. Cia koj cov me nyuam sib tham txog tej yam uas muaj nyob hauv cov duab thiab vim li cas lawv hlub Yexus thiab “xyiv fab heev vim nws cawm peb dim lawm” (nqe 9).

  • Tej zaum koj yuav xav qhia koj cov me nyuam txog koj txoj kev tu siab thaum ib tug uas koj hlub tau xiam lawm. Ua tim khawv txog txoj kev nplij siab uas koj txais vim muaj Yexus Khetos. Tej zaum koj cov me nyuam yuav xav kos ib daim duab txog ib lub ntsej muag uas los kua muag ces mam lwv cov kua muag thaum nej nyeem Yaxayas 25:8 ua ke.

Yexus Khetos nyob hauv Khexemanes

Ua Raws Li Koj lub Siab Nyiam, los ntawm Ken Spencer

Yaxayas 25:4-6.

Yexus “tiv thaiv peb thaum muaj cua daj cua dub.”

  • Koj thiab koj cov me nyuam puas tau muaj ib lub sij hawm thaum nej tau txais koob hmoov los ntawm ib qhov chaw tiv thaiv thaum huab cua phem tuaj los sis nej nyob hauv ib qhov chaw ntxoov ntxoo thaum tshav ntuj kub? Los sis nej puas tau noj ib pluag mov zoo thaum nej tshaib plab? Sib tham txog tej yam no thaum nej nyeem Yaxayas 25:4–6. Yog li cas Yexus thiaj li zoo li tej yam no?

Yaxayas 29:11–18, 24

Kev Muab Txoj Moo Zoo Txum Tim Rov Qab Los yeej yog “ib txoj hauj lwm zoo kawg nkaus.”

  • Thaum koj thiab koj cov me nyuam nyeem Yaxayas 29:14, qhia lawv lwm lo lus uas muaj lub ntsiab ib yam tej lus “zoo kawg nkaus” thiab “xav tsis thoob.” Cia lawv pab koj nrhiav tej yam khoom los sis cov duab uas qhia txog tus Tswv tej hauj lwm uas zoo kawg nkaus hauv hnub nyoog kawg no. Tej no mas tej zaum yuav yog ib Phau Ntawv Maumoos, ib daim duab txog lub tuam tsev los sis ib daim duab txog Thawj Zaug Ua Yog Toog (muaj ib daim nyob ua ntej ntawm tus txheej txheem qhia no). Ces koj cov me nyuam xaiv tau ib yam khoom thiab qhia vim li cas yam ntawd yeej zoo kawg nkaus rau lawv.

  • Tej zaum yuav zoo yog nej hu ib zaj nkauj txog Kev Muab Txoj Moo Zoo Txum Tim Rov Qab Los nrog kev nyeem Yaxayas 29, xws li “On a Golden Springtime” (Children’s Songbook, 88). Thiab tej zaum kev xav txog ib lub sij hawm hauv koj lub neej yuav pab cov me nyuam to taub tias kev txum tim rov qab los txhais li cas. Piv txwv hais tias, tej zaum koj tiab koj cov me nyuam yuav xav sib tham txog ib yam dab tsi uas nej ua xiam thiab nej tau ua li cas kom nrhiav tau. Pab koj cov me nyuam muab qhov no piv rau Kev Muab Txoj Moo Zoo Txum Rov Qab Los. Raws li Yaxayas 29:13–15 hais, vim li cas peb yuav tsum muaj Kev Muab Txoj Moo Zoo Txum Rov Qab Los? Tus Tswv ua tej hauj lwm zoo kawg nkaus twg kom muab Nws txoj moo zoo txum tim rov qab los? (saib phab ntawv ntxim ua rau lub lim tiam no).

Yog xav tau ntxiv, saib phau xov xwm Phooj Ywg rau lub hli no.

Yexus raug ntsia saum ntoo khaub lig

Kev Raug Ntsia Saum Ntoo Khaub Lig, los ntawm Carl Heinrich Bloch, nyob hauv lub tsev Frederiksborg Museum of National History

Lub Koom Haum Me Nyuam Yaus phab ntawv ntxim ua: Kev Muab Txoj Moo Zoo Txum Tim Rov Qab Los yeej yog “ib txoj hauj lwm zoo kawg nkaus”