Hakais 1–2; Xakhaliyas 1–4; 7–14

Twb muaj ntau yam tseem ceeb uas yuav tsum ua kom tsa Yeluxalees. Tiam sis kws yees li 15 xyoos tom qab cov Neeg Ixayees tau rov qab los lawm, tus Tswv tsis zoo siab uas lawv tsis tau tsom ntsoov rau kev rov qab ua lub tuam tsev (saib Hakais 1:2–5; kuj saib Exalas 4:24). Thaum koj nyeem Hakais 1; 2:1–9, cia li xav txog tej lus nug zoo li no:

• Cov Neeg Ixayees tau raug dab tsi vim lawv tsis tau ua lub tuam tsev tiav lawm?

• Tus Tswv tau cog lus tias lawv yuav txais cov koob hmoov twg yog lawv ua Nws lub tsev tiav?

• Tus Tswv xav qhia dab tsi rau koj nyob hauv Hakais 1:5–7? Koj yuav ua li cas kom koj muaj tej lub hom phiaj raws li tus Tswv tej lub hom phiaj? Thaum twg koj tau koob hmoov vim koj xub ua raws li tus Tswv lub siab nyiam hauv koj lub neej?

Haiv Neeg Ntseeg hauv Hnub Nyoog Kawg tau raug tej xwm txheej zoo ib yam li cov Neeg Ixayees nyob hauv Hakais lub caij nyoog (saib Lus Qhuab Qhia thiab Kev Khi Lus 95). Koj kawm dab tsi los ntawm ob haiv neeg no txog tus Tswv txoj kev xav txog tej lub tuam tsev?

Kuj saib Dale G. Renlund, “Yexus Khetos Yog tus uas Muaj Nqis,” Liyahaunas, Kaum Ib Hlis Ntuj 2023, 96–99; Terence M. Vinson, “Tus Cawm Seej cov Thwj Tim Tseeb,” Liyahaunas, Kaum Ib Hlis Ntuj 2019, 9–11; “We Love Thy House, O God,” Hymns, zaj 247; “Provo City Center Temple Completed” (vidi-aus), ChurchofJesusChrist.org.

7:17

Raws li koj xav mas, qhov uas muab tej lus “kev dawb huv rau tus Tswv” kos rau tej yam khoom uas siv txhua hnub xws li tej khoom nyob hauv Xakhaliyas 14:20 muaj nqis dab tsi? (kuj saib Khiav Dim 28:36–38). Vim li cas peb muab kos rau tej lub tuam tsev niaj hnub no? Cov lus no muaj lub ntsiab dab tsi rau koj? Yog li cas koj thiaj li yuav ua kom koj lub neej txhua hnub muaj kev dawb huv? Xav txog tej lus nug no thaum koj nyeem tus Tswv tej lus caw Nws haiv neeg los ua neeg dawb huv ntxiv nyob hauv Xakhaliyas 1:1–6; 3:1–7; 7:8–10; 8:16–17.

Tej zaum koj kuj yuav xav nyeem Xakhaliyas 2:10–11; 8:1–8; 14:9–11, 20–21 kom kawm tias peb lub neej yuav zoo li cas thaum txog hnub uas peb yog neeg dawb huv uas nrog tus Tswv nyob. Muaj dab tsi uas tshoov koj lub siab txog Xakhaliyas txoj kev ua yog toog pom Yeluxalees? Koj nrhiav dab tsi nyob hauv tej nqe no uas koj yuav nyiam pom hauv koj zej zog? Koj yuav ua li cas kom npaj ua neej raws li Xakhaliyas piav?

Xakhaliyas tej lus uas nws sau ntawv ib txhia hais txog Yexus Khetos txoj hauj lwm qhuab qhia hauv lub ntiaj teb thiab hais txog Nws txoj Kev Los Zaum Ob. Nyob nram qab no yog ib txhia ntawm Xakhaliyas tej lus qhia txog yav tom ntej, thiab tej nqe vaj lug kub uas hais txog lub sij hawm uas muaj raws li nws tej lus ntawd. Thaum koj kawm tej nqe vaj lug kub no, nug koj tus kheej tias: Qhov no qhia dab tsi rau kuv txog tus Cawm Seej?

• Xakhaliyas 9:9–11 (saib Mathais 21:1–11; 1 Petus 3:18–19)

• Xakhaliyas 11:12–13 (saib Mathais 26:14–16; 27:1–7)

• Xakhaliyas 12:10 (saib Yauhas 19:37; Tshwm Sim 1:7)

• Xakhaliyas 13:6–7; 14:1–9 (saib Mathais 26:31; Lus Qhuab Qhia thiab Kev Khi Lus 45:47–53)

Koj xav tias yuav zoo li cas yog nej yog cov neeg uas tos txais Yexus nkag los hauv Yeluxalees raws li piav nyob hauv Xakhaliyas 9:9–11? Koj yuav ua li cas tos txais Nws hauv koj lub neej, hauv koj tsev neeg, thiab hauv koj lub zej zog?

Kuj saib Phau Qhia txog Vaj Lug Kub, “Mexiyas,” Txoj Moo Zoo cov Ntawv; “The Lord’s Triumphal Entry into Jerusalem” (vidi-aus), Txoj Moo Zoo cov Ntawv; Ronald A. Rasband, “Hauxanas rau tus Vajtswv uas Siab Tshaj Plaws,” Liyahaunas, Tsib Hlis Ntuj 2023, 108–12.

1:22

• Thaum koj nrog koj cov me nyuam nyeem Hakais 1:2–5, pab lawv kawm hais tias yog vim li cas tus Tswv tsis zoo siab rau cov neeg. Tej zaum koj cov me nyuam yuav xav xaiv ib lo lus los ntawm nqe 6 thiab kos duab txog lo lus ntawd. Tej zaum lawv yuav xav muab rau txhua tus saib thiab twv seb lawv kos duab txog lo lus twg. Thaum peb siv sij hawm rau tej yam uas tsis yog raws li tus Tswv xav kom peb siv, ces qhov ntawd zoo li peb noj mov tiam sis tsis tsau? Tej zaum nej yuav xav sib tham txog tej yam uas nej ua tau kom muaj sij hawm ua tej yam uas tseem ceeb rau tus Tswv.

• Tej zaum koj kuj yuav xav nyeem nqe 8 rau koj cov me nyuam thiab caw lawv ua yeeb yam “mus pem roob,” “txiav ntoo,” thiab “kho lub tuam tsev [ntawm tus Tswv].” Tej zaum koj cov me nyuam yuav xav sau ntawv txog tej yam lawv ua txhua hnub, tsis hais tej yam uas tus Tswv hais kom lawv ua. Nug koj cov me nyuam seb “vim li cas lawv raug tej xwm txheej” thaum lawv kos voj voog rau tej yam uas tus Tswv yuav hais tias yog tej yam tseem ceeb tshaj plaws.

• Xakhaliyas tau ua yog toog pom ib tug pov thawj hlob uas “hnav ib cev ris tsho lo av heev” (Xakhaliyas 3:3). Ib tug tim tswv tau muab ris tsho huv rau nws hnav. Tej zaum koj pab tau koj cov me nyuam kawm tej lus tseeb tseem ceeb thaum nej nyeem Xakhaliyas 3:1–7 ua ke thiab sib tham txog qhov uas tej ris tsho lo av thiab tej ris tsho huv piv txog dab tsi. Yog li cas peb thiaj los ua neeg huv ntawm peb tej kev txhaum, tom qab peb ua kev cai raus dej? Peb txoj kev khi lus thaum ua kev cai raus dej pab peb li cas kom “coj raws li [tus Tswv] tej kev cai”?

• Tej zaum koj thiab koj cov me nyuam yuav xav saib ib daim duab txog kev cai raus dej, xws li muaj hauv tus txheej txheem qhia no. Vim li cas peb hnav ris tsho dawb thaum peb ua kev cai raus dej? Tej zaum nej yuav xav hu ib zaj nkauj txog kev cai raus dej, xws li “When I Am Baptized” (Children’s Songbook, 103); zaj nkauj qhia dab tsi rau peb txog qhov uas vim li cas tus Tswv xav kom peb ua kev cai raus dej?

• Tej zaum koj cov me nyuam yuav nyiam xav txog tej xwm txheej thaum yav tom ntej raws li qhia nyob hauv Xakhaliyas 9:9, thaum Yexus los hauv Yeluxalees lub lim tiam kawg ntawm Nws lub neej hauv lub ntiaj teb no. Kom pab ua li no, muab ib daim duab rau lawv saib, xws li daim duab hauv tus txheej txheem qhia no. Tej zaum koj kuj yuav xav qhia lawv los ntawm “Tus Cawm Seej Mus rau Yeluxalees” (nyob hauv Tej Dab Neeg hauv Phau Tshiab, 110–12). Tej zaum koj cov me nyuam yuav xav taw tes rau cov neeg hauv cov duab uas “zoo siab kawg.” Leej twg yog tus Vaj Ntxwv nyob hauv Xakhaliyas 9:9? Vim li cas peb ris Nws txiaj?

  

  1:35

• Xav seb puas pab koj cov me nyuam muab Xakhaliyas tej lus qhia txog yav tom ntej piv rau tej nqe hauv Phau Qub uas piav txog thaum muaj raws li tej lus ntawd. Nov yog tej nqe lus: Xakhaliyas 9:9 thiab Mathais 21:5–9; Xakhaliyas 9:11 thiab 1 Petus 3:18–19; Xakhaliyas 11:12 thiab Mathais 26:14–16; Xakhaliyas 13:7 thiab Mathais 26:31. Peb kawm dab tsi txog tus Cawm Seej los ntawm tej nqe no?