“Cuaj Hlis Ntuj 7–13. ‘Nws Yuav Coj Koj Taug txoj Kev’: Paj Lug 1–4; 15–16; 22; 31; Tej Lus Qhia 1–3; 11–12,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Cuaj Hlis Ntuj 7–13. ‘Nws Yuav Coj Koj Taug txoj Kev,’” Los, Nrog Kuv Mus—Siv hauv Tsev thiab lub Koom Txoos: Phau Qub 2026
Yexus nrog cov Me Nyuam Yaus, los ntawm Dilleen Marsh
Cuaj Hlis Ntuj 7–13: “Nws Yuav Coj Koj Taug txoj Kev”
Paj Lug 1–4; 15–16; 22; 31; Tej Lus Qhia 1–3; 11–12
Tej zaum koj xav tias phau Paj Lug yog ib phau ceev tswv yim los ntawm peb niam thiab txiv uas hlub peb (saib Paj Lug 1:8). Lub ntsiab ntawm phau ntawd qhia tias yog koj nrhiav tswv yim—tseem ceeb tshaj nrhiav Vajtswv tswv yim—koj lub neej yuav zoo. Tiam sis tom qab phau Paj Lug los muaj phau Tej Lus Qhia, uas zoo nkaus li hais tias, “Tsis yooj yim npaum li ntawd.” Tus Qhuab Qhia tau hais hauv Tej Lus Qhia tias “[nws] npaj siab kawm kev txawj ntse” tiam sis nws pom tias “tsuas zoo ib yam li caum cua xwb” thiab “muaj kev nyuaj siab ntau” (Tej Lus Qhia 1:17–18). Phau ntawv no nug tias, “Nyob hauv lub ntiaj teb uas zoo nkaus li txhua txhia yam tsis muaj nqis, nyob tsis ntev, thiab tsis paub tseeb los puas muaj lub ntsiab dab tsi li?”
Tiam sis, txawm ob phau ntawv ntawd muaj ob txoj kev xav, ob phau no qhia tej lus tseeb uas zoo tib yam. Tej Lus Qhia qhia tias: “Thaum kawg no yuav tsum hwm Vajtswv thiab ua raws li nws tej lus [txib], rau qhov nws tsim neeg los ua tes hauj lwm ntawd” (Tej Lus Qhia 12:13). Nov yog tib lub ntsiab cai uas nyob thoob plaws phau Paj Lug: “Tso siab rau tus Tswv kom kawg koj lub siab” (Paj Lug 3:5; kuj saib nqe 7). Peb lub neej yuav zoo dua—tej zaum tsis zoo tag nrho—thaum peb tso siab thiab ua raws li tus Tswv Yexus Khetos.
Yog xav nyeem ib zaj lus piav txog ob phau no, saib “Phau Paj Lug” thiab “Tej Lus Qhia” nyob hauv Phau Qhia txog Vaj Lug Kub.
Tej Tswv Yim Pab Qhia hauv Tsev thiab lub Koom Txoos
Paj Lug 1–4; 15–16; Tej Lus Qhia 1–3; 11–12
“Ua tib zoo mloog tus neeg txawj ntse tej lus.”
Phau ntawv Paj Lug thiab Tej Lus Qhia muaj ntau yam qhia txog laj lim tswv yim. Xav seb koj puas sau tej lus “tswv yim” thiab lwm tej lus zoo li ntawd, xws li “txawj ntse” thiab “to taub,” thaum koj nrhiav tau tej lus no nyob hauv Paj Lug 1–4; 15–16; Tej Lus Qhia 1–3; 11–12. Tej tshooj no hloov koj txoj kev xav li cas txog laj lim tswv yim? Raws li koj kawm los, koj yuav piav tias laj lim tswv yim uas “tus Tswv … pub” zoo li cas? Paj Lug 2:6. Peb tau koob hmoov zoo li cas los ntawm Vajtswv laj lim tswv yim?
Kuj saib Mathais 7:24–27; 25:1–13.
Pab cov neeg kawm qhia tias lawv kawm dab tsi. “Cia cov neeg kawm muaj cib fim qhia lwm tus txog tej yam uas lawv kawm txog tus Cawm Seej thiab Nws txoj moo zoo.” Kev ua li no yuav pab lawv ua raws li tej lus tseeb uas koj qhia lawv. Thiab kuj yuav pab lawv ua siab loj hais lus tseeb lwm lub sij hawm” (Teaching in the Savior’s Way, 26). Piv txwv hais tias, tej zaum koj yuav xav caw cov neeg kawm sau tej nqe los ntawm Paj Lug thiab Tej Lus Qhia thaum lawv tau kawm tej yam txog Vajtswv lub tswv yim. Ces caw cov neeg kawm tham txog tej yam uas lawv tau kawm.
Paj Lug 1:7; 2:5; 3:7; 15:33; 16:6; 31:30; Tej Lus Qhia 12:13
“Tsis txhob xav hais tias koj yog tus ntse tshaj: cia li hwm tus Tswv.”
Lwm lub ntsiab cai uas nyob thoob plaws Paj Lug thiab Tej Lus Qhia yog “txoj kev hwm tus Tswv.” Nrhiav lo lus no thaum koj nyeem. Koj xav hais tias kev hwm tus Tswv txhais li cas? Nrhiav tej lub tswv yim hauv Txwj Laug David A. Bednar zaj lus “Yog Li Ntawd Lawv Tau Tsum Lawv tej Kev Ntshai” (Liyahaunas, Tsib Hlis Ntuj 2015, 46–49). Yog li cas kev hwm tus Tswv txawv lwm yam kev hwm?
Kuj saib Paj Lug 8:13.
Paj Lug 3:5–7; 4
“Tso siab rau tus Tswv kom kawg koj lub siab.”
Koj yuav hais li cas rau ib tug neeg tias zoo dua rau nws “tso siab rau tus Tswv” thiab “tsis txhob cia siab rau [peb] tej kev txawj ntse”? (Paj Lug 3:5). Koj yuav siv tej khoom twg kom qhia qhov no? Thaum koj xav txog Paj Lug 3:5–7, xav txog seb koj yuav sau dab tsi kom sau tej kab lus ntawm no tas: Kev tso siab rau tus Tswv zoo li … Kev cia siab rau peb tej kev txawj ntse zoo li …
Vim li cas tsis zoo rau peb cia siab rau peb tej kev txawj ntse? Yog li cas koj tau kawm tias tsim nyog uas peb tso siab rau tus Tswv?
Txawm li ntawd los, tej zaum yuav nyuaj rau peb tso siab rau tus Tswv. Yog vim li cas? Txwj Laug Gerrit W. Gong kuj qhia vim li cas, thiab hais tej lus ntuas uas pab tau, nyob hauv “Rov Qab Tso Siab Rau” (Liyahaunas, Kaum Ib Hlis Ntuj. 2021, 97–99). Muaj dab tsi hauv tej zaj dab neeg los sis lus qhia ntawm zaj lus no uas yuav pab lwm tus rov qab tso siab rau tus Tswv?
Phau Paj Lug 3:6 thiab Paj Lug 4 muab lub neej no piv rau “ib txoj kev.” Koj xav hais tias kev cia tus Tswv “coj [koj] taug txoj kev” txhais li cas? (Paj Lug 3:6). Koj nrhiav tau dab tsi nyob hauv tshooj 4 uas pab koj “ua tib zoo xav ua ntej uas koj yuav ua ib yam dab tsi”? (nqe 26). Piv txwv hais tias, tej nqe 11–12 thiab 18–19 qhia dab tsi txog tej koob hmoov uas los thaum taug txoj kev yog? Koj xav li cas txog tej nqe 26–27 no?
Kuj saib 2 Nifais 31:18–21; “Tus Tswv, Kuv Yuav Nrog Koj Mus,” Cov Nkauj Qhuas Vajtswv, zaj. 98.
Paj Lug 15; 16:24–32
“Lus mos lus muag ua rau kev chim ploj mus.”
Tej lub tswv yim nyob hauv Paj Lug 15–16 tej zaum yuav tshoov koj lub siab kom pab koj hloov koj txoj kev sib txuas lus nrog lwm tus, qhov tseem ceeb cov uas koj hlub. Piv txwv hais tias, cias li xav txog tej lub sij hawm thaum “lus mos lus muag” tau pab “kev chim ploj mus” (Paj Lug 15:1).
Tej zaum koj yuav xav txog tej lub sij hawm thaum tus Cawm Seej tau qhia tej lus nyob hauv Paj Lug 15:1–4, 18 (saib Malakaus 12:13–17; Yauhas 8:1–11). Koj yuav ua raws li Nws tus yam ntxwv thaum koj nrog lwm tus sib tham ua ke?
Tej lus ntuas hauv Paj Lug 15; 16:24–32 muaj nqis npaum li cas rau kev sib tham digital hauv lub caij nyoog no? Saib seb koj nrhiav puas tau ib nqe hauv tej tshooj no uas koj rov qab qhia tau txog txoj kev sib tham hauv social media los sis thaum ntaus ntawv text.
Kuj saib Neil L. Andersen, “Coj Raws Li Yexus: Ua rau Neeg Nyob Sib Haum Xeeb,” Liyahaunas, Tsib Hlis Ntuj 2022, 17–20; Ronald A. Rasband, “Yus cov Lus Yeej Tseem Ceeb,” Liyahaunas, Tsib Hlis Ntuj 2024, 70–77; Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (2022), 11–12.
Leej Twg Nrhiav Tau Ib tug Poj Niam uas Zoo? II, los ntawm Louise Parker
Paj Lug 31:10–31
“Tsim nyog qhuas tus poj niam uas hwm tus Tswv.”
Paj Lug 31:10–31 qhia tias txog “ib tug poj niam uas tsim txiaj,” los sis ib tug poj niam uas nws sab ntsuj muaj zog, muaj peev xwm thiab muaj hwj huam. Tej zaum koj yuav xav sau ntsiab lus seb tej nqe no qhia dab tsi txog cov poj niam uas tsim txiaj. Koj ua raws li tej cwj pwm twg ntawm no?
Tej Lus Qhia 1–3; 12
Lub neej hauv ntiaj teb tsuas muaj ib ntu xwb.
Vim li cas tseem ceeb rau koj nco qab tias ntau yam hauv lub ntiaj teb no, xws li Tej Lus Qhia 1–2 hais, yog “tej yam tsis muaj nuj nqis” (los sis tsis kav ntev thiab ntau zaus tsis tseem ceeb)? Koj nrhiav tau dab tsi hauv Tej Lus Qhia 12 uas pab qhia tias lub neej no muaj nqis nyob mus ib txhis?
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Paj Lug 1:7; 2:5; 15:33; 16:6; Tej Lus Qhia 12:13
Kev “hwm tus Tswv” txhais tias hlub thiab ua raws li Nws hais.
-
Kom pab koj cov me nyuam to taub tej nqe vaj lug kub txog txoj kev hwm tus Tswv, koj kuj muab lo lus “hwm” pauv kom siv lo lus saib rau nqi, hlub, los sis ua raws li (kuj saib Henplais 12:28). Yog ua li no ces puas hloov peb txoj kev xav txog tej nqe no? Peb yuav ua tau dab tsi kom qhia tias peb hwm tus Tswv?
Paj Lug 3:5–7
Kuv yuav cia siab rau tus Tswv kom kawg kuv lub siab lub ntsws.
-
Tej zaum koj thiab koj cov me nyuam yuav xav ua yeeb yam txog tej yam hauv Paj Lug 3:5–7, xws li siv nej txhais tes ua ib lub plawv, sawv rau ntawm ib sab, taug kev, thiab taw tes rau nej lub qhov muag. Peb ua tau dab tsi kom qhia tias peb tso siab rau Yexus Khetos kom kawg siab?
-
Kom qhia tias “tsis txhob cia siab rau koj tej kev txawj ntse” (Paj Lug 3:5) txhais li cas, xav seb puas caw koj cov me nyuam mus ib ntawm ib yam dab tsi ruaj khov, xws li phab ntsa. Ces tej zaum lawv yuav xav ib ntawm ib yam dab tsi tsis khov, xws li ib tug khaub ruab. Los sis lawv sim muab ib tug pas los sis ib tug xaum ib rau tej yam uas ruaj khov thiab tsis ruaj khov, xws li ib phau ntawv los sis ib daim ntawv. Vim li cas kev “tso siab rau tus Tswv” (nqe 5) tseem ceeb heev thiab yuav tsum tsis txhob tso siab rau peb tej kev txawj ntse?
Kawm Tso Siab rau tus Tswv, los ntawm Kathleen Peterson
Paj Lug 15:1, 18
Kuv hais tau lus zoo rau lwm tus.
-
Tej zaum koj thiab koj cov me nyuam yuav nyiam xav txog tej lub sij hawm thaum koj los sis lawv tau chim siab. Nyeem Paj Lug 15:1 ua ke, thiab pab koj cov me nyuam siv nqe lus no rau tej lub sij hawm uas lawv xav txog. Tej zaum lawv kuj xyaum tau hais “tej lus mos lus muag.” Ib zaj nkauj hais txog kev ua siab zoo, xws li “Love Is Spoken Here” (Children’s Songbook, 190–91), pab qhia ntxiv txog lub ntsiab cai no.
-
Kom kawm tias “tsis chim sai” (Paj Lug 15:18) txhais li cas, koj thiab koj cov me nyuam qhia tau txog tej lub sij hawm thaum nej (los sis leej twg nej paub) tau chim siab tiam sis xaiv txoj kev ua siab zoo. Pab koj cov me nyuam xav txog tej yam uas peb ua sai sai yog tias peb “tsis chim sai.” Piv txwv hais tias, peb muaj peev xwm xav txog Yexus sai sai, mus thov kev pab ntawm Leej Txiv Saum Ntuj Ceeb Tsheej, xav txog zaj nkauj rau lub Koom Haum Me Nyuam Yaus, los sis, yog ua tau, taug kev mus.
Yog xav tau ntxiv, saib phau xov xwm Phooj Ywg rau lub hli no.