“Kaum Ib Hlis Ntuj 30–Kaum Ob Hlis Ntuj 6. ‘Nws Txaus Siab Hlo Hlub Peb’: Mikhas; Nahus; Hanpakus; Xefaniyas,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Kaum Ib Hlis Ntuj 30–Kaum Ob Hlis Ntuj 6. ‘Nws Txaus Siab Hlo Hlub Peb,’” Los, Nrog Kuv Mus: Phau Qub 2026
Thaum Chiv Keeb Twb Muaj Txoj Lus, los ntawm Eva Timothy
Kaum Ib Hlis Ntuj 30–Kaum Ob Hlis Ntuj 6: “Nws Txaus Siab Hlo Hlub Peb”
Mikhas; Nahus; Hanpakus; Xefaniyas
Kev nyeem Phau Qub feem ntau yog kev nyeem txog cov yaj saub tej lus txog kev raug puas tsuaj. Tus Tswv pheej hu cov yaj saub ceeb toom cov neeg phem txog Nws tej kev txiav txim. Mikhas, Nahus, Hanpakus, thiab Xefaniyas tej hauj lwm qhuab qhia yeej ua piv txwv txog qhov no. Cov yaj saub no tau qhia tej xwm txheej phem uas yuav raug tej nroog uas, thaum lub sij hawm ntawd, tib neeg xav tias muaj zog thiab muaj hwj chim: Nineves, Npanpiloos, thiab Yeluxalees. Tiam sis twb yog li ntawd ntau txhiab xyoo tas los. Vim li cas kev nyeem tej lus qhia txog yav tom ntej no muaj nqis rau peb niaj hnub nim no?
Txawm yog tej nroog uas muaj neeg muab hlob thiab phem raug puas tsuaj lawm los, tseem muaj kev phem thiab kev muab hlob niaj hnub no. Tej zaum peb yuav pom tias muaj tej no hauv peb lub siab me ntsis thiab. Cov yaj saub hauv Phau Qub tau qhia tias peb yuav ua li cas kom tig ntawm tej kev phem no mus. Tej zaum yog vim li no peb tseem nyeem lawv tej lus niaj hnub no. Lawv tsis yog cov yaj saub uas hais lus txiav txim xwb—lawv yog cov yaj saub uas hais lus txog kev txhiv dim thiab. Nrog lawv tej lus qhia tias tib neeg yuav raug puas tsuaj lawv kuj caw los cuag Khetos thiab txais Nws txoj kev zam txim. Ib yam li Mikhas hais tias, tus Tswv tsis zoo siab rau txim rau peb, tiam sis “nws txaus siab hlo hlub peb” (Mikhas 7:18). Nov yog tus Tswv txoj kev puag thaum ub, thiab yeej yog Nws txoj kev niaj hnub no thiab. “Nws tej kev kav mus ib txhis li” (Hanpakus 3:6).
Yog xav nyeem tej zaj lus piav txog tej phau no, saib “Mikhas,” “Nahus,” “Hanpakus,” thiab “Xefaniyas” nyob hauv Phau Qhia txog Vaj Lug Kub
Tej Tswv Yim Pab Qhia hauv Tsev thiab lub Koom Txoos
Mikhas 6:1–8
“Tej uas [tus Tswv] xav kom peb ua yog li [cas]?”
Mikhas caw peb xav seb yuav zoo li cas thaum peb “mus pe hawm tus Tswv uas yog Vajtswv tus uas kav saum qaum ntuj” (Mikhas 6:6). Nqe 6–8 qhia dab tsi rau koj txog qhov uas tus Tswv xav tias tej yam twg tseem ceeb rau Nws thaum Nws txiav txim rau koj lub neej?
Kuj saib Dale G. Renlund, “Ua Ncaj, Hlub Tshua, thiab Txo Hwj Chim rau Vajtswv,” Liyahaunas, Kaum Ib Hlis Ntuj 2020, 109–12.
“Tus Tswv yog tus uas zoo; nws tsom kwm nws haiv neeg thaum muaj kev kub ntxhov” (Nahus 1:7).
Nahus 1
Tus Tswv muaj hwj chim thiab muaj kev hlub tshua.
Nahus ntiag tug hauj lwm yog qhia tias Nineves—lub tuam nroog ntawm teb chaws Axilias—yuav raug puas tsuaj—vim lawv tau ua rau Ixayees tawg ri niab thiab tsim txom Yudas. Nahus piav txog Vajtswv txoj kev chim npau taws thiab lub hwj chim uas tsis paub kawg, tiam sis Nws kuj hais txog Vajtswv txoj kev hlub tshua thiab txoj kev zoo. Cia li nrhiav tej nqe nyob hauv tshooj 1 uas pab koj to taub tias txhua tus cwj pwm no—thiab lwm tus cwj pwm ntawm Vajtswv uas koj pom tau. Vim li cas koj xav tias peb yuav tsum paub tej yam no txog tus Tswv?
Hanpakus
Kuv tso siab tau rau tus Tswv lub siab nyiam thiab Nws lub sij hawm.
Tej lub sij hawm cov yaj suab muaj tej lus nug txog tus Tswv tej kev. Hanpakus, uas nyob hauv ib lub caij nyoog thaum cov neeg hauv Yudas ua phem ntau, pib sau tej lus nug rau tus Tswv (saib Hanpakus 1:1–4). Koj yuav piav dab tsi txog tej yam uas Hanpakus txhawj txog? Tib neeg niaj hnub no nug Vajtswv txog tej yam twg uas zoo ib yam? Koj puas tau xav li no? Tej zaum koj kuj yuav xav muab nws tej lus nug thiab lwm tej lo lus nug hauv vaj lug kub, xws li tej nqe uas nyob hauv Malakaus 4:37–38 thiab Lus Qhuab Qhia thiab Kev Khi Lus 121:1–6.
Tus Tswv teb Hanpakus tej lus nug thaum Nws hais tias Nws yuav txib cov Neeg Khadees (cov Neeg Npanpiloos) mus txiav txim rau Yudas (saib Hanpakus 1:5–11). Tiam sis Hanpakus tseem txhawj heev, vim tias nws xav tias tsis ncaj yog tus Tswv nyob ntsiag to thaum “cov neeg phem [Npanpiloos] tuaj muab cov neeg uas ncaj ncees [Yudas] tua pov tseg tas lawm” (saib nqe 12–17). Koj nrhiav dab tsi nyob hauv Hanpakus 2:1–4 uas ua rau koj xav tso siab tus Tswv thaum koj muaj tej lus nug uas koj tsis paub teb? (kuj saib Malakaus 4:39–40; Lus Qhuab Qhia thiab Kev Khi Lus 121:7–8; “God Will Lift Us Up” [vidi-aus], Txoj Moo Zoo cov Ntawv).
God Will Lift Us Up
Tshooj 3 yog Hanpakus txoj kev qhuas Vajtswv thiab thov Vajtswv nrog kev ntseeg. Yog li cas tej yam uas Hanpakus hais nyob hauv tshooj 3 txawv ntawm tshooj 1? Nov yog ib lub tswv yim kom pab koj xav txog nqe 17–19: Cia li sau ntawv txog cov koob hmoov ntawm sab cev nqaij daim tawv thiab sab ntsuj plig uas Vajtswv tau foom pub rau koj. Ces cia li xav seb yuav zoo li cas yog cov koob hmoov ntawm sab cev nqaij daim tawv twb ploj mus. Yuav ua rau koj xav li cas txog lwm cov koob hmoov? Vim li cas yuav nyuaj rau koj “zoo siab rau tej uas tus Tswv twb ua rau [koj]” (nqe 18) thaum koj raug tej yam nyuaj raws li hais nyob hauv nqe 17? Cia li xav seb koj yuav ua li cas kom muaj kev ntseeg Vajtswv ntxiv, tsis hais thaum koj xav tias koj lub neej raug tej yam tsis ncaj.
Kuj saib Gerrit W. Gong, “Txhua Yam Yuav Zoo rau Peb,” Liyahaunas, Tsib Hlis Ntuj 2024, 41–44; “Lub Teeb, Thov Coj Kuv Kev,” Cov Nkauj Qhuas Vajtswv, zaj 35; Tej Ntsiab Lus thiab tej Lus Nug, “Nrhiav Kev Teb Lus Nug,” Txoj Moo Zoo cov Ntawv.
Ua siab ntev. Tej lub sij hawm peb xav tau tej lus teb rau peb tej lus nug tam sim no, tiam sis yuav tsum siv sij hawm thiab yuam tsis tau kom txais tej kev tshoov siab ntawm sab ntsuj plig. Ib yam li tus Tswv qhia Hanpakus, “Ua siab ntev tos; tej ntawd yuav muaj los tiag” (Hanpakus 2:3).
Xefaniyas
“Cov neeg uas txo hwj chim nyob hauv lub teb chaws no, … nej txhua tus cia li tig los cuag tus Tswv.”
Thaum koj nyeem Xefaniyas tej lus, cia li xav txog tib neeg tej cwj pwm thiab yeeb yam uas ua rau lawv raug puas tsuaj—qhov tseem ceeb saib Xefaniyas 1:4–6, 12; 2:8, 10, 15; 3:1–4. Ces nrhiav tej cwj pwm ntawm cov neeg uas Vajtswv yuav muab tshwj tseg cia—saib Xefaniyas 2:1–3; 3:12–13, 18–19. Koj xav tias tus Tswv xav qhia dab tsi rau koj los ntawm tej nqe vaj lug kub no?
Xefaniyas 3:14–20
Tus Tswv yuav nrog Nws haiv neeg hauv Xi-oos muaj kev zoo siab.
Tom qab koj nyeem Xefaniyas 3:14–20, sim seb koj txawj sau ntawv ntau npaum li cas kom sau kab lus no kawg: “Cia li zoo siab kom kawg koj lub siab lub ntsws” vim …Vim li cas yuav tsum paub tej no uas ua rau koj zoo siab? Tej zaum koj yuav xav muab tej nqe no piv rau tej xwm nyob hauv 3 Nifais 17 thiab xav seb Yexus Khetos xav li cas txog Nws haiv neeg—tsis hais koj los yog.
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Mikhas 5:2
Yexus Khetos yug los hauv Npelehees.
-
Tej zaum koj cov me nyuam yuav tsis paub tias yog Mikhas tej lus uas pab cov Neeg Txawj Saib Hnub Qub nrhiav tau tus me nyuam mos liab Yexus hauv Npelehees. Thaum nej nyeem Mikhas 5:2 thiab Mathais 2:1–6, tej zaum koj cov me nyuam yuav xav ua yeeb yam txog zaj no. Ces koj nrog lawv tham tau yog vim li cas Yexus txoj kev yug los tseem ceeg heev cov yaj saub thiaj paub txog qhov no ntau xyoo ua ntej Nws yug los.
Tus Me Nyuam Dawb Huv Yug Los, los ntawm Dana Wood
Nahus 1:7
“Tus Tswv yog tus uas zoo; nws [zoo li ib qho chaw tiv thaiv rau] nws haiv neeg thaum muaj kev kub ntxhov.”
-
Tom qab koj nyeem Nahus 1:7, tej zaum koj cov me nyuam yuav xav ua los sis kos duab txog ib lub qhov chaw tiv thaiv (muaj ib daim duab nyob hauv tus txheej txheem qhia no). Vim li cas tib neeg yuav xav tau ib qho chaw tiv thaiv? Muaj dab tsi uas ua rau peb “muaj kev kub ntxhov”? Vim li cas Yexus Khetos zoo li ib qho chaw tiv thaiv rau peb?
Hanpakus 2:3
Vajtswv yeej yuav ua raws li Nws cog lus.
-
Kom pab qhia Hanpakus 2:3, tej zaum koj thiab koj cov me nyuam yuav xav sib tham txog tej yam uas zoo tom qab peb tos xwb—zoo li cov txiv uas yuav tsum siav los sis cov hmoov nplej xyaw dej uas yuav tsum muab ci. Yuav muaj li cas yog peb noj cov txiv uas tsis siav los sis cov hmoov nplej xyav dej uas ntej muab ci? Ces tej zaum nej yuav xav sib tham txog tus yaj saub Hanpakus, tus uas xav paub thaum twg tus Tswv yuav txiav kev phem hauv lub ntiaj teb. Cia li nyeem tus Tswv tej lus teb nyob hauv Hanpakus 2:3. Koj pab tau koj cov me nyuam xav txog tej yam uas Vajtswv tau cog lus. Txhua yam uas lawv hais, tej zaum nej hais tau ua ke, “Ua siab ntev tos; tej ntawd yuav muaj los tiag.”
Hanpakus 2:14
Kuv pab tau kom lub ntiaj teb tag nrho paub txog Yexus Khetos.
-
Kom qhia txog Hanpakus 2:14, tej zaum koj thiab koj cov me nyuam yuav nyiam muab ib lub hub puv cov duab los sis tej lus uas yog piv txwv yog tej yam uas Yexus ua los sis qhia. Peb yuav ua li cas kom lub ntiaj teb tag nrho paub txog tus Tswv?
-
Tej zaum koj kuj yuav xav muab ib daim duab txog lub ntiaj teb (saib Cov Ntawv Qhia Kev txog lub Koom Txoos zaj Keeb Kwm, daim 7, “Daim Qhia Kev ntawm lub Ntiaj Teb”) rau koj cov me nyuam saib. Pab lawv nrhiav qhov chaw uas lawv nyob tam sim no thiab tej qhov chaw uas cov tub txib lawv paub tau mus. Tej zaum nej yuav xav hu ib zaj nkauj txog kev qhia txoj moo zoo ua ke, xws li “We’ll Bring the World His Truth” (Children’s Songbook, 172–73). Peb yuav qhia dab tsi rau lwm tus txog Yexus Khetos?
Xefaniyas 3:14–20
Yexus Khetos zoo siab rau cov uas coj raws li Nws.
-
Nyob hauv Xefaniyas 3:14–20, tej zaum koj cov me nyuam yuav xav nrhiav ib yam dab tsi uas ua rau lawv xav “cia li hu nkauj, … [thiab] zoo siab kom kawg [lawv] lub siab lub ntsws.” Tej zaum nej yuav xav hu tej zaj nkauj qhuas Vajtswv los sis tej zaj nkauj zoo siab thiab sib tham txog txoj kev xyiv fab uas muaj nyob hauv Yexus Khetos txoj moo zoo.
Yog xav tau ntxiv, saib phau xov xwm Phooj Ywg rau lub hli no.