Hauxeyas 1–6; 10–14; Yau-ees

Hauxeyas tus poj niam, Nkaumes, twb mus nrog lwm tus pw, thiab Vajtswv tau hais txog qhov xwm txheej tu siab no kom qhia cov Neeg Ixayees hais tias Nws xav li cas txog lawv thiab lawv tej kev khi lus nrog Nws. Thaum koj nyeem Hauxeyas 1–3, cia li xav txog qhov uas tus Tswv xav dab tsi txog Nws cov neeg khi lus. Yog li cas kev khi lus nrog tus Tswv zoo li kev sib yuav? Yog li cas kev rhuav txoj kev khi lus zoo li kev mus nrog lwm tus pw? (saib Hauxeyas 2:5–7, 13). Hauxeyas 2:14–23 qhia li cas rau koj txog tus Tswv txoj kev hlub thiab txoj kev muaj siab hlub tshua? Koj ua li cas thiaj qhia Nws tias koj hlub Nws thiab muab siab npuab Nws?

Nyob hauv Hauxeyas 14, nrhiav tej yam zoo kawg nkaus uas tus Tswv cog lus rau cov uas rov qab los cuag Nws. Koj xav tias lo lus “hlub lawv kom kawg … lub siab lub ntsws” txhais li cas? (nqe 4). Tej zaj lus piv txwv txog nroj tsuag nyob hauv nqe 5–8 qhia dab tsi rau koj txog tus Tswv cov koob hmoov, xws li cov koob hmoov uas los ntawm kev hloov siab lees txim? Thaum koj kawm cov vaj lug kub no, xav seb puas hu nkauj los sis mloog ib zaj nkauj txog tus Cawm Seej txoj kev hlub tshua, xws li “Los Cuag Tswv Yexus” (Cov Nkauj Qhuas Vajtswv, zaj 42).

Cov neeg nyob hauv Hauxeyas lub caij nyoog twb muab tsiaj tua txi, tiam sis lawv twb ua txhaum tej kev cai uas tseem ceeb dua. Koj xav li cas cov lus no txhais li cas uas tus Tswv “xav tau … kom nej muaj txoj kev hlub, tsis yog tus tsiaj uas nej muab tua theej txhoj. Kuv xav kom kuv haiv neeg paub kuv tseeb dua li uas cia lawv coj khoom tuaj fij rau kuv”? (Hauxeyas 6:6). Koj xav tias yuav zoo li cas yog tias yus txoj kev ncaj ncees zoo li ib cov huab los sis tej lwg dej? (saib Hauxeyas 6:4). Peb yuav tsum muaj kev ncaj ncees zoo li cas? (saib Yaxayas 48:18; 1 Nifais 2:9–10).

Tej zaum koj kuj yuav xav nyeem Mathais 9:10–13; 12:1–8 kom saib tus Cawm Seej tau siv Hauxeyas 6:6 nyob hauv Nws txoj hauj lwm qhuab qhia. Tej nqe no pab koj li cas kom to taub Hauxeyas tej lus?

Thaum koj nyeem Yau-ees 2:12–13, tej zaum yuav pab koj paub tias kev dua yus tej ris tsho yog ib lub cim uas qhia tias yus nyuaj siab los sis tu siab. Kev dua peb lub siab thiab kev dua peb tej ris tsho txawv li cas?

Koj pom tias peb lub caij nyoog thiab lub caij nyoog uas Yau-ees pom sib thooj li cas? (qhov tseem ceeb saib Yau-ees 2:1–2, 11, 18–32). Koj txais kev tshoov siab dab tsi txog cov koob hmoov uas tus Tswv cog lus nyob hauv nqe 18–32? Vim li cas cov koob hmoov no yuav muaj nqis rau peb niaj hnub no?

Tej zaum koj yuav xav nyeem tej yam uas Maulaunais hais txog Yau-ees 2 thaum nws tuaj xyuas Joseph Smith nyob rau xyoo 1823 (saib Joseph Smith—Keeb Kwm 1:41). Koj xav tias twb muaj raws li tej yam twg nyob hauv Yau-ees 2:28–32 hauv peb lub caij nyoog? (kuj saib Tes Hauj Lwm 2:1–21). Koj xav tias qhov uas tus Tswv hais tias Nws yuav “pub [Nws] tus ntsuj plig rau txhua tus neeg” txhais li cas? (Yau-ees 2:28).

Tej zaum koj yuav xav txog tej lus no los ntawm Thawj Tswj Hwm Russell M. Nelson: “Hauv tej hnub uas tseem yuav los, peb sab ntsuj plig yuav tsis txawj ciaj li yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv” (“Kev Tshwm Sim rau lub Koom Txoos, Kev Tshwm Sim rau Peb lub Neej,” Liyahaunas, Tsib Hlis Ntuj 2018, 96). Vim li cas yuav tsum txais kev tshwm sim kom koj sab ntsuj plig txawj ciaj?

Koj yuav tsum ua li cas yog tias koj xav tias koj tsis txais kev tshwm sim ntau? Nov yog ob peb yam uas tej zaum pab tau. Cov neeg nyob hauv tej nqe vaj lug kub no tau ua dab tsi kom txais tau tus Tswv tus Ntsuj Plig nplua mias.

• Mauxiyas 4:1–3, 19–20; 18:7–11

• Hilamas 6:34–36

• Lus Qhuab Qhia thiab Kev Khi Lus 19:37–41

Thaum koj nyeem tej lus no los ntawm Txwj Laug David A. Bednar, cia li xav seb zoo li cas thaum yus txais tau tus Vaj Ntsuj Plig Dawb Huv nplua mias hauv yus lub neej txhua hnub:

“Peb yeej ib txwm ua nyuaj rau peb tus kheej thaum peb xav txais kev tshwm sim. Kuv hais tias peb twb txais kev cog lus hais tias thaum peb ua raws nraim li peb tej kev khi lus, peb yeej yuav muaj tus Vaj Ntsuj Plig Dawb Huv nrog nraim peb nyob. Tiam sis peb hais txog qhov no thiab peb xav tias zoo li peb hnov tus Tswv lub suab dhau los ntawm Nws tus Ntsuj Plig tsawg zaus xwb. … Tsim nyog uas [tus Ntsuj Plig] yuav nrog nraim peb nyob txhua lub sij hawm. Tsis yog txhua lub sij hawm, tiam sis yog ib tug neeg ua zoo npaum li nws ua taus—tsis yog yus yuav ua ib tug zoo tag nrho—tiam sis yog tias peb ua zoo npaum li peb ua tau thiab peb tsis ua txhaum loj heev ces peb yuav muaj tus Vaj Ntsuj Plig Dawb Huv coj peb txoj hau kev. …

“… Zoo li peb ntseeg tias tus Vaj Ntsuj Plig Dawb Huv ua tej yam loj thiab tseem ceeb tam sim ntawd, tiam sis Nws ua tej yam me zuj zus xwb” (“Elder David A. Bednar Discussion” [ib hmo nrog ib tug Tuam Thawj Coj, Ob Hlis Ntuj 7, 2020], broadcasts.ChurchofJesusChrist.org).

Kuj saib Gary E. Stevenson, “Tus Ntsuj Plig tej Kev Tshoov Siab,” Liyahaunas, Kaum Ib Hlis Ntuj 2023, 42–45; “Enemy Territory” (vidi-aus), Txoj Moo Zoo cov Ntawv.

3:38

• Nyob hauv phau Hauxeyas, tus Tswv tau muab Nws txoj kev nrog Nws haiv neeg khi lus piv rau kev sib yuav. Kom pab lawv kawm los ntawm qhov no, tej zaum koj thiab koj cov me nyuam yuav xav saib daim duab txog ib tug nyab thiab ib tug vauv thiab sib tham txog qhov uas Leej Txiv Saum Ntuj Ceeb Tsheej xav tau ib tug txiv thiab ib tug poj niam ib leeg ua li cas rau ib leeg. Pab koj cov me nyuam nrhiav tej lus nyob hauv Hauxeyas 2:19–20 uas piav hais tias tus Tswv xav li cas txog peb. Peb yuav ua li cas kom qhia tus Tswv hais tias peb hlub Nws thiab yuav rau siab ntseeg Nws?

• Hauxeyas 10:12 hais txog kev laij teb, sau qoob loo, sij hawm, thiab ntuj los nag kom caw peb los cuag tus Tswv. Thaum koj nyeem nqe vaj lug kub no, ua rau koj tawm tswv yim dab tsi uas pab tau koj cov me nyuam xav los cuag Nws. Piv txwv hais tias, tej zaum koj cov me nyuam yuav xav kos duab txog ib lub teev thiab sau ntawv txog tej yam uas lawv ua tau kom los cuag tus Tswv thaum tej lub sij hawm hauv ib hnub. Ib zaj nkauj xws li “Anytime, Anywhere” (Txoj Moo Zoo cov Ntawv) yuav pab koj qhia tias yeej yog ib lub sij hawm zoo kom los cuag tus Tswv.

• Los sis koj cov me nyuam ua tau tej yam yooj yim zoo li nqe vaj lug kub no qhia, xws li kev ua yeeb yam txog kev cog noob, de zaub, los sis sawv nraum zoov thaum ntuj los nag. Pab koj cov me nyuam muab kev cog noob thiab kev sau qoob loo piv rau kev ua neej ncaj ncees thiab kev txais tus Tswv cov koob hmoov. Ces tej nej yuav xav sib tham txog cov koob hmoov uas tus Tswv tau foom pub rau nej thaum nej tau sim los cuag Nws.

• Kom qhia txog qhov tseeb nyob hauv Hauxeyas 13:4 hais tias tsis muaj ib tug Cawm Seej tsuas yog Yexus Khetos ib leeg xwb, tej zaum koj yuav xav muab tej daim duab txog ob peb tug neeg rau koj cov me nyuam saib, thiab muaj ib daim duab txog Yexus thiab. Tej zaum koj cov me nyuam yuav xav taw tes rau tus neeg uas muaj hwj chim cawm peb dim kev txhaum thiab kev tuag. Hais koj zaj lus tim khawv txog Yexus Khetos thiab Nws txoj Kev Theej Txhoj.

• Tej zaum koj cov me nyuam yuav xav nrhiav tej lus nyob hauv Hauxeyas 13:4, 14 uas piav txog Yexus Khetos. Tej lus no qhia dab tsi rau peb txog Nws? Xav seb puas pab koj cov me nyuam siv Phau Qhia txog Vaj Lug Kub kom nrhiav lwm nqe vaj lug kub uas qhia tias Yexus yog peb tus Cawm Seej thiab tus Txhiv Dim. Nej txhua tus cia li qhia tias nej xav li cas txog Yexus Khetos.

• Tej zaum koj pab tau koj cov me nyuam to taub Yau-ees 2:28–29 thaum koj cia lawv muab kua nchuav ces muab piv rau ib tee xwb. Qhov uas peb muaj tus Ntsuj Plig nplua mias zoo li muab kua nchuav los txhais li cas?

• Thaum nej nyeem Yau-ees 2:28–29 ua ke, tej zaum koj yuav xav caw koj cov me nyuam muab lawv tej lub npe pauv tej lus xws li “nej tej tub” thiab “nej tej ntxhais.” Ces pab lawv nrhiav hauv tej nqe vaj lug kub xws li Yauhas 14:16; Maulaunais 10:5; Lus Qhuab Qhia thiab Kev Khi Lus 42:17 kom kawm hais tias tus Ntsuj Plig pab tau lawv li cas.