Yelemis 1–3; 7; 16–18; 20

Cia li xav seb yuav zoo li cas yog koj hais rau ib tug phooj ywg uas tsis tau hnov txog cov yaj saub, thiab koj txiav txim siab siv Vajtswv txoj kev hu Yelemis ua ib tug yaj saub nyob hauv Yelemis 1:4–19 kom piav txog lub ntsiab no. Koj nrhiav dab tsi hauv tej nqe no uas qhia ib yam dab tsi txog Vajtswv cov yaj saub? Tej zaum koj kuj yuav xav saib nyob hauv Yelemis 7:1–7; 20:8–9 thiab ib zaj nkauj qhuas Vajtswv xws li “Los, Mloog Ib tug Yaj Saub lub Suab” (Cov Nkauj Qhuas Vajtswv, zaj 9).

Tej zaum koj yuav xav qhia koj tus phooj ywg txog tus yaj saub uas muaj niaj hnub nim no. Puas muaj dab tsi nyob hauv tej nqe no uas pab tau? Piv txwv hais tias, cov yaj saub hauv peb hnub nyoog muab dab tsi “rho tawm” los sis “muab rhuav”? Lawv “tsim tsa” thiab “muab [dab tsi] cog”? (Yelemis 1:10). Vim li cas koj ho paub tias tus yaj saub uas muaj niaj hnub nim no yog Vajtswv hu nws?

Kuj saib Tej Nqe Kev Ntseeg 1:6, 9; “Why Do We Have Prophets?” (vidi-aus), ChurchofJesusChrist.org.

1:37

Yelemis tau kawm dab tsi txog nws tus kheej nyob hauv Yelemis 1:5? Vim tus Tswv nyuam qhuav hu nws los ua ib tug yaj saub, vim li cas tej lus ntawd tseem ceeb rau nws paub?

Tej yam uas Yelemis kawm txog nws tus kheej nyob hauv Yelemis 1:5 los feem ntau muaj tseeb yog hais txog koj thiab. Vajtswv kuj paub koj ua ntej koj yug los thiab npaj koj rau tej kev lav ris tseem ceeb. Yog xav kawm ntxiv txog koj lub neej ua ntej koj yug los, cia li nyeem Amas 13:1–4; Lus Qhuab Qhia thiab Kev Khi Lus 138:53–56; thiab Anplaham 3:22–23. Tej zaum koj yuav xav sau ntawv txog tej lus tseeb uas koj kawm. Vim li cas cov lus no tseem ceeb rau koj paub?

Kom kawm txog tej lus tseeb no tau hloov Txwj Laug Ahmad S. Corbitt lub neej, cia li kawm nws zaj lus “Koj Muaj Peev Xwm Sau Ixayees Los Ua Ke!” (Liyahaunas, Tsib Hlis Ntuj 2021, 63–63). Qhov uas koj paub txog koj lub neej ua ntej koj yug los ua li cas kom hloov koj txoj kev ua neej hauv lub ntiaj teb no?

Ntawm no yog tej yam uas Thawj Tswj Hwm Russell M. Nelson tau hais txog koj lub neej ua ntej koj yug los:

“Nej Leej Txiv Saum Ntuj Ceeb Tsheej twb paub nej tau ntev lawm. Nws twb xaiv nej, uas yog Nws cov tub los sis cov ntxais, los rau hauv lub ntiaj teb thaum lub sij hawm no, ua Nws ib tug thawj coj ua Nws txoj hauj lwm tseem ceeb hauv lub ntiaj teb no. Nws tsis tau xaiv nej vim nej muaj ib lub cev tiam sis vim nej muaj tej cwj pwm ntawm sab ntsuj plig, xws li kev ua siab loj, lub siab ncaj, kev xav paub qhov tseeg, kev ntshaw tswv yim, kev xav pab lwm tus.

“Muaj tej cwj pwm uas nej muaj ua ntej nej yug los rau hauv lub ntiaj teb no. Muaj lwm yam cwj pwm uas nej ua tau kom loj hlob tuaj nyob hauv lub ntiaj teb no thaum nej sib zog nrhiav (“Tej Kev Txiav Txim uas Nyob Mus Ib Txhis,” Liahona, Kaum Ib Hlis Ntuj 2013, 107).

Cia li xav txog tej xwm txheej uas koj yuav raug thiab yuav tseem ceeb rau koj nco txog tej lus teeb no txog koj lub neej ua ntej koj yug los. Koj yuav ua li cas kom nco txog tej lus tseeb no?

Kuj saib Russell M. Nelson, “Decisions for Eternity,” Liyahaunas, Kaum Ib Hlis Ntuj 2013, 106–9; Tej Ntsiab Lus thiab tej Lus Nug, “Xaiv Ua Ntej,” “Lub Neej Ua Ntej Yug Los,” Txoj Moo Zoo cov Ntawv.

Nyob hauv roob moj sab qhuas uas cov Neeg Ixayees nyob, tib neeg tau tso dej hauv tej qhov dej hauv cov av. Koj xav tias “tej qhov dej [uas] tawg pleb” hauv Yelemis 2:13 yog ib lub cim txog dab tsi? Vim li cas qhov uas peb txais dej los ntawm lub qhov dej txhawv zoo dua peb haus dej los ntawm ib lub qhov dej? Qhov uas yus “tso [tus] uas yog lub qhov dej txhawv tseg” txhais li cas? Thaum koj nyeem Yelemis 2 thiab 7, xav seb tib neeg ua dab tsi kom tso tus Tswv uas yog lub qhov dej txhawv tseg (saib, ua piv txwv, Yelemis 2:26–28; 7:2–11). Vim li cas “lub qhov dej txhawv” yog ib lub cim zoo rau tej yam uas tus Cawm Seej muab rau koj? Cia li xav txog qhov uas koj txais cov dej txhawv li cas.

Yelemis 7 yog hais rau cov neeg uas nkag mus hauv “tus Tswv … lub tuam tsev [kom] pe hawm tus Tswv,” tiam sis tej yam lawv ua yeej tsis sib haum nrog lawv txoj kev pe hawm (saib nqe 2–11). Koj xav tias tus Tswv xav qhia dab tsi rau koj nyob hauv nqe 21–23?

Nyob hauv Yelemis 16:14–15, Yelemis tau muab kev muab Ixayees sau los ua ke hauv hnub nyoog kawg piv rau Ixayees txoj Kev Khiav Dim Iyiv teb chaws. Raws li koj xav, vim li cas kev muab neeg sau los ua ke tseem ceeb rau Vajtswv haiv neeg dua li Kev Khiav Dim?

Yelemis 3:14–18; 16:14–21 qhia dab tsi txog txoj kev muab neeg sau los ua ke?

Nyob hauv nws zaj lus “Hope of Israel,” Thawj Tswj Hwm Russell M. Nelson, ib yam li Yelemis, qhia tias kev uab Ixayees sau los ua ke yog “qhov tseem ceeb tshaj plaws uas peb ua hauv lub ntiaj teb niaj hnub nim no” (kev sib ntsib hawm Vajtswv rau cov tub hluas ntxhais hluas thoob plaws lub ntiaj teb, Rau Hli Ntuj 3, 2018, Txoj Moo Zoo cov Ntawv). Cia li nyeem los sis mloog nws zaj lus, thiab xav seb (a) Thawj Tswj Hwm Nelson qhia tias kev muab Ixayees sau los ua ke yog dab tsi, (b) nws piav li cas hais tias qhov ntawd tseem ceeb npaum li cas (c) koj yuav ua li cas kom pab muab neeg sau los ua ke.

• Yog xav qhia tej lus tseeb tseem ceeb nyob hauv Yelemis 1:5, tej zaum koj yuav xav muab ib daim duab txog ib tug me nyuam mos liab rau lawv saib (los sis, yog ua taus, muab daim duab txog koj cov me nyuam thaum lawv tseem yog mos liab rau lawv saib). Nug koj cov me nyuam seb lawv puas paub tias lawv nyob qhov twg ua ntej lawv yug los. Tej zaum koj kuj yuav xav hu ib zaj nkauj ua ke uas qhia txog peb lub neej ua ntej peb yug los, xws li “I Lived in Heaven” (Children’s Songbook, 4).

• Yog koj cov me nyuam xav kawm ntxiv, tej zaum koj pab tau lawv nrhiav hauv “Lub Neej Ua Ntej Yug Los” nyob hauv Phau Qhia txog Vaj Lug Kub. Tej zaum lawv yuav xav nrhiav tej lus teb txog “leej twg,” “thaum twg,” thiab “dab tsi” hais txog lub neej ua ntej yug los.

• Xav seb koj puas muab duab txog cov yaj saub los ntawm cov vaj lug kub los sis tus yaj saub niaj hnub nim no rau lawv saib (koj nrhiav tau nyob hauv lub Koom Txoos tej phau xov xwm, Phau Muaj Duab txog Txoj Moo Zoo, thiab Los, Nrog Kuv Mus). Nug koj cov me nyuam seb lawv paub dab tsi txog cov yaj saub.

• Kom pab qhia txog tej yam uas cov yaj saub ua, tej zaum koj yuav xav xaiv tej nqe los ntawm Yelemis 1, xws li nqe 5, 7, 10, thiab 19. Tej zaum koj cov me nyuam yuav xav xaiv ib nqe vaj lug kub, nyeem nqe ntawd, thiab qhia txog ib yam uas lawv kawm txog cov yaj saub.

• Thaum koj nyeem Yelemis 16:16, tej zaum koj cov me nyuam yuav xav ua txuj “cuab ntses” los sis “tua nqaij” nrhiav tej khoom hauv chav uas nej nyob. Thawj Tswj Hwm Russell M. Nelson tau muab cov neeg cuab ntses thiab cov neeg tua nqaij hauv tej nqe no piv rau cov tub txib (saib “The Gathering of Scattered Israel,” Liyahaunas, Kaum Ib Hlis Ntuj 2006, 81). Cov tub txib ua dab tsi? Peb yuav ua li cas kom pab sau Ixayees los ua ke zoo li “cov neeg cuab ntses” thiab “cov neeg tua nqaij”? (saib “A Message for Children from President Russell M. Nelson” [vidi-aus], ChurchofJesusChrist.org).

  

  3:30

• Kom kawm ntxiv txog tej nqe no, tej zaum koj yuav xav sib tham los sis muab duab rau lawv saib tias tib neeg muab av puab twj tais li cas (saib daim duab nyob hauv tus txheej txheem qhia no). Tus Tswv xav qhia dab tsi rau peb nyob hauv Yelemis 18:1–6? Qhov uas yus yog cov av nplaum hauv tus Tswv txhais tes txhais li cas? (kuj saib Yaxayas 64:8). Yog xav nyeem ib zaj ntxiv uas muab peb piv rau tus puab lauj kaub cov av nplaum, cia li nyeem Richard J. Maynes zaj lus“Kev Xyiv Fab Thaum Ua Neej Raws Nraim Li Khetos” (Liyahaunas, Kaum Ib Hlis Ntuj 2015, 27–30).