Los, Nrog Kuv Mus
Kaum Hli Ntuj 5–11 “Nws Ris Peb tej Kev Txom Nyem thiab Ris Peb tej Kev Mob Kev Nkeeg”: Yaxayas 50–57

Kaum Hli Ntuj 5–11 ‘Nws Ris Peb tej Kev Txom Nyem thiab Ris Peb tej Kev Mob Kev Nkeeg: Yaxayas 50–57,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

Kaum Hli Ntuj 5–11 ‘Nws Ris Peb tej Kev Txom Nyem thiab Ris Peb tej Kev Mob Kev Nkeeg: Yaxayas 50–57,’” Los, Nrog Kuv Mus—Siv hauv Tsev thiab lub Koom Txoos: Phau Qub 2026

Hmab pos los ua kauj looj Yexus taub hau

Kev Faus tus Khetos, los ntawm Carl Heinrich Bloch

Kaum Hli Ntuj 5–11: “Nws Ris Peb tej Kev Txom Nyem thiab Ris Peb tej Kev Mob Kev Nkeeg”

Yaxayas 50–57

Nyob hauv tag nrho nws txoj hauj lwm qhuab qhia, Yaxayas tau qhia txog ib tug uas muaj hwj chim cawm lawv dim. Tej lus qhia txog tej uas yuav muaj los yav tom ntej tseem ceeb heev rau cov neeg Ixayees ntau xyoos tom qab thaum lawv raug ua qhev hauv Npanpiloos. Ib tug uas muaj peev xwm rhuav Npanpiloos tej phab ntsa yeej yuav yog ib tug kov yeej uas muaj hwj chim. Tiam sis tsis yog tus Mexiyas zoo li no uas Yaxayas tau qhia txog nyob hauv tshooj 52–53: “Tib neeg saib tsis taus thiab muab nws tso tseg; nws yog ib tug neeg muaj kev nyuaj siab, thiab paub kev tu siab; thiab zoo li peb nraim peb lub ntsej muag ntawm nws. … Peb tseem xav tias nws raug mob, Vajtswv rau txim rau nws, thiab nws raug kev txom nyem” (Yaxayas 53:3–4).

Vim Nws xa ib tug mus tso lawv dim uas txawv tus uas lawv xav txog, Vajtswv tau qhia peb txog kev khiav dim tseeb. Kom pab cawm peb dim kev tsim txom thiab kev txom nyem, Vajtswv tau txib ib tug uas Nws tus kheej “raug tsim txom, thiab … raug txom nyem.” Txawm ib txhia tau xav tias Vajtswv yuav txib ib tug tsov los, tiam sis Nws tau xa txib tug yaj (saib Yaxayas 53:7). Muaj tseeb tiag, Vajtswv tej kev tsis yog peb tej kev (saib Yaxayas 55:8–9). Yexus Khetos txhiv peb dim tsis yog thaum Nws qhib lub tsev kaw xwb, tiam sis thaum Nws pauv peb chaw nyob haud. Nws cawm peb dim peb tej kev nyuaj siab thiab tej kev tu siab thaum Nws ris tej ntawd Nws tus kheej (saib Yaxayas 53:4–5, 12). Nws tsis nyob deb cawm peb. Nws raug kev txom nyem nrog peb, nrog rau “kev ua siab zoo tas mus li” uas yuav tsis ncaim koj “mus ib txhis li” (Yaxayas 54:8, 10).

lub cim rau txoj kev kawm

Tej Tswv Yim Pab Qhia hauv Tsev thiab lub Koom Txoos

Yaxayas 50–52

Yav tom ntej yeej ci ntsa iab rau tus Tswv cov neeg.

Txawm tias cov neeg Ixayees tau nyob ntau xyoo ua qhev—thiab txawm tias kev ua qhev ntawd los ntawm lawv tej kev xaiv tsis yog—tus Tswv tau xav kom lawv ntsia yav tom ntej nrog kev cia siab. Muaj dab tsi nyob hauv Ixayees zaj lus uas ua rau koj cia siab? Ib daim phiaj zoo li no pab tau koj kawm:

Kuv kawm dab tsi txog tus Tswv (saib, ua piv txwv, Yaxayas 50:2, 5–9; 51:3–8, 15–16; 52:3, 9–10)

Tej zaj lus txog kev cia siab (saib, ua piv txwv, Yaxayas 50:9; 51:3–5, 11–12, 22–23; 52:9–10)

Kuv yuav ua dab tsi kom muaj kev cia siab (saib, ua piv txwv, Yaxayas 50:10; 51:1–2, 6–9; 52:1–3, 9–11)

Kuj saib Mauxiyas 12:20–24; 15:13–18; 3 Nifais 20:29–46; Lus Qhuab Qhia thiab Kev Khi Lus 113:7–10; Russell M. Nelson, “Muaj Kev Ntseeg Mus rau Yav Tom Ntej,” Liyahaunas, Kaum Ib Hlis Ntuj 2020, 73–76.

Yexus ev tus ntoo khaub lig

Vim Muaj Kev Hlub, los ntawm Angela Johnson

Pab cov neeg kawm kom lawv los cuag Yexus Khetos. Tsis muaj ib yam dab tsi uas koj ua tau kom foom koob hmoov rau cov neeg uas koj qhia ntau tshaj qhov uas koj pab lawv paub Leej Txiv Saum Ntuj Ceeb Tsheej thiab Yexus Khetos thiab hnov Nkawd txoj kev hlub (Kev Qhia Raws Li tus Cawm Seej txoj Kev, 8). Thaum koj npaj qhia Yaxayas 50–57 rau lwm tus, xav seb koj yuav ua li cas pab tau lawv pom tias Ixayees tej teeb meem, Yaxayas tej kev qhia tej uas yuav muaj los yav tom ntej txog Khetos, thiab lawv tej kev txais kev pab los saum ntuj rau lawv tej teeb meem nyuaj zoo ib yam li cas.

Yaxayas 53

lub cim txog seminary
Yexus Khetos tau ris kuv tej kev txhaum thiab kev tu siab.

Tsis muaj tej zaj lus hauv vaj lug kub uas qhia txog Yexus Khetos ntiag tug hauj lwm kom txhiv peb dim zoo dua li hauv Yaxayas 53. Xav txog tej yam ntxim saib ntxim ua li ntawm no kom to taub dua thiab paub ua raws li tej lus qhia uas muaj hwj huam no:

  • Cia li xav los sis sib tham txog seb tej zaj dab neeg thiab cov movie qhia li cas txog cov phab ej uas cawm neeg dim. Muab tej zaj ntawd piv rau tej lus piav txog tus Cawm Seej nyob hauv Yaxayas 53.

  • Tom qab koj nyeem txhua nqe, tos thiab xav txog tej yam uas tus Cawm Seej tau raug—tej “kev nyuaj siab,” “kev tu siab,” thiab “kev ua txhaum” uas Nws tau ris—rau tag nrho cov tib neeg thiab tseem ceeb tshaj, Nws ris rau koj. Tej zaum koj yuav xav muab tej lus xws li “peb” thiab “peb li” pauv kom siv “kuv” thiab “kuv li” thaum koj nyeem. Tej nqe no pab tau koj xav li cas los sis xav txog dab tsi?

  • Xav seb puas saib qhov vidi-aus “My Kingdom Is Not of This World” (Txoj Moo Zoo cov Ntawv), thiab xav txog yog li cas thiaj li muaj raws li tej uas yuav muaj los yav tom ntej nyob hauv Yaxayas 53. Tus Cawm Seej tau ris tej kev nyuaj siab thiab tej kev tu siab twg rau koj?

    5:25

    My Kingdom Is Not of This World

  • Nrhiav tej duab txog lub sij hawm thaum muaj Yexus Khetos txoj Kev Theej Txhoj (saib Phau Muaj Duab txog Txoj Moo Zoo, najnpawb 56–60). Ces tej zaum koj yuav xav nrhiav tej lus nyob hauv Ixayees 53 uas qhia txog tej xwm uas cov duab qhia txog. Tej lus qhia no tshoov koj lub siab ua dab tsi?

Kuj saib “Saib Seb tus Cawm Seej txoj Kev Tuag,” Cov Nkauj Qhuas Vajtswv, zaj. 80.

Yaxayas 54; 57:15–19

Yexus Khetos xav kom kuv rov qab los cuag Nws.

Peb sawv daws muaj tej lub sij hawm uas peb nyob deb ntawm tus Tswv vim yog peb tej kev txhaum los sis kev qaug zog. Ib txhia tau tso kev cia siab tseg vim lawv xav tias Nws yuav tsis zam txim rau lawv. Yaxayas 54 thiab 57 yog ob tshooj zoo nyeem kom muaj kev nplij siab thiab lus txhawb pab thaum raug tej lub sij hawm li no. Nyob hauv Yaxayas 54:4–10; 57:15–19, tej lus twg qhia koj txog tus Cawm Seej tej kev xav txog koj? Tej no hloov koj lub neej li cas thaum koj paub tej no txog Nws?

Thawj Tswj Hwm Dieter F. Uchtdorf qhia hais tias:

“Qhov uas peb lub neej raug puas tsuaj npaum li cas los tsis ua li cas. Peb tej kev txhaum loj npaum li cas, peb chim siab npaum li cas, peb kho siab, raug tso tseg, los sis tu siab npaum li cas los tsis ua li cas. Tag nrho cov uas tsis muaj kev cia siab, cov uas nyuaj siab, cov uas tau ntxeev siab, cov uas tso kev ncaj ncees tseg, cov uas tau tso Vajtswv tseg los Vajtswv yeej pab tau lawv rov qab muaj lub neej zoo. …

“Txoj moo zoo qhia li no hais tias: los ntawm txoj hauv kev zoo siab uas nyob mus ib txhis uas peb Leej Txiv Saum Ntuj Ceeb Tsheej npaj rau peb thiab Yexus Khetos txoj kev theej txhoj uas nyob mus ib txhis, peb yeej yuav txais kev txhiv dim kom tsis txhob poob ntxiv thiab rov qab ua neeg dawb huv, thiab peb kuj yuav txais ntau tshaj qhov peb xav vim peb yuav txais tau txoj sia nyob mus ib txhis thiab Vajtswv lub yeeb koob los ua peb tug” (“Nws Yuav Muab Nej Tsaws Hlo Saum Nws Xub Pwg thiab Nqa Nej Mus Tsev,” Liyahaunas, Tsib Hlis Ntuj 2016, 102).

Kuj saib Patrick Kearon, “Vajtswv Xav Kom Coj Nej Los Tsev,” Liyahaunas, Tsib Hlis Ntuj 2024, 87–89.

Yaxayas 55–56

Tus Tswv caw txhua tus kom “coj ncaj raws li kuv txoj kev khi lus.”

Rau ntau tiam neeg, cov neeg Ixayees yog hu ua Vajtswv cov neeg khi lus. Tiam sis, Vajtswv txoj hau kev yeej ib txwm muaj ntau tshaj ib haiv neeg xwb, rau qhov Nws caw hais tias “leej twg nqhis dej, cia li los haus, muaj dej nyob ntawm no” (Yaxayas 55:1). Cia li xav txog qhov no thaum koj nyeem Yaxayas 55 thiab 56, thiab xav txog seb qhov uas yus yog Vajtswv haiv neeg txhais li cas. Vajtswv zaj lus rau cov uas “tsis nrog” Nws nyob yog dab tsi? Yaxayas 56:3. Xav seb puas sau tej nqe lus uas qhia txog tej cwj pwm thiab tej yam uas cov uas “coj ncaj raws li kuv txoj kev cai” ua (saib Yaxayas 56:4–7).

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

lub cim rau cov me nyuam tshooj

Tej Tswv Yim Pab Qhia cov Me Nyuam

Yaxayas 51–52

Tus Tswv caw kuv “muab [kuv] lub zog los coj.”

  • Tej zaum yuav lom zem rau koj cov me nyuam kawm txog tej kab lus xws li “sawv los,” “sawv tsees,” thiab “cuab koj lub zog khov kho” nyob hauv Yaxayas 51:9, 17; 52:1–2, 9 thiab ua yeeb yam txog tej kab lus ntawd. Tom qab ua tas, tej zaum koj yuav xav hais txog qhov uas kev sawv los, sawv tsees, thiab kev cuab lub zog khov kho txhais li cas rau koj sab ntsuj plig. Tus Tswv hais kom peb ua dab tsi nyob hauv tej nqe no?

  • Tej zaum koj cov me nyuam yuav xav nyeem Yaxayas 51:1, 4, 7 thiab qhia seb tus Tswv nrog leej twg tham thiab Nws xav kom lawv ua dab tsi. Qhov uas hais tias “mloog” tus Tswv txhais li cas? Peb yuav ua dab tsi kom qhia rau tus Tswv tias peb “mloog” Nws lus?

Yaxayas 53:3–9

Yexus Khetos tau ris kuv tej kev txhaum thiab kev tu siab.

  • Koj thiab koj cov me nyuam saib tau cov duab uas qhia txog Yexus Khetos txoj kev raug txom nyem thiab Nws txoj kev tuag (saib, ua piv txwv, Phau Muaj Duab txog Txoj Moo Zoo, najnpawb 56, 57, 58). Ces tej zaum nej yuav xav nyeem Yaxayas 53:3–6, 9 ua ke, thiab nrhiav tej lus uas qhia tias muaj xwm txheej dab tsi hauv cov duab. Pab koj cov me nyuam to taub tias Yaxayas qhia tej lus tseeb no ntau puas xyoo ua ntej tej ntawd tau tshwm sim. Vim li cas tib neeg yuav tsum paub txog tej ntawd ntau xyoo ua ntej muaj raws li tej ntawd? (saib Amas 39:15–19).

  • Tom qab nej nyeem Yaxayas 53:4, “Twb yog nws ris peb tej kev nyuaj siab, thiab nqa peb tej kev tu siab mus,” ces tej zaum koj cov me nyuam yuav xav sim tsa ib yam uas hnyav (los sis ua yeeb yam tsa). Sib tham txog qhov uas “kev nyuaj siab” thiab “kev tu siab” yog tej yam uas hnyav thiab nyuaj ris. Vim li cas Yexus tau ris peb tej “kev nyuaj siab,” “kev tu siab,” thiab “kev ua txhaum”? (kuj saib Amas 7:11–12).

Yexus Khetos nrog cov me nyuam

Yaxayas 55:6.

Kuv txawj nrhiav tus Tswv thiab thov Nws.

  • Xwv kom pab qhia koj cov me nyuam txog Yaxayas 55:6, koj muab tau ib daim duab txog Yexus zais hauv lub chav. Ces koj caw tau koj cov me nyuam nrhiav daim duab thiab qhia txog ib txoj kev uas pab lawv “nrhiav … tus Tswv thaum uas tseem yuav ntsib tau Nws.” Ib zaj nkauj xws li “Seek the Lord Early” (Children’s Songbook, 108) kuj qhia tau tswv yim rau lawv. Ces tej zaum koj yuav xav cia ib tug me nyuam muab daim duab zais cia thiab rov qab ua dua.

Yaxayas 55:8–9

Tej yam uas tus Tswv ua yeej siab dua li tej yam kuv ua.

  • Tom qab nej nyeem Yaxayas 55:9, tej zaum yuav lom zem rau koj cov me nyuam sawv ntawm ib lub rooj zaum thiab sib tham txog qhov uas yuav pom tej yam txawv thaum yus nyob “siab zog.” Los sis lawv kos tau ib daim duab txog qhov uas Yaxayas 55:9 muaj nqis dab tsi rau lawv. Ces tej zaum nej yuav xav sib tham txog tej yam uas tus Tswv ua uas siab dua li tej yam peb ua. Piv txwv hais tias, Nws ua li cas rau cov neeg txhaum? (saib Malakaus 2:15–17). Nws txoj kev caw lwm tus yog dab tsi? (saib Mathais 20:25–28). Qhia koj cov me nyuam koj tau kawm kom tso siab rau tej yam uas tus Tswv ua thiab xav uas siab dua li koj li.

Yog xav tau ntxiv, saib phau xov xwm Phooj Ywg rau lub hli no.

daim duab txog Yexus

Nws txoj Kev Kaj, los ntawm Michael Malm

Lub Koom Haum Me Nyuam Yaus phab ntawv ntxim ua: Kuv txawj nrhiav tus Tswv thiab thov Nws