Yaxayas 58–66

Vim li cas ib tug neeg yuav txaus siab yoo mov thaum lawv muaj mov noj? Thaum koj kawm Yaxayas 58:3–12, tej zaum koj yuav xav txog vim li cas koj yoo mov—thiab vim li cas tus Tswv muab txoj kev cai no. Nov yog tej lus nug rau koj xav txog:

• Vim li cas peb yuav xav tias kev yoo mov yog ib lub nra rau peb ris thiab tsis yog ib txoj koob hmoov? (saib Yaxayas 58:3–5). Tus Tswv tej lus qhia hauv tshooj no ua li cas rau koj kom koj hloov siab txog qhov no?

• Tej lus hais tias “daws tej saw hlau ntawm txoj kev tsim txom” thiab “txo tus quab” txhais li cas? (Yaxayas 58:6). Ua li cas kev yoo mov ua rau lwm tus tau koob hmoov? (saib nqe 7).

• Kev yoo mov tau pab koj tau koob hmoov li cas ib yam li hais nyob hauv Yaxayas 58:8–12?

Nyob hauv nws zaj lus “Puas Yog txoj Kev Cai Yoo Mov uas Kuv Txaus Siab Ua Yog Li No?” (Liyahaunas, Tsib Hlis Ntuj 2015, 22–25), Thawj Tswj Hwm Henry B. Eyring qhia txog ob peb tug neeg uas tau koob hmoov thaum lawv yoo mov thiab muab nyiaj yoo mov. Koj tau pom cov koob hmoov no li cas hauv koj lub neej los lawm?

Kuj saib “Bless Our Fast, We Pray,” Hymns, zaj 138; Tej Ntsiab Lus thiab tej Lus Nug, “Yoo Mov thiab Nyiaj Yoo Mov,” Txoj Moo Zoo cov Ntawv.

Hnub Caiv puas yog kev “zoo siab” rau koj? Thaum koj kawm Yaxayas 58:13–14, cia li xav seb yuav ua li cas kom muaj kev zoo siab nyob rau hauv tus Tswv hnub. Piv txwv hais tias, “tsis ua tej yam raws li nej lub siab nyiam [nyob rau Nws hnub dawb huv]” txhais li cas? Qhov uas koj “tau kev kaj siab vim [koj] mloog [tus Tswv] lus” thiab “ua raws li [koj] lub siab nyiam” txawv li cas?

Kuj saib Russell M. Nelson, “Hnub Caiv Yog Ib Hnub Zoo Siab,” Liyahaunas, Tsib Hlis Ntuj 2015, 129–32.

Yaxayas 58–66 muaj ntau yam uas hais txog Yexus Khetos ntiag tug hauj lwm theej peb lub txhoj. Nrhiav tej no thaum koj kawm vaj lug kub. Qhov tseem ceeb, nrhiav tej lub npe thiab tej lus uas piav txog tus Cawm Seej. Piv txwv hais tias:

• Muaj dab tsi uas tshoov koj lub siab txog tus uas los pab nyob hauv Yaxayas 59:16–21? Tus Cawm Seej ua li cas kom kov yeej tej teeb meem uas piav txog nyob hauv nqe 9–15?

• Thaum Yexus Khetos tshaj tawm rau cov neeg hauv Naxales hais tias Nws yog tus Mexiyas, Nws hais tej lus los ntawm Yaxayas 61:1–3 (saib Lukas 4:16–21; kuj saib qhov vidi-aus “Jesus Declares He Is the Messiah,” Txoj Moo Zoo cov Ntawv). Yexus Khetos tau ua li cas kom foom koob hmoov rau koj thiab lwm tus ib yam li piav txog nyob hauv tej nqe vaj lug kub no? Nws tau ua li cas kom muab kev kaj siab pauj kev lwj siab

  

  3:24

• Koj “qhia” tau dab tsi txog “tus Tswv txoj kev hlub”? (saib Yaxayas 63:7–9).

• Koj nrhiav tau tej nqe twg txog tus Cawm Seej ntxiv nyob hauv Yaxayas 58–66?

Kuj saib Mauxiyas 3:7; Lus Qhuab Qhia thiab Kev Khi Lus 133:46–53.

Yaxayas 60 thiab 62 hais txog qhov kaj thiab kev tsaus ntuj, thiab qhov muag uas pom tau kev kom qhia txog qhov uas Yexus Khetos txoj moo zoo yuav foom koob hmoov rau neeg ntiaj teb nyob hauv hnub nyoog kawg. Nrhiav tej lub ntsiab lus no nyob hauv Yaxayas 60:1–5, 19–20; 62:1–2. Thaum koj nyeem tej tshooj no, cia li xav seb Vajtswv ua li cas kom muab Nws cov me nyuam sau los ua ke tawm kev tsaus ntuj los txog Nws txoj kev kaj. Koj ua luag hauj lwm dab tsi nyob hauv txoj hauj lwm no?

Kuj saib 1 Nifais 22:3–12; 3 Nifais 18:24; Lus Qhuab Qhia thiab Kev Khi Lus 14:9; Bonnie H. Cordon, “Xwv Kom Lawv Yuav Pom,” Liyahaunas, Tsib Hlis Ntuj 2020, 78–80.

Yaxayas hais txog ib hnub thaum “tsis nco txog tej kev txom nyem uas nej raug los lawm” (Yaxayas 65:16). Txawm yog twb muaj raws li tej lus qhia no ib feem, hnub ntawd los tseem yuav los—thaum Yexus Khetos rov qab los. Yaxayas tau piav txog hnub uas yuav los yav tom ntej no nyob hauv Yaxayas 64:1–5; 65:17–25; 66. Cia li saib nws siv tej lus xws li “zoo siab” thiab “txaus siab.” Vim li cas hnub uas tus Cawm Seej rov qab los yuav yog ib hnub rau koj zoo siab kawg? Koj yuav ua li cas kom npaj rau Nws txoj kev rov qab los?

Kuj saib Tej Nqe Kev Ntseeg 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Plaub Hlis Ntuj 2020, 13–17.

• Tej zaum qhov zoo tshaj plaws uas koj pab tau koj cov me nyuam xav yoo mov—thaum twg lawv npaj siab ua li ntawd—yog kom lawv to taub vim li cas tus Tswv muab txoj kev cai no. Xav seb puas nyeem Yaxayas 58:6–11 ua ke kom nrhiav tej lus teb rau tej lus nug no: Vim li cas peb yoo mov? Peb yuav ua li cas thaum yoo mov? Koj kuj nyeem tau “Yoo Mov” nyob hauv Phau Qhia txog Vaj Lug Kub.

• Yog tias twb muaj ib lub sij hawm tseem ceeb thaum koj yoo mov, qhia rau koj cov me nyuam. Tej zaum koj kuj yuav xav nug lawv seb lawv yuav piav li cas rau ib tug phooj ywg hais tias vim li cas tus Tswv muab txoj kev cai no.

• Tom qab koj nyeem Yaxayas 58:13–14, tej zaum koj yuav xav taw tes rau tej hnub hauv ib daim qhia hnub thiab caw koj cov me nyuam nrog koj hais tej hnub ntawd. Thaum txog Hnub Caiv, hais kom lawv hais tias hnub ntawd yog ib hnub “zoo siab.” Qhia lawv vim li cas Hnub Caiv yog ib hnub zoo siab rau koj.

• Sib tham txog tej yam uas nej ua tau kom muaj “kev kaj siab vim nej mloog [tus Tswv] lus” nyob rau Hnub Caiv. Tej zaum koj cov me nyuam yuav xav kos duab txog lawv tej lub tswv yim thiab tso hauv “ib lub thawv txog kev zoo siab ntawm Hnub Caiv.” Ces, thaum twg lawv xav tau tswv yim seb yuav ua li cas thaum Hnub Caiv, lawv khaws tau ib lub tswv yim tawm ntawm lub thawv ntawd.

• Tej zaum koj yuav xav caw koj cov me nyuam qi muag thaum koj nyeem Yaxayas 60:1–3. Hais kom lawv rua muag thaum lawv hnov lo lus “kaj” thiab qi muag thaum lawv hnov lo lus “tsaus ntuj.” Cia li piav tias Yexus Khetos thiab Nws txoj moo zoo yeej zoo li txoj kev kaj uas pab peb pom txoj kev rau peb rov qab mus cuag Leej Txiv Saum Ntuj Ceeb Tsheej.

• Yaxayas 65:17–25 piav tias lub ntiaj teb yuav zoo li cas thaum tus Cawm Seej rov qab los. Thaum koj nyeem tej nqe no nrog koj cov me nyuam, cia li pab lawv nrhiav seb lub neej no yuav txawv li nyob hauv “lub ntiaj teb tshiab” raws li Yaxayas piav txog. Vim li cas lub sij hawm no yog ib lub sij hawm rau peb “zoo siab … mus ib txhis”? (nqe 18).

• Tej zaum nej yuav xav hu ib zaj nkauj txog tus Cawm Seej txoj Kev Los Zaum Ob ua ke, xws li “When He Comes Again” (Txoj Moo Zoo cov Ntawv). Qhia tias nej tos ntsoov xav pom dab tsi thaum tus Cawm Seej rov los. Peb yuav ua li cas thiaj npaj tau rau hnub ntawd?