“Kaum Ib Hlis Ntuj 23–29. ‘Cia Li Mus Cuag tus Tswv, Nej Thiaj Yuav Muaj Sia’: Amaus; Aunpadiyas; Yaunas,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Kaum Ib Hlis Ntuj 23–29. ‘Cia Li Mus Cuag tus Tswv, Nej Thiaj Yuav Muaj Sia,’” Los, Nrog Kuv Mus: Phau Qub 2026
Yaunas Nyob ntawm Ntug Dej hauv Nineves, los ntawm Daniel Lewis
Kaum Ib Hlis Ntuj 23–29: “Cia Li Mus Cuag tus Tswv, Nej Thiaj Yuav Muaj Sia”
Amaus; Aunpadiyas; Yaunas
Yaunas tab tom caij nkoj mus rau Thasis. Yeej tsis ua txhaum dab tsi caij nkoj mus rau Thasis, tiam sis twb nyob deb ntawm Nineves, uas yog qhov chaw Yaunas yuav tsum mus kom tshaj tawm Vajtswv zaj lus. Thaum lub nkoj raug cua daj cua dub hlob heev, Yaunas paub tias yog vim nws tsis mloog Vajtswv lus. Raws li Yaunas hais, cov uas nrog nws caij nkoj muab nws pov rau hauv hiav txwv kom huab cua cia li tus. Ntshe Yaunas thiab nws txoj hauj lwm qhuab qhia twb tag lawm. Tiam sis tus Tswv tsis tau tso Yaunas tseg lawm—ib yam li Nws tsis tau muab cov neeg hauv Nineves, tsev neeg Ixayees, los sis peb txhua tus tso tseg.
Yog li ntawd Nws tseem txib cov yaj saub—xws li Yaunas, Amaus, Aunpadiyas, thiab cov yaj saub niaj hnub nim no—kom lawv qhia tias yog peb hloov siab lees txim, ces yeej yuav tsis tso peb tseg mus ib txhis li. Ntawm tag nrho “tej txuj ci uas neeg tsis paub” (saib Amaus 3:7), zaj lus no yeej muaj nqis tshaj plaws: hais tias vim muaj Yexus Khetos, yeej tsis lig dhau kom hloov siab. Nws tseem xav pab peb ua raws li peb tej kev khi lus uas peb nrog Nws khi, thiab Nws txaus siab cia peb muaj ib lub sij hawm ntxiv kom ua li ntawd.
Yog xav paub ntxiv txog tej phau no, saib “Amaus,” “Aunpadiyas,” thiab “Yaunas” nyob hauv Phau Qhia txog Vaj Lug Kub
Tej Tswv Yim Pab Qhia hauv Tsev thiab lub Koom Txoos
Amaus 3:1–8; 7:10–15
Tus Tswv xub qhia qhov tseeb rau nws cov yaj saub.
Nyob hauv Amaus 3:3–6, tus yaj saub Amaus tau qhia txog tej yam uas peb kawm tau los ntawm tej lub cim uas peb hnov los sis pom: thaum ib tug tsov ntxhuav nyooj, nws yeej tom tsiaj lawm; yog ib tug noog mag ntxiab, ces nyaj muaj dab tsi ua rau tus noog xav noj. Nyob hauv nqe 7–8, Amaus tau muab qhov no piv rau cov yaj saub. Peb yuav tsum xav li cas thaum ib tug yaj saub qhia txog tej yam uas yuav muaj los yav tom ntej? Peb kawm dab tsi ntxiv txog cov yaj saub los ntawm Amaus 7:10–15?
Tus Tswv tau muab dab tsi tshwm sim rau koj dhau los ntawm Nws cov yaj saub?
Txwj Laug Ulisses Soares hais tias “txoj kev muaj cov yaj saub yog ib lub cim txog Vajtswv txoj kev hlub rau Nws cov me nyuam” (“Cov Yaj Saub Hais Lus los ntawm tus Ntsuj Plig Dawb Huv lub Hwj Chim,” Liyahaunas, Tsib Hlis Ntuj 2018, 99). Xav seb koj yuav hais li cas kom hais tej lus no tiav lawm: “Kuv paub Vajtswv hlub kuv, vim Nws txib cov yaj saub uas …” Nov yog tej nqe vaj lug kub uas pab tau: 2 Kev Cai 18:18; Exekhees 3:16–17; Efexus 4:11–14; 1 Nifais 22:2; Lus Qhuab Qhia thiab Kev Khi Lus 21:4–6; 84:36–38; 107:91–92.
Koj yuav hais li cas rau ib tug neeg uas xav tias tsis tas muaj cov yaj saub niaj hnub nim no?
Kuj saib Tej Ntsiab Lus thiab tej Lus Nug, “Yaj Saub,” Txoj Moo Zoo cov Ntawv.
Amaus 4–5
“Cia li mus cuag tus Tswv, nej thiaj yuav muaj sia.”
Raws li Amaus 4:6–13 hais, tus Tswv cia siab tias yuav muaj dab tsi tshwm sim tom qab cov Neeg Ixayees raug tej kev sim siab? (kuj saib Hilamas 12:3). Txawm yog Vajtswv tsis tau xa koj tej kev sim siab los, yog li cas tej ntawd thiaj li ua rau koj muaj cib fim tig mus rau Nws?
Thaum koj nyeem Amaus 5:4, 14–15, cia li xav seb tus Tswv tau ua li cas kom ua siab dawb siab zoo rau koj. Ua li cas koj txoj kev mus cuag Nws tau ua rau koj muaj sia?
Amaus 8:11–12
Tus Tswv txoj lus yeej pab yus sab ntsuj plig tau noj tau haus.
Thaum koj nyeem Amaus 8:11–12, cia li xav seb vim li cas kev tshaib nqhis yeej yog ib yam piv txwv zoo rau kev ua neej thaum tsis muaj Vajtswv txoj lus (kuj saib Yauhas 6:26–35; 2 Nifais 9:50–51; 32:3; Enos 1:4–8). Koj ua li cas thiaj li paub tias koj sab ntsuj plig tshaib thiab nqhis?
Tej zaum tej nqe no yuav piav txog Kev Tso Qhov Tseeb Tseg Loj Heev (saib Tej Ntsiab Lus thiab tej Lus Nug, “Tso Qhov Tseeb Tseg,” Txoj Moo Zoo cov Ntawv). Txoj kev tshaib ntawm sab ntsuj plig ntawd tau ua li cas rau Vajtswv cov me nyuam? Kev Muab Txoj Moo Zoo Txum Tim Rov Qab Los tau ua li cas pab koj sab ntsuj plig tau noj tau haus?
Kuj saib “The Great Apostasy” (vidi-aus), Txoj Moo Zoo cov Ntawv.
The Great Apostasy
Aunpadiyas 1:21
Leej twg yog cov cawm seej saum lub roob Xi-oos?
Hais txog Aunpadiyas 1:21, Thawj Tswj Hwm Gordon B. Hinckley tau piav tias peb los ua cov cawm seej saum lub Roob Xi-oos thaum peb txais cov kab ke sawv cev rau cov tuag hauv lub tuam tsev (saib “Closing Remarks,” Liyahaunas, Kaum Ib Hlis Ntuj 2004, 105). Yog li cas txoj hauj lwm ntawd zoo li qhov uas tus Cawm Seej tau ua rau peb—txawm yog peb ua ib qho me me xwb los yog? Qhov uas koj ua txoj hauj lwm no tau pab koj li cas kom muab siab npuab tus Cawm Seej?
Kuj saib “Holy Temples on Mount Zion,” Hymns, zaj 289.
Yaunas 1–4
Tus Tswv muaj siab hlub tshua txhua tus uas rov qab los cuag Nws.
Cov neeg Nineves yog Ixayees cov yeeb ncuab vim lawv tsim kev kub ntxhov thiab ua lim hiam. Nyaj Yaunas xav tias lawv tsis tau npaj siab kom hloov siab lees txim. Tej zaum yuav tsim nyog muab Yaunas tus cwj pwm (saib Yaunas 1; 3–4) piv rau Amas thiab Mauxiyas cov tub (saib Mauxiyas 28:1–5; Amas 17:23–25). Koj kawm dab tsi los ntawm Yaunas 3 uas tshoov koj lub siab kom xav qhia txoj moo zoo rau cov neeg uas yus xav tias lawv tsis tau npaj hloov siab?
Thaum koj nyeem phau Yaunas, cia li nrhiav tej lub sij hawm uas tus Tswv qhia txog Nws txoj kev hlub tshua. Koj xav tias yog vim li cas Yaunas “tsis txaus siab” thiab “chim kawg” (Yaunas 4:1) thaum tus Tswv hlub tshua cov neeg hauv Nineves? Koj xav tias tus Tswv sim qhia dab tsi rau nws nyob hauv tshooj 4? Xav seb thaum twg koj tau paub txog Nws txoj kev hlub tshua hauv koj lub neej. Koj kawm dab tsi los ntawm Yaunas uas pab tau koj hlub tshua neeg ntxiv?
Tej Tswv Yim Pab Qhia cov Me Nyuam
Vim hnub Sunday no yog hnub Sunday thib tsib rau lub hli no, xav kom cov xib hwb hauv lub Koom Haum Me Nyuam Yaus siv tej yam ntxim kawm uas nyob hauv “Ntaub Ntawv Ntxiv Tom Kawg B: Npaj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej.”
Amaus 3:7
Cov yaj saub yog Yexus Khetos cov tub xa xov.
-
Kom pab koj cov me nyuam to taub Amaus 3:7, tej zaum koj yuav xav ntxhi lus txog ib zaj lus yooj yim rau ib tug ces hais kom nws qhia zaj ntawd rau lwm tus me nyuam. Yog li cas tus tub xa xov no zoo li ib tug yaj saub? Vim li cas tus Tswv muab cov yaj saub rau peb?
-
Kom kawm ntxiv txog tej yam uas cov yaj saub ua, tej zaum koj thiab koj cov me nyuam yuav xav rov qab nyeem tej zej lus los ntawm lub Koom Txoos tus Thawj Tswj Hwm tam sim no. Tej zaum nej kuj yuav xav hu ib zaj nkauj xws li “Follow the Prophet” (Children’s Songbook, 110–11). Sib tham txog qhov uas vim li cas nej xaiv ua raws li Vajtswv tus yaj saub qhia.
Pab cov me nyuam cim ntsoov cov vaj lug kub. Txwj Laug Richard G. Scott qhia tias: “Kev cim ntsoov ib nqe vaj lug kub zoo li kev ua phooj ywg tshiab. Zoo li yus nrhiav tau ib tug uas pab thaum twg xav tau, tshoov thiab nplij yus lub siab, thiab yog lub hauv paus uas txhawb yus lub siab thaum twg yus yuav tsum hloov” (“The Power of Scripture,” Ensign, Kaum Ib Hlis Ntuj 2011, 6). Kom pab koj cov me nyuam cim ntsoov ib feem los sis tag nrho Amaus 3:7, tej zaum koj yuav xav sau ntawv thiab hais nqe ntawd ua ke. Ces koj muab ob peb lo lus tshem los sis muab npog mus txog thaum koj cov me nyuam txawj hais tag nrho nqe ntawd.
Amaus 8:11–12
Kev Muab Txoj Moo Zoo Txum Tim Rov Qab Los ua rau lub sij hawm tso qhov tseeb tseg tag lawm.
-
Caw koj cov me nyuam ua yeeb yam zoo li lawv tshaib plab Amaus 8:11–12. Zoo li cas thaum peb xav tau Vajtswv txoj lus npaum li peb tshaib plab heev? Tej zaum koj cov me nyuam yuav xav ua yeeb yam tias lawv noj mov thaum nej sib tham txog tej nqe vaj lug kub uas nej nyiam tshaj.
-
Koj siv tau Phau Qhia txog Vaj Lug Kub, “Tso Qhov Tseeb Tseg” (Txoj Moo Zoo cov Ntawv), los sis “Tom Qab Phau Tshiab” (nyob hauv Tej Dab Neeg hauv Phau Qub, 167–70) kom pab koj cov me nyuam to taub txog “kev tshaib nqhis” uas los ntawm Kev Tso Qhov Tseeb Tseg Loj Heev thiab qhov ntawd twb tag lawm thaum muaj Kev Muab Txoj Moo Zoo Txum Tim Rov Qab Los Sib tham txog tej yam uas ua rau nej ris tus Tswv txiaj vim Nws tau muab Nws txoj moo zoo txum tim rov qab los hauv peb lub caij nyoog.
2:52After the New Testament
Yaunas 1–3
Tus Tswv yuav pab kuv ua raws li Nws hais, txawm yog yuav tsum ua tej yam nyuaj los yog.
-
Kom pab koj cov me nyuam kawm zaj dab neeg txog Yaunas, tej zaum koj yuav xav nyeem “Yaunas uas Yog tus Yaj Saub” nyob hauv Tej Dab Neeg hauv Phau Qub; kuj saib phab ntawv ntxim ua rau lub lim tiam no). Ces koj nug tau:
-
Yaunas raug dab tsi thaum nws tsis mloog tus Tswv lus? (saib Yaunas 1:4–17).
-
Yaunas tau ua dab tsi kom hloov siab lees txim? (saib Yaunas 1:10–12; 2:1–4, 9; 3:1–4).
-
Muaj li cas thaum Yaunas mloog Vajtswv lus? (saib Yaunas 3:5).
2:30Jonah the Prophet
-
-
Tej zaum koj cov me nyuam yuav nyiam hais zaj dab neeg txog Yaunas los sis ua yeeb yam txog qhov no. Sib tham txog tej lub sij hawm uas tus Tswv xav kom nej ua dab tsi uas nyuaj rau nej. Nws tau ua li cas kom pab nej mloog Nws lus?
Yaunas 1–4
Tus Tswv muaj siab hlub tshua txhua tus uas rov qab los cuag Nws.
-
Tej zaum koj cov me nyuam yuav xav ua yeeb yam zoo li lawv xam phaj Yaunas txog nws lub neej. Lawv yuav nug dab tsi? Hais kom lawv nug tej lus kom paub tias Yaunas kawm dab tsi txog tus Tswv. Yaunas yuav hais li cas txog tus Tswv txoj kev tshav ntuj? (saib, ua piv txwv, Yaunas 2:7–10; 3:10; 4:2).
Khetos thiab tus Txiv Neej Tuag Tes Tuag Taw, los ntawm J. Kirk Richards
-
Pab koj cov me nyuam xav txog tej lub sij hawm thaum tus Cawm Seej muab kev siab hlub rau lwm tus, xws li Malakaus 2:3–12; Lukas 23:33–34; and Yauhas 8:1–11. Tej zaum koj thiab koj cov me nyuam yuav xav nrhiav tej daim duab txog tej yam no. Peb muaj cib fim dab tsi kom muaj siab hlub tshua lwm tus?
Yog xav tau ntxiv, saib phau xov xwm Phooj Ywg rau lub hli no.