Los, Nrog Kuv Mus
Kaum Ob Hlis Ntuj 21–27. “Peb Tso Siab Plhuav rau Nws, thiab Nws Tau Cawm Peb Txoj Sia”: Christmas

“Kaum Ob Hlis Ntuj 21–27. ‘Peb Tso Siab Plhuav rau Nws, thiab Nws Tau Cawm Peb Txoj Sia’: Christmas,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Kaum Ob Hlis Ntuj 21–27. ‘Peb Tso Siab Plhuav rau Nws, thiab Nws Tau Cawm Peb Txoj Sia,’” Los, Nrog Kuv Mus: Phau Qub 2026

tus me nyuam mos liab Yexus pw tsaug zog

Vim Ib tug Me Nyuam Yuav Yug Los rau Peb, los ntawm Simon Dewey

Kaum Ob Hlis Ntuj 21–27: “Peb Tso Siab Plhuav rau Nws, thiab Nws Tau Cawm Peb Txoj Sia”

Christmas

Phau Qub qhia txog tej yam uas tib neeg tos ntsoov. Yeej zoo li lub caij Christmas me ntsis. Txij thaum Adas thiab Evas los, cov yawg suab, cov yaj saub, cov kws sau paj lug, thiab cov neeg hauv Phau Qub twb tos ntsoov rau tej hnub zoo thaum yav tom ntej, muaj kev cia siab tias tus Mexiyas yuav los cawm lawv dim. Thiab cov Neeg Ixayees pheej yuav tsum cia siab li ntawd—thaum lawv ua qhev rau luag nyob hauv Iyiv Teb los sis Npanpiloos los sis lawv txoj kev txhaum los sis kev ntxeev siab ua rau lawv raug ntes. Txhua zaus, cov yaj saub qhia lawv tias ib tug Mexiyas, ib tug Txhiv Dim, yuav los “qhia txoj kev dim rau cov neeg uas raug luag ntes” (Yaxayas 61:1).

Pib muaj raws li lawv txoj kev cia siab thaum Yexus Khetos yug los hauv Npelehees. Tus uas yuav Txhiv Ixayees Dim tau yug los hauv ib lub nkuaj thiab twb muab Nws tso pw hauv ib lub dab nyuj (saib Lukas 2:7). Tiam sis tsis yog Nws yuav muab cov Neeg Ixayees puag thaum ub txhiv dim xwb. Nws tau los cawm nej dim thiab—ris nej tej kev txom nyem, ris tej kev mob kev nkeeg, vim nej tej kev txhaum nws thiaj raug ntaus nqaij ntuag ntshav nrog, Nws raug nplawm twb yog kho kom nej zoo (saib Yaxayas 53:4–5). Yog vim li no muaj tib neeg uas zoo siab tos ntsoov Christmas niaj hnub no thiab. Tus Mexiyas tau los 2,000 xyoo tas los, thiab Nws tseem los cuag peb thaum peb nrhiav Nws.

lub cim rau txoj kev kawm

Tej Tswv Yim Pab Qhia hauv Tsev thiab lub Koom Txoos

lub cim txog seminary
Kuv zoo siab vim muaj kuv tus Txhiv Dim.

Christmas yog ib lub caij zoo siab vim Yexus Khetos ua rau neeg ntiaj teb muaj kev xyiv fab. Ntau xyoo ua ntej tus Cawm Seej yug los, cov yaj saub hauv Phau Qub kuj muaj kev xyiv fab thaum lawv hais txog tus Mexiyas uas yuav los. Cia li nyeem tej nqe vaj lug kub no, thiab xav seb yog vim li cas tej lus no muaj nqis heev rau tib neeg uas tos ntsoov tus Cawm Seej ntiag tug hauj lwm: Phau Ntawv Nkauj 35:9; Yaxayas 25:8–9; 44:21–24; 51:11; Xefaniyas 3:14–20; Mauxes 5:5–11. Vim li cas tej nqe vaj lug kub no muaj nqis rau koj? Vim li cas tej nqe vaj lug kub no ua rau neeg muaj kev xyiv fab?

Kuj saib Dallin H. Oaks, “Tej Moo Zoo Siab ntawm txoj Kev Xyiv Fab Heev” (First Presidency kev sib ntsib hawm Vajtswv hauv lub caij Christmas, Kaum Ob Hlis Ntuj 4, 2022), Txoj Moo Zoo cov Ntawv; “Ntiaj Teb Zoo Siab,” Cov Nkauj Qhuas Vajtswv, zaj 88.

ib lub hnub qub ci ntsa iab saum ntuj

Tej lub cim pab tau kuv nco ntsoov Yexus Khetos.

Ntau yam kab lig kev cai hauv lub caij Christmas muaj tej lub cim uas pab peb nco txog Yexus Khetos. Xyoo no thaum koj kawm Phau Qub, tej zaum koj nco qab txog tej lub cim txog tus Cawm Seej. Twb sau ob peb lub cim nram qab no. Xav seb puas kawm tej no thiab sau ntawv txog qhov uas tej no qhia dab tsi rau koj txog Nws.

  • Hnub Qub (Teev Npe 24:17; Mathais 2:2; Tshwm Sim 22:16).

  • Tus Tswv Yug Yaj (Phau Ntawv Nkauj 23; Lukas 15:4–7; Yauhas 10:11)

  • Me Nyuam Yaj (Chiv Keeb 22:8; Khiav Dim 12:5; 1 Petus 1:18–20).

  • Dej (Khiav Dim 17:1–6; Yelemis 2:13; Exekhees 47:1–12; Yauhas 4:7–14).

  • Pob Zeb (1 Xamuyees 2:2; 2 Xamuyees 22:2–3; Phau Ntawv Nkauj 118:22–23; Yaxayas 28:16; Efexus 2:20).

  • Ceg Ntoo (Yaxayas 11:1–2; Yelemis 23:5; 33:15).

  • Lub Teeb (Phau Ntawv Nkauj 27:1; Yaxayas 9:2; 60:19; Mikhas 7:8; Yauhas 8:12).

Koj twb nrhiav tau tej lub cim, tej zaj lus, thiab tej zaj dab neeg ntxiv uas ua tim khawv txog Yexus Khetos?

Kuj saib 2 Nifais 11:4; Mauxiyas 3:14–15; Mauxes 6:63; “Khetos tej Cim” thiab “Yexus Khetos,” nyob hauv Phau Qhia txog Vaj Lug Kub (Txoj Moo Zoo cov Ntawv).

“Nws lub npe yuav hu ua tus Zoo Kawg Nkaus.”

Yexus Khetos muaj tej lub npe ntau. Nrhiav tej lub npe hauv tej nqe no: Phau Ntawv Nkauj 23:1; 83:18; Yaxayas 7:14; 9:6; 12:2; 63:16; Amaus 4:13; Xakhaliyas 14:16; Mauxes 7:53. Koj puas txawj xav txog lwm lub npe? Tej zaum koj yuav nyiam sau Yexus Khetos tej lub npe uas koj nrhiav tau hauv tej zaj nkauj Christmas. Txhua lub npe ua rau koj xav li cas txog Nws?

Cia li xav seb puas xaiv ib lub npe ntawm tus Cawm Seej uas yuav pab koj nco txog Nws kom tas xyoo tom ntej.

Kuj saib Quentin L. Cook, “Kev Kaj Siab Lug hauv lub Caij Nyoog Nyuaj Heev,” Liyahaunas, Kaum Ib Hlis Ntuj 2021, 89–92; “Hark! The Herald Angels Sing,” Hymns, zaj 209.

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

lub cim rau cov me nyuam tshooj

Tej Tswv Yim Pab Qhia cov Me Nyuam

Phau Qub qhia kuv txog Yexus.

  • Tej zaum koj thiab koj cov me nyuam muaj tej khoom Christmas uas nej yuav xav siv kom pib sib tham txog Yexus Khetos. Tej zaum nej yuav xav sib tham txog qhov uas ib lub hnub qub, cov teeb, los sis ib qho khoom plig pab peb nco txog tus Cawm Seej. Ces tej zaum nej yuav xav nrhiav hauv tej nqe vaj lug kub no seb puas muaj dab tsi uas yog ib lub cim txog Yexus Khetos: Chiv Keeb 22:8; Teev Npe 24:17; Phau Ntawv Nkauj 23:1; 27:1. Tej zaum koj cov me nyuam yuav xav tsa ib daim duab los sis ib qho khoom uas haum txhua nqe vaj lug kub thaum lawv nyeem. Yog li cas Yexus zoo li ib tug yaj, lub hnub qub, tus neeg yug yaj, los sis ib lub teeb? Xav seb puas hu ib zaj nkauj Christmas ua ke, xws li “Stars Were Gleaming” (Children’s Songbook, 37).

  • Tej zaum koj cov me nyuam kuj yuav xav saib daim duab hauv tus txheej txheem qhia no thaum koj nyeem Yaxayas 9:6 rau lawv. Hais kom koj cov me nyuam taw tes rau tus me nyuam mos liab Yexus thaum lawv hnov lo lus “ib tug me nyuam twb los yug.” Ua tim khawv rau lawv hais tias cov yaj saub hauv Phau Qub paub tias Yexus yuav yug los.

  • Thaum koj npaj kawm Yexus Khetos lub neej hauv Phau Tshiab lwm xyoo, xav seb koj puas nrog koj cov me nyuam hais txog tej yam uas lawv kawm txog Nws xyoo no nyob hauv Phau Qub. Tej zaum koj yuav xav rov qab nyeem tej tus txheej txheem qhia hauv phau no thiab tej lus cim uas koj sau kom pab koj nco txog tej yam uas nej tau kawm. Cov me nyuam yaus yuav tau zoo yog lawv saib hauv Tej Dab Neeg hauv Phau Qub los sis saib cov duab nyob hauv Los, Nrog Kuv Mus. Peb nco txog tej lus qhia txog tej yuav muaj los yav tom ntej los sis tej zaj dab neeg twg? Peb tau kawm dab tsi txog tus Cawm Seej?

Tej kab lig kev cai Christmas pab peb nco txog Yexus Khetos.

  • Tej tsev neeg Ixayees muaj tej kab lig kev cai, xws li Kev Cai Hla Dhau thiab lwm yam kev ua koob tsheej, uas ua rau lawv muaj siab xav txog tus Tswv (saib Khiav Dim 12). Koj thiab koj cov me nyuam muaj tej kab lig kev cai twg hauv lub caij Christmas uas pab nej tsom ntsoov rau Yexus Khetos? Koj paub txog tej kab lig kev cai twg los ntawm nej tsev neeg zaj keeb kwm? Tej zaum nej yuav xav sib tham nrog koj cov me nyuam txog tej kab lig kev cai uas nej xav pib ua. Ob peb lub tswv yim yog mus pab ib tug neeg uas xav tau kev pab, xaiv ib yam uas koj yuav muab rau tus Cawm Seej, caw ib tug phooj ywg los nrog koj saib Thawj Pawg Thawj Tswj Hwm kev sib ntsib hawm Vajtswv hauv lub caij Christmas (broadcasts.ChurchofJesusChrist.org), sau ib zaj nkauj Christmas, los sis tshaj tawm ib zaj xov txog Yexus Khetos txoj kev yug los.

Nyob hauv tsev, kev kawm thiab kev ua neej yeej nyob ua ke. “Txoj moo zoo yeej tseem ceeb nyob hauv tsev. Nyob ntawd cov neeg uas nrog koj kawm txog txoj moo zoo yeej yog cov neeg uas koj yuav ua neej nyob—txhua hnub. Muaj tseeb tiag, feem ntau, kev ua neej raws li txoj moo zoo yeej yog peb txoj kev kawm txog txoj moo zoo. Yog li ntawd thaum koj kawm thiab qhia txog txoj moo zoo hauv tsev, nrhiav tej yam uas yuav pab koj tsev neeg kawm txog tej yam uas koj tsev neeg ua. Nyob hauv tsev, cia li siv zog ua raws li txoj moo zoo, tsis txhob sib tham txog txoj moo zoo xwb” (Kev Qhia Raws Li tus Cawm Seej txoj Kev, 31).

cov me nyuam roj hmab txog lub sij hawm Yexus yug

Daim duab txog Yexus txoj Kev Yug Los, los ntawm Ethan Brown

Leej Txiv Saum Ntuj Ceeb Tsheej tau muab txiaj ntsim uas yog Nws Leej Tub rau kuv los ua kuv tus Cawm Seej.

  • Koj yuav ua li cas kom pab koj cov me nyuam muaj kev zoo siab txog Yexus Khetos txoj kev yug los? Tej zaum nej yuav xav saib qhov vidi-aus “The Christ Child” (Txoj Moo Zoo cov Ntawv) los sis nyeem Mathais 1:18–25; 2:1–12; Lukas 1:26–38; 2:1–20 ua ke. Txhua tus me nyuam xaiv tau ib tug neeg los ntawm qhov vidi-aus los sis zaj dab neeg hauv vaj lug kub thiab qhia tias tus neeg ntawd xav li cas txog tus Cawm Seej. Ces nej txhua tus qhia tau hais tias nej xav li cas txog Nws.

    17:57

    The Christ Child

  • Tej zaum koj thiab koj cov me nyuam yuav nyiam sib tham txog tej khoom plig uas nej muab rau lwm tus los sis txais uas ua rau nej muaj kev xyiv fab. Ces nej nyeem tau Yaxayas 25:9 ua ke thiab sib tham vim li cas nej zoo siab uas Leej Txiv Saum Ntuj Ceeb Tsheej tau txib ib tug Cawm Seej los rau peb. Kom pab koj cov me nyuam to taub zoo duab txog Yexus Khetos lub luag hauj lwm ua peb tus Cawm Seej, caw lawv nyeem Yaxayas 25:8–9; 53:3–5; thiab Hauxeyas 13:14. Tej nqe no qhia dab tsi rau peb txog tus Tswv ua li cas kom cawm peb dim?

  • Tej zaum nej kuj yuav xav hu ib zaj nkauj Christmas ua ke, xws li “Nyob hauv Ib lub Dab Nyuj” (Cov Nkauj Qhuas Vajtswv, 92) or “Auj lub Me Zej Zos Npelehees” (Cov Nkauj Qhuas Vajtswv, zaj 94). Pab koj cov me nyuam nrhiav tej lus hauv zaj nkauj uas pab lawv paub tias Leej Txiv Saum Ntuj Ceeb Tsheej thiab Yexus Khetos hlub lawv.

Yog xav tau ntxiv, saib phau xov xwm Phooj Ywg rau lub hli no.

cov me nyuam roj hmab txog lub sij hawm Yexus yug

Yexus txoj Kev Yus Log, los ntawm N. C. Wyeth

Lub Koom Haum Me Nyuam Yaus phab ntawv ntxim ua: Phau Qub qhia kuv txog Yexus.