Daniyees 1–7

Zoo li peb txhua tus nyob hauv Npanpiloos. Peb pheej raug kev ntxias kom tso peb tej kev cai tseg thiab ntxeev siab rau peb txoj kev ntseeg Yexus Khetos. Thaum koj nyeem Daniyees 1, 3, thiab 6, nco txog qhov uas muaj neeg xav yuam Daniyees, Sadalas, Mesakas, thiab Anpenekaus ua tej yam uas lawv paub tias yog kev txhaum. Lawv tau ua li cas thiab hais li cas thaum muaj xwm txheej li no? (saib Daniyees 1:10–13; 3:15–18; 6:10). Twb tau muaj dab tsi los ntawm lawv txoj kev ntseeg no? Koj kawm dab tsi los ntawm tej yam no uas yuav pab koj tso siab rau tus Tswv thaum koj raug kev tsim txom? Thiab cia li xav txog tej lus nug no:

• Thaum twg muaj neeg xav yuam koj ua ib yam dab tsi uas koj paub tias yog kev txhaum? Tus Tswv tau foom koob hmoov rau koj li cas thaum koj ua raws li Nws cov lus txib?

• Yuav ua li cas yog tias tsis muaj tej txuj tseem ceeb zoo li cas koj xav tau los ntawm koj txoj kev ntseeg? (ua piv txwv, saib Amas 14:8–13). Los ntawm tej yam uas koj nyeem nyob hauv Daniyees 3:13–18, koj xav tias Sadalas, Mesakas, thiab Anpenekaus yuav teb li cas? Lawv tus yam ntxwv pab tau koj li cas thaum koj raug tej kev sim siab?

• Koj tej kev ua ncaj ncees yuav pab tau lwm tus li cas kom ntseeg tus Tswv ntxiv? (saib Daniyees 2:47; 3:28–29). Cia li xav seb tej yam uas koj xaiv ua yuav ua li cas rau lwm tus.

Kuj saib Dieter F. Uchtdorf, “Tsis Txhob Ntshai, Cia li Ntseeg Xwb,” Liyahaunas, Kaum Ib Hlis Ntuj 2015, 76–79.

Dhau los ntawm kev tshwm sim, Daniyees pom Nenpukajnexales txoj kev ua npau suav tau qhia txog tej nceeg vaj thaum yav tom ntej, thiab Vajtswv lub nceeg vaj, uas “yuav nyob mus tsis paub kawg li” (Daniyees 2:44). Txwj Laug D. Todd Christofferson qhia hais tias, “Lub Koom Txoos yog lub nceeg vaj hauv lub caij nyoog kawg uas tsis yog tib neeg tsim, tiam sis yog Vajtswv saum ntuj ceeb tsheej tsa thiab muab dov mus zoo li yog lub pob zeb uas muab txam tawm saum lub roob los uas tsis yog neeg txam kom txog thaum puv tag nrho lub ntiaj teb” (“Vim Li Cas Muaj lub Koom Txoos,” Liyahaunas, Kaum Ib Hlis Ntuj 2015, 111). Cia li xav txog Vajtswv lub nceeg vaj hauv hnub nyoog kawg thaum koj nyeem tej lus piav txog lub pob zeb nyob hauv Daniyees 2:34–35, 44–45. Koj lub luag hauj lwm pab kom muaj raws li tej lus qhia txog tej yam uas yuav muaj los yav tom ntej yog dab tsi?

Kuj saib “Mloog Nej Txhua Haiv Neeg!,” Cov Nkauj Qhuas Vajtswv, zaj 121; “God Gave Them Knowledge” (vidi-aus), ChurchofJesusChrist.org.

13:49

Thaum koj nyeem Daniyees 2:1–15, xav seb koj yuav xav li cas yog koj yog Daniyees. Daniyees tau ua dab tsi? (saib Daniyees 2:16–18). Koj kawm dab tsi los ntawm Daniyees 1:17 txog qhov uas Vajtswv tau npaj Daniyees li cas? Koj kawm dab tsi los ntawm Daniyees tej lus thiab tej nws ua tom qab nws txais tus Tswv txoj kev pab? (saib Daniyees 2:19–30).

Thaum tus Cawm Seej ua hauj lwm hauv lub ntiaj teb no, cov Neeg Yudais feem coob xav tias “Neeg leej tub” los ntawm Daniyees 7:13 yog hais txog tus Mexiyas uas yuav los. Koj kawm dab tsi txog tus Mexiyas los ntawm Daniyees 7:13–14? (kuj saib Mauxes 6:57).

Tus Cawm Seej pheej hais tias Nws yog “neeg leej tub.” Xav seb puas nyeem txog tej nqe txog qhov no: Mathais 25:31; Malakaus 9:31; 10:45. Nws qhi dab tsi txog Nws tus kheej nyob hauv tej nqe no? Nyob hauv Malakaus 14:61–64, Yexus tau siv lub npe no thaum txog hnub kawg ntawm Nws lub neej uas txawj tuag hauv lub ntiaj teb. Cia li xav seb cov neeg uas hnov Nws hais li no tau ua li cas. Daniyees txoj kev qhia txog Neeg Leej Tub ua rau koj xav li cas txog tej yam uas Nws raug nyob hauv Malakaus 15?

Ib yam li muaj neeg ntxub Yexus vim Nws hais tias Nws yog “neeg leej tub,” tej zaum koj kuj yuav raug tsim txom vim koj hais lus tseeb. Muab tej lus qhia txog yav tom ntej nyob hauv Daniyees 7:13–14 piv rau tej lus cog tseg nyob hauv Lus Qhuab Qhia thiab Kev Khi Lus 121:29, 46.

Kuj saib Lus Qhuab Qhia thiab Kev Khi Lus 49:6; Phau Qhia txog Vaj Lug Kub, “Neeg Leej Tub,” Txoj Moo Zoo cov Ntawv.

• Kom pab koj cov me nyuam kawm los ntawm tej zaj dab neeg zoo nyob hauv phau Daniyees, tej zaum koj yuav xav nrhiav tej daim duab txog tej yam uas muaj nyob hauv Daniyees 1, 3, thiab 6 (saib phab ntawv ntxim ua rau lub lim tiam no los sis Phau Muaj Duab txog Txoj Moo Zoo, najnpawb 23, 25, 26). Ces koj tso tau tej daim duab rau lub rooj kom tsis pom daim duab thiab caw ib tug me nyuam muab ntxeev thiab piav txog zaj dab neeg ntawd. (Yog xav tau kev pab, saib “Daniyees thiab Nws cov Phooj Ywg,” “Sadalas, Mesakas, thiab Anpenekaus,” thiab “Daniyees thiab lub Qhov Tsov” nyob hauv Tej Dab Neeg hauv Phau Qub, 154–56, 160–62, 163–65.)

  

  1:39

  

  1:39

  

  1:45

• Pab koj cov me nyuam xav txog tej lub sij hawm thaum lwm tus xav yuam lawv ua txhaum, xws li Daniyees thiab nws cov phooj ywg raug nyob hauv Daniyees 1, 3, thiab 6. Sib tham txog qhov uas nej tau koob hmoov thaum nej xaiv qhov yog tsis hais thaum nyuaj rau nej xaiv li ntawd los yog. Tej zaum nej kuj yuav xav hu ib zaj nkauj txog lub ntsiab no ua ke, xws li “Xaiv Qhov Yog” (Cov Nkauj Qhuas Vajtswv, zaj 110).

• Kev nyeem zaj dab neeg txog Daniyees thiab nws cov phooj ywg txoj kev tsis kam noj tus vaj ntxwv cov nqaij thiab haus cov cawv txiv hmab los tej zaum yuav ua rau nej xav sib tham txog txoj kev cai noj qab nyob zoo uas Leej Txiv Saum Ntuj Ceeb Tsheej tau muab rau peb niaj hnub no (saib Lus Qhuab Qhia thiab Kev Khi Lus 89). Tej zaum nej yuav xav nrhiav cov koob hmoov uas Daniyees thiab nws cov phooj ywg tau txais thiab muab piv rau cov koob hmoov uas tau cog lus rau peb nyob hauv Txoj Lus Txawj Ntse (saib Daniyees 1:15–17 and Lus Qhuab Qhia thiab Kev Khi Lus 89:18–21).

• Thaum koj nyeem Daniyees 2:31–35, 44–45 nrog koj cov me nyuam, tej zaum koj yuav xav caw lawv kos duab txog Nenpukajnexales txoj kev ua npau suav. Pab lawv to taub tias lub pob zeb hauv txoj kev ua npau suav ntawd yog ib lub cim txog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb kawm dab tsi txog lub Koom Txoos los ntawm txoj kev ua npau suav no? Tej zaum koj cov me nyuam yuav xav hais txog tej yam uas Leej Txiv Saum Ntuj Ceeb Tsheej tau ua kom tsa Nws lub Koom Txoos hauv hnub nyoog kawg no. Yog lawv xav tau kev pab, tej zaum koj yuav muab tej daim duab txog tej xwm ntawm Kev Muab lub Koom Txoos Txum Tim Rov Qab Los (saib Phau Muaj Duab txog Txoj Moo Zoo, najnpawb 90–95).

• Vim li cas Daniyees xav tias kev thov Leej Txiv Saum Ntuj Ceeb Tsheej tseem ceeb heev? Tej zaum koj thiab koj cov me nyuam yuav xav sib tham txog lo lus nug ntawd thaum nej nyeem Daniyees 6 ua ke Ces nej txhua tus hais tau vim li cas kev thov Vajtswv yog ib yam tseem ceeb rau nej. Tej zaum koj cov me nyuam yuav nyiam kos duab txog lawv tus kheej thov Vajtswv. Tej zaum koj yuav xav siv lawv tej daim duab kom qhia tias peb thov tau Leej Txiv Saum Ntuj Ceeb Tsheej txawm yog peb nyob qhov twg los sis peb xav tau dab tsi los yog.