“Kaum Hli Ntuj 26–Kaum Ib Hlis Ntuj 1. ‘Kuv Yuav Muab Lawv tej Kev Nyuaj Siab Hloov Ua Kev Zoo Siab’: Yelemis 31–33; 36–39; Nkauj Quaj Ntsuag 1; 3” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Kaum Hli Ntuj 26–Kaum Ib Hlis Ntuj 1. ‘Kuv Yuav Muab Lawv tej Kev Nyuaj Siab Hloov Ua Kev Zoo Siab,’” Come, Follow Me: Phau Qub 2026
Yelemis Quaj Nyiav txog Yeluxalees txoj Kev Raug Puas Tsuaj, los ntawm Rembrandt van Rijn
Kaum Hli Ntuj 26–Kaum Ib Hlis Ntuj 1: “Kuv Yuav Muab Lawv tej Kev Nyuaj Siab Hloov Ua Kev Zoo Siab”
Yelemis 31–33; 36–39; Nkauj Quaj Ntsuag 1; 3
Thaum tus Tswv hu Yelemis los ua ib tug yaj saub, Nws qhia Yelemis tias Yelemis ntiag tug hauj lwm yog “muab rho tawm thiab muab rhuav” (Yelemis 1:10)—thiab nyob hauv Yeluxalees, twb muaj ntau yam kev phem uas yuav tsum muab rho tawm thiab muab rhuav. Tiam sis nov yog ib feem ntawm Yelemis ntiag tug hauj lwm—tus Tswv kuj hu nws los “tsim tsa thiab muab cog” (Yelemis 1:10). Yuav tsa los sis cog dab tsi haud tej qhov chaw uas raug puas tsuaj uas cov neeg ntxeev siab rau lawv tej kev khi lus tau muab tso tseg? Los yog hais tias, thaum kev txhaum los sis kev ntxhov siab ua rau peb lub neej raug puas tsuaj, peb yuav ua li cas kom muab tsa los thiab cog ntxiv? Lo lus teb yog “[tus Ceg] uas ncaj ncees” (Yelemis 33:15), tus Mexiyas uas tau cog lus tias yuav los. Nws “cog lus tshiab” (Yelemis 31:31)—ib txoj kev khi lus uas hais kom peb ua ntau tshaj kev pe hwm tus Tswv rau sawv daws saib xwb. Yuav tsum “nco ntsoov [Nws] tej kev cai rau [hauv peb] nruab siab.” Yog lub ntsiab ntawm qhov uas tus Tswv yog “[peb] tus Vajtswv” thiab peb yog “[Nws] haiv neeg” (Yelemis 31:33). Yog ib tug txheej txheem uas peb yuav ua tas peb lub neej, thiab tej lub sij hawm peb tseem yuav ua yuam kev thiab raug tej yam uas ua rau peb tu siab. Tiam sis thaum peb ua li ntawd, tus Tswv cog lus tias, “Kuv yuav … muab lawv tej kev quaj ntsuag hloov ua kev lom zem” (Yelemis 31:13).
Yog xav nyeem ib zaj lus piav txog phau Nkauj Quaj Ntsuag, saib “Nkauj Quaj Ntsuag” nyob hauv Phau Qhia txog Vaj Lug Kub.
Tej Tswv Yim Pab Qhia hauv Tsev thiab lub Koom Txoos
Yelemis 31; 33
Tus Tswv yuav coj Nws cov neeg khi lus tawm ntawm kev ua qhev.
Nyob hauv Yelemis 31; 33 tus Tswv tau lees cov Neeg Ixayees lub “suab quaj suab nyiav [thiab] lub suab quaj uas tu siab kawg li” (Yelemis 31:15) thaum lawv raug ua cov neeg qhev. Tiam sis, nws kuj hais tej lus uas nplij lawv lub siab thiab ua rau lawv muaj kev cia siab. Cia li nrhiav tej no thaum koj nyeem tej tshooj no. Koj nrhiav tau tej lus cog tseg uas koj xav tias muaj nqis rau koj?
Yelemis 31:31–34; 32:37–42
“Lawv yuav ua kuv haiv neeg thiab kuv yuav ua lawv tus Vajtswv.”
Txawm yog cov Neeg Ixayees tau rhuav lawv tej kev khi lus, Yelemis tau qhia tias tus Tswv yuav rov qab tsa “ib txoj kev khi lus tshiab thiab kav ib txhis” rau lawv (saib Yelemis 31:31; 32:40). Txoj kev khi lus ntawd yog dab tsi? Xav seb puas tawm tswv yim txog qhov no nyob hauv Phau Qhia txog Vaj Lug Kub, “Kev Khi Lus Tshiab thiab Kav Ib Txhis,” Txoj Moo Zoo cov Ntawv.
Thaum koj nyeem Yelemis 31:31–34; 32:37–42, cia li xav seb:
-
Qhov uas koj yog ib feem ntawm Vajtswv cov neeg khi lus muaj nqis li cas.
-
Qhov uas koj nco ntsoov Nws tej lus hauv koj nruab siab txhais li cas.
-
Tus Tswv cog lus dab tsi rau koj thaum koj nrog Nws khi lus.
-
Tus Tswv txoj kev khi lus nrog koj hloov koj li cas.
Koj tau cog lus dab tsi rau Vajtswv thaum koj ua tej kab ke dawb ceev? Nws ua li cas kom ua raws li Nws tej lus cog tseg rau koj?
Kuj saib David A. Bednar, “Ua Neej Nrog Kuv, thiab Kuv Nrog Koj; Yog Li Ntawd Taug Kev Nrog Kuv Mus,” Liyahaunas, Tsib Hlis Ntuj 2023, 123–26.
Yelemis 36
Cov vaj lug kub muaj hwj chim kom kuv tig ntawm kev phem mus li.
Raws li Yelemis 36:2–3 qhia, vim li cas tus Tswv tau txib Yelemis sau ntawv txog nws tej lus qhia tej yam yuav muaj los yav tom ntej. Thaum koj nyeem Yelemis 36, cia li xav seb cov neeg no xav li cas txog tej lus qhia no:
-
Tus Tswv (saib nqe 1–3, 27–31)
-
Yelemis (saib nqe 4–7, 32)
-
Npaulus (saib nqe 4, 8–10, 14–18)
-
Yehudis thiab Vaj Ntxwv Yehauyakees (saib nqe 20–26)
-
Enathas, Delayas thiab Nkemaliyas (saib nqe 25)
Xav seb koj xav li cas txog cov vaj lug kub. Cov vaj lug kub tau pab koj li cas kom tig ntawm kev phem mus?
Yelemis 37–39
Ua raws nraim li Vajtswv cov yaj saub qhia.
Nyob hauv Yelemis 37:1–3, 15–21; 38:1–6, 14–28, koj kawm dab tsi uas qhia tias Vaj Ntxwv Xedekiyas ntseeg tias Yelemis yog tus Tswv tus yaj saub tiag? Muaj dab tsi uas qhia tias Xedekiyas tsis ntseeg? Koj kawm dab tsi los ntawm qhov no? Thaum koj nyeem Yelemis 39, xav seb yuav txawv li cas yog tias Xedekiyas thiab nws cov neeg tau mloog tus yaj saub lus thiab ua raws li tus Tswv cov lus txib. (Muab tej yam uas Xedekiyas raug piv rau tej yam uas Lihais tsev neeg rau nyob hauv 1 Nifais 1–2.)
Yelemis 38:6–13; 39:15–18
Kuv muaj peev xwm ua siab loj tiv thaiv tej yam uas zoo.
Tus vaj ntxwv cov nom tswv xav tias Yelemis tej lus qhia txog tej yuav muaj los yav tom ntej yuav ua rau lawv cov tub rog tsis xav mus ua rog, yog li ntawd lawv tso Yelemis hauv ib lub qhov taub uas qias neeg (saib Yelemis 38:1–4). Nyob hauv Yelemis 38:6–13, tej lus twg ntawm Enpemelej uas yog neeg Sudas tshoov koj lub siab? Cia li xav txog txoj koob hmoov uas tus Tswv foom rau Enpemelej nyob hauv Yelemis 39:15–18.
Koj yuav ua li cas kom coj raws li Enpemelej tus yam ntxwv?
Yelemis txoj Kev Quaj Nyiav
Nkauj Quaj Ntsuag 1; 3
Tus Tswv pab tau kuv kom txhob tu siab thaum kuv ua txhaum.
Phau Nkauj Quaj Ntsuag yog ib phau paj lug uas neeg sau tom qab Yeluxalees thiab lub tuam tsev raug puas tsuaj. Koj xav tias vim li cas yog ib qho tseem ceeb uas yuav tsum muab tej no tshwj tseg? Xav seb tej zaj lus piv txwv nyob hauv Nkauj Quaj Ntsuag 1 thiab 3 pab koj li cas kom to taub txog Ixayees txoj kev nyuaj siab kawg li. Koj nrhiav tau tej zaj lus twg uas pab koj muaj kev cia siab rau Khetos? (qhov tseem ceeb saib Nkauj Quaj Ntsuag 3:20–33; kuj saib Mathais 5:4; Yakaunpaus 4:8–10; Amas 36:17–20).
Thawj Tswj Hwm M. Russell Ballard tau hais txog ob peb yam xwm txheej uas ua rau tib neeg poob siab, thiab nws hais tej lus ntuas kom paub nrhiav tau kev cia siab:
“Ntshe peb ib txhia yuav muaj kev npau taws, kev poob siab, thiab kev tu siab hauv peb lub neej. Feem coob xav tias lawv tsis muaj hwj chim ua dab tsi kov yeej tej kev ntxhov siab hauv lub ntiaj teb no. Lwm tus txhawj txog cov neeg hauv lawv tsev neeg uas raug tej kev tsis ncaj ncees thiab tib neeg txoj kev tsis coj ncaj ncees zuj zus. … Feem ntau twb xav hais tias kev phem thiab kev lim hiam ntawm lub ntiaj teb yog tej yam uas kho tsis taus. Lawv twb poob siab tag lawm. …
“…Tej zaum peb ib txhia twb poob siab lawm vim peb ua txhaum thiab ua yuam kev. Ib tug neeg uas ua li neeg ntiaj teb ua ntau tsis txawj pom ib txoj kev dim thiab poob siab tag. Kuv thov kom cov uas mag tus yeeb ncuab rab ntxiab no kom lawv tsis txhob tso tseg! Txawm yog nej xav tias tsis muaj kev cia siab npaum li cas los sis tseem yuav raug tej yam nyuaj thaum yav tom ntej npaum li cas los, thov ntseeg kuv tias nej yeej muaj taus kev cia siab. Always” (“The Joy of Hope Fulfilled,” Ensign, Kaum Ib Hlis Ntuj 1992, 31–32).
Kuj saib “Come, Ye Disconsolate,” Hymns, zaj 115.
Pab lwm tus lav ris lawv txoj kev kawm ntawv. Tej lub sij hawm zoo li yooj yim rau peb qhia yog peb cia li hais rau cov neeg kawm txog tej yam uas peb xav tias lawv yuav tsum paub. Tiam sis, txoj kev yooj yim tshaj plaws tsis yog txoj kev zoo tshaj. Txwj Laug David A. Bednar qhia tias: “Tsis yog peb yuav tsum xav tias ‘Kuv yuav tsum qhia dab tsi rau lawv?’ Tiam sis, peb yuav tsum nug peb tus kheej tias ‘Kuv yuav caw lawv ua dab tsi? Kuv yuav nug tej yam twg kom coj tus Vaj Ntsuj Plig Dawb Huv los nrog lawv nyob, yog tias lawv kam ua li tau caw lawv?’” (ib hmo nrog ib tug Tuam Thawj Coj, Ob Hlis Ntuj 7, 2020, broadcasts.ChurchofJesusChrist.org; kuj saib Kev Qhia Raws Li tus Cawm Seej txoj Kev, 25). Muaj ntau txoj kev rau peb pab tib neeg lav ris lawv txoj kev kawm ntawv. Piv txwv hais tias, nyob hauv tus txheej txheem kawm peb caw cov neeg kawm kom nrhiav, xav txog, sau ntawv, saib daim duab, siv khoom kom qhia, kos duab, thiab qhia thiab ua neej raws li tej yam lawv kawm.
Tej Tswv Yim Pab Qhia cov Me Nyuam
Yelemis 31:3
Leej Txiv Saum Ntuj Ceeb Tsheej thiab Yexus “yeej ib txwm hlub” kuv mus ib txhis.
-
Thaum koj nyeem Yelemis 31:3 nrog koj cov me nyuam, tej zaum lawv yuav xav pab koj nrhiav tej khoom (los sis daim duab txog tej khoom) uas kav taus ntev, xws li ib lub npib nyiaj, thiab tej yam uas tsis kav ntev, xws li ib lub txiv. Tej zaum nej yuav xav sib tham txog lub ntsiab ntawm lo lus “mus ib txhis” thiab sib tham seb thaum twg nej tau hnov Leej Txiv Saum Ntuj Ceeb Tsheej txoj kev hlub uas kav ib txhis. Tej zaum nej yuav xav hu ib zaj nkauj ua ke xws li “God Is Watching Over All” (Children’s Songbook, 229).
Yelemis 31:31–34; 32:38–41
Vajtswv yuav pab kuv ua raws li kuv tej kev khi lus.
-
Tej zaum koj cov me nyuam yuav xav kos duab txog ib lub plawv rau ib daim ntawv ces sau ntawv hauv lub plawv txog tej yam uas lawv kawm los ntawm Yelemis 31:31–34 txog txoj kev nrog Vajtswv khi lus. Tej zaum koj yuav xav qhia lawv txog txoj kev khi lus uas lawv khi thaum lawv ua kev cai raus dej (saib Mauxiyas 18:10, 13) thiab sib tham txog qhov uas lawv muaj tej lus cog tseg hauv lawv nruab siab.
Yelemis 36:1–4
Cov vaj lug kub yog Vajtswv txoj lus.
-
Tej zaum phab ntawv ntxim ua rau lub lim tiam no yuav pab koj cov me nyuam kawm txog Yelemis, Npalus, thiab tus vaj ntxwv (saib Yelemis 36). Tej zaum lawv yuav xav ua yeeb yam txog tej lus nyob hauv Yelemis 36:4–10, xws li kev sau ntawv hauv ib phau ntawv (saib nqe 4) thiab nyeem vaj lug kub rau cov neeg (saib nqe 8, 10).
-
Tej zaum koj thiab koj cov me nyuam yuav xav nyeem ib phau ntawv rau cov me nyuam thiab ib phau vaj lug kub thiab sib tham txog qhov uas ob phau no sib txawv li cas. Vim li cas cov vaj lug kub tshwj xeeb? Tej zaum yuav tshoov lawv lub siab yog koj qhia txog tej nqe vaj lug kub uas muaj nqis rau koj heev.
Yelemis 38:6–13
Kuv muaj peev xwm ua siab loj tiv thaiv tej yam uas zoo.
-
Tej zaum koj yuav xav siv daim duab hauv tus txheej txheem qhia no kom pab koj cov me nyuam xav txog Enpemelej zaj dab neeg nyob hauv Yelemis 38:6–13. Tej zaum koj yuav xav pab lawv nrhiav ib nqe thaum Enpemelej tau ua siab loj ua tej yam kom pab tus Tswv tus yaj saub. Peb yuav ua li cas kom qhia tias peb paub hais tias Vajtswv tau hu tus yaj saub niaj hnub nim no?
Nkauj Quaj Ntsuag 1:1–2, 16; 3:22–26
Tus Cawm Seej tau ua rau kuv muaj cib fim txais kev zam txim rau kuv tej kev txhaum.
-
Kom qhia txog Nkauj Quaj Ntsuag, tej zaum koj yuav xav piav rau koj cov me nyuam hais tias vim cov Neeg Ixayees tsis tau hloov siab lees txim, Yeluxalees thiab lub tuam tsev raug puas tsuaj. Tej zaum nej yuav xav sib tham txog qhov uas nej yuav xav li cas yog nej nyob thaum ntawd (saib Nkauj Quaj Ntsuag 1:1–2, 16). Zaj lus nyob hauv Nkauj Quaj Ntsuag 3:22–26 yuav ua li cas kom nej muaj kev cia siab?
-
Tej zaum nej yuav xav sib tham txog tej lub sij hawm uas nej tu siab vim nej xaiv ua tej yam tsis zoo. Peb nrhiav dab tsi nyob hauv Nkauj Quaj Ntsuag 3:22–26 uas pab peb to taub Yexus Khetos txoj kev zam txim pub rau peb?
Yog xav tau ntxiv, saib phau xov xwm Phooj Ywg rau lub hli no.