“Cuaj Hlis Ntuj 28–Kaum Hli Ntuj 4. ‘Nplij Kuv Haiv Neeg lub Siab’: Yaxayas 40–49,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Cuaj Hlis Ntuj 28–Kaum Hli Ntuj 4. ‘Nplij Kuv Haiv Neeg lub Siab,’” Los, Nrog Kuv Mus: Phau Qub 2026
Kev Kho tus Txiv Neej Dig Muag, los ntawm Carl Heinrich Bloch, nyob ntawm Frederiksborg Museum of National History
Cuaj Hlis Ntuj 28–Kaum Hli Ntuj 4: “Nplij Kuv Haiv Neeg lub Siab”
Yaxayas 40–49
Kev “nplij siab” yog thawj los lus ntawm Yaxayas tshooj 40. Yeej yog qhov pib ntawm ib txoj kev hais txawv, ib yam txawv nyob hauv tus yaj saub tej lus. Yaxayas tej lus ua ntej tau ceeb toom Ixayees thiab Yudas txog qhov uas lawv yuav raug puas tsuaj thiab raug ua qhev vim lawv ua txhaum. Tiam sis tej lus qhia txog yav tom ntej no yuav nplij cov neeg Yudas lub siab 150 xyoo tom qab ntawd—tom qab Yeluxalees thiab lub tuam tsev raug puas tsuaj thiab Npanpiloos yuam cov neeg ua qhev. Tiam sis tej lus qhia no hais txog peb lub caij nyoog thiab tsis yog hais rau cov neeg Ixayees uas poob siab xwb. Tej lus no yog hais rau peb, vim peb kuj poob siab, nyuaj siab, thiab xav tias peb twb ploj mus.
Yaxayas zaj lus rau nws cov neeg thiab rau peb yeej yooj yim: “Tsis txhob ntshai” (Yaxayas 43:1). Yeej muaj ib txoj kev. Tus Tswv yeej nco ntsoov txog koj, thiab Nws muaj hwj chim kov yeej tej yam uas koj xav tias koj ua tsis taus. Tus Tswv uas tau “tsim lub ntuj” (Yaxayas 42:5) puas muaj hwj chim tshaj Npanpiloos, tshaj kev txhaum, tshaj tej yam uas ua rau koj raug ua qhev? Nws thov hais tias, “Nej cia li rov los cuag kuv, kuv yog tus uas txhiv nej dim” (Yaxayas 44:22). Nws kho tau peb, muab peb txum tim rov qab los, txhawb zog, zam txim, thiab nplij peb lub siab—peb xav tau dab tsi kom txais kev txhiv dim los Nws ua tau.
Tej Tswv Yim Pab Qhia hauv Tsev thiab lub Koom Txoos
Yaxayas 40–49
Yexus Khetos muaj peev xwm nplij kuv lub siab thiab ua rau kuv muaj kev cia siab.
Thaum cov neeg Ixayees raug ua qhev nyob hauv Npanpiloos, neeg coob tau xav seb lawv puas tau xiam lawv txoj kev ua Vajtswv cov neeg khi lus uas Nws tau xaiv tseg. Thaum koj nyeem Yaxayas 40–49, nrhiav tej zaj lus uas ua rau koj txais kev nplij siab thiab kev cia siab. Thaum koj nyeem txhua nqe, cia li xav thiab sau ntawv txog qhov uas tus Tswv hais li cas rau koj nyob hauv tej nqe no. Nov yog ob peb nqe rau koj pib nyeem:
-
40:11, 29–31:
-
41:10–13, 17–18:
-
42:6–7:
-
43:1–7, 25:
-
44:1–4, 21–24:
-
46:3–4:
-
49:7–16:
Koj xav tias tus Tswv xav kom koj paub dab tsi txog Nws/
Tej zaum koj yuav pom tias zaj nkauj qhuas Vajtswv hu ua “Lub Hauv Paus Ruaj Nrees” (Cov Nkauj Qhuas Vajtswv, zaj 29) siv Yaxayas tej lus nyob hauv Yaxayas 41:10; 43:2–5; 46:4. Xav seb puas hu nkauj los sis mloog zaj nkauj no, thiab nrhiav tej yam hauv tej lus no seb puas zoo li tej nqe no los ntawm Yaxayas. Tus Tswv tau ua li cas kom muaj raws li kev cog lus nyob hauv tej nqe no nyob hauv koj lub neej?
Kuj saib Patrick Kearon, “Nws Sawv Los nrog Hwj Chim Kho Mob hauv Nws Ob Sab Tis: Peb Yuav Kov Yeej Txhua Yam,” Liyahaunas, Tsib Hlis Ntuj 2022, 37–40.
Siv cov vaj lug kub ntxiv. Tej lub sij hawm peb yuav to taub Phau Qub zoo duab yog peb kawm tej nqe hauv Phau Ntawv Maumoos thiab. Piv txwv hais tias, Phau Ntawv Maumoos ob tug yaj saub Nifais thiab Yakhauj muaj Yaxayas tej lus uas tau muab sau rau ntawm cov phiaj toog (saib 1 Nifais 19:22–23), thiab nkawd tau siv tej lus no kom qhia txog tus Cawm Seej. Yog xav kawm tias Nifais thiab Yakhauj tau muab Yaxayas 48–49 piv rau lawv cov neeg, cia li saib 1 Nifais 22. Yog koj ua li no ces tej zaum yuav pab koj muab ob tshooj no piv rau koj lub neej.
Thaum peb mloog tus Tswv lus ces peb yuav muaj “tej koob hmoov … ntws laub lug los rau [peb] ib yam li tus dej ntws tsis paub nqhuab li” (Yaxayas 48:18).
Yaxayas 40–49
“Koj yog kuv tus tub txib.”
Nyob hauv Yaxayas 40–49 tus Tswv hais txog Nws “tus tub txib” thiab Nws “cov tim khawv.” Tej lus no los hais txog Yexus Khetos (saib Yaxayas 42:1–7), tsev neeg Ixayees (saib Yaxayas 45:4), thiab hais txog Vaj Ntxwv Xailas, tus uas cia cov neeg Yudais rov qab mus rau Yeluxalees thiab rov qab ua lub tuam tsev (saib Yaxayas 44:26–28; 45:1–4). Tej zaum koj yuav xav paub seb tej nqe no muaj nqis dab tsi rau koj vim koj yog tus Tswv ib tug tub qhe thiab ib tug tim khawv. Piv txwv hais tias, cia li xav txog tej lus nug xws li no:
Yaxayas 40:1–3, 9–11; 43:9–12. Yog li cas koj yog ib tug uas tim khawv txog Yexus Khetos? “Txoj moo zoo” uas koj ua tim khawv txog yog dab tsi? Tej zaum koj yuav xav paub seb yuav zoo li cas yog koj yog ib tug tim khawv thaum hais plaub ntug. Nyob hauv kev hais plaub no, muaj neeg uas hais tias Yexus Khetos tau hais tej lus nyob hauv Yaxayas 43:11. Koj yuav hais dab tsi kom txhawb nqa qhov uas Yexus hais? Koj yuav muab puav pheej dab tsi los ntawm koj lub neej?
Yaxayas 41:8–13; 42:6; 44:21. Tus Tswv tau hu koj ua dab tsi? Cia li xav txog tej yam uas Vajtswv hu koj ua hauv lub Koom Txoos thiab lwm lub cib fim kom ua hauj lwm rau Nws. Nws tau npaj koj li cas kom los ua Nws tus tub qhe? Nws ua li cas kom txhawb nqa koj thaum koj ua hauj lwm?
Yaxayas 49:1–9. Koj nrhiav tau tej zaj lus twg hauv tej nqe no uas yuav pab koj thaum koj xav tias tej yam koj ua thiab pab los “tsis muaj qab hau”? (nqe 4).
Yaxayas 40:3–8, 15–23; 42:15–16; 47:7–11
Vajtswv lub hwj chim muaj zog ntau dua li lub hwj chim hauv lub ntiaj teb.
Yaxayas pheej ua rau nws cov neeg nco txog Vajtswv lub hwj chim uas tsis paub kawg, txawm muab piv rau lub hwj chim ntawm neeg ntiaj teb uas muab lawv ntes los yog. Nrhiav zaj lus no thaum koj nyeem Yaxayas 40:3–8, 15–23; 42:15–16; thiab 47:7–11 (nco qab tias tshooj 47 yog hais rau cov uas tau yuam Ixayees ua qhev, Npanpilos). Tej nqe no qhia dab tsi rau koj txog tej yam khoom hauv lub ntiaj teb? Tej no qhia koj dab tsi txog Vajtswv? Xav seb vim li cas zaj lus no yuav muaj nqis rau cov neeg Yudais uas raug ua qhev. Vim li cas muaj nqis rau koj?
Yaxayas 48:10; 49:13–16
Tus Tswv txawj muab kuv nchuav nyiaj hauv yeej vub thaum kuv raug kev nyuaj siab.
Thaum koj nyeem Yaxayas 48:10, cia li xav txog koj txoj “kev nyuaj siab.” Yog li cas tus Tswv thiaj muab koj hloov zoo li kev “nchuav nyiaj hauv yeej vub”? Yaxayas 49:13–16 pab koj li cas thaum koj raug kev txom nyem?
Kuj saib “The Refiner’s Fire” (vidi-aus), Txoj Moo Zoo cov Ntawv.
The Refiner's Fire
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Yaxayas 40:3–5
Kuv pab tau kom npaj “kho kev … tos tus Tswv.”
-
Cia li xav txog tej yam uas yuav piav txog qhov uas “kho kev … tos tus Tswv” txhais li cas raws li piav nyob hauv Yaxayas 40:3–5. Piv txwv hais tias, tej zaum koj thiab koj cov me nyuam yuav xav muab ib yam dab tsi uas nkhaus kho kom ncaj, tu ib lub tsev, los sis ua ib txoj kev hauv cov av uas muaj pob zeb ntau. Tej zaum koj yuav xav muab daim duab txog Yauhas tus uas Muab Neeg Ua Kev Cai Raus Dej thiab Joseph Smith rau lawv saib (saib Phau Muaj Duab txog Txoj Moo Zoo, najnpawb 35, 87). Lawv tau kho txoj kev li cas kom tos tus Tswv txoj kev los? (saib Lukas 3:2–18; Lus Qhuab Qhia thiab Kev Khi Lus 135:3). Peb yuav ua li cas thiaj pab tau? Tej zaum nov yog ib lub cib fim kom sib tham txog qhov uas cov uas tuav lub Pov Thawj Hwj Aloos pab li cas kom npaj rau tus Tswv txoj kev los (saib Lus Qhuab Qhia thiab Kev Khi Lus 84:26–28).
Yaxayas 43:10
Kuv ua tau tim khawv txog tus Tswv Yexus.
-
Tom qab nej nyeem Yaxayas 43:10 ua ke, tej zaum nej yuav xav sib tham txog qhov uas kev ua ib tug tim khawv txhais li cas. Cia li sib tham txog tej yam hauv nej lub neej uas nej “ua tim khawv txog”—piv txwv hais tias, ib yam uas koj tau saj lawm, ib qhov chaw uas koj tau mus xyuas, los sis ib tug neeg uas koj paub lawm. Qhov uas peb ua tim khawv txog tus Tswv txhais li cas? Peb yuav qhia dab tsi rau lwm tus txog Nws?
Yaxayas 44:3–4; 45:8
Tus Tswv yuav tso Nws cov koob hmoov rau kuv.
-
Tom qab nej nyeem tej nqe no, tej zaum koj cov me nyuam yuav xav tso dej rau ib tug xyoob ntoo thiab sib tham txog cov koob hmoov uas tus Tswv tau foom pub rau lawv. Ib tug xyoob ntoo ua dab tsi thaum peb tso dej rau? Yog li cas tus Tswv cov koob hmoov tau peb pab loj tuaj?
Peb “tej kev vam meej yuav zoo ib yam li hiav txwv ntas” (Yaxayas 48:18).
Yaxayas 48:17–18
Kev coj raws li Vajtswv cov lus txib ua rau peb nyob kaj siab lug.
-
Tej zaum cov vidi-aus txog cov dej thiab tej nthwv dej yuav pab koj cov me nyuam xav txog Yaxayas 48:18 (xws li cov duab hauv tus txheej txheem qhia no). Tej zaum koj cov me nyuam yuav nyiam yoj tes mus los xws li ib tug dej thiab tej nthw dej hauv hiav txwv. Yog li cas kev kaj siab lug zoo li ib tug dej? Yog li cas kev ncaj ncees zoo li tej nthw dej? Cia li sib tham txog qhov uas nej coj raws li Vajtswv cov lus txib yog qhov uas pab nej nyob kaj siab lug zoo li ib tug dej los sis muaj zog zoo li ib nthw dej.
-
Hu ib zaj nkauj ua ke txog cov lus txib, xws li “Keep the Commandments” (Children’s Songbook, 146–47). Zaj nkauj no qhia dab tsi rau peb txog vim li cas peb yuav tsum coj raws li Vajtswv cov lus txib?
Yaxayas 49:14–16
Tus Tswv yeej yuav nco ntsoov kuv.
-
Yaxayas 49:14–16 yuav nplij koj cov me nyuam lub siab tau ntau xyoo tom ntej. Thaum nej nyeem nqe 14, tej zaum nej yuav xav sib tham txog tej yam uas ua rau tib neeg xav tias tsis muaj leej twg nco txog lawv. Yog li cas peb thiaj paub tias tus Tswv nco ntsoov txog peb?
-
Kom qhia txog nqe 15–16, tej zaum koj yuav xav nug koj cov me nyuam txog ib tug uas lawv yeej yuav nco ntsoov, xws li ib tug kwv tij neej tsa los sis ib tug phooj ywg. Raws li Yaxayas 49:15–16qhia, vim li cas tus Tswv yeej yuav nco ntsoov peb? Ces tej zaum nej yuav xav qhia tias nej xav li cas txog Yexus Khetos.
Yog xav tau ntxiv, saib phau xov xwm Phooj Ywg rau lub hli no.